The Phnom Penh Post Search

Search form

Logo of Phnom Penh Post newspaper Phnom Penh Post - រដ្ឋាភិបាល បារាំង និង អូស្ត្រាលី អបអរ​សាទរ​លោក ហ៊ុន សែន

រដ្ឋាភិបាល បារាំង និង អូស្ត្រាលី អបអរ​សាទរ​លោក ហ៊ុន សែន

រដ្ឋាភិបាល បារាំង និង អូស្ត្រាលី អបអរ​សាទរ​លោក ហ៊ុន សែន

131014_07
លោកនាយករដ្ឋមន្ត្រី ហ៊ុន សែនក្នុងពិធីមួយកាលពីចុងខែមុន

ភ្នំពេញៈ រដ្ឋាភិបាល អូស្រ្តាលី និង បារាំង បាន​អបអរសាទរ លោក​នាយក​រដ្ឋ​មន្រ្តី ហ៊ុន សែន ចំពោះ​ការ​ឈ្នះ​ឆ្នោត ដោយ​រដ្ឋាភិបាល​ទាំង​ពីរ បាន​ក្លាយ​ជា​ម្ចាស់​ជំនួយ​លោក​ខាង​លិច​ទី ១ ដែល​បាន​សម្តែង​ការ​អបអរសាទរ ចាប់​តាំង​ពី​លទ្ធផល​បោះឆ្នោត​ផ្លូវ​ការ​ដ៏​ចម្រូង​ចម្រាស ត្រូវ​បាន​ប្រកាស​កាល​ពី​ថ្ងៃ ទី៨ ខែ កញ្ញា។

យោង​តាម​មន្រ្តី​ក្រសួង ការ​បរទេស បាន​អះអាង​ថា លោក បាន គីមូន អគ្គ​លេខាធិការ​អង្គការ​សហ​ប្រជាជាតិ ក៏​បាន​សម្តែង​ការ​សាទរ ចំពោះ​លោក ហ៊ុន សែន ផង​ដែរ នៅ​ក្រៅ​កិច្ច​ប្រជុំ​កំពូល​អាស៊ាន​លើក​ទី ២៣ នៅ​ប្រទេស ប្រ៊ុយណេ កាល​ពី​សប្តាហ៍​មុន។ ការ​ទទួល​ស្គាល់​ជា​អន្តរជាតិ​នេះ​បាន​ធ្វើ​ឡើង​ខណៈ​ដែល​លោក សម រង្ស៊ី មេ​ដឹក​នាំ​បក្ស​ប្រឆាំង បាន​បន្ត​ដំណើរ​ទៅ​ក្រៅ​ប្រទេស ដើម្បី​ប្រមែ​ប្រមូល​ការ​ថ្កោល​ទោស​ជា​អន្តរជាតិ លើ​រដ្ឋាភិបាល ដែល​គណបក្ស​របស់​លោក​ហៅ​ថា ត្រូវ​បាន​បង្កើត​ឡើង​ដោយ​ខុស​ច្បាប់។

លោក​ស្រី មូរ សុខហួរ ប្រធាន​ផ្នែក​កិច្ចការ​សាធារណៈ របស់​គណបក្ស​ប្រឆាំង បាន​ឲ្យ​ដឹង​ថា បន្ទាប់​ពី​បាន​ឈប់​នៅ​រដ្ឋសភា​អឺរ៉ុប ក្នុង​ទីក្រុង Strasbourg និង​សហភាព​អឺរ៉ុប នៅ​ទីក្រុង Brussels លោក សម រង្ស៊ី ស្ថិត​នៅ​ទីក្រុង ប៉ារីស កាល​ពី​ថ្ងៃ​ម្សិលមិញ ដែល​លោក​គ្រោង​ជួប​មន្រ្តី​រដ្ឋាភិបាល​បារាំង។ «រដ្ឋាភិបាល ដែល​ទទួល​ស្គាល់​ការ​បោះឆ្នោត ដែល​មិន​សេរី និង​យុតិ្តធម៌​នេះ កំពុង​តែ​ធ្វើ​ឲ្យ​ខ្លួន​ឯង​ទទួល​ខុស​ត្រូវ ចំពោះ​ពិភពលោក ដោយ​សារ​តែ​ការ​ខក​ខាន ក្នុង​ការ​ជំរុញ​លទ្ធិ​ប្រជាធិបតេយ្យ​នៅ​កម្ពុជា»។

លោក ឯក ថា អ្នក​នាំ​ពាក្យ​ម្នាក់​នៃ​ទីស្តីការ​គណៈ​រដ្ឋ​មន្រ្តី ថ្លែង​ថា រដ្ឋាភិបាល បាន​បង្កើត​ឡើង​តាម​ច្បាប់ ដែល​ជា​មូលហេតុ​ធ្វើ​ឲ្យ​សហគមន៍​អន្តរជាតិ​គាំទ្រ។ «យើង​មាន សុទិដ្ឋិនិយម​ដែល​សហគមន៍​អន្តរជាតិ បន្ត​ផ្តល់​ជំនួយ​ឥត​សំណង​ព្រម​ទាំង​កម្ចី​ដល់​កម្ពុជា។ គ្រប់​ប្រទេស​ទាំង​អស់​កំពុង​គាំទ្រ​យើង​ពេល​នេះ គឺ​ចាប់​ពី​រដ្ឋាភិបាល​អាស៊ី​ដល់​រដ្ឋាភិបាល​លោក​ខាង​លិច»។

លិខិត​ពី​លោក Tony Abbott នាយក​រដ្ឋ​មន្រ្តី អូស្រ្តាលី និង​លោក Jean-Marc Ayrault នាយក​រដ្ឋ​មន្រ្តី បារាំង ត្រូវ​បាន​ផ្សព្វ​ផ្សាយ ដោយ​ក្រសួង ការ​បរទេស កាល​ពី​ថ្ងៃ​សុក្រ។ មេ​ដឹក​នាំ​ទាំង​ពីរ ក៏​បាន​ផ្តោត​លើ​ការ​ផ្សះផ្សា​នយោបាយ​រវាង​គណបក្ស​ទាំង​ពីរ​ផង​ដែរ។

គណបក្ស​សង្គ្រោះ​ជាតិ ដែល​ទទួល​បាន​អាសនៈ​ចំនួន ៥៥ ក្នុង​រដ្ឋសភា បាន​ធ្វើ​ពហិការ​ក្នុង​ការ​ប្រជុំ រដ្ឋសភា ចាប់​តាំង​ពី​ការ​បើក​សម័យ​ប្រជុំ​លើក​ដំបូង កាល​ពី​ថ្ងៃ​ទី ២៣ ខែ កញ្ញា ជា​ការ​តវ៉ា​ចំពោះ​ភាព​មិន​ប្រក្រតី​ជា​ទូទៅ នៃ​ការ​បោះឆ្នោត ដែល​គណបក្ស​ប្រឆាំង​ថា ចាំ​បាច់​ត្រូវ​មាន​ការ​ស៊ើប​អង្កេត​ឯករាជ្យ។

កិច្ច​ប្រជុំ​រវាង​គណបក្ស​ទាំង​ពីរ​កាល​ពី​ថ្ងៃ​ទី ១៦ ខែ កញ្ញា បាន​សន្យា​ធ្វើ​ការ​ចរចា​បន្ត​ទៀត និង​កំណែ​ទម្រង់​ប្រព័ន្ធ​បោះឆ្នោត​ដែល​ពុំ​បាន​បញ្ជាក់​លម្អិត ប៉ុន្តែ​មិន​មាន​ការ​រីក​ចម្រើន​សោះ​ចាប់​តាំង​ពី​ពេល​នោះ​មក។

លោក Carlyle Thayer អ្នក​សិក្សា និង​ឃ្លាំ​មើល​ប្រទេស​កម្ពុជា នៅ​បណ្ឌិត​សភា​កងទ័ព​ការពារ​ជាតិ អូស្រ្តាលី បាន​ថ្លែង​ថា មហា​អំណាច​បរទេស អាច​ទទួល​យក​ភាព​ស្រប​ច្បាប់​នៃ​រដ្ឋាភិបាល «ហើយ​ទន្ទឹម​នឹង​នេះ មាន​ក្តី​បារម្ភ​ធ្ងន់​ធ្ងរ​អំពី​ដំណើរការ​បោះឆ្នោត»។ លោក​ថា៖ «ច្បាស់​ណាស់​គេ​នឹង​បន្ត​ដាក់​សម្ពាធ​ដើម្បី​ឲ្យ​មាន​ការ​ដោះស្រាយ​គុណវិបតិ្ត​ទាំង​នោះ​មុន​ពេល​ការ​បោះឆ្នោត​លើក​ក្រោយ​»។

លោក​បន្ថែម​ថា មហា​អំណាច​ដទៃ​ទៀត​ដូចជា អាមេរិក និង​សហគមន៍​អឺរ៉ុប នឹង​សម្តែង​ការ​អបអរ​សាទរ​ដូច​គ្នា​ផង​ដែរ​។ «វា​ជា​ទម្លាប់​ដែល​អ្នក​ចេញ​លិខិត​ទទួល​ស្គាល់...វា​គួរ​ចេញ​ពី​សហរដ្ឋ អាមេរិក ប្រសិន​បើ​មិន​អ៊ីចឹង​ទេ វា​បង្ហាញ​អំពី​ការ​មិន​ពេញ​ចិត្ត​របស់​អាមេរិក»។

ប្រទេស​ដទៃ​ទៀត ដែល​បាន​សម្តែង​ការ​អបអរសាទរ ដល់​រដ្ឋាភិបាល​កម្ពុជា​ថ្មី រួម​មាន ចិន កូរ៉េ សិង្ហបុរី ជប៉ុន ឥណ្ឌា និង ប្រេស៊ីល៕ TK

រាយការណ៍​បន្ថែម​ដោយ វង្ស សុខេង

អត្ថបទគួរចាប់អារម្មណ៍