The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋ​ដាក់​លក់​ឡាយ​ឡុង​រថយន្ត​ដឹក​ឈើ​ខុស​ច្បាប់

រដ្ឋ​ដាក់​លក់​ឡាយ​ឡុង​រថយន្ត​ដឹក​ឈើ​ខុស​ច្បាប់

រថយន្ត​ដឹក​ឈើ​ល្មើស​ច្បាប់​ដែល​រឹប​អូស​បាន​រដ្ឋ​ដាក់​លក់​ឡាយ​ឡុង​ជម្រះ​បញ្ជី។
រថយន្ត​ដឹក​ឈើ​ល្មើស​ច្បាប់​ដែល​រឹប​អូស​បាន​រដ្ឋ​ដាក់​លក់​ឡាយ​ឡុង​ជម្រះ​បញ្ជី។ រូបថត សហការី

រដ្ឋ​ដាក់​លក់​ឡាយ​ឡុង​រថយន្ត​ដឹក​ឈើ​ខុស​ច្បាប់

កំពង់ឆ្នាំងៈ រថយន្ត​ដឹក​ឈើ​ខុស​ច្បាប់ ៧៥៧ គ្រឿង ដែល​ត្រូវ​បាន​សមត្ថកិច្ច​ទូទាំង​ខេត្ត​ក្រុង​បង្ក្រាប នឹង​ដក​ហូត​បាន​ពី​បទ​ល្មើស​ព្រៃ​ឈើ​ចន្លោះ ឆ្នាំ​២០០៤ ដល់ ២០១១ ត្រូវ​បាន​ក្រសួង​កសិកម្ម ប្រកាស​លក់​ឡាយ​ឡុង​នៅ​ថ្នាក់​ជាតិ ក្នុង​នោះ​មាន ១៦ គ្រឿង​នៅ​ក្នុង​រដ្ឋបាល​ព្រៃ​ឈើ ខេត្ត​កំពង់ឆ្នាំង ត្រូវ​អ្នក​ដេញ​ថ្លៃ​ដឹក​ជញ្ជូន​យក​ចេញ​កាល​ពី​ថ្ងៃ ទី២១ តុលា។

ផ្អែក​លើ ស.ជ.ណ លេខ ១០៨៥ របស់​ទីស្តីការ​គណៈ​រដ្ឋ​មន្រ្តី ក្រសួង​កសិកម្ម រុក្ខា​ប្រមាញ់ និង​នេសាទ បាន​ចេញ​សេចក្តី​ប្រកាស​លេខ ៤២៦ ចុះ​ថ្ងៃ ទី២៨ ខែ​សីហា ឆ្នាំ​២០១៤ ប្រកាស​ដាក់​ដេញ​ថ្លៃ​រថយន្ត​ឡាយ​ឡុង​មាន​ចំនួន ៧៥៧ គ្រឿង ដែល​សមត្ថកិច្ច​រដ្ឋបាល​ព្រៃ​ឈើ​នៅ​គ្រប់​ខេត្ត​ក្រុង​បង្ក្រាប​និង​ដក​ហូត​ពី​បទ​ល្មើស​ព្រៃ​ឈើ​ចាប់​តាំង​ពី ឆ្នាំ​២០០៤ ដល់ ២០១១ ដើម្បី​ជម្រះ​ចេញ​ពី​បញ្ជី​កត់​ត្រា​សារពើភ័ណ្ឌ​របស់​រដ្ឋ ក្រោយ​ពី​តុលាការ​បាន​ប្រកាស​សាល​ក្រម​រឹប​អូស​យក​ជា​សម្បត្តិ​រដ្ឋ​រួច​មក​នោះ។

កាល​ពី ខែ​កញ្ញា ការ​ប្រកាស​ដាក់​ឲ្យ​ដេញ​ថ្លៃ​រថយន្ត​ជា​សាធារណៈ​កម្រិត​ថ្នាក់​ជាតិ នេះ មាន​អ្នក​ចុះ​ឈ្មោះ​ដេញ​ថ្លៃ​ចំនួន ៤​នាក់។ ការ​ដេញ​ថ្លៃ​នោះ បាន​ទៅ​ឈ្មោះ ម៉ា សុធី ក្នុង​តម្លៃ ២៤៨.៩៥០.០០០ រៀល ប៉ុន្តែ​ការ​ដាក់​ដេញ​ថ្លៃ​នោះ បាន​តែ​រថយន្ត​ចំនួន ៥៤៣ គ្រឿង ព្រោះ​រថយន្ត​ចំនួន ២១៤ គ្រឿង​ទៀត ពុក​ផុយ​រលួយ ត្រូវ​លក់​ឲ្យ​អេតចាយ។

នាយ​រង​ខណ្ឌ​រដ្ឋបាល​ព្រៃឈើ ខេត្ត​កំពង់ឆ្នាំង លោក ថោង វីរ៉ាវុឌ្ឍី បាន​ឲ្យ​ដឹង​ថា កាល​ពី​ល្ងាច​ថ្ងៃ ទី២១ ខែ​តុលា រថយន្ត​លក់​ឡាយ​ឡុង​ចំនួន ១៦ គ្រឿង ដែល​បាន​ដាក់​ដេញ​ថ្លៃ ត្រូវ​ដឹក​ជញ្ជូន​ចេញ​ពី​ទីស្នាក់ការ​រដ្ឋបាល​ព្រៃ​ឈើ​ខេត្ត​ហើយ។

លោក​បញ្ជាក់​ថា៖ «ករណី​ឡាន​ពុក​ខូច​នៅ ខេត្ត​កំពង់ឆ្នាំង អត់​មាន​ទេ ប៉ុន្តែ​នៅ​តាម​ខេត្ត​ផ្សេងៗ អាច​មាន​ខ្លះ»៕

អត្ថបទគួរចាប់អារម្មណ៍