The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋាភិបាល​សម្រេច​ដំឡើង​ប្រាក់​ឈ្នួល​កម្មករ $ ១២៨

រដ្ឋាភិបាល​សម្រេច​ដំឡើង​ប្រាក់​ឈ្នួល​កម្មករ $ ១២៨

កម្មករ-កម្មការិនី ពេល​ចេញ​ពី​ធ្វើ​ការ នៅ​រោងចក្រ​ដែល​មាន​ទីតាំង​ស្ថិត​នៅ​ក្នុង សង្កាត់​ចាក់​អង្រែ ខណ្ឌ​មាន​ជ័យ កាល​ពី​ម្សិល​មិញ។
កម្មករ-កម្មការិនី ពេល​ចេញ​ពី​ធ្វើ​ការ នៅ​រោងចក្រ​ដែល​មាន​ទីតាំង​ស្ថិត​នៅ​ក្នុង សង្កាត់​ចាក់​អង្រែ ខណ្ឌ​មាន​ជ័យ កាល​ពី​ម្សិល​មិញ។ ម៉ៃ វីរៈ

រដ្ឋាភិបាល​សម្រេច​ដំឡើង​ប្រាក់​ឈ្នួល​កម្មករ $ ១២៨

ភ្នំពេញៈ រាជ​រដ្ឋាភិបាល បាន​សម្រេច​ដំឡើង​ប្រាក់​ឈ្នួល​ជូន​កម្មករ​និយោ​ជិត ផ្នែក​វាយនភ័ណ្ឌ​កាត់​ដេរ និង​ផលិត​ស្បែក​ជើង​ចំនួន ១២៨ ដុល្លារ​ក្នុង​មួយ​ខែ ដែល​ត្រូវ​ចាប់​ផ្តើម​អនុវត្ត​ចាប់​ពី ខែ​មករា ឆ្នាំ​២០១៥ តទៅ។ ទោះ​ជា​យ៉ាង​ណា​សហជីព​ដែល​ការពារ​ផល​ប្រយោជន៍​កម្មករ​នៅ​តែ​ទទូច​ឲ្យ​មាន​ការ​ដំឡើង​ដល់ ១៤០ ដុល្លារ ខណៈ​ដែល​សមាគម​រោងចក្រ​កាត់​ដេរ​បាន​ព្រមាន​ថា រោងចក្រ​ប្រមាណ ៣០ ភាគរយ​អាច​នឹង​បិទ​ទ្វារ ដោយ​សារ​ការ​ដំឡើង​ប្រាក់​ឈ្នួល​ខ្ពស់​នេះ។

មុន​នឹង​ឈាន​ទៅ​ដល់​ការ​សម្រេច​ជា​ផ្លូវ​ការ​ពី​រដ្ឋាភិបាល​នេះ គណៈកម្មការ​ប្រឹក្សា​ការងារ​បាន​បើក​កិច្ច​ប្រជុំ​ដើម្បី​ពិភាក្សា​លើ​លទ្ធផល​របស់​ក្រុម​ការងារ​ត្រី​ភាគី និង​ធ្វើ​ការ​ពិភាក្សា​កំណត់​ប្រាក់​ឈ្នួល​អប្បបរមា​សម្រាប់​កម្មករ​ក្នុង ឆ្នាំ​២០១៥ ប៉ុន្តែ​មិន​ទទួល​បាន​ការ​គាំទ្រ​ជា​ឯកច្ឆន្ទ​លើ​តួ​លេខ​ណា​មួយ​ឡើយ​ព្រោះ​ភាគី​និយោជក នៅ​តែ​រក្សា​ជំហរ​ចំនួន ១១០ ដុល្លារ ខណៈ​ភាគី​សហជីព​រក្សា​ជំហរ ១៤០ ដុល្លារ​ដដែល។ ដើម្បី​សម្រប​សម្រួល​រវាង​ភាគី​ទាំង​ពីរ ភាគី​រដ្ឋាភិបាល​បាន​ស្នើ​ដាក់​តួ​លេខ​ចំនួន ១២៣ ដុល្លារ ហើយ​មាន​ការ​បោះ​ឆ្នោត​គាំទ្រ ១៦ សំឡេង​លើ ២៥ សំឡេង​ខណៈ​ដែល​សំណើ​របស់​ភាគី​រោងចក្រ ១១០ ដុល្លារ មាន​អ្នក​បោះឆ្នោត​គាំទ្រ ៧ សំឡេង និង​សំណើ​របស់​សហជីព ១៤០ ដុល្លារ មាន​អ្នក​បោះ​ឆ្នោត​គាំទ្រ​តែ ២ សំឡេង។

យោង​តាម​សេចក្តី​ប្រកាស​ព័ត៌មាន​របស់​ក្រសួង​ការងារ​កាល​ពី​ម្សិល​មិញ បាន​ឲ្យ​ដឹង​ថា បន្ទាប់​ពី​មាន​ការ​សម្រេច​យក​ចំនួន ១២៣ ដុល្លារ​រួច​មក រដ្ឋ​មន្រ្តី​ក្រសួង​ការងារ លោក អ៊ិត សំហេង បាន​បញ្ជូន​របាយ​ការណ៍ នៃ​កិច្ច​ប្រជុំ​ទៅ​លោក​នាយក​រដ្ឋ​មន្រ្តី ហ៊ុន សែន ពិនិត្យ។ លោក​នាយក​រដ្ឋ​មន្រ្តី បាន​សម្រេច​បន្ថែម​ទឹក​ប្រាក់​ចំនួន ៥ ដុល្លារ​ទៀត លើ​ចំនួន​ទឹក​ប្រាក់ ១២៣ ដុល្លារ​ដែល​បាន​ស្នើ​ដោយ​រដ្ឋ​មន្រ្តី​ក្រសួង​ការងារ។

សេចក្តី​ប្រកាស​ដដែល បាន​ឲ្យ​ដឹង​បន្ត​ថា សម្រាប់​ប្រាក់​អត្ថ​ប្រយោជន៍​ផ្សេងៗ​ទៀត​ដែល​កម្មករ​និយោជិត​ធ្លាប់​បាន​ទទួល​កន្លង​មក ត្រូវ​រក្សា​ទុក​ដដែល​មាន​ដូច​ជា​ប្រាក់​សោហ៊ុយ​ធ្វើ​ដំណើរ​និង​ប្រាក់​ស្នាក់នៅ ៧ ដុល្លារ​ក្នុង​មួយ​ខែ ប្រាក់​រង្វាន់​ធ្វើ​ការ​ទៀង​ទាត់ ១០ ដុល្លារ​ប្រាក់​ថ្លៃ​បាយ​ធ្វើ​ការ​ថែម​ម៉ោង​ដោយ​ស្ម័គ្រ​ចិត្ត ២០០០ រៀល ឬ​បាយ​មួយ​ពេល និង​ប្រាក់​រង្វាន់​អតីត​ភាព​ការងារ​ជាច្រើន​ទៀត ដែល​សរុប​ជា​មធ្យម​កម្មករ​ម្នាក់​នឹង​ទទួល​បាន​ប្រាក់​បៀវត្សរ៍​យ៉ាង​តិច​ចំនួន​ពី ១៤៧ ដល់ ១៥៦ ដុល្លារ​ក្នុង​មួយ​ខែ។

លោក អ៊ិត សំហេង រដ្ឋ​មន្ត្រី​ក្រសួង​ការងារ នៅ​ក្នុង​សន្និសីទ​កាសែត​មួយ​ស្តី​ពី​ការ​ដំឡើង​ប្រាក់​ឈ្នួល​កម្មករ​កាល​ពី​ម្សិល​មិញ។
លោក អ៊ិត សំហេង រដ្ឋ​មន្ត្រី​ក្រសួង​ការងារ នៅ​ក្នុង​សន្និសីទ​កាសែត​មួយ​ស្តី​ពី​ការ​ដំឡើង​ប្រាក់​ឈ្នួល​កម្មករ​កាល​ពី​ម្សិល​មិញ។ ម៉ៃ វីរៈ

លោក អ៊ិត សំហេង បាន​ថ្លែង​កាល​ពី​ម្សិល​មិញ​ថា តួលេខ​ដែល​បាន​សម្រេច​នេះ​ជា​តួលេខ​មួយ​សម​ហេតុ​សម​ផល ដែល​លោក​បាន​គិត​គូរ​គ្រប់​ទិដ្ឋភាព​ទាំង​អស់ ហើយ​លោក​ក៏​ជឿ​ជាក់​ថា កម្មករ​នឹង​បាន​កែ​ប្រែ​ជីវភាព​របស់​ខ្លួន​ប្រសើរ​ជាង​ឆ្នាំ​ចាស់ ហើយ​រោងចក្រ​ក៏​មាន​លទ្ធភាព​ធានា​ផ្គត់​ផ្គង់​ប្រាក់​ឈ្នួល​នេះ​ទៅ​ដល់​កម្មករ​ផង​ដែរ។ លោក​បញ្ជាក់​ថា៖ «ខ្ញុំ​ជឿ​ថា មតិ​អន្តរជាតិ ដែល​កំពុង​តែ​តាម​ដាន​នឹង​មាន​ការ​ចាប់​អារម្មណ៍ ហើយ​ការ​បញ្ជា​ទិញ​នានា​នឹង​ហូរ​ចូល​មក​កម្ពុជា​បង្កើត​ឱកាស​ការងារ​ការ​វិនិយោគ​បាន​កាន់​តែ​ច្រើន ...»។

បើ​ទោះ​បី​ជា​ការ​ដំឡើង​នេះ មិន​បាន​ឆ្លើយ​តប​ទៅ​នឹង​អ្វី​ដែល​ក្រុម​សហជីព​បាន​ទាមទារ​ក៏​ដោយ ក៏​លោក សំហេង សង្ឃឹម​ថា ខាង​សហជីព​នឹង​យល់​ពី​ការ​ដំឡើង​នេះ​ដោយ​សារ​ពួក​គេ​ក៏​បាន​ចូល​រួម​ពិភាក្សា​ផង​ដែរ។ «ឱកាស​ដែល​ពួក​គេ​បាន​ចូល​រួម​ពិភាក្សា​ជា​ឱកាស​មួយ ដែល​កាត់​បន្ថយ​ការ​ធ្វើ​បាតុកម្ម។ ដូច​នេះ​វា​មិន​មាន​ការ​ចាំ​បាច់​អី​ដែល​ត្រូវ​ធ្វើ​បាតុកម្ម​ទេ។ សូម​កុំ​យក​ការ​ធ្វើ​បាតុកម្ម​ដាក់​នៅ​នឹង​មុខ​ដើម្បី​ធ្វើ​ការ​ទាមទារ»។

ទោះ​ជា​យ៉ាង​ណា ភាគី​ខាង​និយោជក ហាក់​មិន​ពេញ​ចិត្ត​ចំពោះ​ការ​ដំឡើង​ប្រាក់​ឈ្នួល​កម្មករ​ពី ១០០ ដុល្លារ ក្នុង ឆ្នាំ​២០១៤ ទៅ​ដល់ ១២៨ ដុល្លារ​ក្នុង ឆ្នាំ​២០១៥ នេះ​ទេ។

លោក ណាង សុធី អនុ​ប្រធាន​គណៈកម្មការ​ប្រឹក្សា​ការងារ​ភាគី​តំណាង​និយោជក​បាន​ថ្លែង​កាល​ពី​ម្សិល​មិញ បន្ទាប់​ពី​កិច្ច​ប្រជុំ​ថា វា​ជា​ការ​មិន​ធម្មតា ដែល​រាជ​រដ្ឋាភិបាល​សម្រេច​ដំឡើង ២៨ ភាគរយ នៃ​ប្រាក់​ខែ​អប្បបរមា ហើយ​ក៏​មិន​ដែល​មាន​រោង​សហគ្រាស​ណា ដែល​អាច​រក​ផល​ចំណេញ​បាន ២៨ ភាគរយ​ក្នុង​មួយ​ឆ្នាំ​នោះ​ដែរ។ លោក​បញ្ជាក់​ថា៖ «ក្នុង​នាម​យើង​ជា​អ្នក​វិនិយោគ​ស្រប​ច្បាប់ យើង​មាន​កាតព្វកិច្ច​គោរព​នូវ​អ្វី​ដែល​រាជ​រដ្ឋាភិបាល​បាន​សម្រេច​ហើយ​ក្នុង​នាម​យើង​ជា​និយោជក​យើង​សូម​ប្រកាស​នូវ​ជំហរ​របស់​យើង​ថា យើង​នឹង​គោរព​នូវ​អ្វី​ទាំង​អស់​ដែល​រាជ​រដ្ឋាភិបាល​បាន​សម្រេច»។

ជាមួយ​នេះ​ដែរ លោក​ក៏​បាន​បង្ហាញ​ពី​ក្តី​កង្វល់​ថា តាម​ការ​ប៉ាន់​ស្មាន​របស់​សមាគម​រោងចក្រ​កាត់ដេរ មាន​រោងចក្រ​ប្រមាណ​ជា ៣០ ទៅ ៥០ រោងចក្រ (៣០ ភាគរយ) អាច​នឹង​ប្រឈម​នឹង​ការ​បិទ​ទ្វារ​ដោយ​សារ​ការ​ដំឡើង​ប្រាក់​ឈ្នួល​កម្មករ​ខ្ពស់​នេះ ដែល​អាច​នឹង​មាន​កម្មករ​ប្រមាណ ៥ ម៉ឺន នាក់​ប្រឈម​នឹង​ការ​បាត់​បង់​ការងារ។

សមាគម​រោងចក្រ​កាត់​ដេរ បាន​ចេញ​សេចក្តី​ថ្លែង​ការណ៍​មួយ ដោយ​បង្ហាញ​ពី​ការ​សោក​ស្តាយ​យ៉ាង​ខ្លាំង ចំពោះ​សេចក្តី​សម្រេច​លើ​ប្រាក់​ឈ្នួល​នេះ ហើយ​សមាគម​ក៏​បាន​អំពាវនាវ​យ៉ាង​ទទូច​ដល់​រដ្ឋាភិបាល ឲ្យ​ដាក់​ចេញ​នូវ​គោល​នយោបាយ​គាំទ្រ​នានា ដើម្បី​ជួយ​ដល់​វិស័យ​ទាំង​នេះ ហើយ​ក៏​បាន​ស្នើ​ផង​ដែរ ដល់​សហជីព​នានា មេត្តា​កុំ​បង្ក​ភាព​ចលាចល​ថែម​ទៀត​ដល់​វិស័យ​នេះ​តាម​រយៈ​ការ​ធ្វើ​បាតុកម្ម កូដកម្ម​ដែល​ប្រាស់​ចាក​នឹង​នីតិវិធី​ច្បាប់។

ប៉ុន្តែ​យ៉ាង​ណា​ក៏​ដោយ​សហជីព​ចំនួន ៩ ដែល​តែង​តែ​ចេញ​មុខ​ការពារ​ផល​ប្រយោជន៍​កម្មករ មិន​ពេញ​ចិត្ត​ចំពោះ​ការ​ដំឡើង​ប្រាក់​ឈ្នួល​កម្មករ​នេះ​ទេ​ហើយ​បាន​ប្តេជ្ញា​បន្ត​ធ្វើ​យុទ្ធនាការ ដើម្បី​ជំរុញ​ឲ្យ​មាន​ការ​ដំឡើង​ប្រាក់​ឈ្នួល​អប្បបរមា​សមរម្យ​ជាង​នេះ​ជូន​កម្មករ។

លោក អាត់ ធន់ ប្រធាន​សហព័ន្ធ​សហជីព​ស៊ីខៅឌូ បាន​ថ្លែង​កាល​ពី​ថ្ងៃ​ម្សិល​មិញ​ថា សហជីព​ដែល​មិន​គាំទ្រ​នឹង​ការ​ដំឡើង​នេះ នឹង​ជួប​ប្រជុំ​ដើម្បី​ពិភាក្សា ថា​តើ​នឹង​ធ្វើ​យ៉ាង​ណា​ដើម្បី​ទាមទារ​ប្រាក់​ឈ្នួល​សមរម្យ​ជូន​កម្មករ​ឲ្យ​បាន​ច្រើន​ជាង​នេះ។ «សហជីព​យើង បាន​បដិសេធ​នូវ​លទ្ធផល​ដែល​បាន​សម្រេច (១២៨ ដុល្លារ) ហើយ​យើង​នឹង​ធ្វើ​ការ​តវ៉ា​ទៀត ប៉ុន្តែ​នឹង​រក​វិធី​ថា តើ​យើង​ត្រូវ​ធ្វើ​យ៉ាង​ណា​ក្នុង​រយៈ​ពេល​ខាង​មុខ​ដ៏​ខ្លី​នេះ»។

លោក​ស្រី យ៉ាង សុភណ្ឌ ប្រធាន​សម្ព័ន្ធ​សហជីព​កម្ពុជា ដែល​មិន​មែន​ជា​សមាជិក​របស់ LAC បាន​និយាយ​ថា លោក​ស្រី​នឹង​ជួប​ប្រជុំ​ជាមួយ​នឹង​សមាជិក និង​ប្រធាន​សហជីព​តាម​រោងចក្រ​នៅ​ថ្ងៃ​ព្រហស្បតិ៍​នេះ ដើម្បី​ចង់​ដឹង​ថា តើ​ពួក​គេ​ពេញ​ចិត្ត​ឬ​អត់ និង​មាន​គម្រោង​ធ្វើ​អ្វី​បន្ត​ទៀត។ «ខ្ញុំ​មិន​អាច​ទទួល​យក​បាន​ទេ​នូវ​ចំនួន​ប្រាក់​ឈ្នួល​ដែល​បាន​ដំឡើង​នេះ។ ខ្ញុំ​នៅ​ចង់​បាន​ចំនួន ១៧៧ ដុល្លារ ប៉ុន្តែ ដោយ​សារ​សហជីព​ដែល​ធ្វើ​ការ​ជាមួយ​គ្នា​ចង់​បាន​តែ ១៤០ ដុល្លារ អ៊ីចឹង​ខ្ញុំ​យល់​ព្រម​តាម​ពួក​គេ»។

លោក​ស្រី សុភណ្ឌ បាន​បញ្ជាក់​ជំហរ​ថា ការ​តវ៉ា​ធំ​អាច​នឹង​កើត​មាន​ឡើង​ប្រសិន​បើ​មិន​មាន​ការ​ចរចា​ប្រាក់​ឈ្នួល​នេះ​ម្តង​ទៀត។

ចំណែក​លោក ប៉ាវ ស៊ីណា ប្រធាន​សម្ព័ន្ធ​សហជីព​ចលនា​កម្មករ ក៏​គ្រោង​នឹង​ជួប​ជាមួយ​នឹង​សមាជិក​តាម​រោងចក្រ​របស់​លោក​នៅ​ថ្ងៃ​អាទិត្យ​ក្នុង​សប្តាហ៍​នេះ​ដែរ ដើម្បី​ឲ្យ​ដឹង​ថា តើ​ពួក​គេ​ព្រម​ទទួល​យក ១២៨ ដុល្លារ​ឬ​មិន​ទទួល៕

អត្ថបទគួរចាប់អារម្មណ៍