.jpg)
លោក អូន ព័ន្ធមុនីរ័ត្ន (រូបចាប់ដៃខាងស្តាំ) ចាប់ដៃជាមួយតំណាងធនាគារពិភពលោកក្នុងពិធីចុះហត្ថលេខាកាលពីម្សិលមិញ។ រូបថត WB
ភ្នំពេញៈ រាជរដ្ឋាភិបាលកម្ពុជា និងធនាគារពិភពលោក (WB) ពីម្សិលមិញបានចុះកិច្ចព្រមព្រៀងលើគម្រោងបង្កើនគុណភាពប្រព័ន្ធអប់រំឧត្តមសិក្សា និងការស្រាវជ្រាវ និងដើម្បីពង្រីកឱ្យកាន់តែទូលាយថែមទៀតនូវលទ្ធភាពទទួលបានការអប់រំឧត្តមសិក្សាសម្រាប់សិស្សក្រីក្រដែលមានតម្លៃ ៩០ លានដុល្លារអាមេរិក។
ពិធីចុះហត្ថលេខានេះបានធ្វើឡើងនៅក្រសួងសេដ្ឋកិច្ច និងហិរញ្ញវត្ថុរវាងលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោកស្រី អ៊ីនហ្គូណា ដូប្រាចា នាយកគ្រប់គ្រងធនាគារពិភពលោកប្រចាំនៅកម្ពុជា។
លោកស្រី អ៊ីនហ្គូណា ដូប្រាចា បានថ្លែងនៅក្នុងសេចក្តីប្រកាសព័ត៌មានរបស់លោកស្រីថា៖ «វាមានសារៈសំខាន់ជាសារវន្តណាស់សម្រាប់ប្រទេសកម្ពុជា វិនិយោគទៅលើមូលធនមនុស្សរបស់ខ្លួន និងលើកកម្ពស់នូវជំនាញយុវជនខ្មែរ ដែលពួកគេមានលទ្ធភាពប្រកួតប្រជែងនៅក្នុងបែបផែនសេដ្ឋកិច្ចនាពេលអនាគតបាន។ ការបិទគម្លាតនៃកង្វះខាតផ្នែកហេដ្ឋារចនាសម្ព័ន្ធក៏មានសារៈសំខាន់ជាសារវន្តដែរ ដើម្បីលើកតម្កើងនូវសមត្ថភាពប្រកួតប្រជែងរបស់ប្រទេសកម្ពុជានៅក្នុងតំបន់ និងជំរុញការអភិវឌ្ឍវិស័យឯកជន»។
លោកស្រីបន្ថែមទៀតថា៖ «ការចុះហត្ថលេខាក្នុងថ្ងៃនេះបង្ហាញថា ធនាគារពិភពលោកនៅបន្តភាពជាដៃគូអភិវឌ្ឍន៍ជាមួយប្រទេសកម្ពុជា»។
តាមរយៈគម្រោង HEICP ដែលមានតម្លៃទឹកប្រាក់ ៩០ លានដុល្លារអាមេរិក ធនាគារពិភពលោកនឹងជួយដល់ការខិតខំរបស់ប្រទេសកម្ពុជាក្នុងការបង្កើនគម្រោងដែលមានអាយុកាល ៦ ឆ្នាំនេះនឹងផ្តោតទៅលើការកែលម្អមុខវិជ្ជាវិទ្យាសាស្ត្រ បច្ចេកវិទ្យា វិស្វកម្ម គណិតសាស្ត្រ ព្រមទាំងកម្មវិធីសិក្សាផ្នែកកសិកម្មផងដែរជាមួយនឹងគោលដៅបំពាក់ឱ្យនិស្សិតបញ្ចប់ការសិក្សានូវជំនាញពាក់ព័ន្ធនឹងអាចជួយដល់ប្រទេសកម្ពុជាក្នុងការធ្វើអន្តរកម្មពីបែបផែនសេដ្ឋកិច្ចអតិពលកម្មឱ្យក្លាយទៅជាសេដ្ឋកិច្ចមួយដែលជំរុញទៅមុខដោយចំណេះដឹង។
សកម្មភាពធំៗទាំង ៥ របស់គម្រោងនេះរួមមាន៖ ការផ្តល់មូលនិធិសម្រាប់ការស្រាវជ្រាវនៅតាមផ្នែកមុខវិជ្ជាអាទិភាព ការបង្កើនចំនួនថ្នាក់រៀន និងមន្ទីរពិសោធន៍,ការសង់សយនដ្ឋានសម្រាប់និស្សិតក្រីក្រស្នាក់នៅដូចជានិស្សិតមកពីគ្រួសារក្រីក្រ និងមកពីតំបន់ដាច់ស្រយាល រួមទាំងនិស្សិតស្ត្រីផងដែរ, ការពង្រឹងប្រព័ន្ធធានាគុណភាព និងប្រព័ន្ធព័ត៌មាន, និងការសហការជាមួយដៃគូអន្តរជាតិដើម្បីកែលម្អកម្មវិធី និងវិធីសាស្ត្របង្រៀនលើមុខវិជ្ជាអាទិភាព។
លោក បេង ស៊ីមេត មន្ត្រីជាន់ខ្ពស់ឯកទេសអប់រំនៃធនាគារពិភពលោកបានថ្លែងប្រាប់ភ្នំពេញប៉ុស្តិ៍ថា គម្រោងនេះផ្ដល់អាទិភាពដល់សាលារដ្ឋចំនួន ៥ សហការជាមួយដៃគូសាកលវិទ្យាល័យជាតិ និងអន្តរជាតិដែលនិស្យិតកម្ពុជាចំនួន ១៦ ៣០០ នាក់នឹងបានទទួលផលប្រយោជន៍ពីគម្រោងនេះ។
លោក ស៊ីមេត ថ្លែងថា៖ «នេះជាអាទិភាព និងជាសំណើរបស់រាជរដ្ឋាភិបាល សិស្សបើអត់ចេះ (មុខវិជ្ជាវិទ្យាសាស្ត្រ បច្ចេកវិទ្យា វិស្វកម្ម គណិតសាស្ត្រ) រៀន វិស្វកម្ម (engineering) មិនបាន ចេះទើបប្រើបច្ចេកវិទ្យាបាន ដូចជា Drone ពីមុនគេប្រើនៅក្នុងវិស័យយោធា តែពេលនេះគេប្រើនៅក្នុងវិស័យឧស្សាហកម្ម ដែលនៅក្នុងប្រទេសកម្ពុជាយើងត្រូវការធនធានមនុស្ស»។
លោក រស់ សាលីន អ្នកនាំពាក្យក្រសួងអប់រំកាលពីថ្ងៃម្សិលមិញមិនអាចទាក់ទងសុំអត្ថាធិប្បាយបានទេ។
ជាមួយគ្នានេះដែរទឹកប្រាក់ចំនួន ១១០ លានដុល្លារអាមេរិកដែលជាហិរញ្ញប្បទានបន្ថែមសម្រាប់គម្រោង កែលម្អលក្ខខណ្ឌ សុវត្ថិភាព និងភាពធន់អាកាសធាតុរបស់ផ្លូវជាតិលេខ ៤។ ផ្លូវជាតិមួយនេះកំពុងរងសម្ពាធចរាចរណ៍យ៉ាងមមាញឹកណាស់ឆ្លងកាត់តំបន់សេដ្ឋកិច្ច និងតំបន់កសិកម្មសម្បូរបែបជាច្រើនកន្លែង។
ជំនួយហិរញ្ញប្បទានបន្ថែមនេះនឹងត្រូវបានប្រើប្រាស់សម្រាប់បង្កើនគុណភាពបណ្តោយផ្លូវចម្ងាយជាង ២០០ គីឡូម៉ែត្រឱ្យល្អជាងមុន និងការរៀបចំធ្វើការកែលម្អចិញ្ចើមសងខាងផ្លូវ ដាក់លូបង្ហូរទឹក និងធ្វើស្ពានតាមរចនាប័ទ្មបែបនវានុវត្តន៍ និងមានភាពធន់ទៅនឹងអាកាសធាតុ។
គម្រោងនេះក៏នឹងផ្តោតផងដែរទៅលើការបង្កើនគុណភាពស្ថានីយថ្លឹងទម្ងន់រថយន្តធំដែលមានស្រាប់កាត់បន្ថយហានិភ័យនៃការដឹកលើសទម្ងន់ដំឡើងសញ្ញាតំបន់ល្បឿនមានកម្រិត សញ្ញានាំផ្លូវប្រព័ន្ធភ្លើងបំភ្លឺប្រើថាមពលពន្លឺព្រះអាទិត្យ និងកាមេរ៉ាចាប់ល្បឿនបើកបរ។
លោក អូន ព័ន្ធមុនីរ័ត្ន ថ្លែងនៅក្នុងសេចក្តីប្រកាសព័ត៌មានដដែលនេះថា ដោយបានទទួលស្គាល់នូវកិច្ចសហប្រតិបត្តិការយ៉ាងល្អ រវាងធនាគារពិភពលោក និងរាជរដ្ឋាភិបាលកម្ពុជាដែលបានធ្វើការជាមួយគ្នាក្នុងស្មារតីយោគយល់គ្នាដើម្បីធ្វើយ៉ាងណាឱ្យគម្រោងទាំង ២ នេះបានចេញជាផ្លែផ្កា។
លោកបានថ្លែងថា៖ «ការអភិវឌ្ឍធនធានមនុស្សឱ្យមានជំនាញគឺសំខាន់ណាស់ក្នុងការឈានទៅសម្រេចគោលដៅដូចបានប្រមើលទុកនៅក្រោម “គោលនយោបាយអភិវឌ្ឍន៍ឧស្សាហកម្ម និងផែនការអភិវឌ្ឍន៍ឧស្សាហកម្ម ២០១៥-២០២៥” របស់កម្ពុជា ដើម្បីទ្រទ្រង់ដល់ដំណើរការទំនើបភាវូបនីយកម្មរចនាសម្ព័ន្ធឧស្សាហកម្មនៅក្នុងប្រទេសពីភាពជាឧស្សហកម្មមួយដែលពឹងផ្អែកលើពលកម្មឱ្យទៅជាឧស្សាហកម្មមួយដែលពឹងផ្អែកលើជំនាញត្រឹមឆ្នាំ ២០២៥»។
គម្រោងទាំង ២ នេះទទួលហិរញ្ញប្បទានតាមរយៈឥណទានពីសមាគមអភិវឌ្ឍន៍អន្តរជាតិ (IDA) ដែលជាមូលនិធិរបស់ធនាគារពិភពលោកសម្រាប់ប្រទេសក្រីក្រជាងគេ។ ជំនួយទាំងនេះជាឥណទានគ្មានការប្រាក់ដែលមានអាយុសងឱ្យគ្រប់វិញរយៈពេល ៣៨ ឆ្នាំរួមមានក្នុងនោះរយៈពេលអនុគ្រោះ ៦ ឆ្នាំផង៕
