ភ្នំពេញៈ រដ្ឋាភិបាល បានចេញអនុក្រឹត្យ ស្ដីពីការប្រើប្រាស់និងការចាត់ចែងទ្រព្យសម្បត្តិបង្កក ដែលបានមកពីបទល្មើសហិរញ្ញប្បទានដល់ការរីកសាយភាយអាវុធមហាប្រល័យ ខណៈក្រសួងយុត្តិធម៌បានធ្វើបទបង្ហាញពីទិដ្ឋភាពទូទៅនៃការសម្អាតប្រាក់ដល់មន្ត្រីអនុវត្តច្បាប់នៃសាលាដំបូងរាជធានីភ្នំពេញ។
លោកនាយករដ្ឋមន្ត្រី ហ៊ុន សែន បានចុះហត្ថលេខាលើអនុក្រឹត្យស្តីពីការប្រើប្រាស់ និងការចាត់ចែងទ្រព្យសម្បត្តិបង្កកនៃហិរញ្ញប្បទានដល់ការរីកសាយភាយអាវុធមហាប្រល័យកាលពីថ្ងៃទី ៣ ខែតុលា ថា ការបង្កកទ្រព្យសម្បត្តិដែលពាក់ព័ន្ធនឹងបទល្មើសនៃហិរញ្ញប្បទានដល់ការរីកសាយភាយអាវុធមហាប្រល័យ អាចធ្វើទៅបាននៅទូទាំងប្រទេសកម្ពុជា។
លោកបន្តថា អនុក្រឹត្យនេះនឹងអនុញ្ញាតឱ្យបុគ្គល ឬអង្គភាពដែលទទួលខុសត្រូវលើកិច្ចការនេះអាចប្រើប្រាស់ និងចាត់ចែងទ្រព្យសម្បត្តិបង្កកតាមសេចក្តីសម្រេចរបស់តុលាការ ដើម្បីធានាដល់ការចំណាយមូលដ្ឋាន ការចំណាយលើការបំពេញកាតព្វកិច្ច និងការចំណាយផ្សេងៗដែលទទួលបានការអនុញ្ញាតហើយស្របតាមសេចក្តីសម្រេចចិត្តនានារបស់ UN។
លោកនាយករដ្ឋមន្ត្រីបញ្ជាក់ថា៖ «បុគ្គល ឬអង្គភាពដែលកាន់កាប់ទ្រព្យសម្បត្តិបង្កកត្រូវដាក់ពាក្យស្នើសុំប្រើប្រាស់ និង/ឬចាត់ចែងទ្រព្យសម្បត្តិដែលត្រូវបានបង្កកនោះទៅតុលាការ ដែលបានចេញសេចក្តីសម្រេចបង្កក។ សេចក្តីសម្រេចបង្កកត្រូវធ្វើឡើងជាទម្រង់ដីកាសម្រេច»។
បើតាមច្បាប់ស្តីពីការប្រឆាំងហិរញ្ញប្បទានដល់ការរីកសាយភាយអាវុធមហាប្រល័យដែលត្រូវបានអនុម័តនៅឆ្នាំ ២០២០ គឺមានគោលបំណងធានាប្រឆាំងការសម្អាតប្រាក់ និងហិរញ្ញប្បទានភេរវកម្ម ដោយកំណត់អំពីវិធានការត្រួតពិនិត្យ បង្ការ ទប់ស្កាត់ បង្ក្រាប និងលុបបំបាត់ការសម្អាតប្រាក់ និងហិរញ្ញប្បទានភេរវកម្ម។
ជាមួយនឹងទិសដៅនេះលោក ប៉ែន ពេជ្រសាលី អគ្គនាយកកិច្ចការអយ្យការ និងព្រហ្មទណ្ឌ និងជាប្រធានក្រុមការងារប្រឆាំងការសម្អាតប្រាក់ និងហិរញ្ញប្បទានភេរវកម្មនៃក្រសួងយុត្តិធម៌កាលពីថ្ងៃទី ២ តុលា បានរៀបចំវគ្គបណ្តុះបណ្តាលមួយស្តីពីការសម្អាតប្រាក់ និងការផ្សព្វផ្សាយអំពីច្បាប់ស្តីពីការជួយគ្នាទៅវិញទៅមកផ្នែកច្បាប់ក្នុងវិស័យព្រហ្មទណ្ឌ។
លោក តាំង ស៊ុនឡាយ ប្រធានសាលាដំបូងរាជធានីភ្នំពេញបានលើកឡើងថា ការធ្វើបទបង្ហាញនេះគឺក្នុងគោលបំណងផ្តល់ពុទ្ធិចំណេះដឹង និងចែករំលែកបទពិសោធនដល់អនុប្រធានសាលាដំបូង ព្រះរាជអាជ្ញា ចៅក្រម និងអនុប្រធានលេខាធិការរដ្ឋបាល ឬប្រធានការិយាល័យនៃលេខាធិការដ្ឋានរដ្ឋបាលសាលាដំបូងរាជធានីភ្នំពេញ។
លោកឱ្យដឹងថា មេរៀនដែលត្រូវបង្ហាញដល់មន្ត្រីអនុវត្តច្បាប់នៃសាលាដំបូងរាជធានីភ្នំពេញនេះគឺការបង្ហាញពីទិដ្ឋភាពទូទៅនៃការសម្អាតប្រាក់ ការអង្កេត ការចោទប្រកាន់ និងការរឹបអូសមធ្យោបាយប្រព្រឹត្តបទល្មើសផលនៃបទល្មើសក្នុងការសម្អាតប្រាក់។
លោកបានបញ្ជាក់ថា៖ «ក្នុងពេលថ្មីៗនេះ ព្រះមហាក្សត្របានប្រកាសឱ្យប្រើច្បាប់ចំនួន ២ បន្ថែមទៀតហើយវាមានសារៈសំខាន់យ៉ាងខ្លាំងទាក់ទងទៅនឹងបទល្មើសសម្អាតប្រាក់។ ដូចនេះរបត់ការងារក្នុងវិស័យយុត្តិធម៌បានប្រែប្រួលយ៉ាងខ្លាំងដែលតម្រូវឱ្យមានការបំពាក់បំប៉នសមត្ថភាពដល់ចៅក្រម ព្រះរាជអាជ្ញា និងមន្ត្រីអនុវត្តច្បាប់ផ្សេងទៀតឱ្យបានយល់ និងមានសមត្ថភាពគ្រប់គ្រាន់ក្នុងការអនុវត្តការងាររបស់ខ្លួនឱ្យបានសមស្រប»។
ជាមួយគ្នានេះលោក ស៊ុនឡាយ រំពឹងថា មន្ត្រីមានសមត្ថកិច្ចអនុវត្តច្បាប់ទាំងអស់ក៏នឹងទទួលបានបទពិសោធថ្មីទាក់ទងនឹងការបង្ការទប់ស្កាត់ បង្ក្រាប និងលុបបំបាត់ការសម្អាតប្រាក់ និងហិរញ្ញប្បទានភេរវកម្មនៅក្នុងដែនសមត្ថកិច្ចរបស់ខ្លួនក៏ដូចជានៅទូទាំងប្រទេសផងដែរ។
មិនអាចទាក់ទងប្រធានអង្គការតម្លាភាពកម្ពុជាលោក ប៉ិច ពិសី ដើម្បីសុំអត្ថាធិប្បាយលើបញ្ហានេះបានទេកាលពីថ្ងៃម្សិលមិញ៕