ពោធិ៍សាត់ៈ កម្លាំងកងរាជអាវុធហត្ថស្រុកវាលវែងពីម្សិលមិញបានដុតបំផ្លាញរថយន្តដឹកឈើចំនួន ៣ គ្រឿងនៅស្នាក់ការដែនជម្រកសត្វព្រៃភ្នំសំកុះ បន្ទាប់ពីសមត្ថកិច្ចរកឃើញ និងរឹបអូសនៅឃុំប្រមោយ ស្រុកវាលវែង ប៉ុន្ដែម្ចាស់រថយន្តបានរត់គេចខ្លួន ខណៈសមត្ថកិច្ចខេត្តសៀមរាបក៏បានឃាត់រថយន្ដដឹកឈើខុសច្បាប់ ១ គ្រឿងដែលមានឈើជាង ១ ម៉ែត្រគុប។
លោក សូ សុវណ្ណឌី មេបញ្ជាការរងកងរាជអាវុធហត្ថខេត្តពោធិ៍សាត់ថ្លែងពីម្សិលមិញថា នៅថ្ងៃទី ២៣ មីនា កម្លាំងមូលដ្ឋានកងរាជអាវុធហត្ថស្រុកវាលវែងដុតបំផ្ទុះចោលរថយន្តទាំង ៣ គ្រឿងនៅក្នុងស្នាក់ការដែនជម្រកសត្វព្រៃភ្នំសំកុស។ មុនពេលរកឃើញរថយន្តទាំង ៣ គ្រឿងកម្លាំងកងរាជអាវុធហត្ថស្រុកវាលវែង ដឹកនាំដោយលោក ម៉ែន ឆិល មេបញ្ជាការរងកងរាជអាវុធហត្ថស្រុកកាលពីថ្ងៃទី ២១ មីនាសហការជាមួយអង្គការសម្ព័ន្ធភាពសត្វព្រៃ (Wildlife Alliance) ចុះបង្ក្រាបបទល្មើសព្រៃឈើនៅភូមិស្ទឹងថ្មី ឃុំប្រមោយ ស្រុកវាលវែង។ លោកថាពេលនោះបានប្រទះឃើញរថយន្តបាកុង ៣ គ្រឿងដែលជាមធ្យោបាយដឹកជញ្ជូនឈើខុសច្បាប់ រីឯម្ចាស់បានគេចខ្លួនបាត់។
លោក សុវណ្ណឌី បញ្ជាក់ថា៖ «បន្ទាប់ពីសមត្ថកិច្ចជំនាញយើងរឹបអូសវត្ថុតាងខាងលើប្រគល់ឲ្យស្នាក់ការដែនជម្រកសត្វព្រៃភ្នំសំកុះ ដើម្បីបន្តនីតិវិធី ហើយនៅថ្ងៃទី ២៣ នេះ [ម្សិលមិញ] យើងបានកាត់វាជាកំណាត់ៗ ហើយដុតចោលតែម្ដងដោយកន្លងមកយើងធ្លាប់បានបំផ្លាញចោលរថយន្តដឹកឈើជិត ២០ គ្រឿងដែរ»។
លោកបន្តថា៖ «ការងារបន្តទៀតគឺយើងនៅតែបន្តការសហការជាមួយអង្គការសម្ព័ន្ធភាពសត្វព្រៃ ដើម្បីស្វែងរកជនល្មើស និងវត្ថុតាងដែលបម្រើឲ្យបទល្មើសព្រៃឈើ»។
លោក ផាន់ សុភារីន នាយកដែនជម្រកសត្វព្រៃភ្នំសំកុះ ស្រុកវាលវែង ខេត្តពោធិ៍សាត់ថ្លែងពីម្សិលមិញថា នៅរយៈពេល ៣ ខែនៃឆ្នាំ ២០២០ នេះជនសង្ស័យដែលពាក់ព័ន្ធបទល្មើសព្រៃឈើ និងការបរបាញ់សត្វព្រៃភ្នំសំកុះ ចំនួនជាង ១០ នាក់ត្រូវបានឃាត់ខ្លួន និងបញ្ជូនទៅសាលាដំបូងខេត្តពោធិ៍សាត់ ដើម្បីចាត់ចែងតាមនីតិវិធីច្បាប់។
មន្ត្រីរូបនេះបន្តថា បច្ចុប្បន្នបទល្មើសព្រៃឈើ និងការបាញ់សត្វព្រៃមានសភាពស្ងប់ស្ងាត់ជាធម្មតា ដោយសារមួយរយៈនេះមានការសហការជាមួយអង្គការសម្ព័ន្ធភាពសត្វព្រៃ (Wildlife Alliance) ជួយជ្រោមជ្រែងការងារចុះល្បាតព្រៃជាប្រចាំ។ ពេលខ្លះក៏មានការចូលរួមពីសហគមន៍ក្នុងការងារចុះល្បាតព្រៃផងដែរ។
លោកបញ្ជាក់ថា៖ «ការងារចុះល្បាតរបស់យើងសព្វថ្ងៃនេះគឺមានឧបសគ្គខ្លះនៅពេលដែលយើងបានជួបប្រទះបទល្មើសក្នុងព្រៃជ្រៅពិបាកយកវត្ថុតាងទាំងអស់ចេញមកក្រៅ។ ដូច្នេះយើងមានតែជម្រើសដុតវាបំផ្លាញចោលនៅក្នុងព្រៃនោះតែម្ដង។ ក្នុង ១ ខែយើងចុះល្បាតចន្លោះពី ៧ ទៅ ៩ លើក ព្រោះពេលខ្លះកម្លាំងយើងមិនគ្រប់គ្រាន់ក្នុងការចុះល្បាតដែរ»។
លោក គុជ វេង តំណាងសហគមន៍ការពារព្រៃឈើខេត្តពោធិ៍សាត់បានថ្លែងថា មួយរយៈចុងក្រោយនេះប្រជាសហគមន៍មិនសូវបានចុះល្បាតព្រៃដូចកាលពីមុនទេ ដោយសារកត្តាជីវភាពក្នុងគ្រួសារកាន់តែជួបការលំបាកខ្លាំង។ ម្យ៉ាងទៀតពលរដ្ឋភាគច្រើនមិនបានចូលព្រៃទៅបេះបន្លែយកមកលក់នៅទីផ្សារទេ ព្រោះខ្លាចឆ្លងជំងឺកូវីដ ១៩ នេះ។
លោកបន្តថា ចំពោះបទល្មើសព្រៃឈើនៅតែមានការកាប់ឈើ និងដឹកជញ្ជូនតាមគោយន្តជាហូរហែដែរ ដោយមន្ត្រីជំនាញចុះល្បាតយូរៗម្ដង។ នៅពេលមានមន្ត្រីចុះល្បាត បទល្មើសព្រៃឈើស្ងាត់មួយរយៈពេលខ្លី ប៉ុន្ដែពេលមន្ត្រីត្រឡប់មកវិញ ក្រុមជនខិលខូចចាប់ផ្ដើមធ្វើសកម្មភាពឡើងវិញដែរ។
លោក គុជ វេង និយាយថា៖ «ពួកខ្ញុំពេលនេះមិនសូវបានចូលរួមចុះល្បាតព្រៃទេ ព្រោះជីវភាពកំពុងជួបបញ្ហា គឺម្នាក់ៗខំរកលុយមកចិញ្ចឹមគ្រួសារ។ ម្យ៉ាងទៀតកន្លងមកនេះនៅពេលពួកខ្ញុំខិតខំការពារព្រៃឈើកាន់តែខ្លាំង ពួកគាត់ក៏មានអ្នកខ្លះប្រឈមជាប់គុកដែរ ដោយសារក្រុមឈ្មួញទុច្ចរិត មិនសប្បាយចិត្តនឹងយើងទៅរំខានការកាប់ឈើរបស់ពួកគេ ហើយក៏យកលេសចោទប្រកាន់ពួកខ្ញុំឡើងតុលាការ។ អ៊ីចឹងពួកខ្ញុំមិនចង់ឡើងចុះតុលាការទៀតទេ»។
ជាមួយគ្នានេះមន្ត្រីនគរបាលប្រឆាំងបទល្មើសសេដ្ឋកិច្ចនៃស្នងការដ្ឋានខេត្តសៀមរាបនៅថ្ងៃទី ២២ ខែមីនា បានបង្ក្រាបរថយន្តបាឡែនដឹកឈើល្មើសច្បាប់ ១ គ្រឿងនៅភូមិធ្លកអណ្តូង សង្កាត់ស្លក្រាមក្រុងសៀមរាប ខេត្តសៀមរាប ខណៈកំពុងដឹកយកមកលក់ក្នុងទីរួមខេត្ត។ ប៉ុន្ដែម្ចាស់រថយន្តដឹកឈើ និងបក្ខពួកបាននាំគ្នារត់បាត់អស់ដោយបន្សល់ទុករថយន្តបទល្មើសនៅនឹងកន្លែង។
លោក ម៉េង សំណាង នាយរងការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋានខេត្តសៀមរាបត្រូវបានអគ្គស្នងការដ្ឋាននគរបាលជាតិដកស្រង់សម្តីពីម្សិលមិញថា ប្រតិបត្តិការនេះដឹកនាំដោយលោកផ្ទាល់ក្រោមការបញ្ជាពីលោកប្រធានការិយាល័យប្រឆាំងបទល្មើសសេដ្ឋកិច្ចខេត្តសៀមរាប និងលោក ម៉ក់ ធារ៉ា ស្នងការរងទទួលបន្ទុកការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋានខេត្តសៀមរាបសហការជាមួយកម្លាំងរដ្ឋបាលព្រៃឈើខេត្តសៀមរាប។
លោកបានបន្តថា រថយន្តដឹកឈើនេះត្រូវបានរឹបអូសយកមកស្នងការដ្ឋានខេត្តសៀមរាបរង់ចាំកម្លាំងរដ្ឋបាលព្រៃឈើមកទទួលយកទៅរក្សាទុក ដើម្បីស្វែងរកម្ចាស់ឈើចាត់ការតាមផ្លូវច្បាប់។ លោកបានបញ្ជាក់ថា រថយន្តបាឡែននេះដឹកឈើប្រភេទលេខ ១ មានចំនួន ២២ ដុំស្មើ ១ ម៉ែត្រគុប ២ ផ្លាន។ សមត្ថកិច្ចខេត្តសៀមរាបនឹងបន្តបង្ក្រាបបទល្មើសផ្សេងៗក្នុងខេត្តសៀមរាបឲ្យមានការថយចុះ និងទៅតាមបទបញ្ជារបស់ថ្នាក់លើ៕