.jpg)
កម្មករកំពុងធ្វើដំណើរចាកចេញពីរោងចក្រនៅភូមិព្រៃទា សង្កាត់ចោមចៅ ខណ្ឌពោធិ៍សែនជ័យនៅថ្ងៃទី ១៨-០៣-២០២១។ ហេង ជីវ័ន
ភ្នំពេញៈ រាជរដ្ឋាភិបាលតាមរយៈក្រសួងការងារបានប្រកាសផ្តល់ប្រាក់ឧបត្ថម្ភលើកទី ៦០ ជូនដល់កម្មករនិយោជិតក្នុងវិស័យកាត់ដេរ និងទេសចរណ៍ជាង ៥ ពាន់នាក់ ដែលត្រូវបានព្យួរកិច្ចសន្យាការងារ ដោយសារផលប៉ះពាល់ពីការរីករាលដាលនៃជំងឺកូវីដ១៩ ស្របតាមស្មារតីនៃកញ្ចប់វិធានការរបស់រាជរដ្ឋាភិបាល។
សេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈចុះថ្ងៃទី ១១ ឧសភា ឱ្យដឹងថា ការផ្តល់ជូនសាច់ប្រាក់ឧបត្ថម្ភលើកទី ៦០ នេះមានកម្មករនិយោជិតចំនួន ៥ ២៦២ នាក់នៃរោងចក្រ សហគ្រាសទាំង ២៩ នៃវិស័យកាត់ដេរ និងវិស័យទេសចរណ៍ ដែលបានទទួលការអនុញ្ញាតព្យួរកិច្ចសន្យាការងារស្របតាមស្មារតីជុំទី ៣ នៃកញ្ចប់វិធានការរបស់រាជរដ្ឋាភិបាល។
សេចក្តីជូនដំណឹងបន្តថា ធនាគារឯកទេសវីងនឹងផ្ញើសារអំពីការបើកប្រាក់ឧបត្ថម្ភរបស់រាជរដ្ឋាភិបាលទៅលេខទូរស័ព្ទ ដែលកម្មករបានផ្ដល់មកឱ្យក្រសួងតាមរយៈរដ្ឋបាលរោងចក្រ សហគ្រាសនាពេលកន្លងមក។
បើតាមក្រសួងការងារ ប្រាក់ឧបត្ថម្ភនេះនឹងត្រូវបើកផ្ដល់ជាប្រាក់រៀល និងអាស្រ័យលើចំនួនថ្ងៃនៃការព្យួរកិច្ចសន្យាការងារក្នុងនោះកម្មករម្នាក់នឹងទទួលបានប្រាក់ឧបត្ថម្ភចំនួន ៦០ ៧៥០ រៀល (១៥ ដុល្លារអាមេរិក) សម្រាប់ការព្យួរកិច្ចសន្យាការងាររយៈពេល ៧ ថ្ងៃ ដល់ ១០ ថ្ងៃ។ ទទួលបាន ១២១ ៥០០ រៀល (៣០ ដុល្លារអាមេរិក) សម្រាប់ការព្យួរកិច្ចសន្យាការងាររយៈពេល ១១ ថ្ងៃ ដល់ ២០ ថ្ងៃ និងទឹកប្រាក់ចំនួន ១៦២ ០០០ រៀល (៤០ ដុល្លារអាមេរិក) សម្រាប់ការព្យួរកិច្ចសន្យាការងាររយៈពេលចាប់ពី ២១ ថ្ងៃ ដល់ ១ ខែ។
ក្រសួងរំឭកថា៖ «ធនាគារឯកទេសវីងនឹងបង្វិលប្រាក់ឧបត្ថម្ភនេះជូនរាជរដ្ឋាភិបាលវិញ ប្រសិនជាបងប្អូនខកខានមិនបានទៅបើកប្រាក់ឧបត្ថម្ភនេះក្នុងរយៈពេល ១០ ថ្ងៃ បន្ទាប់ពីទទួលបានសារតាមទូរស័ព្ទពីធនាគារឯកទេសវីង»។
ក្រសួងការងារបញ្ជាក់ថា៖ «ដើម្បីបើកប្រាក់ឧបត្ថម្ភនេះ បងប្អូនត្រូវយកអត្តសញ្ញាណប័ណ្ណសញ្ជាតិខ្មែរ និងទូរស័ព្ទដែលទទួលបានសារនោះទៅកាន់ភ្នាក់ងារវីង ដែលនៅជិតបំផុត ហើយមិនតម្រូវឱ្យបង់ថ្លៃសេវាទៅភ្នាក់ងារវីងឡើយពេលបើកប្រាក់ឧបត្ថម្ភនេះ»។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាលោក អាត់ ធន់ បានថ្លែងថា ការបន្តផ្តល់ប្រាក់ឧបត្ថម្ភដល់កម្មករដែលត្រូវបានព្យួរការងារជារឿងល្អមួយ។ ប៉ុន្តែរដ្ឋាភិបាលគួរពិចារណាផ្តល់ប្រាក់ឧបត្ថម្ភនេះ ដល់កម្មករ-កម្មការិនី ដែលរស់នៅតំបន់បិទខ្ទប់ដែលកំពុងជួបបញ្ហាប្រឈម។
លោកថ្លែងថា៖ «អ្វីដែលរដ្ឋាភិបាលធ្លាប់ផ្តល់ដល់កម្មករកន្លងមក គឺបានចូលរួមចំណែកជួយដល់កម្មករមួយផ្នែកហើយ ប៉ុន្តែឥឡូវនេះបញ្ហាប្រឈមខ្លាំងកម្មករដែលរស់នៅតំបន់បិទខ្ទប់»។
រាជរដ្ឋាភិបាលពីម្សិលមិញបានចេញសេចក្តីសម្រេចមួយស្តីពីការដាក់ឲ្យអនុវត្តកម្មវិធី «ជំនួយសង្គមជាសាច់ប្រាក់ ក្រោយពេលបិទខ្ទប់» ដើម្បីជួយគាំទ្រដល់គ្រួសារប្រជាពលរដ្ឋ ដែលមានកម្រិតជីវភាពទាប និងជួបប្រឈមនឹងការលំបាក ក្រោយការអនុវត្តវិធានការបិទខ្ទប់ជាលក្ខណៈទ្រង់ទ្រាយធំ និងការផ្តល់ជំនួយសង្គមជាសាច់ប្រាក់ សម្រាប់គ្រួសារដែលមានអ្នកស្លាប់ ដោយសារជំងឺកូវីដ១៩ និងគ្រួសារដែលមានអ្នកឆ្លងជំងឺកូវីដ១៩។
ក្នុងសេចក្តីសម្រេចបញ្ជាក់ថា៖ «នៅក្នុងរយៈពេលអនុវត្តវិធានការបិទខ្ទប់ រាជរដ្ឋាភិបាលបាននិងកំពុងផ្តល់ «ជំនួយសង្គ្រោះបន្ទាន់ក្នុងពេលបិទខ្ទប់» ជាស្បៀងអាហារ រួមមាន អង្ករ មី ត្រីខកំប៉ុង ទឹកត្រី និង/ឬ ទឹកស៊ីអ៊ីវ និងថវិកាមួយចំនួន ជូនដល់គ្រួសារប្រជាពលរដ្ឋងាយរងគ្រោះ ប្រជាពលរដ្ឋក្រីក្រ និងកម្មករនិយោជិតផងដែរ»។
បើតាមសេចក្តីសម្រេច រដ្ឋាភិបាលផ្តល់ប្រាក់ឧបត្ថម្ភចំនួន ១៦ ម៉ឺនរៀលក្នុង ១ នាក់ជូនដល់កម្មករ និយោជិត ដែលឆ្លងជំងឺកូវីដ១៩។
ប៉ុន្តែកម្មករទាំងនោះត្រូវជាអ្នកបម្រើការនៅតាមរោងចក្រ សហគ្រាសក្នុងវិស័យកាត់ដេរ សម្លៀកបំពាក់ ស្បែកជើង និងកាបូប ដែលស្ថិតក្នុងភូមិសាស្ត្រ ក្រៅពីរាជធានីភ្នំពេញ ក្រុងតាខ្មៅ និងក្រុងព្រះសីហនុ៕
វីដេអូ៖
