.jpg)
បេក្ខជនចូលរួមប្រឡងធ្វើមន្ត្រីរាជការពីខែកញ្ញា។ រូបថត ក្រសួងមហាផ្ទៃ
ភ្នំពេញៈ រាជរដ្ឋាភិបាលតាមរយៈក្រសួងមុខងារសាធារណៈកាលពីថ្ងៃពុធ បានសម្រេចផ្ដល់ផែនការក្របខ័ណ្ឌដល់គ្រប់ក្រសួង ស្ថាប័នរដ្ឋចំនួន ៣០ ដើម្បីជ្រើសរើសក្របខ័ណ្ឌមន្ដ្រីរាជការស៊ីវិលថ្មីជាង ៦ ពាន់នាក់ និងមន្ដ្រីជាប់កិច្ចសន្យាជាច្រើនម៉ឺននាក់សម្រាប់បំពេញការងារតាមកន្លែងនីមួយៗ។
លិខិតរបស់ក្រសួងមុខងារសាធារណៈស្ដីពី «ការផ្ដល់ផែនការក្របខ័ណ្ឌជូនគ្រប់ក្រសួង ស្ថាប័ន សម្រាប់ឆ្នាំ ២០២០» បានឲ្យដឹងថា រាជរដ្ឋាភិបាលបានយល់ព្រមផ្ដល់ជាគោលការណ៍ជ្រើសរើសក្របខ័ណ្ឌថ្មី មន្ត្រីរាជការស៊ីវិល ចំនួន ៦ ២១៤ កន្លែងមន្ដ្រីជាប់កិច្ចសន្យាចំនួន ១៩ ១៣៧ នាក់ និងគ្រូបង្រៀនជាប់កិច្ចសន្យាចំនួន ៩ ៨៩៦ នាក់ គ្រូបង្រៀន ២ ថ្នាក់ ២ ពេលចំនួន ១១ ៦៧១ នាក់គ្រូបង្រៀនថ្នាក់គួប ២ ចំនួន ២ ៥៩៨ នាក់ គ្រូបង្រៀនថ្នាក់គួប ៣ ចំនួន ១២០ នាក់ គ្រូបង្រៀនជាប់កិច្ចសន្យាអប់រំក្រៅប្រព័ន្ធចំនួន ២៤៧២ នាក់ និងគ្រូបង្រៀនជាប់កិច្ចសន្យាខ្មែរ-អ៊ិស្លាមចំនួន ១៧៨ នាក់ ដើម្បីផ្ដល់ជូនគ្រប់ក្រសួង ស្ថាប័ន ទាំងនៅថ្នាក់ជាតិ និងថ្នាក់ក្រោមជាតិ។
ក្រសួងបញ្ជាក់ថា ការផ្ដល់ផែនការជ្រើសរើសមន្ត្រីក្របខ័ណ្ឌថ្មី និងមន្ដ្រីជាប់កិច្ចសន្យាតាមគ្រប់បណ្ដាក្រសួង និងស្ថាប័នរដ្ឋនេះក្រោយទទួលបានចំណារយល់ព្រមពីលោកនាយករដ្ឋមន្ដ្រី ហ៊ុន សែន កាលពីថ្ងៃចន្ទទី ៩ ខែធ្នូ ឆ្នាំ ២០១៩។
ក្រសួងមុខងារសាធារណៈបានស្នើគ្រប់ក្រសួងស្ថាប័នសហការអនុវត្ដនូវគោលការណ៍មួយចំនួន ចំពោះការជ្រើសរើស និងការប្រើប្រាស់ធនធានមនុស្សឆ្នាំ ២០២០ នេះ។ ក្រសួងស្នើថា៖ «ក្រសួងស្ថាប័នត្រូវធ្វើការប្រកាសជ្រើសរើសចេញពីការប្រឡងប្រជែងក្នុងចំណោមសិស្ស-និស្សិត និងមន្ដ្រីរាជការស៊ីវិលក្នុងពេលតែមួយ និងត្រូវប្រកាសលទ្ធផលប្រឡងជាប់ជាស្ថាពរយ៉ាងយូរត្រឹមដំណាច់ខែមិថុនាឆ្នាំ ២០២០ ព្រមទាំងចាត់ចែងរៀបចំបើកផ្ដល់បៀវត្សរ៍ដល់បេក្ខជនប្រឡងជាប់ឲ្យបានយ៉ាងយូរ ១ ខែក្រោយការទទួលស្គាល់លទ្ធផលពីក្រសួងមុខងារសាធារណៈ»។
ក្រសួងមុខងារសាធារណៈបញ្ជាក់ថា៖ «នៅពេលបើកឲ្យមានការប្រឡងប្រជែង សូមមេត្ដារៀបចំជ្រើសរើសបេក្ខជនណាដែលមានលក្ខណសម្បត្ដិគ្រប់គ្រាន់ឲ្យចូលបម្រើការងារ ដើម្បីបំពេញមុខតំណែងដែលទំនេរ និងសេចក្ដីត្រូវការដែលមានពិតប្រាកដនៅតាមអង្គភាពថ្នាក់ជាតិ និងថ្នាក់ក្រោមជាតិ និងមន្ទីរអង្គភាពជំនាញរាជធានី-ខេត្ដ»។
លើសពីនេះ ក្រសួងបានជំរុញឲ្យយកចិត្តទុកដាក់ដល់បេក្ខភាពជនពិការដែលមានសមត្ថភាពសមស្រប ២ ភាគរយនៃចំនួនក្របខ័ណ្ឌសរុបរបស់សាមីក្រសួងស្ថាប័នហើយត្រូវមានបេក្ខនារីជាប់ជាស្ថាពរពី ២០ ទៅ ៥០ ភាគរយនៃចំនួនក្របខ័ណ្ឌដែលទទួលបានប្រចាំឆ្នាំ។
លោក ជុត មន្នី អនុរដ្ឋលេខាធិការ និងជាអ្នកនាំពាក្យក្រសួងមុខងារសាធារណៈថ្លែងកាលពីម្សិលមិញថា ជារៀងរាល់ឆ្នាំ រាជរដ្ឋាភិបាលបានជ្រើសរើសមន្ដ្រីក្របខ័ណ្ឌដើម្បីយកទៅបំពេញបន្ថែមចន្លោះកន្លែងការងារ ដែលមានមន្ដ្រីចូលនិវត្ដន៍។ ប៉ុន្ដែចំនួនជ្រើសរើសមន្ដ្រីចូលថ្មីនេះ គឺមិនឲ្យមានចំនួនលើសពីចំនួនមន្ដ្រីដែលធ្លាប់បានបម្រើការងារចាស់នៅតាមបណ្ដាក្រសួង ស្ថាប័ននោះទេព្រោះរាជរដ្ឋាភិបាលកំពុងកាត់បន្ថយចំនួនមន្ដ្រីជាអតិបរមា។
លោកថ្លែងថា៖ «ជារៀងរាល់ឆ្នាំរាជរដ្ឋាភិបាលបានជ្រើសរើសមន្ដ្រីក្របខ័ណ្ឌបន្ថែមនៅចន្លោះ មន្ដ្រីដែលបានចូលនិវត្ដន៍។ មានន័យថា មន្ដ្រីចូលនិវត្ដន៍មាន ៣ នាក់ យើងជ្រើសរើសចូលវិញម្នាក់ ឬ ២ នាក់ទេ ព្រោះយើងកាត់បន្ថយចំនួនជាអតិបរមាហើយ។ ចំណែកមន្ដ្រីកិច្ចសន្យា គឺយើងប្រើប្រាស់ចំនួននៅដដែលមិនឲ្យកើនទេ»។
លោក មន្នី បញ្ជាក់ថា៖ «ចំនួនមន្ដ្រីក្របខ័ណ្ឌគឺយើងត្រូវជ្រើសរើសមន្ដ្រីថ្មី ព្រោះមានមន្ដ្រីដែលបានចូលនិវត្ដន៍ ដែលត្រូវជ្រើសរើសពីសិស្ស-និស្សិតដែលត្រូវដាក់ពាក្យចូលប្រឡង។ ចំណែកមន្ដ្រីជាប់កិច្ចសន្យាក្នុង ១ ឆ្នាំក្រសួងស្ថាប័នត្រូវជ្រើសរើសម្ដង ក្នុងនោះមានមន្ដ្រីជាប់កិច្ចសន្យាចាស់ និងសិស្ស-និស្សិតថ្មីប្រឡងចូល ព្រោះក្នុងមន្ដ្រីកិច្ចសន្យានេះមានមន្ដ្រីខ្លះបានបន្ដកិច្ចសន្យា និងមន្ដ្រីខ្លះទៀត ត្រូវឈប់ទើបត្រូវជ្រើសរើសបន្ថែម។ ប៉ុន្ដែមន្ដ្រីកិច្ចសន្យាបើត្រូវបន្តគឺត្រូវដាក់ពាក្យស្នើឡើងវិញ»។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាថ្លែងកាលពីម្សិលមិញថា ជាទូទៅក្រសួងអប់រំ ជ្រើសរើសមន្ដ្រីក្របខ័ណ្ឌ និងមន្ត្រីជាប់កិច្ចសន្យាជាប្រចាំឆ្នាំ ដើម្បីឆ្លើយតបទៅនឹងតម្រូវការនៅថ្នាក់ជាតិ និងថ្នាក់ក្រោមជាតិតាមបណ្ដារាជធានី-ខេត្ដ។
លោកថ្លែងថា៖ «ចំនួនមន្ដ្រីដែលក្រសួងទទួលបានផែនការជ្រើសរើសថ្មីនេះ គឺជាចំនួនដែលត្រូវជ្រើសរើសបន្ថែម ព្រោះមានបុគ្គលិកខ្លះ ក្រោយពីចូលបម្រើការងារមួយរយៈពួកគាត់មានការផ្លាស់ប្ដូរជម្រើសអាជីពការងាររបស់ពួកគាត់លើមូលហេតុបុគ្គលផ្សេងៗគ្នា។ ដូច្នេះក្រសួងត្រូវធ្វើការជ្រើសរើសជាប្រចាំឆ្នាំដើម្បីឆ្លើយតបទៅនឹងតម្រូវការជាក់ស្ដែង»។
តាមការផ្តល់ផែនការក្របខ័ណ្ឌរបស់ក្រសួងមុខងារសាធារណៈ សម្រាប់ផែនការជ្រើសរើសមន្ដ្រីរាជការស៊ីវិលក្នុងឆ្នាំ ២០២០ នេះក្រសួងអប់រំត្រូវការជ្រើសរើសមន្ដ្រីក្របខ័ណ្ឌថ្មីបន្ថែមចំនួន ៣៦០០ នាក់ និងមន្ត្រីជាប់កិច្ចសន្យាចំនួន ៧០៤ នាក់ដើម្បីបំពេញតម្រូវការបន្ថែមកន្លែងដែលខ្វះចន្លោះ៕
