.jpg)
ជំនួបរវាងមន្ត្រីរដ្ឋាភិបាល និងផ្នែកឯកជនកន្លងមក។ ហ្វេសប៊ុក
ភ្នំពេញៈ រាជរដ្ឋាភិបាលកម្ពុជា បានបង្កើតក្រុមការងារចំនួន ១៣ ក្រុម «តាមវិស័យសម្រាប់ធ្វើការជាដៃគូពិភាក្សាការងារជាមួយវិស័យឯកជន» ជាអ្វីដែលរដ្ឋាភិបាលចាត់ទុកថា ជាតម្រូវការចាំបាច់ ខណៈសង្គមស៊ីវិលក៏យល់ឃើញស្រដៀងគ្នាថា គួរធ្វើឡើងប្រសិនបើមិនមានស្ថាប័នជាក់លាក់ ។
យោងតាមឯកសារកម្រាស់ ១៣ ទំព័រដែលភ្នំពេញប៉ុស្ដិ៍ទទួលបាន លោកនាយករដ្ឋមន្ត្រីហ៊ុន សែន បានចុះហត្ថលេខាបង្កើតក្រុមការងារនេះកាលពីថ្ងៃទី ២៥ ខែមីនា បានសម្រេចបង្កើត «ក្រុមការងារតាមវិស័យសម្រាប់ធ្វើការជាដៃគូពិភាក្សាការងារជាមួយវិស័យឯកជន» ដោយ «យោងតាមតម្រូវការចាំបាច់របស់រាជរដ្ឋាភិបាល»។
ក្រុមងារងារនីមួយៗ ក្នុងចំណោមទាំង ១៣ ក្រុមនោះ ភាគច្រើនដឹកនាំដោយរដ្ឋមន្ត្រីនិងមានសមាសភាពចំនួនជាង ២០ នាក់។ ឧទាហរណ៍ក្រុមការងារផ្នែកកម្មន្តសាលសហគ្រាសធុនតូចនិងមធ្យម និងសេវា ត្រូវបានដឹកនាំដោយលោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្មនិងសិប្បកម្ម។
ក្រុមការងារផ្នែកនីតិកម្ម ពន្ធដារ និងអភិបាលកិច្ច ដឹកនាំដោយលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ។ ក្រុមការងារទាំង ១៣ មានលោកសុក ចិន្ដា សោភា ជាអនុប្រធាន ខណៈលោកក៏ជារដ្ឋមន្ត្រីប្រតិភូអមនាយករដ្ឋមន្ត្រីនិងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា (CDC) ផងនោះ។
ឯកសារសម្រេចបង្កើតក្រុមការងារនេះមិនបានរៀបរាប់ពីតួនាទីរបស់ក្រុមការងារនីមួយៗទេ។
ភ្នំពេញប៉ុស្តិ៍បានសុំការពន្យល់ពីលោក ផៃ ស៊ីផាន អ្នកនាំពាក្យរាជរដ្ឋាភិបាល ប៉ុន្តែលោកថ្លែងយ៉ាងខ្លីថា លោកមិនបានដឹងរឿងនេះទេ ហើយបង្វែរឲ្យសួរទៅប្រភពឯកសារដែលទទួលបាន។
លោក អ៊ូ វីរៈ ប្រធានវេទិកាអនាគតយល់ឃើញថា ការបង្កើតក្រុមការងារឬគណៈកម្មការ គួរតែធ្វើឡើងប្រសិនបើរដ្ឋាភិបាលមិនមានស្ថាប័នជាក់លាក់ដែលមានអាណត្តិនិងការទទួលខុសត្រូវលើបញ្ហាពាក់ព័ន្ធ។លោកបន្តថា ជាញឹកញយបញ្ហារបស់កម្ពុជាគឺការមានអាណត្តិ (ភារកិច្ច) ជាន់គ្នានិងកង្វះបន្ទាត់នៃការទទួលខុសត្រូវ។
លោកបានបញ្ជាក់ថា៖ «មនុស្សជាច្រើនទទួលខុសត្រូវសម្រាប់រឿងដូចគ្នា ហើយតំណែងជាច្រើនត្រូវបានផ្ដល់ឲ្យមនុស្សជាច្រើន។ ការធ្វើសវនកម្ម (ការពិនិត្យ) ទៅលើអាណត្តិរបស់ក្រសួងនីមួយៗនឹងអាចជួយឲ្យដំណើរការមានប្រសិទ្ធភាព ហើយជាលទ្ធផលនឹងធ្វើឲ្យអភិបាលកិច្ចមានប្រសិទ្ធភាពនិងផ្លែផ្កា»។
លោក Arnaud Darc នាយកប្រតិបត្តិនៃក្រុមហ៊ុន Thalias Hospitality Group យល់ឃើញថា រដ្ឋាភិបាលគួរតែពង្រឹងយន្តការដែលមានស្រាប់ដោយបង្កើតការជួបជុំគ្នាជាមួយនាយករដ្ឋមន្ត្រីឲ្យបាន ២ ដងក្នុង ១ ឆ្នាំ ដូចអ្វីដែលនឹងកើតឡើងនៅថ្ងៃសុក្រនេះ។ លោកថាការធ្វើដូច្នេះវាធ្វើឲ្យរបៀបវារៈមួយចំនួនដំណើរការបានលឿន។
យោងតាមការប្រកាសព័ត៌មានរបស់សមាគមរោងចក្រកាត់ដេរនៅកម្ពជា (GMAC) ដែលផ្សព្វផ្សាយពីម្សិលមិញបានឲ្យដឹងថា នៅថ្ងៃសុក្រនេះ លោកនាយករដ្ឋមន្ត្រី ហ៊ុន សែន នឹងចូលរួមក្នុងវេទិការាជរដ្ឋាភិបាលនិងផ្នែកឯកជនលើកទី ១៨ នៅវិមានសន្តិភាព។ វេទិកាជាយន្តការសន្ទនាដ៏មានប្រសិទ្ធភាពដែលបានរៀបចំឡើងតាំងពីឆ្នាំ ១៩៩៩។
GMAC ថ្លែងថាតំណាងវិស័យឯកជនចំនួន ៣ នឹងថ្លែងបទអន្តរាគមន៍ទៅកាន់វេទិកានេះដោយលើកឡើងនូវបញ្ហា និងសំណើនានាទៅកាន់រាជរដ្ឋាភិបាលតាងនាមឲ្យវិស័យឯកជន៕
