.jpg)
សេចក្ដីសម្រេចរបស់រាជរដ្ឋាភិបាល។ រូបថត SPM
ភ្នំពេញ៖ រាជរដ្ឋាភិបាលកម្ពុជាបានសម្រេចបញ្ចប់ការបិទខ្ទប់ភូមិសាស្រ្តរាជធានីភ្នំពេញ និងក្រុងតាខ្មៅ នៃខេត្តកណ្តាល ចាប់ពីថ្ងៃទី ៦ ខែឧសភាតទៅ ដោយជំនួសមកវិញនូវវិធានការថ្មីសំដៅ បង្ការការឆ្លងរាលដាលនៃជំងឺកូវីដ ១៩។
យោងតាមសេចក្តីប្រកាសដែលចុះហត្ថលេខាដោយលោកនាយករដ្ឋមន្រ្តី ហ៊ុន សែន នៅយប់ថ្ងៃទី ០៣ ខែឧសភានេះ បានសម្រេចបញ្ចប់ការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាលចាប់ពីថ្ងៃទី ៦ ខែ ឧសភា ឆ្នាំ ២០២១ តទៅ ប៉ុន្តែរដ្ឋបាលសាលារាជធានីភ្នំពេញ និងរដ្ឋបាលខេត្តកណ្តាលនឹងដាក់ចេញវិធានការចាំបាច់ផ្សេងទៀត ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ ១៩ ក្នុងផ្នែកណាមួយនៃភូមិសាស្រ្តទាំងនេះ។
សេចក្តីសម្រេចនេះបានលើកឡើងបន្តថា៖ «ការដាក់ចេញវិធានការបិទខ្ទប់សម្រាប់ផ្នែកណាមួយនៃភូមិសាស្រ្តរាជធានីភ្នំពេញ ឬក្រុងតាខ្មៅនៃខេត្តកណ្តាល ដោយផ្អែកតាមស្ថានភាពវិវត្តន៍នៃការឆ្លងរាលដាលនៃជំងឺកូវីដ ១៩ នៅក្នុងភូមិសាស្ត្រស្ថិតក្រោមសមត្ថកិច្ចរបស់ខ្លួន និងដោយត្រូវអនុវត្តតាមអនុក្រឹត្យស្តីពីវិធានការរដ្ឋបាល ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត»។
ប្រភពដដែលបានបន្តថា ក្រសួង និងស្ថាប័នពាក់ព័ន្ធ អភិបាលរាជធានីភ្នំពេញ និងអភិបាលខេត្តកណ្តាល ត្រូវទទួលបន្ទុកអនុវត្តសេចក្តីសម្រេចនេះ តាមភារកិច្ចរៀងៗខ្លួនចាប់ពីថ្ងៃចុះហត្ថលេខាតទៅ។
គួរបញ្ជាក់ផងដែរថា យោងតាមសេចក្តីសម្រេចរបស់រាជរដ្ឋាភិបាលកាលពីថ្ងៃទី ២៦ ខែមេសា បានបន្តបិទខ្ទប់ភូមិសាស្រ្តរាជធានីភ្នំពេញ និងក្រុងតាខ្មៅនៃខេត្តកណ្តាលចំនួន ៧ ថ្ងៃបន្តទៀត ដោយចាប់អនុវត្តន៍ពីម៉ោងសូន្យថ្ងៃទី ២៩ ខែមេសា រហូតដល់ថ្ងៃទី ០៥ ខែ ឧសភា ឆ្នាំ ២០២១ ដែលនឹងផុតនៅយប់ថ្ងៃពុធ ខាងមុខនេះ៕
