ភ្នំពេញ៖ ករណីឆេះអគារបម្រើសេវាកម្មជួសជុលរថយន្ត និងឃ្លាំងស្តុករថយន្តរបស់ក្រុមហ៊ុន Mitsubishi Motors Cambodia ដែលមានទីតាំងស្ថិតនៅក្នុងក្រុមទី ៣ ភូមិ-សង្កាត់ទឹកថ្លា ខណ្ឌសែនសុន រាជធានីភ្នំពេញកាលពីល្ងាចថ្ងៃចន្ទ បានបង្កឲ្យមនុស្សយ៉ាងហោចណាស់ ៣ នាក់រងរបួស និងឆេះខូចខាតរថយន្តម៉ាក Mitsubishi ស៊េរីឆ្នាំ ២០២០ អស់ចំនួន ២៧ គ្រឿង ព្រមទាំងសម្ភារ និងគ្រឿងចក្រជួសជុលរថយន្តមួយចំនួនទៀត បានរងការឆេះខូចខាតស្ទើរទាំងស្រុង។ នេះបើយោងរបាយការណ៍របស់សមត្ថកិច្ចកងពន្លត់អគ្គិភ័យរាជធានីភ្នំពេញ ដែលភ្នំពេញប៉ុស្តិ៍ទទួលបានកាលពីព្រឹកថ្ងៃអង្គារ។
របាយការណ៍នោះ បានឲ្យដឹងថាសមត្ថកិច្ចនគរបាលជំនាញមិនបានបញ្ជាក់អំពីមូលហេតុ ដែលនាំឲ្យកើតមានគ្រោះអគ្គិភ័យកើតឡើងនៅក្នុងអគារបម្រើសេវាកម្មជួសជុលរថយន្ត និងឃ្លាំងស្តុករថយន្ត របស់ក្រុមហ៊ុន Mitsubishi Motors Cambodia នោះទេ ប៉ុន្តែលោក ព្រំ យ៉ន ប្រធានការិយាល័យបង្ការទប់ស្កាត់ និងពន្លត់អគ្គិភ័យរាជធានីភ្នំពេញ បានប្រាប់ភ្នំពេញប៉ុស្តិ៍ ដោយយោងតាមការសាកសួរបុគ្គលិក កម្មករផ្នែកជួសជុលរថយន្ត និងនាយកគ្រប់គ្រងក្រុមហ៊ុនខាងលើនេះ ក្រុមមន្ត្រីជំនាញបានសន្និដ្ឋានក្នុងជំហានបឋមរបស់ខ្លួនថា អគ្គិភ័យនេះ បណ្ដាលមកពី «ការផ្ទុះឆ្លងចរន្តអគ្គិសនី»។
លោក យ៉ន បានឲ្យដឹងទៀតថា របាយការណ៍បានបង្ហាញថា ក្នុងអំឡុងពេលជួយអន្តរាគមន៍បាញ់ទឹកពន្លត់អគ្គិភ័យ ដែលកំពុងឆាបឆេះសំណង់អគាររបស់ក្រុមហ៊ុន Mitsubishi Motors Cambodia នាល្ងាចថ្ងៃចន្ទនោះ មន្ត្រីនគរបាលការិយាល័យបង្ការ និងពន្លត់អគ្គិភ័យរាជធានីភ្នំពេញ ចំនួន ២ នាក់ រួមមានឈ្មោះ អ៊ីត សុខា អាយុ ៥២ ឆ្នាំ និងឈ្មោះ ព្រហ្ម បញ្ញា អាយុ ២៦ ឆ្នាំ និងបុគ្គលិកផ្នែកអន្តរាគមន៍ពន្លត់អគ្គិភ័យនៃក្រុមហ៊ុនកោះពេជ្រម្នាក់ឈ្មោះ ផាន់ សំអ៊ាង អាយុ ២៣ ឆ្នាំ បានរងរបួសស្រាល ដោយដែកដំបូលស័ង្កសី នៃសំណង់អគារនោះបាក់ធ្លាក់លើបណ្ដាលឲ្យមុតដៃ និងជើង។
លោកបានបញ្ជាក់ថា៖ «បើទោះជាមានរបួស ប៉ុន្តែក្រុមការងារយើងនៅតែខិតខំប្រឹងប្រែងជួយអន្តរាគមន៍បាញ់ទឹកពន្លត់អគ្គិភ័យនោះរហូតដល់បានជោគជ័យ ដោយធានាមិនឲ្យឆេះឆ្លងរីករាលដាលដល់លំនៅឋានរបស់អ្នកភូមិផ្សេងទៀត»។
លោក យ៉ន ថ្លែងថា ក្រោយពន្លត់ភ្លើងនោះបានជោគជ័យទាំងស្រុងហើយនោះ ក្រុមមន្ត្រីជំនាញផ្នែកបច្ចេកទេសបានចុះត្រួតពិនិត្យ រកឃើញមានរថយន្តម៉ាក Mitsubishi ស៊េរីឆ្នាំ ២០២០ ចំនួន ២៧ គ្រឿង និងគ្រឿងសម្ភារបរិក្ខារដែលបម្រើឲ្យសេវាកម្មជួសជុលរថយន្តមួយចំនួនទៀត ព្រមទាំងសំណង់អគារបម្រើសេវាកម្មជួសជុលរថយន្ត ធ្វើពីបេតុង ប្រក់ស័ង្កសីទំហំ ២០x៥០ ម៉ែត្រចំនួនមួយ និងឃ្លាំងស្តុករថយន្តធ្វើពីបេតុងប្រក់ស័ង្កសីទំហំ ១២x៦០ ម៉ែត្រ ចំនួន ១ បានរងការឆេះខូចខាតអស់ប្រមាណ ៧០ ភាគរយ។
លោក យ៉ន បានបន្ថែមថា នៅក្នុងប្រតិបត្តិការពន្លត់អគ្គិភ័យដែលឆាបឆេះសំណង់អគាររបស់ក្រុមហ៊ុន Mitsubishi Motors Cambodia កាលពីល្ងាចថ្ងៃចន្ទនោះ សមត្ថកិច្ចបានប្រើប្រាស់ទឹកអស់ ១៧៤ ម៉ែត្រគុប និងចំណាយពេលប្រមាណជិត ២ ម៉ោង និងប្រើប្រាស់រថយន្តពន្លត់អគ្គិភ័យចំនួន ១៩ គ្រឿង ដែលមកពីស្ថាប័នចំនួន ៥ រួមមាន នាយកដ្ឋានកងពន្លត់អគ្គិភ័យនៃក្រសួងមហាផ្ទៃ, ការិយាល័យពន្លត់អគ្គិភ័យរាជធានីភ្នំពេញ, ក្រុមហ៊ុន OCIC ទីក្រុងកោះពេជ្រ, ក្រុមហ៊ុន OCIC ទីក្រុងជ្រោយចង្វារ និងក្រុមហ៊ុនស្រាបៀរកម្ពុជា។
លោក ឡៅ សាក់ នាយកគ្រប់គ្រងក្រុមហ៊ុន Mitsubishi Motors Cambodia សុំមិនធ្វើអធិប្បាយកាលពីម្សិលមិញ ដោយគ្រាន់ថ្លែងថា៖ «ខ្ញុំសូមការអធ្យាស្រ័យ នៅពេលនេះខ្ញុំនៅមិនទាន់អាចវាយតម្លៃពីទំហំនៃការខូចខាតបានទេ»៕