The Phnom Penh Post Search

Search form




Logo of Phnom Penh Post newspaper Phnom Penh Post - របាយ​ការណ៍ អ.ស.ប បាន​បង្ហាញ​ថា​អំពើ​ហិង្សា​រំលោភ​លើ​ស្ត្រី​ភេទ​គួរ​ឲ្យ​បារម្ភ​យ៉ាង​ខ្លាំង

របាយ​ការណ៍ អ.ស.ប បាន​បង្ហាញ​ថា​អំពើ​ហិង្សា​រំលោភ​លើ​ស្ត្រី​ភេទ​គួរ​ឲ្យ​បារម្ភ​យ៉ាង​ខ្លាំង

របាយ​ការណ៍ អ.ស.ប បាន​បង្ហាញ​ថា​អំពើ​ហិង្សា​រំលោភ​លើ​ស្ត្រី​ភេទ​គួរ​ឲ្យ​បារម្ភ​យ៉ាង​ខ្លាំង

ភ្នំពេញៈ នៅ​ពេល យ៉ង ប៊ុនលី ជា​ឪពុក បាន​ដឹង​ថា កូន​ស្រី​គាត់​ទាំង​ពីរ​នាក់​ត្រូវ​បាន​រំលោភ​ដោយ​មិត្តភក្តិ​ជិត​ស្និទ្ធ​នោះ គាត់​បាន​សុំ​ឲ្យ​អាជ្ញាធរ​នៅ​ខេត្ត ព្រះ​សីហនុ ជួយ​ធ្វើ​អន្តរាគមន៍។

លោក ប៊ុនលី បាន​និយាយ​ថា៖ «ខ្ញុំ​រំជួល​ចិត្ត​យ៉ាង​ខ្លាំង​ចំពោះ​កូន​ស្រី​ខ្ញុំ​នៅ​ពេល​ខ្ញុំ​ដឹង​ថា ពួកគេ​ត្រូវ​បាន​គេ​រំលោភ​ដូច្នោះ» រយៈ​ពេល​ពីរ​ឆ្នាំ​បន្ទាប់​ពី​កូន​ស្រី​អាយុ ១៥ ឆ្នាំ​របស់​គាត់​បាន​ប្រាប់​ពី​រឿង​រ៉ាវ​ចាប់​រំលោភ​ដល់​គាត់​ឲ្យ​ដឹង។

នៅ​ពេល ប៊ុនលី បាន​ទៅ​ព្រមាន​កូន​ស្រី​ទី២​របស់​គាត់​នោះ គាត់​បាន​ដឹង​រឿង​ដ៏​គួរ​ឲ្យ​រន្ធត់​ចិត្ត​ដែរ​ថា កូន​ស្រី​ទី២​នោះ​ក៏​ត្រូវ​បាន​មិត្តភក្តិ​ដដែល​នោះ​ចាប់​រំលោភ​ដែរ​កាល​ពី​នាង​អាយុ ១០ ឆ្នាំ។

លោក ប៊ុនលី បាន​ថ្លែង​ថា៖ «ខ្ញុំ​បាន​ដាក់​ពាក្យ​បណ្ដឹង​ទៅ​តុលាការ​ចំពោះ​ករណី​ទាំង​ពីរ​នេះ​ដែរ តែ​ករណី​នេះ​ត្រូវ​បាន​ទម្លាក់​ចោល ហើយ​ជន​សង្ស័យ​រស់​នៅ​មាន​សេរីភាព» ដោយ​បន្ថែម​ថា ជន​សង្ស័យ​ទោះ​ជា​ត្រូវ​បាន​ចាប់​ខ្លួន​ក៏​ដោយ​ក៏​ត្រូវ​បាន​ដោះលែង​ឲ្យ​នៅ​ក្រៅ​ឃុំ​ភ្លាមៗ​ផង​ដែរ។

លោក​ថា៖ «ពាក្យ​បណ្ដឹង​ខ្ញុំ​ឥឡូវ​នេះ​ស្ថិត​នៅ​សាលា​ឧទ្ធរណ៍ ប៉ុន្តែ​ខ្ញុំ​មិន​ដឹង​ថា តើ​ពួក​គេ​រំពឹង​នឹង​បើក​សវនាការ​នៅ​ពេល​ណា​នោះ​ទេ។ រហូត​ដល់​ខ្ញុំ​ងាប់ ខ្ញុំ​នឹង​មិន​បោះបង់​ចោល​ការ​ព្យាយាម​រក​យុត្តិធម៌​ឲ្យ​កូន​ស្រី​ខ្ញុំ​ឡើយ»។

ពាក្យ​បណ្ដឹង​នោះ​គឺ​ពិត​ជា​មិន​អាច​ជួយ​ដល់ ប៊ុនលី បាន​ទេ។ បុរស​ម្នាក់​ចំណោម ៥ នាក់​បាន​ប្រព្រឹត្ត​អំពើ​ចាប់​រំលោភ ប៉ុន្តែ​ពួក​គេ​ជាង ៤៤ ភាគរយ​មិន​ធ្លាប់​ប្រឈម​នឹង​ផល​វិបាក​ផ្លូវ ច្បាប់​ឡើយ បើ​ទោះ​ជា​ពួក​គេ​ជិត​ពាក់​កណ្ដាល​ត្រូវ​បាន​ចាប់​ខ្លួន​ក្ដី ក៏​មាន​ត្រឹម​តែ​ជិត ២៨ ភាគរយ​ប៉ុណ្ណោះ​ជាប់​ពន្ធនាគារ។ នេះ​បើ​យោង​តាម​របាយ​ការណ៍​អង្គការ​សហ​ប្រជាជាតិ​ចេញ​ពី​ថ្ងៃ​ម្សិលមិញ ដែល​លើក​ឡើង​ពី «ការ​ទទួល​យក​វប្បធម៌ និទ្ទណ្ឌភាព» ថា​ជា​មូល​ហេតុ​សំខាន់​ដែល​អំពើ​ហិង្សា​លើ​ស្ត្រី​ភេទ នៅ​តែ​មាន​ជា​ទូទៅ​នៅ​ឡើយ។

ទោះ​ជា​កម្ពុជា​បាន​ខិតខំ​ប្រយុទ្ធ​ប្រឆាំង​នឹង​ការ​ចាប់​រំលោភ​ក្ដី ក៏​កិច្ចការ​នេះ​មាន​ការ​រាំង​ស្ទះ​ដោយ​សារ​កង្វះ​ខាត​ទិន្នន័យ​គួរ​ឲ្យ​ជឿ​ទុក​ចិត្ត​បាន។ របាយ​ការណ៍ អ.ស.ប. ដែល​បាន​ធ្វើ​សម្ភាស​រយៈ​ពេល​បី​ឆ្នាំ​ជាមួយ​មនុស្ស ប្រុស​ស្រី​ចំនួន​ជាង ១៣ ០០០ នាក់​នៅ​ក្នុង​ប្រទេស​ចំនួន ៦ នេះ គឺ​មាន​ការ​ស្ទង់​មតិ​ទូលំ​ទូលាយ​បំផុត​ដែល​មិន​ធ្លាប់​បាន​ចេញ​ផ្សាយ​ពី​មុន​មក ហើយ​នឹង​ត្រូវ​បាន​គេ​យក​ទៅ​ប្រើ​ផ្ដល់​ជា​ព័ត៌មាន​នៅ​តាម​កម្មវិធី​ធ្វើ បទ​បង្ហាញ​មួយ​ចំនួន​ដែល​គេ​គ្រោង​នឹង​ធ្វើ​នៅ​ក្នុង​រយៈ​ពេល​ប៉ុន្មាន​ឆ្នាំ​ខាង​មុខ​នេះ។

នៅ​កម្ពុជា ក្រុម​អ្នក​ស្រាវជ្រាវ​បាន​ធ្វើ​បទ​សម្ភាស​ជាមួយ​ពលរដ្ឋ​ប្រុស​ស្រី កម្ពុជា​ចំនួន​ជាង ២ ០០០ នាក់​តាម​ឥរិយាបថ និង​ប្រវត្តិ​នៃ​អំពើ​ហិង្សា​ដោយ​សម្លឹង​មើល​ជា​រួម​ដ៏​កម្រ​មួយ​ថា តើ​មូល​ហេតុ​អី និង​តើ​បុរស​ប៉ុន្មាន​នាក់​ដែល​ប្រព្រឹត្ត​អំពើ​ហិង្សា​លើ​ស្ត្រី​ភេទ?

របាយ​ការណ៍​នេះ​បាន​ពន្យល់​ជា​ឈុត​ថា ការ​រំលោភ​ពី​ពេល​កន្លង​មក​អាច​ជា​ប្រធានបទ​រក​ឃើញ​តិច​តួច​មួយ​នៅ កម្ពុជា។ បុរស​កម្ពុជា ៤៥ ភាគរយ​រាយការណ៍​ថា​បាន​ឆ្លង​កាត់​ទម្រង់​មួយ​ចំនួន​នៃ ការ​រំលោភ​រាង​កាយ​ដូចជា ក្មេង​ជាដើម និង ១៥ ភាគរយ​ត្រូវ​បាន​រំលោភ​ផ្លូវ​ភេទ។

របាយ​ការណ៍​កត់​សម្គាល់​ថា៖ «មាន​ការ​ពាក់​ព័ន្ធ​គ្នា​យ៉ាង​ខ្លាំង​ក្លា​រវាង​បទពិសោធ​អំពើ​ហិង្សា ផ្ទាល់​ខ្លួន និង​ការ​ប្រើ​អំពើ​ហិង្សា​របស់​បុរសៗ»។

អ្នក​ចាប់​រំលោភ​ជនជាតិ​កម្ពុជា​ភាគ​ច្រើន​ជា​យុវជន។ បុរស​ភាគ​ច្រើន​បាន​ប្រព្រឹត្ត​ការ​ចាប់​រំលោភ​ដំបូង​របស់​ខ្លួន​នៅ​ពេល​មាន​វ័យ​ក្មេង​ខ្ចី​ជាង​បុរស​ជាតិ​ផ្សេង​ទៀត​នៅ​ក្នុង​តំបន់​នេះ គឺ​បុរស​ជិត ១៦ ភាគរយ​បាន​ប្រព្រឹត្ត​អំពើ​នេះ​នៅ​ពេល​ក្រោម​អាយុ ១៥ ឆ្នាំ និង​ចំនួន​ជាង​ពាក់​កណ្ដាល​អាយុ​ក្រោម ២០ ឆ្នាំ។

លោក James Lang មន្ត្រី​សម្រប​សម្រួល​កម្មវិធី​នៅ​អង្គការ Partners for Prevention ដែល​ជា​កម្មវិធី​រួម​របស់ អ.ស.ប.មាន​មូលដ្ឋាន​នៅ​ក្រុង បាងកក បាន​ថ្លែង​នៅ​ពី​ក្រោយ​របាយ​ការណ៍​ថា៖ «យើង​ឃើញ​យុវជន​ជាច្រើន​នៅ​កម្ពុជា​ប្រព្រឹត្ត​អំពើ​ហិង្សា និង​បុរស​ជា​ច្រើន​តែង​តែ​ព្យាយាម​បង្ហាញ​ពី​ភាព​ជា​បុរស​របស់​ខ្លួន​តាម​រយៈ​អំពើ​ហិង្សា​ផ្លូវ​ភេទ»។

ជា​ការ​ពិត​មាន​បុរស ៤៥ ភាគរយ​ដែល​បាន​ប្រាប់​ពី​ការ​ចាប់​រំលោភ​កាល​ពី​មុន​បាន​និយាយ​ថា ពួក​គេ​បាន​ធ្វើ​ដូច្នោះ​ដោយ​សារ​តែ​មាន «សិទ្ធិ​ផ្លូវ​ភេទ»។ បុរស ៤២ ភាគរយ​បាន​ប្រព្រឹត្ត​បទ​ឧក្រិដ្ឋ​នេះ​ដោយ​សារ​តែ​ពួក​គេ​មាន «កំហឹង​/ការ​ផ្ដន្ទាទោស» និង​មាន​ចំណង់​ផ្លូវ​ភេទ​ដែល​មិន​អាច​គ្រប់​គ្រង​បាន។

លោក​ស្រី Wenny Kasuma តំណាង​ស្ត្រី​ប្រចាំ​ប្រទេស​របស់ អ.ស.ប.បាន​ថ្លែង​ថា ដោយ​សារ​តែ​មាន​ទំហំ​នៃ​ការ​ស្ទង់​មតិ​មិន​ធ្លាប់​មាន​ពី​មុន​មក​នេះ ទីភ្នាក់ងារ​អភិវឌ្ឍន៍ និង​រដ្ឋាភិបាល​សង្ឃឹម​ថា ការ​ស្ទង់​មតិ​នេះ​គេ​អាច​ប្រើ​វាស់​ស្ទង់​កម្មវិធី​ទប់​ស្កាត់​ឲ្យ​កាន់​តែ​មាន​ប្រសិទ្ធភាព។

លោក​ស្រី Wenny បាន​អះអាង​ថា៖ «វា​ធ្វើ​ឲ្យ​យើង​យល់​កាន់​តែ​ច្បាស់​ពី​កម្លាំង​ដែល​ប្រែ​ក្លាយ​ទៅ​ជា​តើ​ហេតុអ្វី​បាន​ជា​បុរស​មួយ​ចំនួន​ប្រព្រឹត្ត​អំពើ​ហិង្សា​ដូច្នេះ និង​សម្លឹង​រក​មើល​វិធី​ទប់​ស្កាត់​អំពើ​ហិង្សា​នេះ»។

ផ្អែក​លើ​លទ្ធផល​ដែល​បាន​សិក្សា និង​មាន​លក្ខណៈ​កាន់​តែ​ទូលំ​ទូលាយ​បង្ហាញ​ថា ការ​វិភាគ​ជាក់​លាក់​នៅ​កម្ពុជា​ត្រូវ​បាន​រំពឹង​ថា​នឹង​ចាប់​ផ្ដើម​ធ្វើ នៅ​ចុង​ឆ្នាំ​នូវ​កម្មវិធី​សាក​ល្បង​មួយ​ចំនួន​ក្រោម​ការ​ផ្ដល់​មូលនិធិ ពី អូស្រ្តាលី និង​សរសេរ​ដោយ​រដ្ឋាភិបាល ហើយ​ទីភ្នាក់ងារ អ.ស.ប.និង​អង្គការ GIZ នឹង​ត្រូវ​ធ្វើ​នៅ​ពេល​អនាគត​ខាង​មុខ​នេះ។

លោក​ស្រី Kasuma បាន​លើក​ឡើង​ថា៖ «ពិត​ជា​ត្រូវ​ការ​ឲ្យ​គេ​វាស់​ស្ទង់​ចំពោះ​កម្ពុជា​មែន។ ដូច្នេះ​យើង​សូម​សាក​ល្បង​ជា​លើក​ដំបូង​នៅ​ក្នុង​តំបន់​មាន​កម្រិត និង​រក​មើល​មិន​ត្រឹម​តែ​ថា តើ​អ្នក​ប្រព្រឹត្ត​ជា​អ្នក​ណា​នោះ​ទេ គឺ​រាប់​ទាំង​ជន​រងគ្រោះ​ផង​ដែរ»។

លោក​ស្រី Kasuma បាន​ឲ្យ​ដឹង​ទៀត​ថា ជា​ឧទាហរណ៍​នៅ​កម្ពុជា បើ​សិន​ការ​បំពាន​ផ្លូវ​ភេទ​ចេះ​តែ​ធ្ងន់​ធ្ងរ​ឡើង​ដោយ​សារ​តែ​ឥរិយាបថ មាន​សិទ្ធិ ឬ​ក៏​ការ​បំពាន​ដោយ​ជាតិ​ស្រវឹង​នោះ អ្នក​ចង់​ត្រូវ​តែ​មាន​កិច្ច​ប្រឹង​ប្រែង​ទប់ស្កាត់។ អំពើ​ហិង្សា​នៅ​ពេល​គេ​ប្រព្រឹត្ត​ហើយ​គឺជា​ធម្មតា​តែង​តែ​ប្រព្រឹត្ត​វា​ជា​ថ្មី​ម្ដង​ទៀត។ វា​ទំនង​ជា​ប្រព្រឹត្ត​រាល់​ពេល​។ ដូច្នេះ​អន្តរាគមន៍​នគរបាល​គឺ​ជា​ផ្នែក​សំខាន់​មួយ​ក្នុង​ការ​ឆ្លើយ​តប​ទៅ​នឹង​អំពើ​នេះ។

ទោះ​ជា​យ៉ាង​ណា​មន្ត្រី​នៅ​ក្រសួង មហាផ្ទៃ​មិន​អាច​ទាក់​ទង​សុំ​ការ​បំភ្លឺ​បាន​ទេ​កាល​ពី​ថ្ងៃ​ម្សិលមិញ។

រដ្ឋ​មន្ត្រី​ក្រសួង កិច្ចការ​នារី​លោក​ស្រី អ៊ឹង កន្ថាផាវី បាន​ថ្លែង​ថា លោក​ស្រី​មិន​អាច​ឆ្លើយ​តប​នឹង​សំណួរ​ទាំង​នេះ​តាម​ទូរស័ព្ទ​បាន​ទេ ហើយ​ក៏​មិន​ឆ្លើយ​តប​ភ្លាមៗ​នូវ​សំណួរ​តាម​អ៊ីមែល​ផង​ដែរ។

លោក James Lang ដែល​កំពុង​ជួយ​រៀបចំ​កម្មវិធី​នេះ​បាន​ថ្លែង​ថា ចំណុច​ជាក់​លាក់​មួយ​ចំនួន​មិន​ទាន់​ត្រូវ​បាន​បញ្ចប់​នៅ​ឡើយ ប៉ុន្តែ​ថា គេ​នឹង​ខិតខំ​ដោះស្រាយ​ចំណុច​ទាក់​ទង​នីមួយៗ។

លោក James Lang បាន​បន្ថែម​ថា៖ «យើង​ដឹង​ថា ការ​ធ្វើ​ការងារ​ជាមួយ​យុវជន​នៅ​សាលា​រៀន​ពាក់​ព័ន្ធ​នឹង​ឥរិយាបថ ចំពោះ​ទំនាក់​ទំនង និង​យេនឌ័រ​នេះ​អាច​ជួយ​ប្ដូរ​ទម្លាប់​នេះ​នៅ​ពេល​ក្រោយ។ ប៉ុន្តែ​យើង​ក៏​ដឹង​ដែរ​ថា អ្នក​ចង់​បាន​ចំណេះ​ដឹង​សហគមន៍​ជុំវិញ​តុល្យភាព​ទូទៅ​ចំពោះ​ការ​រំលោភ​បំពាន​នេះ​។ យើង​ចង់​បាន​មេ​ដឹក​នាំ​មូលដ្ឋាន​ណា​ដែល​ចេះ​ដោះស្រាយ​បញ្ហា​នេះ​ដោយ​ភាព​ហ្មត់ចត់ និង​នាំ​គ្នា​ជួយ​អនុវត្ត​ច្បាប់​ជាតិ។ យើង​កំពុង​តែ​ស្វែង​រក​កញ្ចប់​ទប់​ស្កាត់​ដោយ​មាន​ការ​សម្រប​សម្រួល​មួយ»។

នៅ​ពេល​សួរ​ថា តើ​មាន​អ្វី​មួយ​បញ្ជាក់​ពី​លទ្ធផល​នៅ​កម្ពុជា​នោះ លោក Lang បាន​លើក​ឡើង​ថា វា​មាន​លក្ខណៈ​ជា​ទូទៅ​បំផុត​នៅ​ក្នុង​តំបន់​នេះ និង​ក្នុង​ពិភពលោក។

លោក James Lang បាន​បញ្ជាក់​បន្ថែម​ទៀត​ថា ៖ «គ្មាន​អ្វី​មួយ​វិសាមញ្ញ​នោះ​ទេ លើក​លែង​តែ​បញ្ហា​ចាប់​រំលោភ​បូក ហើយ​អំពើ​ហិង្សា​ផ្លូវ​ភេទ​គឺ​កើត​ឡើង​ជា​ទូទៅ​នៅ​កម្ពុជា​ច្រើន​ជាង កន្លែង​ផ្សេង​ទៀត។ នោះ​ជា​រឿង​មួយ​ដែល​យើង​គិត​ថា យើង​អាច​ជួយ​កាត់​បន្ថយ​វា​បាន»។

នៅ​ក្នុង​របាយ​ការណ៍​បាន​បញ្ជាក់​បន្ថែម​ទៀត​ថា ទាំង​អស់​នេះ​បាន​ប្រាប់​ថា ចំនួន ២០,៨ ភាគរយ​បាន​ប្រព្រឹត្ត​អំពើ​ចាប់​រំលោភ​យ៉ាង​តិច​ម្ដង​។ ប៉ុន្តែ​ចំនួន​ជាង ៥ ភាគរយ​នៃ​បុរស​កម្ពុជា​បាន​ប្រព្រឹត្ត​ការ​រំលោភ​បូក គឺ​ខ្ពស់​ជាង​តិច​តួច​នឹង​ចំនួន​មធ្យម​ភាគ​នៅ​ក្នុង​តំបន់​នេះ​គឺ​មាន​ចំនួន ៣,៩ ភាគរយ។

ទោះ​យ៉ាង​ណា​ក៏​ដោយ​ក៏​ក្រុម​សិទ្ធិ​មនុស្ស​ក្នុង​ស្រុក​បាន​បង្ហាញ​ថា កម្ពុជា អាច​មាន​ប្រការ​ផ្សេង​ទៀត​គឺ ការ​រំលោភ​លើ​ក្មេង។

របាយ​ការណ៍ របស់ អ.ស.ប.ដដែល​មិន​បាន​បង្ហាញ​លទ្ធផល ពី​អាយុ​ជន​រងគ្រោះ​ទេ តែ​លោក Lang បាន​ថ្លែង​ថា របាយ​ការណ៍​ប្រទេស​កម្ពុជា​អាច​រួម​បញ្ចូល​កម្រិត​លម្អិត​នោះ។

តួលេខ នេះ​ទំនង​ជា​នឹង​មាន​ការ​ពាក់ព័ន្ធ​សំខាន់ៗ​សម្រាប់​កម្មវិធី​នៅ​កម្ពុជា​ដែល​មាន​ជោគជ័យ​ជាក់​លាក់​តិច​តួច​ក្នុង​ការ​បង្រ្កាប​ទៅ​លើ​ឧក្រិដ្ឋកម្ម​ដ៏​សាហាវ​នេះ។

ទោះ​យ៉ាង​ណា​ចំពោះ​អ្នក​ស្រី ហ៊ីម នៅ ដែល​កូន​ស្រី​អាយុ ១១ ឆ្នាំ​របស់​គាត់​ត្រូវ​បាន​គេ​រំលោភ ៣ ឆ្នាំ​មក​ហើយ​នោះ មើល​ទៅ​វា​ហាក់​ដូច​ជា ការ​ប្រព្រឹត្ត​នោះ​ក្លាយ​ទៅ​ជា​រឿង​ធម្មតា​ទៅ​ហើយ។

ដោយ​ថ្លែង​តាម​ទូរស័ព្ទ អ្នក​ស្រី​បាន​ថ្លែង​ពី​ថ្ងៃ​ម្សិលមិញ​ថា៖ «យើង​បាន​ធ្វើ​ដំណើរ​មក​ពី​ខេត្ត ព្រៃវែង។ ខ្ញុំ​នឹង​មិន​អនុញ្ញាត​ឲ្យ​កូន​ស្រី​ខ្ញុំ​រស់​នៅ​ទី​នោះ​ត​ទៅ​ទៀត​ទេ ព្រោះ​ខ្ញុំ​មាន​ការ​ព្រួយ​បារម្ភ​ពី​សន្តិសុខ​នាង ហើយ​ខ្ញុំ​មិន​ចង់​ឲ្យ​នាង​នឹក​ឃើញ​ពី​អតីតកាល​នោះ​ទេ»។

អ្នក​ស្រី ហ៊ីម នៅ បាន​ថ្លែង​ឲ្យ​ដឹង​បន្ត​ទៀត​ថា ក្មេង​ស្រី​នេះ​ត្រូវ​បាន​ជីតា​នាង​រំលោភ ដោយ​គំរាម​សម្លាប់​នាង បើ​សិន​នាង​ហ៊ាន​និយាយ​ប្រាប់​គេ។

អ្នក​ស្រី​បាន​គូស​បញ្ជាក់​ឲ្យ​ដឹង​បន្ថែម​ទៀត​ថា នៅ​ពេល​អ្នក​ជិត​ខាង​បាន​ប្រាប់​អ្នក​ស្រី​ពី​អ្វី​ដែល​គេ​បាន​សង្ស័យ​ថា បាន​កើត​ឡើង​នោះ អ្នក​ស្រី​បាន​ប្រឈម​នឹង​កូន​ស្រី​គាត់​ដែល​បាន​និយាយ​ថា ជីតា​អាយុ ៦៦ ឆ្នាំ​បាន​រំលោភ​នាង នៅ​ពេល​ដែល​នាង​បាន​ទៅ​រក​អុស​នៅ​ក្នុង​ព្រៃ​ក្បែរ​នោះ។ អ្នក​ស្រី​បាន​និយាយ​ថា៖ «នគរបាល​មិន​អាច​ចាប់​ខ្លួន​គាត់​ទេ ព្រោះ​នៅ​ពេល​នោះ​គាត់​បាន​រត់​គេច​ខ្លួន​បាត់​ហើយ​។ គាត់​កំពុង​ធ្វើ​ការ​នៅ​ប្រទេស​ថៃ​ឥឡូវ​នេះ។ ខ្ញុំ​នៅ​តែ​សង្ឃឹម​ថា ថ្ងៃ​ណា​មួយ​កូន​ស្រី​របស់​ខ្ញុំ​នឹង​ទទួល​បាន​យុត្តិធម៌»៕ PN

អត្ថបទគួរចាប់អារម្មណ៍