The Phnom Penh Post Search

Search form




Logo of Phnom Penh Post newspaper Phnom Penh Post - រថយន្ត​ក្រុង​បុក​រថយន្ត​​ដឹក​កម្មករ​ស្លាប់​យ៉ាង​ហោច​ណាស់ ១៨ ​នាក់

រថយន្ត​ក្រុង​បុក​រថយន្ត​​ដឹក​កម្មករ​ស្លាប់​យ៉ាង​ហោច​ណាស់ ១៨ ​នាក់

រថយន្ត​ដឹក​កម្មករ-កម្មការិនី​ដែល​ជួប​គ្រោះថ្នាក់​ចរាចរណ៍​នៅ​ខេត្ត​សា្វយរៀង កាលពី​ម្សិលមិញ ខូចខាត​ទាំង​ស្រុង​។
រថយន្ត​ដឹក​កម្មករ-កម្មការិនី​ដែល​ជួប​គ្រោះថ្នាក់​ចរាចរណ៍​នៅ​ខេត្ត​សា្វយរៀង កាលពី​ម្សិលមិញ ខូចខាត​ទាំង​ស្រុង​។ ម៉ៃ វីរៈ

រថយន្ត​ក្រុង​បុក​រថយន្ត​​ដឹក​កម្មករ​ស្លាប់​យ៉ាង​ហោច​ណាស់ ១៨ ​នាក់

ស្វាយរៀងៈ កម្មករ​រោងចក្រ​យ៉ាង​ហោច​ណាស់ ១៨ នាក់ បាន​​ស្លាប់​ហើយ​ ២០ ​នាក់​ទៀត​រងរបួស​នៅ​ក្នុង​គ្រោះថ្នាក់​ចរាចរណ៍​​រថយន្ត​ដឹក​មនុស្ស​ ៣៩ នាក់​បាន​​បុក​គ្នា​នឹង​រថយន្ត​ក្រុង​នៅក្នុង​ខេត្ត​ស្វាយរៀង។

កម្មករ​កំពុង​ធ្វើ​ដំណើរ​តាម​ផ្លូវជាតិ​លេខ ១ ក្បែរ​ព្រំដែន រវាង​ស្រុក​ស្វាយទាប និង​ស្រុក​កំពង់រោទ៍​តាម​ផ្លូវ​ទៅ​ធ្វើការ នៅ​វេលា​ម៉ោង ៦ និង ២០ នាទី​ព្រឹក​នៅពេល​កើត​គ្រោះថ្នាក់​នេះ​។ នគរបាល​ស្រុក បាន​ថ្លែង​ថា កម្មករ​សំណង់​ពីរ​នាក់​ក៏​រងរបួស​ក្នុង​គ្រោះថ្នាក់​បុក​គ្នា​នេះ​ដែរ។

ថ្លែង​ពី​គ្រែ​នៅក្នុង​មន្ទីរពេទ្យ​ខេត្ត​ស្វាយរៀង អ្នកស្រី អ៊ុក សាខម អាយុ ៣១ ឆ្នាំ បាន​ឲ្យ​ដឹង​ថា អ្នកស្រី​​អង្គុយ​នៅ​ជួរ​មុខ​ព្រម​ទាំង​មនុស្ស ៣ នាក់​ទៀត និង​អ្នក​បើកបរ នៅពេល​កើត​គ្រោះថ្នាក់​បុក​គ្នា។ បើ​​ទោះបី​ជា​អ្នកស្រី​ឈឺ​ចុកចាប់​ក៏ដោយ ក៏​ប៉ុន្តែ​អ្នកស្រី​ជា​មនុស្ស​ម្នាក់​ដែល​រងរបួស​តិច​បំផុត។

អ្នកស្រី​បញ្ជាក់​ថា៖ «​ខ្ញុំ​អង្គុយ​ក្បែរ​ទ្វារ​ហើយ​រថយន្ត​ក្រុង​បុក​ចំ​ម្ខាង​ទៀត​។ ខ្ញុំ​តែងតែ​អង្គុយ​នៅ​កន្លែង​នេះ​ ដូច្នេះ ខ្ញុំ​រស់រាន​មាន​ជីវិត​។ ឡាន​មាន​មនុស្ស​ច្រើន​។ អ្នក​បើក​ខ្ទាត​ចេញ​ពី​រថយន្ត​។​ ខ្ញុំ​ជា​មនុស្ស​សំណាង​បំផុត​»​។

យោងតាម​លោក សាខុម អ្នក​បើក​រថយន្ត​ដឹក​កម្មករ មាន​ឈ្មោះ ពៅ សុភក្រ្ត អាយុ ៣០ ឆ្នាំ​ស្ថិត​ក្នុង​ចំណោម​អ្នក​ស្លាប់​។ កម្មករ​កំពុង​ធ្វើ​ដំណើរ​ទៅ​​​​​​ធ្វើការ​នៅ​រោងចក្រ ៥ ស្ថិត​ក្នុង​តំបន់​សេដ្ឋកិច្ច​ពិសេស​តៃសេងបាវិត ដែល​រួម​បញ្ចូល​រោងចក្រ Kingmaker, Elite, និង Eastern Industrial។ កម្មករ​ពី​ក្រុមហ៊ុន​សំណង់​ពីរ​នាក់​ក៏​ជិះ​​លើ​រថយន្ត​នោះ​ដែរ។ រយៈពេល​ប៉ុន្មាន​ម៉ោង​បន្ទាប់ពី​គ្រោះថ្នាក់ សាក្សី​បាន​ថ្លែង​ពី​កន្លែង​កើតហេតុ ប្រាប់​ភ្នំពេញ ប៉ុស្តិ៍ ដោយ​សុំ​មិន​បញ្ចេញ​ឈ្មោះ ដោយសារ​តែ​ខ្លាច​មាន​បញ្ហា​ជាមួយ​នឹង​អាជ្ញាធរ។

សាក្សី​អាយុ ៤៩ ឆ្នាំ​ម្នាក់​បាន​និយាយ​ថា​៖ «​រថយន្ត​ដឹក​កម្មករ​ធ្វើ​ដំណើរ​ក្នុង​ល្បឿន​​យឺតៗ ដោយសារ​តែ​មាន​អ្នក​ដំណើរ​ជិះ​ច្រើន»។ សាក្សី ម្នាក់​ទៀត ប៉ុន ចឹម អាយុ ៤១ ឆ្នាំ ដែល​ជួយ​ទាញ​មនុស្ស​ចេញ​ពី​ក្នុង​រថយន្ត បាន​ថ្លែង​ពី​ស្ថានការណ៍​ពិបាក ដែល​លោក​ជួប​ប្រទះ។

លោក​បន្ថែម​ថា៖ «​មនុស្ស ៣ នាក់​រងរបួស​ធ្ងន់​។​គ្មាន​សង្ឃឹម​រស់​ទេ។ គេ​រងរបួស​ចំ​ក្បាល ជើង ដៃ និង​ពេញ​លើ​ខ្លួន​ប្រាណ​»។

សាក្សី​ទី ៣ អាយុ ៣៧ ឆ្នាំ​បាន​ថ្លែង​ថា​ខ្លួន​កំពុង​អង្គុយ​ចម្ងាយ ៣០ ម៉ែត្រ ពី​កន្លែង​កើត​ហេតុ​ក្នុង​ពេល​កើត​គ្រោះថ្នាក់​នោះ។ លោក​ឮ​សំឡេង​បុក​ខ្លាំង​ហើយ​បន្ទាប់មក​ស្ទុះ​ទៅ​ជួយ។

លោក​បន្ថែម​ថា៖ «​ខ្ញុំ​ឃើញ​ជនរងគ្រោះ​ប្រហែល​ជា​ ៦ ​នាក់​នៅ​ក្រៅ​រថយន្ត ហើយ​អ្នក​ដទៃ​ទៀត​ជាប់​ក្នុង​រថយន្ត​។ ខ្ញុំ​ប្រើ​ឫស្សី ដើម្បី​គាស់​ជួយ​យក​ជនរងគ្រោះ​ចេញ។ ខ្ញុំ​បាន​ទាញ​សព​ចេញ​ពី​រថយន្ត​។ ខ្ញុំ​តក់ស្លុត​ខ្លាំង​ណាស់ តែ​ព្យាយាម​ជួយ​តាម​ដែល​អាច​ជួយ​បាន»។

សាច់ញាតិ​យំ​ឱប​កម្មករ​រងរបួស​។
សាច់ញាតិ​យំ​ឱប​កម្មករ​រងរបួស​។ ម៉ៃ វីរៈ

យោងតាម​លោក កៅ សុភ័ណ អធិការ​ស្រុក​ស្វាយទាប​បាន​ឲ្យ​ដឹង​ថា មនុស្ស ១៥ នាក់​ស្លាប់​នៅ​កន្លែង​កើតហេតុ ខណៈ​ ៣ នាក់​ទៀត ស្លាប់​ពេល​បញ្ជូន​ទៅ​ភ្នំពេញ ដើម្បី​ព្យាបាល។ ប៉ុន្តែ លោក ចំ សំណាង នៃ​សហជីព CUMW បាន​ថ្លែង​ថា លោក​ផ្ទាល់​បាន​រាប់​អ្នក​ស្លាប់ មាន​ ២១ នាក់​ជា​ចំនួន​ចុងក្រោយ​ដែល​បាន​បញ្ជាក់​ដោយ​លោក​នាយករដ្ឋមន្រ្តី ​ហ៊ុន សែន ក្នុង​អំឡុង​ថ្លែង​សុន្ទរកថា​កាលពី​ម្សិលមិញ​។

រថយន្ត​ក្រុង​ដែល​ដឹក​អ្នក​ដំណើរ​​បួន​នាក់​ពី​ទីក្រុង​ហូជីមិញ​ប្រទេស​វៀតណាម​មក​រាជធានី​ភ្នំពេញ បាន​បើក​វ៉ា​ឡាន​មួយ ហើយ​បុក​ឡាន​​​ដឹក​កម្មករ​ខ្ទេច​។

បើ​តាម​សាក្សី​ឃើញ​ផ្ទាល់​ភ្នែក​បាន​ឲ្យ​ដឹង​ថា រថយន្ត​សង្គ្រោះ​បន្ទាន់​​ ៦ គ្រឿង​បាន​ទៅ​ដល់​កន្លែង​កើតហេតុ​​ប្រហែល​ ២០ ​នាទី​បន្ទាប់ពី​គ្រោះថ្នាក់​។

លោក​បាន​ថ្លែង​បន្ត​ថា អ្នក​បើក​រថយន្ត​ក្រុង​​ដំបូង​ជាប់​នៅក្នុង​រថយន្ត​ដោយសារ​ជាប់​ជើង​។ ​គាត់​ត្រូវ​បាន​អ្នក​ជិះ​រថយន្ត​ក្រុង​​ជួយ​យក​ចេញ​ពី​កៅអី ហើយ​បាន​ព្យាយាម​បិទបាំង​អត្តសញ្ញាណ​របស់​ខ្លួន​​ដើម្បី​បន្លំ​ក្រែងលោ​ប្រជាជន​វ៉ៃ។

សាក្សី​ឃើញ​ផ្ទាល់​ភ្នែក​ម្នាក់​បាន​ថ្លែង​ថា​៖ «​​អ្នក​ដំណើរ​ជនជាតិ​វៀតណាម​បាន​ជួយ​យក​គាត់​​ចេញ​ពី​កៅអី ហើយ​បាន​ប្តូរ​ខោអាវ​របស់​គាត់​ដើម្បី​​កុំ​ឲ្យ​ប្រជាជន​ស្គាល់​គាត់​»។

រថយន្ត​ក្រុង​ ដែល​បង្ក​គ្រោះថ្នាក់​ចរាចរណ៍​​បណ្តាល​ឲ្យ​កម្មករ​សា្លប់​កាលពី​ម្សិលមិញ។
រថយន្ត​ក្រុង​ ដែល​បង្ក​គ្រោះថ្នាក់​ចរាចរណ៍​​បណ្តាល​ឲ្យ​កម្មករ​សា្លប់​កាលពី​ម្សិលមិញ។ ម៉ៃ វីរៈ

ទោះ​យ៉ាងណា​ក្តី អ្នកភូមិ​បី​នាក់​​បាន​ចូល​ទៅក្នុង​រថយន្ត​ក្រុង​ និង​ទាញ​គាត់​ចេញ ហើយ​វ៉ៃ​មុខ​គាត់ បណ្តាល​ឲ្យ​គាត់​រងរបួស​មុខ​។ ​អ្នកភូមិ​ដទៃៗ​ទៀត បន្ទាប់មក​បាន​​មក​ដល់​ និង​ចាប់ផ្តើម​វ៉ៃ​គាត់ ប៉ុន្តែ​នគរបាល​មូលដ្ឋាន​បាន​​​​ជួយ​សង្គ្រោះ​គាត់​ពី​ការ​វ៉ៃ​ពី​ក្រុម​ប្រជាជន​។ សាក្សី​បន្ត​ថា​៖ «​ប្រសិន​បើ​មិន​មាន​អន្តរាគមន៍​ពី​នគរបាល​អ្នក​បើក​រថយន្ត​ក្រុង​​​ជនជាតិ​វៀតណាម​អាច​នឹង​ត្រូវ​ប្រជាជន​វ៉ៃ​ស្លាប់​បាត់​ហើយ​»​។

មន្រ្តី​នគរបាល​ម្នាក់ ដែល​មិន​​ត្រូវ​បាន​ផ្តល់​សិទ្ធិ​​ឲ្យ​និយាយ​អំពី​​ឧប្បត្តិហេតុ​នេះ​ទៅ​ប្រព័ន្ធ​ផ្សព្វផ្សាយ ក៏​បាន​បញ្ជាក់​ដូច​គ្នា​ផង​ដែរ​។

លោក​បាន​ថ្លែង​ថា​៖ «​អ្នក​បើក​រថយន្ត​ក្រុង​​ត្រូវ​បាន​គេ​វ៉ៃ ហើយ​មន្រ្តី​នគរបាល​របស់​យើង​បាន​ជួយ​សង្គ្រោះ​គាត់​​»​។ «​អ្នកភូមិ​ក៏​បាន​វ៉ៃ​នគរបាល​ផង​ដែរ​»។ ​

មន្រ្តី​នគរបាល​​រូប​នេះ​​​ថ្លែង​ថា អ្នក​បើក​រថយន្ត​ក្រុង​​ដែល​​នគរបាល​ស្រុក​ស្វាយទាប កំណត់​អត្តសញ្ញាណ​ថា ឈ្មោះ Le Vanghing អាយុ​ ៤៣ ​ឆ្នាំ ត្រូវ​បាន​យក​ទៅ​អធិការដ្ឋាន​នគរបាល​ស្រុក​ស្វាយទាប​។ ​អ្នក​បើក​រថយន្ត​ក្រុង​រូប​នេះ​នឹង​ត្រូវ​បញ្ជូន​ទៅ​​តុលាការ​ខេត្ត​ស្វាយរៀង​នៅ​ថ្ងៃ​នេះ​។ នេះ​បើ​តាម​​មេនគរបាល​ចរាចរណ៍​ខេត្ត លោក អ៊ុច សារុន។

លោក ដួង រដ្ឋា​ នាយក​គ្រប់​គ្រង​ក្រុមហ៊ុន ​SH Transport ដែល​​​ជា​ម្ចាស់​រថយន្ត​ក្រុងបាន​និយាយ​ថា ក្រុម​ហ៊ុន​របស់​លោក​កំពុង​ធ្វើ​ការ​ជាមួយ​​និង​ក្រុមហ៊ុន​ធានា​រ៉ាប់រ៉ង កាំមីនកូ និង​សមត្ថកិច្ច​មូល​ដ្ឋាន​ក្នុង​ការ​ដោះ​ស្រាយ​បញ្ហា​គ្រោះ​ថ្នាក់​នេះ។

លោក​ថ្លែង​ថា «ខ្ញុំ​ពិត​ជា​មាន​ការ​សោក​ស្តាយ​ខ្លាំង​ណាស់​ចំពោះ​សោកនាដកម្ម​នេះ។ ក្រុមហ៊ុន​ធានា​រ៉ាប់រ៉ង នឹង​ធ្វើ​ការ​សហការ​ជាមួយ​ប៉ូលិស ដោះ​ស្រាយ​បញ្ហា​នេះ​ជាមួយ​និង​គ្រួសារ​ជន​រងគ្រោះ»។

ក្រុមហ៊ុន SH Transport បង្កើត​ឡើង​កាល​ពី​ឆ្នាំ ២០១៣ និង​​ប្រតិបត្តិការ​ដឹក​ជញ្ជូន​អ្នក​ដំណើរ​ពី​ភ្នំពេញ ទៅ​ទីក្រុង ហូជីមិញ ៣​ជើង​ក្នុង​មួយ​ថ្ងៃ។

ខណៈ​អ្នក​របួស​មួយ​​ចំនួន​ក្នុង​ចំណោម​អ្នក​របួស​​ធ្ងន់ធ្ងរ​បំផុត​​ត្រូវ​បាន​​យក​មក​រាជធានី​ភ្នំពេញ​ជួយ​សង្គ្រោះ អ្នកដទៃ​ទៀត​ត្រូវ​បាន​យក​ទៅ​មន្ទីរពេទ្យ​ខេត្ត​ស្វាយរៀង ដែល​អ្នក​សង្កេតការណ៍ បាន​រិះគន់​ថា មិន​មាន​ឧបករណ៍​ព្យាបាល​គ្រប់គ្រាន់​។ ​

លោក David John Welsh នាយក​ប្រចាំ​ប្រទេស​នៅ​មជ្ឈមណ្ឌល​សាមគ្គី​ការងារ ថ្លែង​ថា​៖ «​ពួកគេ​ពិតជា​ត្រូវការ​ជំនួយ​បន្ថែម​ខ្លាំង​ណាស់​គឺ​នៅក្នុង​មន្ទីរពេទ្យ​ល្អ​មួយ ក្នុង​រាជធានី​ភ្នំពេញ​​»​។

លោក Welsh បាន​ថ្លែង​ថា ស្ថានភាព​នេះ​​រឹតតែ​អាក្រក់​នៅពេល​ដែល​​​លោកស្រី​ឧបនាយករដ្ឋមន្រ្តី ម៉ែន សំអន និង​មន្ត្រី​រដ្ឋាភិបាល​ដទៃ​ទៀត​បាន​​ទៅ​ដល់​ក្នុង​ក្បួន​ហែ​រថយន្ត SUV ចំនួន​ ១៥ ​គ្រឿង​ដើម្បី​ផ្តល់​ថវិកា​ផ្ទាល់​ខ្លួន​ទៅ​ជនរងគ្រោះ​។

ខណៈ​អ្នកកាសែត​ក្នុង​ស្រុក​​បាន​ចូល​ទៅ​ណែនណាន់​នៅ​កន្លែង​ដែល​ពោរពេញ​ទៅ​ដោយ​មនុស្ស​រួច​ហើយ​នោះ​ដើម្បី​ថតរូប​លោកស្រី​ផ្តល់​ថវិកា​រាប់​រយ​ដុល្លារ ដល់​គ្រួសារ​អ្នក​ស្លាប់​ និង​របួស វា​នៅ​តែ​មិន​ឃើញ​រថយន្ត​ពេទ្យ​សង្គ្រោះ​បន្ទាន់​មក​ដល់​​ទៀត​។

លោក Welsh បាន​ថ្លែង​ថា​៖ «​រថយន្ត​ពេទ្យ​សង្គ្រោះ​បន្ទាន់​គឺ​សំខាន់​ជាង​លុយ​ខ្លាំង​ណាស់​នា​ពេល​ភ្លាមៗ​នោះ​។ ​​វា​ពិតជា​អាក្រក់​មែន​»​។

បើ​តាម​លោក Welsh បាន​ឲ្យ​ដឹង​ថា អាជ្ញាធរ​គួរ​​ទទួល​ខុសត្រូវ​ទាំង​ស្រុង​ចំពោះ​គ្រោះថ្នាក់​នេះ​។

លោក​ថ្លែង​បាន​បន្ត​ថា​៖ «​ច្បាប់​ការងារ​កម្ពុជា​​ពិតជា​និយាយ​ថា វា​ជា​ការ​ទទួល​ខុសត្រូវ​របស់​រោងចក្រ​​ និង​រដ្ឋាភិបាល នេះ​គួរ​ចាត់​ថា​ជា​គ្រោះថ្នាក់​នៅ​កន្លែង​ការងារ​​»។ «​វា​ពិតជា​មិន​អាច​ទទួល​យក​បាន​ទាំង​ស្រុង​នៅក្នុង​ឧស្សាហកម្ម​មួយ​ដែល​បង្កើត​​ចំណូល​ ៦ ​ពាន់​លាន​ដុល្លារ​ក្នុង​មួយ​ឆ្នាំ ប៉ុន្តែ មិន​អាច​ធានា​​សុវត្ថិភាព​ដល់​កម្មករ​»។

កាលពី​ម្សិលមិញ អ្នក​នាំពាក្យ​ក្រសួង​ការងារ លោក ហេង សួរ បាន​ថ្លែង​ថា មន្រ្តី​ក្រសួង​ត្រូវ​បាន​បញ្ជូន​​ទៅ​​អម​ដំណើរ​សព​ជនរងគ្រោះ​ទៅ​ផ្ទះ​​របស់​ពួកគេ និង​បាន​សន្យា​ផ្តល់​ជំនួយ​ដល់​អ្នក​រងគ្រោះ​។

លោក​បន្ត​ថា​៖ «​​ប្រសិន​​បើ​មិន​អាច​ធ្វើ​ការងារ​បាន​ យើង​នឹង​ចិញ្ចឹម​គាត់​មួយ​ជីវិត​។ កូន​របស់​ជនរងគ្រោះ​ដែល​ស្លាប់​នឹង​ត្រូវ​ទទួល​ការ​ឧបត្ថម្ភ​​ដូច​គ្នា​ដែរ​»៕ PS/TK

អត្ថបទគួរចាប់អារម្មណ៍