The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋ​មន្ត្រី​ពីរ​រូប​ត្រូវ​គណៈកម្មការ​សភា​ហៅ​សួរ

រដ្ឋ​មន្ត្រី​ពីរ​រូប​ត្រូវ​គណៈកម្មការ​សភា​ហៅ​សួរ

លោក យ៉ែម បុញ្ញឫទ្ធិ ប្រធាន​គណៈកម្មការ ទី៧ ដែល​កោះ​ហៅ​រដ្ឋ​មន្ត្រី​ទាំង​ពីរ​មក​បំភ្លឺ។
លោក យ៉ែម បុញ្ញឫទ្ធិ ប្រធាន​គណៈកម្មការ ទី៧ ដែល​កោះ​ហៅ​រដ្ឋ​មន្ត្រី​ទាំង​ពីរ​មក​បំភ្លឺ។ រូបថត អនឡាញ

រដ្ឋ​មន្ត្រី​ពីរ​រូប​ត្រូវ​គណៈកម្មការ​សភា​ហៅ​សួរ

ភ្នំពេញៈ គណៈកម្មការ ទី៧ នៃ​រដ្ឋសភា នឹង​កោះ​ហៅ​រដ្ឋ​មន្រ្តី​ក្រសួង​ទេសចរណ៍ និង​ក្រសួង​វប្បធម៌ វិចិត្រ​សិល្បៈ ឲ្យ​ចូល​ឆ្លើយ​បំភ្លឺ​នៅ​វិមាន​រដ្ឋសភា ជុំវិញ​ការ​គ្រប់​គ្រង​លើ​វិស័យ​ទាំង​ពីរ​នេះ​នៅ​ក្នុង​ពាក់​កណ្តាល​និង​ចុង ខែ​វិច្ឆិកា នេះ។

ព័ត៌មាន​តាម​គេហទំព័រ​ហ្វេសប៊ុក​របស់ លោក យ៉ែម បុញ្ញឫទ្ធិ ប្រធាន​គណៈ​កម្មការ​អប់រំ យុវជន កីឡា ធម្មការ កិច្ចការ​សាសនា វប្បធម៌ និង​ទេសចរណ៍ ដែល​បាន​បង្ហោះ​កាល​ពី​យប់​ថ្ងៃ​ចន្ទ​បាន​ឲ្យ​ដឹង គម្រោង​កោះ​ហៅ​មក​បំភ្លឺ​នេះ រួម​មាន​រដ្ឋ​មន្រ្តី​ក្រសួង​ទេសចរណ៍ លោក ថោង ខុន គឺ​នៅ​ថ្ងៃ ទី១៩ ខែ​វិច្ឆិកា ចំណែក​រដ្ឋ​មន្រ្តី​ក្រសួង​វប្បធម៌ និង​វិចិត្រ​សិល្បៈ លោក​ស្រី ភឿង សកណា គឺ​នៅ​ថ្ងៃ ទី២៦ ខែ​វិច្ឆិកា ឆ្នាំ​២០១៤ នេះ។

ទន្ទឹម​នឹង​ការ​ជូន​ដំណឹង​នេះ លើ​ទំព័រ​ហ្វេសបុក​របស់​លោក យ៉ែម បុញ្ញឫទ្ធិ ក៏​បាន​ប្រកាស​ទទួល​យក​សំណួរ​ពី​អ្នក​ប្រើ​ប្រាស់​បណ្តាញ​ហ្វេសប៊ុក​ផង​ដែរ តាម​រយៈ​ការ​បញ្ចេញ​មតិ (Comments) ដើម្បី​លើក​ទៅ​ពិចារណា​ដើម្បី​ចោទ​សួរ​ទៅ​លើ​រដ្ឋ​មន្រ្តី​ទាំង​ពីរ​រូប​នោះ។

លោក យ៉ែម បុញ្ញឫទ្ធិ បញ្ជាក់​ឲ្យ​ដឹង​ថា ការ​ចោទ​សួរ​នេះ បើ​ចំពោះ​ក្រសួង​ទេសចរណ៍ គឺ​នឹង​ផ្តោត​លើ​ផែនការ​ការងារ ការ​គ្រប់​គ្រង​ចំណូល​ជាតិ​របស់​ស្ថាប័ន​នេះ គួប​ផ្សំ​នឹង​ការ​បំភ្លឺ​ពី​ភាព​អនាធិបតេយ្យ​នៃ​តំបន់​ទេសចរណ៍​អង្គរវត្ត និង​តំបន់​ភ្នំ​បូក​គោ ដែល​បច្ចុប្បន្ន​នេះ​ហាក់​មិន​សូវ​មាន​សណ្តាប់​ធ្នាប់។

លោក​បញ្ជាក់​ថា៖ «ព័ត៌មាន​ដែល​យើង​ទទួល​បាន គឺ​តំបន់​ទាំង​នោះ​មាន​រៀបចំ​ពិធី​សាសនា​ច្រើន​ប្រភេទ ដែល​មិន​មែន​ជា​បុណ្យ​ជាតិ​ខ្មែរ ហើយ​សណ្តាប់​ធ្នាប់​គឺ​មិន​សូវ​ល្អ​នោះ​ទេ»។

សម្រាប់​ក្រសួង​វប្បធម៌​និង​វិចិត្រ​សិល្បៈ​វិញ លោក យ៉ែម បុញ្ញឫទ្ធិ អះអាង​នឹង​ចោទ​សួរ​លើ​ការ​គ្រប់​គ្រង​សម្បត្តិ​វប្បធម៌​ជាតិ ការ​អភិរក្ស​វប្បធម៌ ចម្រៀង និង​ឯកសារ៖ «យើង​ក៏​ចង់​ដឹង​ពី​ចំណាត់​ការ​កន្លង​ទៅ​ថ្មីៗ​នេះ រឿង​ស្រ្តី​បរទេស ដែល​បាន​ធ្វើ​ឲ្យ​ខូច​ពុទ្ធ​បដិមា​នៅ​អង្គរ​ធំ​ផង​ដែរ ថា​តើ​ដោះ​ស្រាយ​ដល់​ណា​ហើយ»។

ភ្នំពេញ ប៉ុស្តិ៍ មិន​អាច​សុំ​ការ​ឆ្លើយ​តប​ពី​រដ្ឋ​មន្រ្តី​ក្រសួង​ទេសចរណ៍ លោក ថោង ខុន បាន​ទេ កាល​ពី​ម្សិល​មិញ​នេះ ប៉ុន្តែ​រដ្ឋ​មន្រ្តី​ក្រសួង​វប្បធម៌ និង​វិចិត្រ​សិល្បៈ លោក​ស្រី ភឿង សកណា បាន​ឆ្លើយ​តប​ថា លោក​ស្រី​នឹង​ចូល​មក​បំភ្លឺ​តាម​ការ​កោះ​នេះ នៅ​ម៉ោង ២ រសៀល​តាម​ថ្ងៃ​កំណត់។

លោក​ស្រី​រដ្ឋ​មន្ត្រី​បាន​បន្ត​ថា៖ «លិខិត​នោះ គ្រាន់​តែ​ស្នើ​បំភ្លឺ​លើ​វិស័យ​វប្បធម៌ មិន​បាន​បញ្ជាក់​លម្អិត​នូវ​សំណួរ​នោះ​ទេ...ខ្ញុំ​មិន​បារម្ភ​អី​ទេ ព្រោះ​ជា​ការងារ​ប្រចាំ​ថ្ងៃ​ធម្មតា មិន​ជា​បញ្ហា​អី​ទេ»៕

អត្ថបទគួរចាប់អារម្មណ៍