The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋ​មន្ត្រី​សង្គមកិច្ច​ត្រូវ​ស្នើ​ឲ្យ​ពន្លឿន​ការ​អនុវត្ត​អនុក្រឹត្យ​ស្តី​ពី​របប​សន្តិសុខ​សង្គម

រដ្ឋ​មន្ត្រី​សង្គមកិច្ច​ត្រូវ​ស្នើ​ឲ្យ​ពន្លឿន​ការ​អនុវត្ត​អនុក្រឹត្យ​ស្តី​ពី​របប​សន្តិសុខ​សង្គម

រដ្ឋ​មន្ត្រី​សង្គមកិច្ច​ត្រូវ​ស្នើ​ឲ្យ​ពន្លឿន​ការ​អនុវត្ត​អនុក្រឹត្យ​ស្តី​ពី​របប​សន្តិសុខ​សង្គម

ភ្នំពេញៈ សមាគម​មន្រ្តី​រាជការ​ឯករាជ្យ​កម្ពុជា​បាន​ដាក់​លិខិត​មួយ​ច្បាប់​ជូន​លោក​រដ្ឋ​មន្រ្តី​ក្រសួង​សង្គមកិច្ច អតីត​យុទ្ធជន និង​យុវនីតិ​សម្បទា ដោយ​បាន​ជំរុញ​ឲ្យ​ក្រសួង​នេះ​ធ្វើ​ការ​ពន្លឿន​ការ​អនុវត្ត​ច្បាប់​ទាក់ទង​នឹង​របប​សន្តិសុខ​សង្គម​សម្រាប់​មន្រ្តី​រាជការ​ស៊ីវិល។

លោក កៅ ពឿន ប្រធាន​សមាគម​មន្រ្តី​រាជការ​ឯករាជ្យ​កម្ពុជា ហៅ​កាត់​ថា CICA បាន​និយាយ កាល​ពី​ចុង​សប្តាហ៍​មុន​ថា រហូត​មក​ដល់​ពេល​នេះ​មន្រ្តី​រាជការ​ស៊ីវិល​កំពុង​រង់​ចាំ​យ៉ាង​ទទូច ដើម្បី​ទទួល​បាន​នូវ​សេវា​ធានា​រ៉ាប់​រង​ទៅ​លើ​គ្រោះថ្នាក់​ការងារ ស្រប​តាម​មាត្រា ២ នៃ​អនុក្រឹត្យ។

លោក​បាន​មាន​ប្រសាសន៍​ថា៖ «ជា​ការ​ពិត​ទៅ​នេះ​ជា​ការ​ចូល​រួម​ចំណែក នៅ​ក្នុង​ការ​ធានា​នូវ​សុវត្ថិភាព​ការងារ​របស់​ពួក​គាត់ នៅ​ពេល​ដែល​គាត់​ទទួល​គ្រោះថ្នាក់ ហើយ​អ្វី​ដែល​ជា​សេចក្តី​ត្រូវ​ការ​នោះ​គឺ​ដោយ​សារ​តែ​ប្រាក់​ឈ្នួល​របស់​គាត់​នៅ​ទាប​នៅ​ឡើយ ហើយ​ប្រសិន​បើ​គាត់​មាន​គ្រោះថ្នាក់​កើត​ឡើង​ក្នុង​ពេល​បំពេញ​ការងារ ពួក​គាត់​ត្រូវ​ចំណាយ​ថវិកា​ផ្ទាល់​ខ្លួន​ដើម្បី​ព្យាបាល។ ប្រការ​បែប​នេះ​រឹង​រឹត​តែ​ធ្វើ​ឲ្យ​ជីវភាព​គ្រួសារ​របស់​មន្ត្រី​រាជការ​យើង​កាន់​តែ​លំបាក​មួយ​កម្រិត​ថែម​ទៀត»។

លោក កៅ ពឿន បាន​បញ្ជាក់​ទៀត​ថា នេះ​ជា​កាតព្វកិច្ច​ផ្នែក​សង្គមកិច្ច របស់​រដ្ឋាភិបាល​ដែល​ត្រូវ​ផ្តល់​ជូន​មន្ត្រី​រាជការ​ក្នុង​ករណី​ដែល​ពួក​គាត់​មាន​គ្រោះថ្នាក់​ក្នុង​ការងារ ដោយ​សារ​តែ​ពួក​គាត់​ត្រូវ​បាន​រាជ​រដ្ឋាភិបាល​ចុះ​កិច្ចសន្យា​ជួល​គាត់​ឲ្យ​ធ្វើ​ការ។

លោក​បាន​បញ្ជាក់​ដែរ​ថា៖ «ដើម្បី​ចូល​រួម​ចំណែក​ក្នុង​ការ​ដោះស្រាយ​ការ​លំបាក​ដែល​មន្ត្រី​រាជការ​យើង​បាន​នឹង​កំពុង​ជួប​ប្រទះ និង​ដើម្បី​លើក​ទឹក​ចិត្ត​ក៏​ដូច​ជា​ផ្តល់​សេចក្តី​សង្ឃឹម​ដល់​មន្រ្តី​រាជការ​ឲ្យ​មាន​កម្លាំង​ចិត្ត អាច​ធ្វើ​ការ​ប្រកប​ដោយ​ប្រសិទ្ធភាព និង​ប្រសិទ្ធផល សមាគម​យើង​សូម​អំពាវនាវ​ដល់​លោក​រដ្ឋ​មន្រ្តី​ក្រសួង​សង្គមកិច្ច មេត្តា​ពិចារណា​ពន្លឿន​ការ​អនុវត្ត​អនុក្រឹត្យ​នេះ»។

យោង​តាម​អនុក្រឹត្យ​ស្តីពី​ការ​បង្កើត​បេឡាជាតិ​សន្តិសុខ​សង្គម​សម្រាប់​មន្រ្តី​រាជការ​ស៊ីវិល (ប.ជ.ស) មាត្រា ២ បាន​ចែង​ថា ប.ជ.ស មាន​វិសាលភាព​គ្រប​ដណ្តប់​លើ​មន្រ្តី​រាជការ​ស៊ីវិល និវត្តជន និង​ជន​បាត់បង់​សម្បទា​វិជ្ជាជីវៈ​ដែល​មាន​ស្ថានភាព​ចូល​និវត្តន៍ បាត់បង់​សម្បទា​វិជ្ជាជីវៈ មាតុភាព គ្រោះថ្នាក់​ការងារ និង​មរណភាព និង​អ្នក​នៅ​ក្នុង​បន្ទប់​នៃ​ជន​ទាំង​នេះ។

មន្រ្តី​ក្រសួង​សង្គមកិច្ច​មិន​អាច​ទាក់ទង សុំ​ការ​បំភ្លឺ​បាន​ទេ ទាក់​ទិន​នឹង​លិខិត​នេះ៕

អត្ថបទគួរចាប់អារម្មណ៍