ភ្នំពេញៈ លោក ឈឹម ផលវរុណ ប្រធានលេខាធិការនៃឧត្តមក្រុមប្រឹក្សាពិគ្រោះ និងផ្តល់យោបល់បានឲ្យដឹងថា ប្រតិភូគណបក្សនយោបាយដែលជាសមាជិកនៃស្ថាប័ននេះបានដាក់របាយការណ៍ទៅកាន់លោកនាយរដ្ឋមន្ត្រី ហ៊ុន សែន ដោយផ្ទាល់ ហើយមានប្រមាណ ៩០ ភាគរយ គឺរឿងបញ្ហាដីធ្លី ដែលមានទាំងការបង្ហាញចំៗនូវឈ្មោះបុគ្គលដែលមានតួនាទីក្នុងរាជរដ្ឋាភិបាល។
ការថ្លែងរបស់លោក ផលវរុណ យ៉ាងដូច្នេះ គឺដើម្បីឆ្លើយតបទៅនឹងការរិះគន់ មកកាន់សមាជិកនៃឧត្តមក្រុមប្រឹក្សាពិគ្រោះ និងផ្តល់យោបល់ដែលត្រូវបានគេចោទប្រកាន់ថា សមាជិកនៃស្ថាប័ននេះគឺគ្រាន់តែជា «អាយ៉ង» របស់រដ្ឋាភិបាល និងមិនមានឥទ្ធិពលអ្វីក្នុងការចូលរួមការដោះស្រាយបញ្ហាធំៗជាពិសេសបញ្ហាវិវាទដីធ្លីនៅក្នុងសង្គមនោះទេ។
លោក ឈឹម ផលវរុណ បានថ្លែងនៅក្នុងសន្និសីទកាសែតកាលពីថ្ងៃអង្គារថា ទាំងការធ្វើរបាយការណ៍ និងការចូលរួមកិច្ចប្រជុំជាមួយលោក ហ៊ុន សែន គឺសមាជិកនៃឧត្តមក្រុមប្រឹក្សាពិគ្រោះ និងផ្តល់យោបល់ សុទ្ធតែលើកពីបញ្ហាចំៗថែមទាំងបង្ហាញឈ្មោះ និងតួនាទីរបស់មន្ត្រីដែលបានរំលោភយកដីពលរដ្ឋថែមទៀតផង។
លោកបន្តថា៖ «ការឆ្លើយតបទៅនឹងការចោទជាអាយ៉ងគាត់ (សមាជិកឧត្តមក្រុមប្រឹក្សា) បានខំធ្វើការងាររបស់គាត់យ៉ាងម៉ត់ចត់ ដើម្បីរំដោះខ្លួនពីការចោទប្រកាន់ដែលនេះបង្ហាញថា គាត់ខំធ្វើការដើម្បីខ្លួនរបស់គាត់ដោយការធ្វើរបាយការណ៍ជូនសម្តេចតេជោ។ បើបងប្អូនប្រជាពលរដ្ឋបានមើលអំពីរបាយការណ៍របស់ប្រតិភូគណបក្សដែលចុះទៅមិនមែនដាក់ចំសាច់រឿងទេ គឺចំទាំងឈ្មោះបុគ្គលដែលមានតួនាទីទៅទៀត។ របាយការណ៍ទាំងនោះបានទៅដល់តុ និងដៃសម្តេចតេជោ»។
លោក ផលវរុណ បានប្រាប់ភ្នំពេញប៉ុស្តិ៍បន្ថែមពីម្សិលមិញថា ភាគច្រើននៃបញ្ហាដែលឧត្តមក្រុមប្រឹក្សាពិគ្រោះ និងផ្តល់យោបល់បានចុះបេសកកម្មសិក្សាប្រមូលទិន្នន័យ (តម្រុយ/ភ័ស្តុតាង និងអង្គហេតុ/អង្គច្បាប់) មានប្រមាណ ៩០% ជារឿងរំលោភដីធ្លី។
លោកបន្តថា រៀងរាល់បេសកកម្មគឺប្រតិភូគណបក្សសាមីបានធ្វើរបាយការណ៍ដាក់ជូនលោកនាយករដ្ឋមន្ត្រីដោយបញ្ជាក់ច្បាស់លាស់នូវតួអង្គ និងចំណុចពាក់ព័ន្ធ។ លោកបញ្ជាក់ថា៖ «អង្គហេតុដែលបានលើកចំៗឈ្មោះមន្ត្រីដែលពាក់ព័ន្ធដីធ្លី កើតឡើងនៅភ្នំពេញ សៀមរាប កំពង់សោម បាត់ដំបង ពោធិ៍សាត់ បន្ទាយមានជ័យ មណ្ឌលគិរី និងកំពង់ធំជាដើម»។ល។
លោក ផលវរុណ បានបកស្រាយថា ឧត្តមក្រុមប្រឹក្សាពិគ្រោះ និងផ្តល់យោបល់ពុំមានសមត្ថកិច្ចដោះស្រាយករណីណានោះទេ គឺមានតែរាជរដ្ឋាភិបាលចេញលិខិតគតិយុត្តសជណ ផ្អែកលើចំណាររបស់លោក ហ៊ុន សែន ប៉ុណ្ណោះ ហើយក្នុង ១ ករណីៗប្រគល់ឲ្យក្រសួង/ស្ថាប័នជំនាញមានសមត្ថកិច្ច ពិនិត្យ និងដោះស្រាយរួចរាយការណ៍ជូនលោកនាយករដ្ឋមន្ត្រី។ ចំពោះការអនុវត្តលិខិតគតិយុត្ត សជណ នីមួយៗ គឺឧត្តមក្រុមប្រឹក្សាពិគ្រោះ និងផ្តល់យោបល់ បំពេញការងារតាមដានប្រសិទ្ធភាពនៃការអនុវត្ត និងរាយការណ៍ជូនលោក ហ៊ុន សែន ជាបន្តទៀត ហើយចំពោះករណីយឺតយ៉ាវនៃការដោះស្រាយអាចស្នើសុំពន្លឿន។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុកបានប្រាប់ភ្នំពេញប៉ុស្តិ៍កាលពីថ្ងៃពុធថា ការធ្វើការងារតាមបែបផែននៃឧត្តមក្រុមប្រឹក្សាពិគ្រោះ និងផ្តល់យោបល់ នៅពេលនេះគឺជាការធ្វើការបែបថ្មី ខណៈដែលកន្លងទៅតួនាទីទាំងនេះ គឺផ្តល់សមត្ថកិច្ចដល់គណបក្សនយោបាយដែលមានអាសនៈនៅក្នុងរដ្ឋសភា ដើម្បីចូលរួមការដោះស្រាយបញ្ហាដែលបានកើតឡើងរបស់ពលរដ្ឋ។
យ៉ាងណាលោកសាទររាល់ចំណាត់ការទាំងអស់ មិនថាស្ថាប័នណានោះទេ ឲ្យតែចូលរួមដោះស្រាយ និងបម្រើផលប្រយោជន៍របស់ប្រជាពលរដ្ឋ។ លោករំពឹងថា គ្រប់វិធានការគឺគួរតែធ្វើឡើងគ្រប់ការស្នើឡើងដោយមិនមានការរើសអើងនោះទេ។
លោកបញ្ជាក់ថា៖ «ខ្ញុំមិនអាចវាយតម្លៃក្នុងការងារទាំងអស់នេះក្នុងរូបភាពនយោបាយនោះទេ។ តែខ្ញុំគិតថា នៅក្នុងតួនាទីណាមួយក៏ដោយឲ្យតែមានការបំពេញតួនាទីហ្នឹងបានជាប្រយោជន៍ទៅពលរដ្ឋ ហើយប្រជាពលរដ្ឋទទួលបាននូវផលប្រយោជន៍ពីការបំពេញការងារនេះ គឺជាហេតុផលដែលអាចទទួលយកបាន»៕