The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋាភិបាល​គ្រោង​បង្កើត​តំបន់​អភិរក្ស​សត្វ​ផ្សោត​ថ្មី​មួយ​ទៀត




រដ្ឋាភិបាល​គ្រោង​បង្កើត​តំបន់​អភិរក្ស​សត្វ​ផ្សោត​ថ្មី​មួយ​ទៀត

រដ្ឋាភិបាល​គ្រោង​បង្កើត​តំបន់​អភិរក្ស​សត្វ​ផ្សោត​ថ្មី​មួយ​ទៀត

130117_08
ត្រីផ្សោតនៅទន្លេមេគង្គ ក្នុងតំបន់អភិរក្ស នៅខេត្តក្រចេះ កាលពីពេលកន្លងមក សហការី

ស្ទឹងត្រែងៈ រដ្ឋា​ភិបាល កំពុង​ត្រួស​ត្រាយ​ផ្លូវ​ដើម្បី​បង្កើត​តំបន់​អភិរក្ស​ផ្សោត​ថ្មី​មួយ​ទៀត នៅ​ខេត្ត​ស្ទឹងត្រែង ជា​ទី​ដែល​ត្រី​ផ្សោត​ធ្វើ​ដំណើរ​ពី​ឡាវ បន្ទាប់​ពី​មាន​តំបន់​អភិរក្ស​មួយ​រួច​ហើយ នៅ​ខេត្ត​ក្រចេះ ដើម្បី​ការ​ពារ​ត្រី​ផ្សោត​សម្រាប់​ទាក់​ទាញ​អ្នក​ទេសចរ។

លោក ទូច ស៊ាង​តាណា ប្រធាន​គណៈកម្មការ​តំបន់​អភិរក្ស​ត្រី​ផ្សោត ទន្លេ​មេគង្គ និង​ការ​អភិវឌ្ឍ​ទេសចរណ៍​ធម្មជាតិ បាន​មាន​ប្រសាសន៍​ថា រដ្ឋា​ភិបាល​កំពុង​មាន​ផែន​ការ បង្កើត​តំបន់​អភិរក្ស​ថ្មី​មួយ​ទៀត នៅ​តំបន់​រំាសា ក្នុង​ខេត្ត​ស្ទឹង​ត្រែង ដោយ​មាន​ឆ្មាំ​ទន្លេ​សម្រាប់​ប៉ុស្តិ៍​យាម ៤ បន្ទាប់​ពី​មាន​តំបន់​អភិរក្ស​មួយ​នៅ​ខេត្ត​ក្រចេះ។

លោកបន្ត​ថា៖«យើង​បង្កើត​តំបន់​អភិរក្ស​នេះ គឺ​សម្រាប់​ការពារ​មេ​ពូជ​ត្រី និង​ដំណើរ​ត្រី​ផ្សោត​ នៅ​ខេត្ត​ស្ទឹងត្រែង។ តំបន់​នេះ ចាំបាច់​ត្រូវ​បង្កើត​តំបន់​អភិរក្ស ព្រោះ​វា ជា​តំបន់​សម្រាប់​មេ​ពូជ​ត្រី ហើយ​ជា​ផ្លូវ​ធ្វើ​ដំណើរ​សម្រាប់​ត្រី​ផ្សោត​ពី​ឡាវ»។

លោក បញ្ជាក់​ថា លោកបាន​ស្នើ​ដល់​អង្គការ​អភិរក្ស​ធម្មជាតិ និង​ក្រសួង​ពាក់​ព័ន្ធ​ដើម្បី​ត្រៀម​រៀបចំ​តំបន់​អភិរក្ស​ថ្មី​មួយ​ទៀត ក្នុងតំបន់​នេះ ពី​ព្រោះ​ជា​រឿយៗ មាន​ការ​នេសាទ​ខុស​ច្បាប់​ នៅ​តំបន់​រាំសា។ លោក បញ្ជាក់​ថា ប្រសិន​បើ​ផែន​ការ​នេះ ទទួល​បាន​ជោគ​ជ័យ ពួក​យើង​អាច​ការ​ពារ​ត្រី​ផ្សោត​ និង​វិស័យ​ទេសចរណ៍​ទូទាំង​ប្រទេស​ ជា​ពិសេស ​ទេសចរណ៍​​មក​ពី​ឡាវ​ផង​ដែរ។

លោកបន្ថែម​ថា​៖ «​ការ​នេសាទ​ខុស​ច្បាប់ មាន​ដូច​ជា ​ការ​ឆក់​ខ្សែ​ភ្លើង និង​បោក​គ្រាប់​បែក​ជា​ដើម។ វាអនា​ធិប​តេយ្យ​ណាស់ នៅ​តំបន់​នោះ។ ដូច្នេះ យើង​ត្រូវ​តែ​ការ​ពារ​វា​ជា​បន្ទាន់។ ឥឡូវ​នេះ មាន​អង្គការ​អូស្រ្តាលី និង​វិទ្យា​ស្ថាន​ជប៉ុន បាន​មក​ពិភាក្សា​ជាមួយ​ខ្ញុំ ជា​បណ្តើរៗ​ដើម្បី​ការពារ​ត្រី​ផ្សោត​របស់​យើង»។ មាន​ត្រី​ផ្សោត៦​ ក្បាល បាន​ងាប់​ ក្នុងឆ្នាំ​២០១២ កើន​ឡើង​១០០​ ភាគរយ​ បើ​ប្រៀប​ធៀប​នឹង​ឆ្នាំ​២០១១​មាន​ត្រី​ផ្សោត​៣​ក្បាល​បាន​ងាប់។ មាន​ត្រី​ផ្សោត​ ៤០ ​ក្បាល បាន​ឆ្លង​ចូល​ទៅ​ប្រទេស​វៀតណាម​ ក្នុង​អំឡុង​ទឹក​ជន់​ធំ​ កាលពី​ឆ្នាំ​ ២០១១។ បច្ចុប្បន្ន កម្ពុជានៅ​មាន​ត្រី​ផ្សោត​សរុប​ជាង​១៥០ ​ក្បាល។

ទោះជាយ៉ាងណា លោក Cordon Congdom ប្រធាន​អភិរក្ស​ត្រី​ទឹក​សាប​របស់​អង្គការ WWF បានឲ្យ​ដឹង​ថា តួ​លេខ​របស់​WWF​ សត្វ​ផ្សោត​បាន​ងាប់​៨ ក្បាល កាល​ពី​ឆ្នាំ​២០១២។ ចំនួន​នេះ បាន​កើន​ឡើង​លើស​ពី​ឆ្នាំ​២០១១ ​ដែល​ងាប់​៥ ក្បាល​ហើយ​មូល​ហេតុ​នៃ​ការ​ងាប់​នេះ មិន​ត្រូវ​បាន​គេ​ដឹង​នោះ​ទេ។ លោក​ថ្លែង​ថា៖ «ការងាប់​ផ្សោត​ដ៏​ច្រើន​នេះ​ ត្រូវ​បាន​គេ​ធ្វើ​ការ​អង្កេត​ នៅ​ក្នុង​ការ​សិក្សា​ស្រា​វជ្រាវ​ ដែល​មាន​រយៈ​ពេល​ជាង​១០​ឆ្នាំ​មក​ហើយ​ ដែល​នេះ​ជា​ការ​គំរាម​កំហែង​ដ៏​ធ្ងន់ធ្ងរ​មួយ​ចំពោះ​ផ្សោត​»។

ក្នុងករណី​ដាច់​ដោយ​ឡែក​មួយ ជន​ជាតិ​វៀតណាម​៤​នាក់ ត្រូវ​បាន​គេ​ចាប់​បញ្ជូន​ទៅ​តុលាការ​ កាល​ពី​ថ្ងៃ​ចន្ទ​ បន្ទាប់​ពី​ពួក​គេ ត្រូវ​បាន​ចាប់​ខ្លួន​ ដោយសារ​ធ្វើ​ការ​នេសាទ​ខុស​ច្បាប់ ដោយ​ប្រើ​ឧបករណ៍​ឆក់ ក្នុង​តំបន់​អភិរក្ស នៅ​ស្រុក​ស្នួល​ខេត្ត​ក្រចេះ។

លោក ស៊ាន គីន ប្រធាន​រដ្ឋបាល​នេសាទ ខេត្ត​ក្រចេះ​ឲ្យ​ដឹង​ថា ប៉ូលិស​និង​ឆ្មាំ​ទន្លេ បាន​ចាប់​ខ្លួន​ពួកគេ កាល​ពី​ព្រឹក​ថ្ងៃ​ចន្ទ ខណៈ​ពួកគេ​កំពុង​នេសាទ​ដោយ​ប្រើ​ឧបករណ៍​ឆក់​ត្រី​នៅ​តំបន់​អភិរក្ស។ លោក​បញ្ជាក់​ថា៖​«ភ្លាមៗ​នោះ សមាគម​វៀតណាម ចង់​ធ្វើ​អន្តរាគមន៍ ប៉ុន្តែ​យើង​នៅតែ​បញ្ជូន​ពួកគេ ទៅ​តុលាការ​ទៅ​តាម​ច្បាប់»៕ NR

អត្ថបទគួរចាប់អារម្មណ៍