.jpg)
ដំបូលផ្ទះនៅបន្ទាយមានជ័យដែលខូចខាតដោយខ្យល់កន្ត្រាក់ថ្មីៗនេះ។ ហ្វេសប៊ុក
ភ្នំពេញៈ ភ្លៀងលាយឡំនឹងខ្យល់កន្រ្តាក់កាលពីល្ងាចម្សិលម្ង៉ៃបានបង្កឲ្យមនុស្សយ៉ាងហោចណាស់ ៣ នាក់រងរបួស និងខូចខាតផ្ទះសំបែងរបស់ពលរដ្ឋ ៣៧ ខ្នង នៅក្នុងខេត្តចំនួន ៣ រួមមាន ខេត្តព្រៃវែង បន្ទាយមានជ័យ និងកណ្ដាល ខណៈនៅរាជធានីភ្នំពេញមានបង្គោលអគ្គិសនីចំនួន ២៤ ដើម បានដួលរលំ។នេះបើតាមរបាយការណ៍ដែលភ្នំពេញប៉ុស្តិ៍ទទួលបានពីម្សិល។
លោក លី ចាន់ថា នាយនគរបាលប៉ុស្តិ៍ឃុំព្រែកខ្សាយ (ក) បានប្រាប់ភ្នំពេញប៉ុស្តិ៍ពីម្សិលមិញថា ភ្លៀងខ្យល់កាលពីល្ងាចថ្ងៃអង្គារ បានបង្កឲ្យលំនៅឋានរបស់ពលរដ្ឋ ៣ ខ្នង នៅភូមិព្រែកខ្យាយ ឃុំព្រែកខ្សាយ (ក) ស្រុកពាមរក៍ ខេត្តព្រៃវែង ដែលធ្វើពីឈើប្រក់ស័ង្កសីបានដួលរលំបាក់រាបដល់ដី។
លោកបានបញ្ជាក់ថា៖ «នៅក្នុងគ្រោះថ្នាក់ដែលបង្កឡើងដោយបាតុភូតគ្រោះធម្មជាតិខាងលើនេះ បានធ្វើឲ្យពលរដ្ឋជាម្ចាស់ផ្ទះចំនួន ៣ នាក់ [ជីដូន និងចៅប្រុស] រងរបួសជាមធ្យមផងដែរ ដោយសារតែផ្ទះបាក់សង្កត់លើ។ បច្ចុប្បន្នជនរងគ្រោះទាំង ៣ នាក់ ត្រូវបានបញ្ជូនទៅកាន់មន្ទីរពេទ្យបង្អែកអ្នកលឿងដើម្បីព្យាបាលរបួស»។
ដោយឡែកនៅខេត្តបន្ទាយមានជ័យឯណោះវិញ ភ្លៀងខ្យល់កន្ត្រាក់កាលពីថ្ងៃអង្គារបានបង្កការខូចខាតផ្ទះពលរដ្ឋចំនួន ៣៤ ខ្នងនៅក្នុងភូមិចំនួន ៤ នៃឃុំតាបែន ស្រុកស្វាយចេក ក្នុងនោះ ភូមិតាបែនមានខូចខាតផ្ទះ ១៣ ខ្នង, ភូមិអូរវែងខាងត្បូងខូចខាតផ្ទះ ១២ ខ្នង ភូមិគោករកា ខូចខាតផ្ទះ ៣ ខ្នង និង ភូមិគោកតាឯក ខូចខាតផ្ទះ ៦ ខ្នង។ប៉ុន្តែមិនប៉ះពាល់ដល់អាយុជីវិតពលរដ្ឋណាម្នាក់ឡើយ។នេះបើតាមលោក អ៊ុំ រាត្រី អភិបាលអះអាងកាលពីម្សិលមិញ។
លោកបានបញ្ជាក់ថា៖ «នៅពេលនេះ ខ្ញុំកំពុងដឹកនាំកម្លាំងសមត្ថកិច្ចចម្រុះជិត ៤០០នាក់ ចុះអន្តរាគមន៍ជួយកសាងនិងជួសជុលផ្ទះជូនពលរដ្ឋរងគ្រោះឡើងវិញដើម្បីឲ្យពួកគាត់រស់នៅដោយសុវត្ថិភាព ហើយយើងក៏បានផ្ដល់ស្បៀងអាហារមួយចំនួនដល់ពួកគាត់ផងដែរ ដើម្បីជួយសម្រាលការលំបាកពេលកំពុងខ្វះខាតនៅពេលនេះ»។
ពាក់ព័ន្ធនឹងគ្រោះធម្មជាតិនេះ អគ្គិសនីកម្ពុជាក៏បានផ្សព្វផ្សាយសេចក្ដីជូនដំណឹងដល់អតិថិជនភ្លាមៗផងដែរ អំពីករណីដាច់ចរន្តអគ្គិសនីក្នុងតំបន់មួយចំនួននៅរាជធានីភ្នំពេញនិងមួយផ្នែកនៃខេត្តកណ្ដាលក្រោយពីមានភ្លៀងខ្យល់បក់បោកខ្លាំងកាលពីល្ងាចថ្ងៃទី ៤ ខែ មិថុនា ឆ្នាំនេះ។
តាមសេចក្ដីជូនដំណឹងដែលត្រូវបានផ្សព្វផ្សាយលើ Facebook ផ្លូវការរបស់ «អគ្គិសនីកម្ពុជា EDC» នាល្ងាចថ្ងៃនោះបានបញ្ជាក់ថា មូលហេតុដែលនាំឲ្យដាច់ចរន្តអគ្គិសនីក្នុងតំបន់អនុស្ថានីយទី ១០ (GS0-F7 និងអនុស្ថានីយទី ៥ (GS5-F11) គឺបណ្ដាលមកពីបាតុភូតភ្លៀងខ្យល់ខ្លាំងធ្វើឲ្យបាក់បង្គោលខ្សែបណ្តាញតង់ស្យុងមធ្យម (MV) សរុបចំនួន ២៤ ដើមស្ថិតតាមបណ្ដោយផ្លូវជាតិលេខ ៤ និងផ្លូវមួយចំនួនទៀតក្នុងខណ្ឌពោធិ៍សែនជ័យរាជធានីភ្នំពេញនិងស្រុកអង្គស្នួលខេត្តកណ្តាល។
យ៉ាងណាក៏ដោយ កាលពីម្សិលមិញ ក្រុមការងារបច្ចេកទេសអគ្គិសនីកម្ពុជាបានចុះត្រួតពិនិត្យ និងដាំបង្គោលខ្សែបណ្តាញតង់ស្យុងមធ្យម (MV) ឡើងវិញ និងរៀបចំតភ្ជាប់ចរន្តអគ្គិសនី ដើម្បីឲ្យពលរដ្ឋឬអតិថិជនរបស់ខ្លួននៅក្នុងតំបន់ទាំងនោះបានប្រើប្រាស់ឡើងវិញ។
ខណៈនេះប្រទេស កម្ពុជា កំពុងរងនូវឥទ្ធិពលសម្ពាធទាបនិងខ្យល់មូសុងនិរតី ស្របពេលដែលឥទ្ធិពល ElNino កំពុងមានការថមថយចុះបន្តិច ប៉ុន្តែកម្ពុជានៅមិនទាន់ឆ្លងផុតបាតុភូតនេះនៅឡើយទេ។
ក្នុងលក្ខណៈបែបនេះ នឹងធ្វើឲ្យអាកាសធាតុក្នុងប្រទេសកម្ពុជាមានភ្លៀងធ្លាក់ក្នុងកម្រិតពីមធ្យមទៅច្រើនរាយប៉ាយនៅទូទាំងប្រទេសចាប់ពីថ្ងៃពុធសប្ដាហ៍នេះរហូតដល់ថ្ងៃអង្គារសប្ដាហ៍ក្រោយ។
ទន្ទឹមនោះបាតុភូតផ្គររន្ទះនិងខ្យល់កន្រ្តាក់ក៏នឹងបន្តកើតមានច្រើនផងដែរដែលគប្បីពលរដ្ឋត្រូវបង្កើនការ ប្រុងប្រយ័ត្នដើម្បីចៀសវាងគ្រោះថ្នាក់ជាយថាហេតុ។ នេះបើយោងសេចក្តីជូនដំណឹងរបស់ក្រសួងធនធានទឹក និងឧតុនិយមដែលបានចេញផ្សាយកាលពីថ្ងៃអង្គារ៕
