The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋាភិបាល​កាត់​បន្ថយ​រយៈ​ពេល​គម្រោង​វិនិយោគ​សម្បទាន​ដី​សេដ្ឋកិច្ច​ពី ៩៩ ​​ឆ្នាំ​មក​នៅ​ត្រឹម​ ៥០ ​ឆ្នាំ

រដ្ឋាភិបាល​កាត់​បន្ថយ​រយៈ​ពេល​គម្រោង​វិនិយោគ​សម្បទាន​ដី​សេដ្ឋកិច្ច​ពី ៩៩ ​​ឆ្នាំ​មក​នៅ​ត្រឹម​ ៥០ ​ឆ្នាំ

តំបន់​ដីសម្បទាន​មួយ​កន្លែង​នៅ​ខេត្ត​រតនគិរី​កន្លង​មក​ដែល​ឃើញ​កាប់​ឈើ​គរ​ពេញ​ព្រៃ​។
តំបន់​ដីសម្បទាន​មួយ​កន្លែង​នៅ​ខេត្ត​រតនគិរី​កន្លង​មក​ដែល​ឃើញ​កាប់​ឈើ​គរ​ពេញ​ព្រៃ​។ ហេង ជីវ័ន

រដ្ឋាភិបាល​កាត់​បន្ថយ​រយៈ​ពេល​គម្រោង​វិនិយោគ​សម្បទាន​ដី​សេដ្ឋកិច្ច​ពី ៩៩ ​​ឆ្នាំ​មក​នៅ​ត្រឹម​ ៥០ ​ឆ្នាំ

ភ្នំពេញៈ រាជរដ្ឋាភិបាល​កម្ពុជា​បាន​សម្រេច​ជា​គោលការណ៍​កាត់បន្ថយ​រយៈពេល​នៃ​ការ​អនុវត្ត​គម្រោង​វិនិយោគ​អភិវឌ្ឍន៍​សម្បទាន​ដី​សេដ្ឋកិច្ច​ទាំងអស់​មក​នៅ​ត្រឹម​យ៉ាង​យូរ ៥០ ឆ្នាំ​ទាំង​ក្នុង​ក្របខ័ណ្ឌ​ក្រសួង​បរិស្ថាន និង​ក្រសួង​កសិកម្ម​បន្ទាប់ពី​រកឃើញ​ថា​គម្រោង​ក្រុមហ៊ុន​ខ្លះ យឺតយ៉ាវ និង​ខ្លះ​មិន​ដំណើរការ​។

ការ​សម្រេច​តាមរយៈ​សេចក្តី​ប្រកាស​ព័ត៌មាន​របស់​ក្រសួង​បរិស្ថាន​ចេញ​កាលពី​ម្សិលមិញ​ត្រូវ​បាន​លោក​ ស្រ៊ុន ដារិទ្ធិ នាយ​ខុទ្ទកាល័យ​ក្រសួង​បរិស្ថាន​បញ្ជាក់​​ថា​ជា​គោលការណ៍​ថ្មី​សម្រេច​ឡើង​ដោយ​រាជរដ្ឋាភិបាល​ដោយ​ផ្អែក​តាម​ច្បាប់​មួយ​ចំនួន​ហើយ​គោលការណ៍​នេះ​នឹង​ត្រូវ​ប្រតិបត្តិ​ជា​បន្តបន្ទាប់​សម្រាប់​ទាំង​ក្រុមហ៊ុន​មុនៗ និង​ក្រុមហ៊ុន​ថ្មី​ដែល​នឹង​ទទួល​បាន​ដី​សម្បទាន​សេដ្ឋកិច្ច​នោះ។

លោក​ថា៖ «ការ​ដាំ​ដំណាំ​ខ្លះ​ដូចជា​កៅស៊ូ​ពីរ​វដ្ត​ដាំដុះ​គឺ​គ្រប់គ្រាន់​អ៊ីចឹង​យើង​មិន​ចង់​ឲ្យ​វា​យូរពេក​ក៏​ត្រូវ​កាត់បន្ថយ​មក​នៅ​ត្រឹម​យ៉ាង​យូរ ៥០ ឆ្នាំ ជា​គោលការណ៍​គឺ​នឹង​ធ្វើ​ឡើង​វិញ​ទាំងអស់ ការ​សម្រេច​មុនៗ​នោះ​គឺ​ភាគច្រើន​មិន​ទាន់​មាន​កិច្ចសន្យា​ទេ​សម្រាប់​ក្រុមហ៊ុន​ដែល​ធ្វើ​កិច្ចសន្យា​ហើយ​គឺ​​យើង​នឹង​កែសម្រួល​​វិញ​»។

តាម​សេចក្តី​ប្រកាស​ព័ត៌មាន​របស់​ក្រសួង​បរិស្ថាន​ថ្មីៗ​នេះ​រាជរដ្ឋាភិបាល​បាន​កាត់បន្ថយ​រយៈពេល​នៃ​ការ​វិនិយោគ​សម្រាប់​ក្រុមហ៊ុន ១៦ ​ដែល​ទទួល​បាន​សិទ្ធិ​វិនិយោគ​លើ​ផ្ទៃដី​សរុប ៩៦ ០៩៨ ហិកតា​ក្នុង​ខេត្ត​មណ្ឌលគិរី (៥ ​ក្រុមហ៊ុន) ខេត្ត​រតនគិរី (៤ ក្រុមហ៊ុន) និង​ខេត្ត​កំពង់ស្ពឺ (៧ ​ក្រុមហ៊ុន) ពី ៩៩ ឆ្នាំ ៨០ ឆ្នាំ និង​ ៧០ ​ឆ្នាំ​មក​នៅ​ត្រឹម​ ៥០ ​ឆ្នាំ​វិញ។

សេចក្តី​ប្រកាស​ព័ត៌មាន​បន្ត​ថា ​ក្រសួង​បរិស្ថាន​បាន​ពិនិត្យ និង​វាយ​តម្លៃ​គម្រោង​វិនិយោគ​អភិវឌ្ឍន៍​ទាំងអស់​ចំនួន​សរុប ១១៣ ដែល​មាន​ផ្ទៃដី​សរុប ៦២៨ ២៩៨,៧៥ ហិកតា​ដែល​ក្នុង​នោះ​គម្រោង​ចំនួន ៨១ ត្រូវ​ដាក់​ឆ្លង​អង្គប្រជុំ​គណៈកម្មការ​អន្តរ​ក្រសួង​ដើម្បី​ពិភាក្សា និង​លើក​សំណើ​ជូន​ប្រមុខ​រាជរដ្ឋាភិបាល​ក្នុង​ការ​ពិភាក្សា និង​លើក​សំណើ​ជូន​ប្រមុខ​រដ្ឋាភិបាល​សម្រេច​ដែល​ជា​លទ្ធផល​គម្រោង​របស់​ក្រុមហ៊ុន​ចំនួន ២៣ លើ​ផ្ទៃដី​សរុប ៩០៦៨២ ហិកតា​ត្រូវ​បាន​រាជរដ្ឋាភិបាល​សម្រេច​និរាករណ៍ (ដកហូត) សិទ្ធិ​វិនិយោគ​ក្រោយពី​រកឃើញ​ថា​ក្រុមហ៊ុន​ទាំងនោះ​មិន​បាន​គោរព​តាម​គោលការណ៍ និង​នីតិវិធី​នានា​ដែល​បាន​កំណត់​។

ចំណែក​គម្រោង ៤ ដែល​មាន​ផ្ទៃដី​សរុប​ ៣២២៨៧ ​ហិកតា​ត្រូវ​បាន​ក្រុមហ៊ុន​ប្រគល់​ដោយ​ស្ម័គ្រចិត្ត​ឲ្យ​រដ្ឋាភិបាល​គ្រប់គ្រង​វិញ​រីឯ​គម្រោង​ ៤ ​ទៀត​ដែល​មាន​ផ្ទៃដី​សរុប ១៤៨៥៤,៧៥ ​ហិកតា​ត្រូវ​បាន​កាត់​ទំហំ​ដី​វិនិយោគ​មក​ត្រឹម ១២៦២ ​ហិកតា និង​គម្រោង​ចំនួន ១៨ ដែល​មាន​ផ្ទៃដី ១០១ ៣៦០ ហិកតា​ត្រូវ​បាន​រាជរដ្ឋាភិបាល​ទុក​ពេល​ឲ្យ​ពី ៦ ខែ​ទៅ ១ ឆ្នាំ ដើម្បី​បន្ត​នីតិវិធី​ចាំបាច់​នានា​ដោយ​ស្ថិត​ក្រោម​ការ​តាមដាន​របស់​ក្រសួង​បរិស្ថាន។

សម្រាប់​គម្រោង ១៦ ផ្សេង​ទៀត​ដែល​មាន​ផ្ទៃដី​សរុប ៧៦ ២៧៩ ហិកតា​ដែល​បាន​ដាក់​ឆ្លង​គណៈកម្មការ​អន្តរ​ក្រសួង​ដើម្បី​ត្រួតពិនិត្យ និង​វាស់វែង​វាយតម្លៃ សម្បទាន​ដី​សេដ្ឋកិច្ច​រួច​ហើយ​ប៉ុន្តែ​មិន​ទាន់​សម្រេច។

ដោយឡែក គម្រោង ៣២ ដែល​នៅ​សេសសល់​មាន​ផ្ទៃដី​សរុប ២១៦ ៧៣៨ ហិកតា នៅ​រង់ចាំ​ដាក់​ឆ្លង​អង្គប្រជុំ​គណៈកម្មការ​អន្តរ​ក្រសួង​វាយតម្លៃ​តែ​ប៉ុណ្ណោះ​។

អ្នក​នាំពាក្យ និង​ជា​អនុរដ្ឋលេខាធិការ​ក្រសួង​កសិកម្ម​រុក្ខាប្រមាញ់ និង​នេសាទ លោក អ៊ាង សុផល្លែត ក៏​បាន​ឲ្យ​ដឹង​ដែរ​ថា​គោលការណ៍​កាត់​បន្ថយ​មក​យ៉ាង​យូរ ៥០ ឆ្នាំ​នេះ​គឺជា​ឆន្ទៈ​របស់​រាជរដ្ឋាភិបាល​ផ្អែក​លើ​ពិសោធន៍​គម្រោង​អភិវឌ្ឍន៍​របស់​​ក្រុមហ៊ុន​កន្លង​មក។

លោក​ថា៖ «បន្ទាប់ពី​ការ​ពិនិត្យ​លើ​ក្រុមហ៊ុន​វិនិយោគ​មួយ​ចំនួន​មាន​ក្រុមហ៊ុន​ខ្លះ​បាន​ធ្វើការ​វិនិយោគ​តែ​ខ្លះ​មិន​បាន​ធ្វើ​ហើយ​ខ្លះ​មាន​ការ​យឺតយ៉ាវ។ រួម​សេចក្តី​មក​រាជរដ្ឋាភិបាល​ក៏​សម្រេច​កាត់បន្ថយ​មក​​នៅ​ត្រឹម ៥០ ឆ្នាំ។ ខ្ញុំ​សុំ​និយាយ​ថា​ជា​ឆន្ទៈ​របស់​រដ្ឋាភិបាល​ខ្ញុំ​សុំ​មិន​បកស្រាយ​នូវ​ទឡ្ហីករណ៍​ច្បាប់​នោះ​ទេ»។

បើ​តាម​លោក សុផល្លែត ក្នុង​ក្របខ័ណ្ឌ​ក្រសួង​កសិកម្ម​មាន​ក្រុមហ៊ុន​សរុប​ចំនួន ១២២ មាន​ផ្ទៃ​ដី​សរុប​ចន្លោះ​ពី ១,២ ​លាន​ហិកតា ទៅ ១,៣ ​លាន​ហិកតា​ដែល​បាន​ទទួល​ការ​អនុញ្ញាត និង​ចុះ​កិច្ចសន្យា​ជាមួយ​រដ្ឋាភិបាល​ក្នុង​ការ​អភិវឌ្ឍ​វិនិយោគ​ក្នុង​នោះ​មាន​ប្រមាណ ៥០ ក្រុមហ៊ុន​ត្រូវ​បាន​ពិនិត្យ និង​វាយតម្លៃ​រួចរាល់។

ប្រធាន​ផ្នែក​ដីធ្លី​នៃ​សមាគម​ការពារ​សិទ្ធិ​មនុស្ស​អាដហុក​លោក ឡាត់ គី មាន​សុទិដ្ឋិនិយម​ចំពោះ​គោលការណ៍​ថ្មី​នេះ​ដែល​នឹង​អាច​ជួយ​កាត់បន្ថយ​បញ្ហា​វិវាទ​ដីធ្លី និង​ការ​វិនិយោគ​ដែល​គ្មាន​ផលប្រយោជន៍​ដល់​ប្រជាពលរដ្ឋ។

ប៉ុន្តែ​លោក​ចោទ​សួរ​ថា៖ «ពី​ដំបូង​ហេតុអ្វី​បាន​ជា​កំណត់​រហូត​ដល់ ៩៩ ឆ្នាំ ហេតុ​ផល​អី​បាន​ជា​ប្តូរ​មក ៥០ ​ឆ្នាំ។ ខ្ញុំ​ជឿ​ថា​រដ្ឋាភិបាល​មាន​ចក្ខុវិស័យ​ចំពោះ​ការ​កាត់បន្ថយ​នេះ​ប៉ុន្តែ​គួរ​តែ​មាន​ការ​ធ្វើ​វិសោធនកម្ម​ច្បាប់​ទាំងឡាយ​ដែល​ពាក់ព័ន្ធ​នឹង​ការ​កំណត់​ពេលវេលា​នេះ»​។

លោក សេង រិទ្ធី តំណាង​ក្រុមហ៊ុន Vietnam Rubber Group ប្រចាំ​កម្ពុជា​ដែល​មាន​ក្រុមហ៊ុន​ចំនួន ១៨ អភិវឌ្ឍន៍​ដំណាំ​កៅស៊ូ​លើ​ផ្ទៃដី​ជាង ៩ ម៉ឺន​ហិកតា​ក្នុង​ខេត្ត​ចំនួន ៥ នៃ​កិច្ចសន្យា​រយៈពេល ៧០ ឆ្នាំ​បាន​ថ្លែង​ថា​លោក​នឹង​អនុវត្ត​ទៅ​តាម​សេចក្តី​សម្រេច​នេះ​ប៉ុន្តែ​លោក​គិត​ថា​គោលការណ៍​ថ្មី​នេះ​មិន​គួរ​ប្រើ​ចំពោះ​ក្រុមហ៊ុន​ដែល​បាន​ចុះកិច្ច​សន្យា​រួច​ហើយ​នោះ​ទេ។

លោក​ថា៖ «តាម​ទស្សនៈ​របស់​ខ្ញុំ​អ្នក​ដែល​បាន​ចុះ​កិច្ចសន្យា​រួច​ហើយ​គួរ​រក្សា​ដូច​ដើម​ចំពោះ​ក្រុមហ៊ុន​ដែល​មិន​ទាន់​ចុះ Okay យើង​ធ្វើ​ទៅ​ព្រោះ​នេះ​ជា​កិត្តិយស​របស់​រដ្ឋាភិបាល​ដែរ​ព្រោះ​ពេល​​ចុះ​កិច្ចសន្យា​ពី​មុន​គឺ​ធ្វើ​ដោយ​អន្តរ​ក្រសួង​មិនមែន​មួយ​ក្រសួង​ទេ​។ បើ​យើង​រក្សា​កិច្ចសន្យា​ក្រុមហ៊ុន​ចាស់​ដូច​ដើម​ទើប​មាន​តម្លាភាព និង​ធ្វើឲ្យ​អ្នក​វិនិយោគ​មិន​ព្រួយ​បារម្ភ»៕

អត្ថបទគួរចាប់អារម្មណ៍

  • កោះកុងៈ កូនអណ្តើក​ហ្លួង​ចំនួន ៣០ ​ក្បាល​បាន​ញាស់​ចេញពី​សម្បុក​នៅលើ​ឆ្នេរ​ខ្សាច់​សិប្បនិម្មិត​ក្នុង​មជ្ឈមណ្ឌល​អភិរក្ស​សត្វ​ល្មូន​ខេត្តកោះកុង កាលពី​សប្តាហ៍​កន្លងទៅ ហើយ​នេះ​គឺជា​លើក​ទី​ ២ ​ហើយ ដែល​អណ្តើក​ហ្លួង​ចិញ្ចឹម​ក្នុង​មជ្ឈមណ្ឌល​នេះ​បាន​ពង​កូន​។ នេះ​បើតាម​អង្គការ​សមាគម​អភិរក្ស​សត្វព្រៃ​នៅ​កម្ពុជា (WCS)​។

  • ភ្នំពេញៈ ការបញ្ចូល​មីក្រូ​សារជាតិ​ក្នុង​អង្ករ គឺជា​ជំហាន​ចម្បង​មួយ​ក្នុងការ​ដោះស្រាយ​បញ្ហា​អាហារូបត្ថម្ភ​ក្នុង​ប្រទេស​កម្ពុជា ដែល​ប្រជាជន​ភាគច្រើន​ទទួលទាន​បាយ ក្នុង​បរិមាណ​ច្រើន​ជា​រៀងរាល់ថ្ងៃ​។ នេះ​បើតាម​មន្ត្រី​ក្រុមប្រឹក្សា​ស្តារ​អភិវឌ្ឍន៍​វិស័យ​កសិកម្ម និង​ជនបទ​។

  • ភ្នំពេញ: ក្នុង​ចំណោម​ភោជនីយដ្ឋាន​ពោរពេញ​ដោយ​សិល្បៈ​ចម្អិន​ម្ហូបអាហារ ការ​គិតគូរ​ពី​និរន្តរភាព​បរិស្ថាន​ភព​ផែន​ដី និង​បង្កប់​រឿង​រ៉ាវ​ប្រពៃណី​វប្បធម៌​ដ៏​អស្ចារ្យ​នៅ​អេស្ប៉ាញ ប៉េរូ​សហរដ្ឋអាមេរិក​ ថៃ ដាណឺម៉ាក​ នូវែលសេឡង់ ចិន ជប៉ុន អ៊ីតាលី និង​ម៉ិកស៊ិក អាហារ​នៅ​​ផ្ទះ​ប្រពៃណី​បុរាណ​មួយ​​​តាម​ដង​ទន្លេ​មេគង្គ

  • ភ្នំពេញៈ ទាំង​អ្នកនយោបាយ អ្នកវិភាគ និង​ស្ថាប័ន​គណៈកម្មាធិការ​ជាតិ​រៀបចំ​ការបោះឆ្នោត​បានចាត់ទុក​ដំណើរការ​ឃោសនា​រក​សំឡេងឆ្នោត ក្នុង​រយៈពេល ៣ ​ថ្ងៃ​របស់​គណបក្ស​នយោបាយ ដែល​បាន​ចុះបញ្ជី​បេក្ខជន​ចូលរួម​បោះឆ្នោត​ជ្រើសរើស​ក្រុមប្រឹក្សាឃុំ សង្កាត់​អាណត្តិ​ទី​ ៥ ដែល​នឹង​ប្រព្រឹត្តទៅ​នៅ​ថ្ងៃទី​ ៥ ខែមិថុនា ថា មាន​ភាពចាស់ទុំ​ផ្នែក​នយោបាយ និង​មិនមាន​អំពើហិង្សា​ណាមួយ​កើតឡើង​នោះ

  • ភ្នំពេញៈ សាលាឧទ្ធរណ៍​ភ្នំពេញ​នៅ​ថ្ងៃទី​ ២៣ ​ឧសភា បានប្រកាស​សាលដីកា​កំបាំង​មុខមន្ត្រី​សមាគម​ការពារ​សិទ្ធិមនុស្ស​អាដហុក​ ៤ ​រូប និង​អតីត​មន្ត្រី​ ១ ​រូប​ទៀត​សម្រេច​តម្កល់​សាលក្រម​របស់​សាលាដំបូង​រាជធានី​ភ្នំពេញ​ដដែល បន្ទាប់ពី​បាន​កាត់ក្តី​ឱ្យ​ពួកគេ​ជាប់ពន្ធនាគារ​ក្នុង​ម្នាក់​ ៥ ​ឆ្នាំ តែ​ឱ្យ​អនុវត្ត​ទោស ​១៤ ​ខែ​ពាក់ព័ន្ធ​បទចោទ​សូកប៉ាន់​សាក្សី និង​សមគំនិត​សូកប៉ាន់​សាក្សី​ដល់​ នាង ខុម ចាន់តារាទី ហៅ​ ស្រីមុំ​។

  • បន្ទាយមានជ័យៈ ក្នុង​មួយ​ថ្ងៃៗ​មាន​ប្រជាពលរដ្ឋ​នៅតាម​ព្រំដែន ជាពិសេស​ពលករ​ខ្មែរ​ពី ​៤០០ ទៅ​ ៥០០​ នាក់​បាន​ទៅ​ស្នើសុំ​ធ្វើ​បណ្ណ​ឆ្លងដែន ដើម្បី​បាន​ចូលទៅ​ធ្វើការ ឬ​លក់ដូរ​ស្របច្បាប់ នៅក្នុង​ប្រទេស​ថៃ បន្ទាប់ពី​ភាគី​ទាំង​ ២​ បាន​ឯកភាព​គ្នា​បើក​ច្រកព្រំដែន​ឡើងវិញ កាលពី​ថ្ងៃទី​ ១ ខែឧសភា ក្នុង​កម្រិត​ថ្នាក់​តំបន់​។