.jpg)
ប៉ូលិសកំពង់ពិនិត្យការចេញ-ចូលរបស់ប្រជាពលរដ្ឋតាមបណ្តោយផ្លូវជាតិលេខ ៦ ស្ថិតក្នុងស្រុកមុខកំពូល កាលពីម្សិលមិញ។ ហេង ជីវ័ន
ភ្នំពេញ៖ មានមនុស្សចំនួន ១៩ នាក់ហើយ ដែលត្រូវបានសមត្ថកិច្ចនៅរាជធានីភ្នំពេញឃាត់ខ្លួនចាប់តាំងពីមានការអនុវត្តវិធានការបិទខ្ទប់រាជធានីភ្នំពេញ ដើម្បីកាត់បន្ថយការឆ្លងជំងឺកូវីដ ១៩ ដោយសារពួកគេល្មើសនឹងបម្រាមនេះ។ នេះបើតាម លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ នៅថ្ងៃទី ២០ មេសានេះ។
ការអនុវត្តការបិទខ្ទប់រាជធានីភ្នំពេញបានចាប់ផ្ដើមធ្វើឡើងកាលពីថ្ងៃទី ១៥ ខែ មេសា ឆ្នាំ ២០២១ ដែលគិតមកទល់ពេលនេះ មានរយៈពេល ៦ ថ្ងៃហើយ។
លោក សុខ សីហា បានប្រាប់ ភ្នំពេញ ប៉ុស្តិ៍ថា ក្នុងចំណោមមនុស្ស ១៩ នាក់ ដែលត្រូវបានឃាត់ខ្លួននៅភ្នំពេញនោះ គឺមានម្នាក់ត្រូវបានសមត្ថកិច្ចអប់រំ ហើយអនុញ្ញាតឲ្យត្រឡប់ទៅផ្ទះវិញ ខណៈ ៦ នាក់ទៀត ត្រូវបានសមត្ថកិច្ចកសាងសំណុំរឿងបញ្ជូនទៅតុលាការហើយត្រូវតុលាការសម្រេចចោទប្រកាន់ និងបង្គាប់ឲ្យឃុំខ្លួននៅពន្ធនាគារព្រៃសជាបណ្ដោះអាសន្ន។ ចំណែក ១២ នាក់ទៀត កំពុងស្ថិតក្រោមការស៊ើបសួរដោយមន្ត្រីនគរបាលជំនាញនៃអធិការដ្ឋាននគរបាលខណ្ឌចំនួន ៣ រួមមាន ខណ្ឌសែនសុខ ចំនួន ៥ នាក់ ខណ្ឌឫស្សីកែវ ៦ នាក់ និងខណ្ឌជ្រោយចង្វារម្នាក់។
លោកបានបញ្ជាក់ថា៖ «ក្នុងអំឡុងពេលនៃការអនុវត្តវិធានការបិទខ្ទប់រាជធានីភ្នំពេញ ដើម្បីបង្ការទប់ស្កាត់ការឆ្លងរីករាលដាលនៃជំងឺកូវីដ ១៩ បុគ្គលណាដែលល្មើសនឹងបម្រាមនឹងត្រូវចាប់ឃាត់ខ្លួនកសាងសំណុំរឿងបញ្ជូនទៅតុលាការ ដើម្បីចាត់វិធានការតាមនីតិវិធីច្បាប់។ ទន្ទឹមនឹងនេះ សមត្ថកិច្ចយើងនៅតែបន្តចុះផ្សព្វផ្សាយអប់រំដល់ពលរដ្ឋក្នុងមូលដ្ឋានឲ្យបានយល់ និងចូលរួមអនុវត្តវិធានការនេះទាំងអស់គ្នា»៕
