The Phnom Penh Post Search

Search form




Logo of Phnom Penh Post newspaper Phnom Penh Post - រថយន្ត​ក្រុង ១៩ គ្រឿង​ត្រូវ​ដាក់​ដំណើរការ

រថយន្ត​ក្រុង ១៩ គ្រឿង​ត្រូវ​ដាក់​ដំណើរការ

អ្នក​ជិះ​រថយន្ត​ក្រុង​កាល​ពី​ម្សិល​មិញ។
អ្នក​ជិះ​រថយន្ត​ក្រុង​កាល​ពី​ម្សិល​មិញ។ ផា លីណា

រថយន្ត​ក្រុង ១៩ គ្រឿង​ត្រូវ​ដាក់​ដំណើរការ

ភ្នំពេញៈ សាលា​រាជធានី​កាល​ពី​ម្សិល​មិញ​បាន​ដាក់​ឲ្យ​ដំណើរ​ការ​សេវា​រថយន្ត​ក្រុង​ខ្សែ ទី១ ដែល​មាន​រថយន្ត ១៩ គ្រឿង​ខណៈ​រថយន្ត​ក្រុង​ពីរ​ខ្សែ​ទៀត នឹង​ត្រូវ​ដាក់​ឲ្យ​ដំណើរការ​ជា​បន្ត​បន្ទាប់​ទៀត​ដើម្បី​កាត់​បន្ថយ​ការ​កក​ស្ទះ​ចរាចរណ៍។

តាម​រយៈ​សេចក្តី​ជូន​ដំណឹង​របស់​សាលា​រាជធានី​រថយន្ត​ក្រុង​ខ្សែ ទី១ នេះ​ត្រូវ​បាន​ដាក់​ឲ្យ​ប្រើ​ប្រាស់​កាល​ពី​ម្សិល​មិញ ដោយ​ដំណើរការ​ចាប់​ពី​ម៉ោង ៥ និង ៣០ នាទី​ព្រឹក​ដល់​ម៉ោង ៨ និង ៣០ នាទី​យប់ ចេញ​ដំណើរ​ពី​ចំណត​គីឡូម៉ែត្រ​លេខ ៩ តាម​ផ្លូវ​ជាតិ​លេខ ៥ កាត់​តាម​រង្វង់​មូល​ស្តាត​ចាស់ មហា​វិថី​ព្រះ​មុនីវង្ស ស្ពាន​ព្រះ​មុនីវង្ស ឆ្ពោះ​ទៅ​ផ្លូវ​ជាតិ​លេខ ១ រហូត​ដល់​ចំណត​រថយន្ត បឹង​ឈូក។ ខ្សែ​នេះ មាន​ចំណត​រថយន្ត​ក្រុង​ចំនួន ៦៧ ចំណត។

ចំណែក​ខ្សែ ទី២ នឹង​ចាប់​ផ្តើម​នៅ​ថ្ងៃ ទី០៧ ខែ​កញ្ញា ចេញ​ដំណើរ​ពី​ផ្សារ​រាត្រី វិថី ព្រះ​ស៊ីសុវត្ថិ កាត់​តាម​ស្ពាន​ជ្រោយ​ចង្វារ រង្វង់​មូលស្តាត​ចាស់ ផ្លូវ​លេខ ៧០ ផ្លូវ​លេខ ២៧៣ អង់តែន​ទូរទស្សន៍ ទួលគោក​មហាវិថី គីម អ៊ីលស៊ុង មហាវិថី ម៉ៅ សេទុង ភ្លើង​ស្តុប បូកគោ មហាវិថី ព្រះ​មុនីវង្ស ឆ្ពោះ​ទៅ​កាន់​ផ្លូវ​ជាតិ​លេខ ២ រហូត​ដល់​រង្វង់​មូល​តាខ្មៅ។ ខ្សែ​នេះ​មាន ៦៨ ចំណត។ រីឯ​ខ្សែ ទី៣ នឹង​ចាប់​ផ្តើម​នៅ​ថ្ងៃ ទី១៥ ខែ​កញ្ញា ដោយ​ចេញ​ពី​ចំណត​ផ្សារ​រាត្រី ផ្លូវ​លេខ ១០៦ តិរវិថី ព្រះ​នរោត្តម កាត់​តាម​ផ្លូវ​លេខ ១៣០ ផ្សារ​ធំ​ថ្មី មហាវិថី​កម្ពុជា​ក្រោម ក្រោម​ស្ពាន​អាកាស ៧ មករា មហាវិថី​សហព័ន្ធ​រុស្ស៊ី អាកាស​យានដ្ឋាន​អន្តរជាតិ​ភ្នំពេញ រហូត​ដល់​រង្វង់​មូល ចោមចៅ។ ខ្សែ​នេះ​មាន ៤៩ ចំណត។

អ្នក​នាំ​ពាក្យ​សាលា​រាជធានី​លោក ឡុង ឌីម៉ង់ បាន​ឲ្យ​ដឹង​ថា សាលា​រាជធានី​បាន​ត្រៀម​រថយន្ត​ចំនួន ៤៥ គ្រឿង សម្រាប់​ដំណើរការ​រថយន្ត​ទាំង ៣ ខ្សែ​នេះ ហើយ​ក្នុង​នោះ ១៩ គ្រឿង​ត្រូវ​បាន​ដាក់​ឲ្យ​ដំណើរការ​នៅ​ខ្សែ ទី១។ លោក​បន្ត​ថា ចំណែក​តម្លៃ​ជិះ​រថយន្ត​ក្រុង​គឺ ១៥០០ រៀល​ក្នុង​ម្នាក់ ហើយ​ព្រះសង្ឃ ជន​ពិការ មនុស្ស​ចាស់ និង​សិស្ស​សាលា​មិន​យក​ប្រាក់​ទេ៕

អត្ថបទគួរចាប់អារម្មណ៍