.jpg)
លោកស្រី ភឿង សកុណ រដ្ឋមន្ត្រីក្រសួងវប្បធម៌និងវិចិត្រលិល្បៈ និងលោក William A. Heidt ឯកអគ្គរដ្ឋទូតនៃសហរដ្ឋអាមេរិកប្រចាំកម្ពុជា។ ហេង ជីវ័ន
ភ្នំពេញៈ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានចុះហត្ថលេខាលើការបន្តអនុស្សរណៈយោគយល់រវាងរដ្ឋាភិបាលសហរដ្ឋអាមេរិកស្ដីពីការដាក់កម្រិតហាមប្រាមនូវការនាំចូលបុរាណវត្ថុរបស់កម្ពុជា ជាមួយលោក William A. Heidt ឯកអគ្គរដ្ឋទូតប្រចាំនៅកម្ពុជា នៅសារមន្ទីរជាតិកម្ពុជា នៅថ្ងៃទី៦ ខែវិច្ឆិកា។ ការដាក់ កម្រិតហាមប្រាម នូវការនាំចូលបុរាណវត្ថុរបស់កម្ពុជាសម្រាប់រយៈពេល៥ឆ្នាំ ២០១៨-២០២៣។
ក្នុងពិធីនោះផងដែរក៏បានចុះកិច្ចព្រមព្រៀងរវាង ស្ថានទូតអាមេរិកប្រចាំនៅកម្ពុជាជាមួយនឹងអាជ្ញាធរជាតិព្រះវិហារផ្តល់ ថវិកាចំនួន២០ម៉ឺន ដុល្លារ សហរដ្ឋអាមេរិកដើម្បីជួសជុលជណ្តើរខាងជើងនៃប្រាសាទព្រះវិហារដែលកសាងនៅសតវត្សរ៍ទី១១។
លោកស្រី ភឿង សកុណា បានថ្លែងថា៖«ខ្ញុំគិតថាការជួបជុំក្នុងឱកាសនៃការចុះហត្ថលេខានៃអនុស្សរណៈវប្បធម៌និងAFCPនេះ បានបង្ហាញ ពីការប្តេជ្ញានិងការខិតខំប្រឹងដើម្បីសហការនិងពង្រឹងមិត្តភាពនិងការយោគយល់គ្នារវាងព្រះរាជាណាចក្រកម្ពុជា និងរដ្ឋាភិបាលសហរដ្ឋអាមេរិក ដើម្បីគាំទ្រការថែរក្សាបេតិកភណ្ឌវប្បធម៌ខ្មែរ សម្រាប់ ប្រយោជន៍ដល់ប្រជាជនខ្មែរ សហរគមន៍អន្តរជាតិនិងសម្រាប់អ្នកជំនាន់ក្រោយ»។
គួរបញ្ជាក់ថា ជណ្តើរបុរាណខាងជើងប្រាសាទព្រះវិហារ ជាជណ្តើរមួយយ៉ាងសំខាន់ក្នុងចំណោមជណ្តើរនិងផ្លូវដើរដែលបានតភ្ជាប់មកក្លោងទ្វារគោបុរៈទី៥នៃប្រាសាទព្រះវិហារ។ កាលពីសម័យអង្គរចន្លោះសតវត្សរ៍ទី៩និងទី១២ជណ្តើរនេះប្រហែលមានតួនាទីសំខាន់ ទាក់ទងនឹងជំនឿសាសនាហិណ្ឌូនិងបម្រើសហគមន៍ខ្មែរបុរាណរស់នៅភាគខាងជើងក្នុងការមកគោរពប្រតិបត្តិសាសនាខាងលើ។ បន្ទាប់ពីបានបោះបង់ចោលនិងគ្មានការថែរក្សាជាច្រើនសតវត្សរ៍មកបណ្តាលឲ្យជណ្តើរខាងជើងទទួលរងនូវការខូចខាតយ៉ាងធ្ងន់ធ្ងរដោយសារធម្មជាតិ និងមនុស្សនាពេលកន្លងមក។ ទោះបីជាអាជ្ញាធរជាតិព្រះវិហារបានសំអាត កាប់ដើមឈើ ដែលបង្កហានិភ័យនិងធ្វើការស្តារប្រព័ន្ធទឹកបុរាណដែលនៅអមសងខាងដើម្បីបង្វែរមុខទឹកនិងបញ្ឈប់ការហូរច្រោះដោយទឹកភ្លៀងមកលើជណ្តើរបុរាណក្តី ក៏វានៅមិនអាចឆ្លើយតបដល់ការងារអភិរក្សជណ្តើរខាងជើងបានទាំងស្រុងនៅឡើយទេ ពោលវាគ្រាន់តែកាត់បន្ថយការខូចខាតខ្លះប៉ុណ្ណោះ៕
