The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋាភិបាល ​សម្រេច​ផ្ដល់​ប្រាក់​ឧបត្ថម្ភ​ដល់​មន្ត្រី​សម្រាប់​ពិធី​ចូលឆ្នាំ​ថ្មី

រដ្ឋាភិបាល ​សម្រេច​ផ្ដល់​ប្រាក់​ឧបត្ថម្ភ​ដល់​មន្ត្រី​សម្រាប់​ពិធី​ចូលឆ្នាំ​ថ្មី

មន្ត្រី​រាជការ និង​កងកម្លាំង​ប្រដាប់​អាវុធ​ក្នុង​អង្គ​សិក្ខា​សាលា​កន្លង​មក។
មន្ត្រី​រាជការ និង​កងកម្លាំង​ប្រដាប់​អាវុធ​ក្នុង​អង្គ​សិក្ខា​សាលា​កន្លង​មក។ ហុង មិនា

រដ្ឋាភិបាល ​សម្រេច​ផ្ដល់​ប្រាក់​ឧបត្ថម្ភ​ដល់​មន្ត្រី​សម្រាប់​ពិធី​ចូលឆ្នាំ​ថ្មី

ភ្នំពេញៈ រាជរដ្ឋាភិបាល​កម្ពុជា​បាន​សម្រេច​ផ្តល់​ប្រាក់​ឧបត្ថម្ភ​បន្ថែម​ដល់​មន្ត្រី​រាជការ​ទូទាំង​ប្រទេស​រួម​ទាំង​មន្ត្រី​ចូល​និវត្តន៍​អតីត​មន្ត្រី​រាជការ​ក្នុង​ម្នាក់ៗ​ទទួល​បាន​ ៥ ​ម៉ឺន​រៀល​ដើម្បី​ជា​ការ​ជួយ​សម្រួល​ការ​ចំណាយ​ក្នុង​ថ្ងៃ​បុណ្យ​ចូលឆ្នាំ​ថ្មី​ប្រពៃណី​ជាតិ​ខណៈ​ដែល​សមាគម​គ្រូ​បង្រៀន​កម្ពុជា​ឯករាជ្យ​ដែល​បាន​ដាក់​សំណើ​បាន​សាទរ​ប៉ុន្តែ​បាន​សំណូមពរ​ដល់​រដ្ឋាភិបាល​គួរ​បន្ថែម​ឱ្យ​គ្រប់​ ១៥ ម៉ឺន​រៀល​សម្រាប់​បុណ្យ​ជាតិ​លើក​ក្រោយ។

អនុក្រឹត្យ​ចេញ​ដោយ​លោក​នាយក​រដ្ឋមន្ត្រី​ ហ៊ុន សែន ចុះ​ថ្ងៃ​ទី ២៥ ខែ​មីនា​បាន​សម្រេច​ផ្តល់​ឱ្យ​មន្ត្រីរាជការ​ស៊ីវិល​​ក្នុង​ម្នាក់ៗ​ ៥ ​ម៉ឺន​រៀល។ អ្នក​ដែល​នឹង​ត្រូវ​ទទួល​បាន​ប្រាក់​ឧបត្ថម្ភ​​រួម​មាន «មន្ត្រីរាជការ​ស៊ីវិល​នៃ​ក្រុម​នីតិប្បញ្ញត្តិ នីតិប្រតិបត្តិ តុលាការ យោធិន​ការពារ​ជាតិ មន្ត្រី​ក្រសួង​មហាផ្ទៃ សមាជិក​ក្រុមប្រឹក្សា​គ្រប់​ជាន់​ថ្នាក់ មន្ត្រី​ជាប់​កិច្ចសន្យា បុគ្គលិក​បណ្តែត​ដែល​កំពុង​ធ្វើការ​នៅ​ថ្នាក់​ជាតិ និង​ថ្នាក់​ក្រោម​ជាតិ និង​មន្ត្រី​ចូល​និវត្តន៍​ព្រម​ទាំង​ជនពិការ​ជា​អតីត​មន្ត្រី​រាជការ​ស៊ីវិល»។

រដ្ឋាភិបាល​បញ្ជា​ឱ្យ​ក្រសួង​ទទួល​បន្ទុក​រួមមាន​ក្រសួង​សេដ្ឋកិច្ច និង​ហិរញ្ញវត្ថុ និង​ក្រសួង​មុខងារ​សាធារណៈ​ត្រូវ​សហការ​គ្នា​ផ្តល់​ប្រាក់​ឧបត្ថម្ភ​នេះ​យ៉ាង​យូរ​បំផុត​ត្រឹម​ថ្ងៃ​ទី​ ១១ ខែ​មេសា ឆ្នាំ ២០១៦។

កាលពី​ថ្ងៃ​ទី ២៣ ខែ​មីនា សមាគម​គ្រូ​បង្រៀន​កម្ពុជា​ឯករាជ្យ​បាន​ស្នើ​ទៅ​លោក​នាយក​រដ្ឋមន្រ្តី​ផ្តល់​ប្រាក់​បន្ថែម​ដល់​មន្រ្តី​រាជការ​ឱ្យ​បាន​ម្នាក់ៗ​ ១៥ ​ម៉ឺន​រៀល​ដើម្បី​​លើក​ទឹកចិត្ត និង​រួម​ចំណែក​​កាត់​បន្ថយ​ការ​ចំណាយ​របស់​​ពួកគេ​ក្នុង​ពិធី​បុណ្យ​ចូល​ឆ្នាំ​ថ្មី​ខណៈ​ដែល​ប្រាក់​ខែ​គ្រូ​បង្រៀន​មន្ត្រី​រាជការ​ស៊ីវិល ទាហាន នគរបាល និង​កងកម្លាំង​ដទៃ​ទៀត​មាន​កម្រិត​នៅ​ឡើយ​មិន​សមាមាត្រ​ទៅ​នឹង​ទំនិញ​លើ​ទីផ្សារ​ដែល​មាន​តម្លៃ​ថ្លៃ។

ក្នុង​សំណើ​នោះ​បាន​​លើក​ឡើង​ថា «ដើម្បី​ជួយ​បន្ធូរ​នូវ​ការ​លំបាករ​បស់​គ្រូបង្រៀន មន្ត្រី​រាជការ និង​កងកម្លាំង​ប្រដាប់​អាវុធ​ឱ្យ​បាន​មួយ​កម្រិត​មាន​តែ​រដ្ឋាភិបាល​ (លោក​នាយក​រដ្ឋមន្ត្រី ហ៊ុន សែន​) ​មេត្តា​ពិនិត្យ​លទ្ធភាព​ដើម្បី​ផ្តល់​ប្រាក់​ឧបត្ថម្ភ​បន្ថែម​ឱ្យ​បាន​ម្នាក់​ ១៥​ ម៉ឺន​រៀល»។

បើ​តាម​អនុក្រឹត្យ​ប្រាក់​ឧបត្ថម្ភ​នេះ​ត្រូវ​ផ្តល់​ចូល​ទៅ​ក្នុង​គណនី​បៀវត្សរ៍​សាមីជន​ម្នាក់ៗ​ដោយ​ផ្ទាល់​តែ​បើ​មន្ត្រី​រាជការ​ណា​មិន​ទាន់​បាន​បើក​គណនី ក្រសួង ស្ថាប័ន ឬ អង្គភាព​របស់​ពួកគេ​ត្រូវ​បើក​ឲ្យ​ដល់​ដៃ​របស់​​សាមីជន​ឲ្យ​គ្រប់​ចំនួន និង​ទាន់​ពេល​។

ប្រធាន​ស្តីទី​សមាគម​គ្រូបង្រៀន​កម្ពុជា​ឯករាជ្យ​អ្នកស្រី អ៊ុក ឆាយ៉ាវី បាន​សម្តែង​ការ​សាទរ​ចំពោះ​ការ​ផ្តល់​ជូន​នេះ​បើ​ទោះ​ជា​​មាន​ចំនួន​តិច​ក្ដី។ អ្នកស្រី​ថា៖ «បើ​សិន​​រដ្ឋាភិបាល​បាន​ឆ្លើយតប​នូវ​អ្វី​ដែល​យើង​ខ្ញុំ​ចង់​បាន​ ១៥ ម៉ឺន​រៀល​នេះ​ខ្ញុំ​គិត​ថា​កាន់​តែ​ប្រសើរ​ព្រោះ​ទំនិញ​លើ​ទីផ្សារ និង​មធ្យោបាយ​ធ្វើ​ដំណើរ​ឡើង​ថ្លៃ​ខ្ពស់»។

យ៉ាង​​នេះ​ក្តី​អ្នកស្រី​ស្នើ​ដល់​រដ្ឋាភិបាល​ត្រូវ​គិតគូរ​ផ្តល់​ប្រាក់​បន្ថែម​ឱ្យ​បាន​ ១៥ ​ម៉ឺន​រៀល​នៅ​ពេល​​បុណ្យ​ជាតិ​ធំៗ​លើក​ក្រោយ​រួមមាន បុណ្យ​ចូលឆ្នាំ​ថ្មី និង​អុំទូក​ជាដើម។

អ្នកស្រី​ថា៖ ​«​ខ្ញុំ​ត្រូវ​តែ​សប្បាយ​ចិត្ត​ចំពោះ​រាល់​ការ​ឆ្លើយតប ប៉ុន្តែ​ការ​ឆ្លើយតប​នេះ​​មាន​ចំនួន​តិច​មែន​ទែន​ហើយ​សំណូមពរ​ដល់​រដ្ឋាភិបាល​ត្រូវ​គិតគូរ​ថា​តើ​ថវិកា​ប៉ុន្មាន​ដែល​គួរ​នាយក​រដ្ឋមន្រ្តី​ចាយ​គ្រប់​សម្រាប់​ប្រាក់​ឧបត្ថម្ភ​នេះ»​។

ដោយ​ឡែក​អនុក្រឹត្យ​មួយ​ទៀត​រដ្ឋាភិបាល​ក៏​បាន​សម្រេច​បន្ថែម​ប្រាក់​របប​សន្តិសុខ​សង្គម​ដល់​អតីត​មន្រ្តី​រាជការ​ស៊ីវិល​អតីត​យុទ្ធជន​ចូល​និវត្ដន៍​បាត់បង់​សម្បទា​វិជ្ជាជីវៈ បាត់បង់​សមត្ថភាព​ការងារ និង​ពិការភាព​ចន្លោះ​ពី ២ ​ម៉ឺន​រៀល​ដល់ ៣ ​ម៉ឺន​រៀល​ចាប់ពី​ថ្ងៃ​ទី ១ ខែ​មេសា​ទៅ​លើ​ពួកគេ​ដែល​មាន​ប្រាក់​បៀវត្សរ៍​បច្ចុប្បន្ន​ក្នុង​ចន្លោះ​ពី​ជាង ៣ សែន​រៀល​ដល់​ជាង ៥ សែន​រៀល។ កាលពី​ឆ្នាំ ២០១៥ ​រដ្ឋាភិបាល​ផ្តល់​ប្រាក់​ឧបត្ថម្ភ​ដល់​មន្រ្តី​រាជការ​ទូទាំង​ប្រទេស​ក្នុង​ម្នាក់​ទទួល​បាន ៤ ម៉ឺន​រៀល​។

ភ្នំពេញ​ប៉ុស្តិ៍​មិន​អាច​សុំ​ការ​អត្ថាធិប្បាយ​បន្ថែម​ពី​រដ្ឋមន្ត្រី​ក្រសួង​មុខងារ​សាធារណៈ​លោក ពេជ្រ ប៊ុនធិន បាន​នៅ​ឡើយ​ទេ​តែ​កន្លង​ទៅ​លោក​ធ្លាប់​ប្រាប់​ថា​៖ «រាល់​ការ​ផ្តល់​ប្រាក់​បន្ថែម​ ឬ​ប្រាក់​លើក​ទឹកចិត្ត​គឺ​អាស្រ័យ​ទៅ​លើ​រដ្ឋ​មាន​ទឹកប្រាក់​គ្រប់គ្រាន់​សម្រាប់​ការ​ចាយវាយ​ឬ​អត់?»។

បច្ចុប្បន្ន​មាន​មន្ត្រី​រាជការ​ស៊ីវិល​នៅ​គ្រប់​ស្ថាប័ន​ក្រសួង​រដ្ឋ​ទាំងអស់​ក្នុង​រង្វង់ ២០ ម៉ឺន​នាក់៕

អត្ថបទគួរចាប់អារម្មណ៍