.jpg)
រថយន្តយោធាចំនួន ២៩០ គ្រឿង ដែលកម្ពុជាទើបទិញមកពីប្រទេសចិន។ ហុង មិនា
ភ្នំពេញៈ រថយន្តយោធាចំនួន ២៩០ គ្រឿង ដែលកម្ពុជាទើបទិញមកពីប្រទេសចិន នឹងត្រូវចែកជូនដល់បណ្តាស្ថាប័ន អង្គភាពនៃកងយោធពលខេមរភូមិន្ទ និងអគ្គស្នងការដ្ឋាននគរបាលជាតិនៅថ្ងៃព្រហស្បតិ៍នេះ។
លោក ម៉ៅ ផល្លា អ្នកនាំពាក្យកងទ័ពជើងគោកប្រាប់ភ្នំពេញប៉ុស្តិ៍ពីថ្ងៃពុធថា ពិធីប្រគល់ និងទទួលរថយន្តទាំងនេះធ្វើឡើងនៅពហុកីឡដ្ឋានជាតិអូឡាំពិក ក្រោមអធិបតីលោក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ។
លោកឲ្យដឹងថា រថយន្តទាំង ២៩០ គ្រឿងនេះគឺ ២៥០ គ្រឿង ត្រូវប្រគល់ជូនអង្គភាពនៃកងយោធពលខេមរភូមិន្ទ និង ៤០ គ្រឿង ប្រគល់ជូនដល់ស្នងការដ្ឋាននគរបាលជាតិ ហើយការទិញរថយន្តទាំងនេះមិនត្រូវបានប្រើប្រាស់ថវិការបស់រដ្ឋនោះឡើយ គឺជាថវិកាចូលរួមរបស់សប្បុរសជនតាមរយៈការអំពាវនាវរបស់លោកនាយករដ្ឋមន្ត្រី ហ៊ុន សែន។
ទោះយ៉ាងណាលោក ម៉ៅ ផល្លារ មិនប្រាប់ឲ្យដឹងពីចំនួនទឹកប្រាក់ប៉ុន្មានដែលត្រូវបានចំណាយសម្រាប់ទិញរថយន្តទាំងនេះឡើយដោយលោកគ្រាន់តែថ្លែងថា វត្តមានរថយន្តទាំងនេះជាការចូលរួមបម្រើដល់ប្រតិបត្តិការក្នុងវិស័យយោធាក៏ដូចជាកងនគរបាលជាតិសម្រាប់ជាប្រយោជន៍របស់ជាតិ។
លោកថា៖ «រថយន្តទាំងនេះមានប្រភេទកង់ ១០ និងកង់ ៦ ។ សម្តេចប្រគល់ឲ្យនេះ ប្រើប្រាស់ក្នុងការបំពេញការងារ និងភារកិច្ចរបស់ខ្លួន។ រថយន្តទាំងនេះបានដឹកមកដាក់នៅពហុកីឡដ្ឋានជាតិអូឡាំពិករួចរាល់អស់ ហើយសម្រាប់ពិធីនៅថ្ងៃព្រហស្បតិ៍»។
លោក ហ៊ុន ម៉ាណែត កាលពីម្សិលមិញបានបដិសេធធ្វើអត្ថាធិប្បាយជុំវិញព័ត៌មាននេះ។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជា បានថ្លែងពីម្សិលមិញថា ក្នុងអំឡុងពេលនេះបើការទិញរថយន្តទាំងនេះសម្រាប់ដោះស្រាយបញ្ហាសង្គម ឬបញ្ហាដែលកំពុងប្រឈមនឹងការរាតត្បាតជំងឺកូវីដ ១៩ នោះគឺជារឿងប្រសើរ។
លោកបន្តថា អ្វីដែលសំខាន់គឺត្រូវប្រើប្រាស់ឲ្យមានតម្លាភាព និងជាប្រយោជន៍ដល់សង្គមជាតិ ដោយគ្មានការរើសអើងនោះគឺជារឿងដែលត្រូវសាទរ ខណៈថវិកាដែលទទួលបានសម្រាប់ទិញរថយន្តទាំងនេះគឺជាការរួមចំណែករបស់សប្បុរសជនក្នុងអំឡុងពេលលំបាកនេះ។
ប៉ុន្តែលោក ច័ន្ទរឿន បញ្ជាក់ថា៖ «គ្រាន់តែថាបញ្ហាការចាយវាយថវិការបស់រដ្ឋយើងកន្លងមក ដូចជាស្ថាប័នរដ្ឋមួយចំនួនទាក់ទងទៅហ្នឹងតម្លាភាពនេះមិនសូវមានតម្លាភាពប៉ុន្មានទេ។ ទាំងនេះគឺជាបញ្ហាប្រឈមរបស់សង្គមយើងក្នុងការទទួលបានតម្លាភាពនៃការចាយវាយថវិកានេះគឺខ្វះព័ត៌មានដែលគួរតែនាំគ្នាជំរុញឲ្យចេញច្បាប់ស្តីពីការទទួលព័ត៌មានឲ្យបានលឿន»៕
