The Phnom Penh Post Search

Search form

Logo of Phnom Penh Post newspaper Phnom Penh Post - រថយន្ត ២ បុក​គ្នា​ស្លាប់​មនុស្ស ៩ នាក់​របួស ៤




រថយន្ត ២ បុក​គ្នា​ស្លាប់​មនុស្ស ៩ នាក់​របួស ៤

ទិដ្ឋភាព​គ្រោះថ្នាក់​ចរាចរណ៍​តាម​ផ្លូវ​ជាតិ​លេខ​ ៥ កាលពី​ម្សិលមិញ​ដោយ​រថយន្ត​ទាំង​ពីរ​សុទ្ធ​តែ​រង​ការ​ខូចខាត។
ទិដ្ឋភាព​គ្រោះថ្នាក់​ចរាចរណ៍​តាម​ផ្លូវ​ជាតិ​លេខ​ ៥ កាលពី​ម្សិលមិញ​ដោយ​រថយន្ត​ទាំង​ពីរ​សុទ្ធ​តែ​រង​ការ​ខូចខាត។ រូបថត ហ្វេសប៊ុក

រថយន្ត ២ បុក​គ្នា​ស្លាប់​មនុស្ស ៩ នាក់​របួស ៤

ខេត្តបាត់ដំបងៈ គ្រោះថ្នាក់​ចរាចរណ៍​មួយ​រវាង​រថយន្ត​ក្រុមហ៊ុន​មេគង្គ​អ៊ិចប្រេស និង​រថយន្ត​មួយ​តោន​កន្លះ​បាន​ធ្វើ​ឲ្យ​មនុស្ស​ ៩​ នាក់​ស្លាប់ និង​ ៤ នាក់​ផ្សេង​ទៀត​បាន​រងរបួស​កាលពី​រសៀល​ម៉ោង​ ៤ ម្សិលមិញ​នេះ​នៅ​តាម​ផ្លូវ​ជាតិ​លេខ ៥ ត្រង់​ចំណុច​ភូមិ​ព្រៃ​ដំរី ឃុំ​ព្រៃតូច ស្រុក​មោងឫស្សី ខេត្ត​បាត់ដំបង​ជា​តំបន់​ដដែល​ដែល​ធ្លាប់​កើត​ហេតុ​គ្រោះថ្នាក់​ចរាចរណ៍​កាលពី​ខែ​មេសា​កន្លង​ទៅ​នេះ​បណ្តាល​ឲ្យ​មនុស្ស​ ៨ នាក់​បាន​ស្លាប់​ផង​ដែរ។

លោក​ សាត គឹមសាន ប្រធាន​ការិយាល័យ​នគរបាល​ចរាចរណ៍​ខេត្ត​បាត់ដំបង​បាន​ប្រាប់​ភ្នំពេញ​ប៉ុស្តិ៍​កាលពី​ម្សិលមិញ​ថា​មនុស្ស​ស្លាប់​ទាំង​ ៩ ​នាក់​នោះ​មាន​អ្នក​បើកបរ​រថយន្ត​ទាំង​ពីរ​គ្រឿង​ផង​ដែរ​ឯ​អ្នក​ផ្សេង​មាន​ស្ត្រី​ ៥ ​នាក់​ហើយ​ក្រៅ​​ពី​នោះ​ជា​បុរស​ដោយ​ពួក​គាត់​សុទ្ធ​ជា​អ្នក​ដំណើរ​ក្នុង​រថយន្ត​មេគង្គ​អ៊ិចប្រេស។ អ្នក​ស្លាប់​ទាំង​នោះ​មាន​អាយុ​ចន្លោះ​ពី​ជាង​ ១០ ឆ្នាំ​ដល់​ជាង​ ៥០ ឆ្នាំ​។

លោក​បាន​បន្ត​ថា៖ «រថយន្ត​ទាំង​ពីរ​គ្រឿង​បាន​ធ្វើ​ដំណើរ​ក្នុង​ទិសដៅ​ផ្ទុយ​គ្នា​គឺ​រថយន្ត​មេគង្គ​អ៊ិចប្រេស​ធ្វើ​ដំណើរ​ពី​លិច​គឺ​មកពី​ប៉ោយប៉ែត​សំដៅ​ចូល​ភ្នំពេញ។ ចំណែក​រថយន្ត​មួយ​តោន​កន្លះ​ធ្វើ​ដំណើរ​ចូល​ក្រុង​បាត់ដំបង​ហើយ​ការ​បុក​គ្នា​នេះ​ដោយសារ​តែ​ឡាន​មេគង្គ​អ៊ិចប្រេស​បាន​បើក​លឿន​ជាង ១០០ គីឡូម៉ែត្រ​ក្នុង​មួយ​ម៉ោង​ និង​ឡាន​មួយ​តោន​ហ្នឹង​វ៉ា​ជែង​គេ​ប្រើ​ចង្កូត​ស្តាំ​ទៀត​»។

លោក​បន្ថែម​ថា៖ «នៅ​ពេល​ជែង និង​ម្ខាង​ទៀត​បើក​លឿន​អ៊ីចឹង​ទោះបី​ផ្លូវ​ត្រង់​ក្តី​ក៏​ពួកគេ​មិន​អាច​ម្ចាស់​ការ​បាន​ដែរ។ វា​ជា​កំហុស​អ្នក​ទាំង​ពីរ​ដែល​កើត​មកពី​ការ​ធ្វេស​ប្រហែស​តែ​ពេល​នេះ​អ្នក​បើកបរ​ទាំង​ពីរ​បាន​ស្លាប់​ហើយ»។

ចំពោះ​សាកសព​មនុស្ស​ទាំង ៩ នាក់​ត្រូវ​បាន​នគរបាល​យក​ទៅ​តម្កល់​នៅ​វត្ត​កូនខ្លុង​ស្ថិត​ក្នុង​ឃុំ​ព្រៃតូច​ដើម្បី​ស្វែងរក​អត្តសញ្ញាណ និង​ក្រុម​គ្រួសារ​អ្នក​ទាំង​នោះ​ដើម្បី​ទទួល​យក​ទៅ​ធ្វើ​បុណ្យ​។

កាលពី​ខែ​មេសា​នៅ​ចំណុច​ភូមិសាស្ត្រ​ខាង​លើ​នេះ​ក៏​​មាន​ករណី​គ្រោះថ្នាក់​ចរាចរណ៍​មួយ​បាន​កើតឡើង​ផង​ដែរ​រវាង​រថយន្ត​ក្រុង​របស់​ក្រុមហ៊ុន​ភីអេស​បុក​ជាមួយ​រថយន្ត​ស្ទូច​មួយ​គ្រឿង​បាន​បណ្តាល​ឲ្យ​មនុស្ស​ ៨ នាក់​បាន​ស្លាប់​ភ្លាមៗ​ក្នុង​នោះ​មាន​ព្រះសង្ឃ​មួយ​អង្គ​បាន​សុគត​ផង​ដែរ​ចំណែក​មនុស្ស​ ២៨ នាក់​ផ្សេង​ទៀត​បាន​រងរបួស។

លោក​ប្រធាន​នគរបាល​ចរាចរណ៍​រូប​នេះ​បាន​និយាយ​ថា៖ «គេ​ថា​ជា​កន្លែង​ជើងកប​ប៉ុន្តែ​បើ​សិន​អ្នក​បើកបរ​គាត់​មាន​ការ​ប្រុងប្រយ័ត្ន​នោះ​មិន​មាន​គ្រោះថា្នក់​អ៊ីចឹង​ទេ។ យើង​ត្រូវ​ប្រុងប្រយ័ត្ន​»។

បុគ្គលិក​ម្នាក់​របស់​ក្រុមហ៊ុន​មេគង្គ​អ៊ិចប្រេស​បាន​ឲ្យ​ដឹង​ថា​ក្រុមហ៊ុន​ទើប​ទទួល​បាន​ព័ត៌មាន​នៅ​ល្ងាច​ម្សិលមិញ​ក្រោយ​គ្រោះថ្នាក់​អ៊ីចឹង​មិន​អាច​អត្ថាធិប្បាយ​អ្វី​បាន​ទេ៕

អត្ថបទគួរចាប់អារម្មណ៍