ភ្នំពេញៈ រដ្ឋាភិបាលកម្ពុជា បានសម្រេចដំឡើងប្រាក់កម្រៃប្រចាំខែជូនមន្ត្រីជាប់កិច្ចសន្យាពី ៦០ ម៉ឺនរៀល ទៅ ៦៥ ម៉ឺនរៀល ក្នុង ១ ខែដោយត្រូវចាប់ផ្ដើមអនុវត្តពីខែមករាឆ្នាំ ២០១៩ ខណៈប្រាក់ខែមន្ត្រីរាជការទូទៅក៏ត្រូវដំឡើងផងដែរ។ នេះបើតាមអនុក្រឹត្យចុះហត្ថលេខាដោយលោកនាយករដ្ឋមន្ត្រី ហ៊ុន សែន ចុះថ្ងៃទី ១៨ ខែធ្នូ ឆ្នាំ ២០១៨។
ការដំឡើងនេះធ្វើឡើងក្នុងខណៈពេលដែលគណបក្សប្រជាជនបាននិងកំពុងរៀបចំសន្និបាតគណៈកម្មាធិការកណ្តាលគណបក្ស ដឹកនាំដោយលោកនាយករដ្ឋមន្ត្រីកម្ពុជាជាប្រធានគណបក្ស នៅមជ្ឈមណ្ឌលកោះពេជ្រដែលត្រូវធ្វើឡើងរយៈពេល ៣ ថ្ងៃចាប់ពីថ្ងៃទី ១៨ ដល់ថ្ងៃ ២០ ខែធ្នូ ដោយមានការចូលរួមពីសមាជិកប្រមាណ ៣ ១៥០ នាក់ ជាសន្និបាតដែលនឹងពិនិត្យវាយតម្លៃអំពីសភាពការណ៍ទូទៅអំពីការដកពិសោធការងារកន្លងមក និងការកំណត់ទិសដៅ និងវិធានការនានាដែលត្រូវអនុវត្តពេលខាងមុខ។
អនុក្រឹត្យនេះបានបញ្ជាក់ថា៖ «រាជរដ្ឋាភិបាលសម្រេចដំឡើងប្រាក់កម្រៃប្រចាំខែជូនមន្ត្រីជាប់កិច្ចសន្យាពី ៦០០ ០០០ រៀល ទៅ ៦៥០ ០០០ រៀល។ ការដំឡើងប្រាក់កម្រៃប្រចាំខែដូចកំណត់ខាងលើត្រូវអនុវត្តចាប់ពីថ្ងៃទី ១ ខែមករា ឆ្នាំ ២០១៩តទៅ។
អនុក្រឹត្យដដែលបានបន្ថែមថា ការដំឡើងប្រាក់កម្រៃនេះ គឺសម្រាប់មន្ត្រីជាប់កិច្ចសន្យាដែលបម្រើការងារនៅតាមក្រសួង ស្ថាប័នថ្នាក់ជាតិ និងថ្នាក់ក្រោមជាតិដោយអនុលោមតាមបទប្បញ្ញត្តិនៃអនុក្រឹត្យលេខ ២៦ អនក្រ.បក ចុះថ្ងៃទី ១០ ខែកុម្ភៈ ឆ្នាំ ២០១៦ ស្តីពីការគ្រប់គ្រង និងការប្រើប្រាស់មន្ត្រីជាប់កិច្ចសន្យា។
កាលពីថ្ងៃទី ៥ មករា ឆ្នាំ ២០១៨ កន្លងទៅ រដ្ឋាភិបាលបានសម្រេចដំឡើងប្រាក់កម្រៃប្រចាំខែជូនមន្ត្រីជាប់កិច្ចសន្យាពី ៥០ ម៉ឺនរៀលទៅ ៦០ ម៉ឺនរៀល ក្នុង ១ ខែ។
លោក ពេជ្រ ប៊ុនធិន រដ្ឋមន្ត្រីក្រសួងមុខងារសាធារណៈបានថ្លែងកាលពីម្សិលមិញថា ជារៀងរាល់ឆ្នាំរាជរដ្ឋាភិបាលតែងសម្រេចដំឡើងប្រាក់កម្រៃប្រចាំខែជូនមន្ត្រីជាប់កិច្ចសន្យា ខណៈមន្ត្រីរាជការទូទៅក៏ដំឡើងផងដែរ។
យ៉ាងណាក៏ដោយ ចំពោះចំនួនមន្ត្រីជាប់កិច្ចសន្យា ដែលកំពុងបម្រើការក្នុងស្ថាប័នរដ្ឋនៅទូទាំងប្រទេសនោះ លោក ពេជ្រ ប៊ុនធិន ថា លោកមិនអាចប្រាប់នៅពេលនេះបានទេ ដោយសារឯកសារទាំងនោះមិននៅជាប់នឹងខ្លួនរបស់លោក ។
លោកបានបញ្ជាក់ថា៖ «ខ្ញុំអត់នៅនឹងកន្លែងទេ ដូច្នេះខ្ញុំអត់មានឯកសារមើលថាមានប៉ុន្មាននាក់ទេ ខ្ញុំគ្រាន់តែដឹងថាមន្ត្រីជាប់កិច្ចសន្យាម្នាក់នៅខែ ១ [មករា] បើកបាន ៦៥ ម៉ឺនរៀល ហើយមួយស្រុកខ្មែរមានចំនួនប៉ុន្មានខ្ញុំអត់ដឹងទេ»៕