.jpg)
រថយន្តបង្ក និងរថយន្តដឹកកម្មករនៅកន្លែងកើតហេតុ។ រូបថត សហការី
ភ្នំពេញៈ យ៉ាងហោចណាស់មានកម្មករ កម្មការិនីចំនួន ១៧ នាក់បានរងរបួសធ្ងន់ និងស្រាលក្នុងគ្រោះថ្នាក់ចរាចរណ៍មួយកាលពីព្រឹកថ្ងៃពុធនៅលើកំណាត់ផ្លូវ ៥០ ម៉ែត្រត្រង់ចំណុចភ្លើងស្តុប បាគូ ស្ថិតក្នុងសង្កាត់ខណ្ឌដង្កោ។
លោក ជា ភិរុណ នាយផ្នែកទី ២ នៃក្រុមការងារវាស់វែងគ្រោះថ្នាក់ចរាចរណ៍រាជធានីភ្នំពេញប្រាប់ភ្នំពេញប៉ុស្តិ៍ពីកន្លែងកើតហេតុថា៖ «តាមរយៈការវាស់វែង និងការអះអាងរបស់សាក្សីនៅកន្លែងកើតហេតុ គ្រោះថ្នាក់ចរាចរណ៍នេះបង្កឡើងដោយអ្នកបើកបររថយន្តដឹកជ្រូកពាក់ស្លាកលេខភ្នំពេញ 3C-7321 ដែលបើកបរខ្វះការប្រុងប្រយ័ត្នទៅបុករថយន្តដឹកកម្មករ ដែលកំពុងឈប់ភ្លើងស្តុប»។ មុនពេលសមត្ថកិច្ចទៅដល់កន្លែងកើតហេតុ អ្នកបើកបររថយន្តបង្កបានរត់គេចខ្លួនបាត់។
ទោះយ៉ាងណារថយន្តបង្ក និងរថយន្តរងគ្រោះ ត្រូវបានមន្ត្រីជំនាញនាំយកទៅរក្សាទុកនៅការិយាល័យនគរបាលចរាចរណ៍រាជធានីភ្នំពេញ ដើម្បីរង់ចាំភាគីទាំង ២ ចូលមកដោះស្រាយទៅតាមផ្លូវច្បាប់ ខណៈជនរងគ្រោះត្រូវបានបញ្ជូនទៅមន្ទីរពេទ្យជ័យជំនះ និងពហុព្យាបាលសុខលាភមេត្រីក្នុងក្រុងតាខ្មៅ ដែលនៅប្រមាណជាង ១ គីឡូម៉ែត្រ។ លោកថា៖ «កម្លាំងនគរបាលជំនាញយើងកំពុងស្រាវជ្រាវរកអត្តសញ្ញាណអ្នកបើកបរ ឬ ម្ចាស់រថយន្តបង្កតាមរយៈស្លាកលេខរថយន្ត ដើម្បីឲ្យចូលខ្លួនដោះស្រាយចំពោះជនរងគ្រោះទៅតាមនីតិវិធីច្បាប់»។
លោក ហេង សុផាណារិទ្ធ អ្នកនាំពាក្យបេឡាជាតិ របបសន្តិសុខសង្គម (ប.ស.ស) ថ្លែងថា ក្រុមការងារ ប.ស.ស បានចុះជួយអន្តរាគមន៍ភ្លាមៗ ដើម្បីដឹកកម្មករដែលរងរបួសទៅមន្ទីរពេទ្យដែលនៅជិតបំផុត។
លោកថ្លែងថា៖ «ជាទូទៅកម្មករទាំងអស់ត្រូវពិនិត្យសុខភាព ឬព្យាបាលជំងឺនៅមន្ទីរពេទ្យ មណ្ឌលសុខភាព ឬគ្លីនិក ដែលជាដៃគូរបស់ ប.ស.ស ប៉ុន្តែសម្រាប់ករណីគ្រោះថ្នាក់ចរាចរណ៍បែបនេះ គឺពួកគាត់ចាំបាច់ត្រូវបញ្ជូនទៅមន្ទីរពេទ្យឬ គ្លីនិកដែលនៅជិតបំផុត ដើម្បីជួយសង្គ្រោះជីវិតមនុស្សគឺជារឿងសំខាន់»។
បើតាមលោក សុផាណារិទ្ធ ជនរងគ្រោះជាកម្មករនៃរោងចក្រកាត់ដេរ Sky Hill Apparel Co; Ltd មានទីតាំងនៅសង្កាត់ព្រៃស ខណ្ឌដង្កោ។ ជនរងគ្រោះសរុប ១៧ នាក់ក្នុងនោះ ៧ នាក់រងរបួសធ្ងន់។
កញ្ញា ហែម រីកា ជំនួយការផ្នែករដ្ឋបាលរោងចក្រ Sky Hill Apparel Co.; Ltd ប្រាប់ភ្នំពេញប៉ុស្តិ៍ថា ករណីគ្រោះថ្នាក់ចរាចរណ៍នេះបានធ្វើឲ្យប៉ះពាល់ដល់ចង្វាក់ផលិតកម្មរបស់ក្រុមហ៊ុនរោងចក្រដោយសារកម្មកររងគ្រោះទាំងនោះមិនអាចមកបំពេញការងារបាន។ កញ្ញា រីកា បានអំពាវនាវដល់សមត្ថកិច្ចឲ្យពន្លឿនការស្រាវជ្រាវ រកអត្តសញ្ញាណអ្នកបើកបររថយន្តដឹកជ្រូក ឬម្ចាស់រថយន្តបង្កឲ្យចូលខ្លួនដោះស្រាយសំណងខូចខាតដល់កម្មករ និងម្ចាស់រថយន្តដឹកកម្មករឲ្យបានឆាប់តាមដែលអាចធ្វើទៅបាន៕
