The Phnom Penh Post Search

Search form




Logo of Phnom Penh Post newspaper Phnom Penh Post - រយៈពេល ១ ​ឆ្នាំ​កងរាជ​អាវុធហត្ថ​បង្ក្រាប​បទល្មើស​ជិត​ ១២០០ ​លើក

រយៈពេល ១ ​ឆ្នាំ​កងរាជ​អាវុធហត្ថ​បង្ក្រាប​បទល្មើស​ជិត​ ១២០០ ​លើក

រូបថត​ឯកសារ​សមត្ថកិច្ច​ចុះ​បង្ក្រាប​ការ​តវ៉ា​កន្លង​មក​។
រូបថត​ឯកសារ​សមត្ថកិច្ច​ចុះ​បង្ក្រាប​ការ​តវ៉ា​កន្លង​មក​។ បុគ្គលិក

រយៈពេល ១ ​ឆ្នាំ​កងរាជ​អាវុធហត្ថ​បង្ក្រាប​បទល្មើស​ជិត​ ១២០០ ​លើក

ភ្នំពេញៈ ក្នុង​រយៈពេល​មួយ​ឆ្នាំ​នៃ​ចន្លោះ​ថ្ងៃ​ទី ១៤ ​កក្កដា ២០១៤ ដល់ ១៤ ​កក្កដា​ ២០១៥ កងរាជ​អាវុធហត្ថ​លើ​ផ្ទៃ​ប្រទេស​បាន​ស្រាវជ្រាវ និង​បង្ក្រាប​បាន​បទល្មើស​ជិត​ ១២០០ ​លើក និង​ឃាត់​ខ្លួន​ជន​សង្ស័យ​បញ្ជូន​ទៅ​តុលាការ​ជាង ១៩០០ ​នាក់ ក្នុង​កិច្ច​ការពារ​សន្តិសុខ​សង្គម។

ក្នុង​ពិធី​ខួប​លើក​ទី ២២ ឆ្នាំ ទិវា​កងរាជ​អាវុធហត្ថ (១៤ កក្កដា ១៩៩៣-១៤ កក្កដា ២០១៥) និង​ពិធី​បញ្ចុះ​បឋម​សិលា​បើក​ការដ្ឋាន​សាងសង់​អគារ​បញ្ជាការដ្ឋាន​កងរាជ​អាវុធហត្ថ​លើ​ផ្ទៃ​ប្រទេស​កាលពី​ម្សិលមិញ​នេះ​អគ្គមេបញ្ជាការ​រង​នៃ​កងយោធពល​ខេមរភូមិន្ទ និង​ជា​មេបញ្ជាការ​កងរាជ​អាវុធហត្ថ​លើ​ផ្ទៃ​ប្រទេស លោក សៅ សុខា បាន​ថ្លែង​ថា សមិទ្ធផល​ចន្លោះ​រវាង​ខួប​លើក​ទី ២១ និង​ទី​ ២២ ឆ្នាំ ២០១៥ នេះ​ក្នុង​ការងារ​ប្រតិបត្តិការ​កងរាជ​អាវុធហត្ថ​លើ​ផ្ទៃ​ប្រទេស​បាន​ធ្វើការ​ស្រាវជ្រាវ និង​បង្ក្រាប​បទល្មើស ចំនួន ១១៩០ លើក ក្នុង​នោះ​បទឧក្រិដ្ឋ ៥៥៩ លើក និង​បទ​មជ្ឈឹម ៦៣១ ​លើក និង​បាន​ឃាត់​ខ្លួន​ជនសង្ស័យ​បញ្ជូន​ទៅ​តុលាការ​ចំនួន ១៩៣៣ ​នាក់។

លោក សៅ សុខា បាន​ឲ្យ​ដឹង​ដែរ​ថា​ក្នុង​លទ្ធផល​នៃ​ខួប​មួយ​ឆ្នាំ​ចុងក្រោយ​នេះ​កងរាជ​អាវុធហត្ថ​លើ​ផ្ទៃ​ប្រទេស​ក៏​បាន​ជួយ​សង្គ្រោះ​ប្រជាជន​ដែល​ទទួល​រងគ្រោះ​ដោយ​មហន្តរាយ​ផ្សេងៗ​ចំនួន ៨៤៩២ លើក​ផង​ដែរ។ ជាមួយ​គ្នា​នេះ​លោក​ថា៖ «កងរាជ​អាវុធហត្ថ​លើ​ផ្ទៃ​ប្រទេស​ក៏​បាន​ធ្វើ​កំណែទម្រង់​បច្ចុប្បន្ន​ភាព និង​ពង្រីក​រចនាសម្ព័ន្ធ​ការងារ​បុគ្គលិក​ហ្វឹកហ្វឺន​អប់រំ​នយោបាយ​ចិត្តសាស្ត្រ​កសាង​ហេដ្ឋារចនាសម្ព័ន្ធ​ការងារ​ថែទាំ​សុខភាព និង​ការងារ​បច្ចេកទេស​ជាច្រើន​ទៀត»។

ក្នុង​ពិធី​ដដែល​នេះ​ក្រៅពី​ការ​ថ្លែង​កោតសរសើរ​អគ្គមេបញ្ជាការ​នៃ​កងយោធពល​ខេមរភូមិន្ទ លោក ប៉ុល សារឿន ក៏​បាន​ជំរុញ​ឲ្យ​មន្ត្រី​កងរាជ​អាវុធហត្ថ​ត្រូវ​យក​ចិត្ត​ទុក​ដាក់​ផ្តល់​កម្លាំង​សហការ​ជាមួយ​អាជ្ញាធរ​គ្រប់​លំដាប់​ថ្នាក់​ក្នុង​ការ​បង្ក្រាប​បទល្មើស​នានា​ដូចជា​ការ​បំពាន​ដី​រដ្ឋ​បទល្មើស​ព្រៃឈើ ការ​នេសាទ​ខុស​ច្បាប់ ជួញដូរ​សត្វ​ព្រៃ ការ​នាំ​ទំនិញ​ខុស​ច្បាប់ និង​ចូលរួម​អនុវត្ត​ចរាចរណ៍​ផ្លូវ​គោក។

លោក​បាន​បន្ត​ថា៖ ​«កងរាជ​អាវុធហត្ថ​គ្រប់​លំដាប់​ថ្នាក់​ត្រូវ​ក្តាប់​ឲ្យ​បាន​នូវ​ព័ត៌មាន​ទូទៅ​នៃ​សកម្មភាព​បទ​ល្មើស បទឧក្រិដ្ឋ បទ​មជ្ឃឹម អំពើ​ភេរវកម្ម ការ​ជួញដូរ​មនុស្ស ជួញដូរ​គ្រឿងញៀន និង​អាវុធ​ជាតិ​ផ្ទុះ»៕

អត្ថបទគួរចាប់អារម្មណ៍