.jpg)
លោក ខៀវ សុភ័គ អ្នកនាំពាក្យក្រសួងមហាផ្ទៃក្នុងឆ្នាំ ២០១៦។ ហេង ជីវ័ន
ភ្នំពេញៈ រាជរដ្ឋាភិបាលបានបង្កើតក្រុមការងារមួយក្រុមដែលមានសមាសភាពមន្ត្រីជាន់ខ្ពស់ផ្នែកច្បាប់ ១៥ រូបមកពីក្រសួងផ្សេងៗមួយចំនួនដែលពាក់ព័ន្ធដើម្បីសិក្សាការធ្វើវិសោធនកម្មច្បាប់ស្ដីពីសញ្ជាតិដែលត្រូវបានប្រកាសឲ្យប្រើប្រាស់តាំងពីឆ្នាំ ១៩៩៦។
យោងតាមរាជកិច្ចដែលបានចេញផ្សាយនៅក្នុងត្រីមាសទី ១ ឆ្នាំ ២០១៨ ដែលចុះហត្ថលេខាដោយលោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាកាលពីថ្ងៃទី ១៨ ខែមករា។
យោងតាមសេចក្ដីសម្រេចរបស់រាជរដ្ឋាភិបាលស្ដីពីការបង្កើតក្រុមការងារដើម្បីសិក្សាការធ្វើវិសោធនកម្មច្បាប់ស្ដីពីសញ្ជាតិនេះបានឲ្យដឹងថា ក្រុមការងារនេះមានភារកិច្ចជាសេនាធិការដ្ឋានជូនរដ្ឋាភិបាលក្នុងការសិក្សាស្រាវជ្រាវច្បាប់ស្តីពីសញ្ជាតិដើម្បីផ្តួចផ្តើមអំពីជម្រើសនានាក្នុងការធ្វើវិសោធនកម្មស្តីពីសញ្ជាតិ និងប្រមែប្រមូលព័ត៌មានទាំងឡាយដែលបម្រើឲ្យការរៀបចំសេចក្តីព្រាងច្បាប់ស្តីពីការធ្វើវិសោធនកម្មច្បាប់ស្តីពីសញ្ជាតិ។ ហើយអាចធ្វើការពិគ្រោះយោបល់ជាមួយក្រសួង ស្ថាប័នពាក់ព័ន្ធ និងសាស្ត្រាចារ្យ ជំនាញការតាមការចាំបាច់។
លោក ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងមកកាន់ភ្នំពេញប៉ុស្តិ៍កាលពីម្សិលមិញថា៖ «យើងកំពុងស្ថិតនៅក្នុងដំណើរការកែប្រែចំណុចខ្លះ ជាពិសេសរយៈពេលនៃការស្នាក់នៅ និងចំនួនថវិកា (ចំពោះជនបរទេសដែលត្រូវទទួលបានសញ្ជាតិ)»។
លោក សុភ័គ ថ្លែងថាច្បាប់សញ្ជាតិត្រូវបានប្រកាសឲ្យប្រើប្រាស់នៅក្នុងឆ្នាំ ១៩៩៦ ហើយតាំងពេលនោះមកតម្លៃសម្រាប់ជនបរទេសដែលត្រូវបង់ (សម្រាប់ចូលសញ្ជាតិ) មានចំនួនតែ ១ ២៥០ ០០០ ០០០ រៀលតែប៉ុណ្ណោះ ប្រហែលជា ៣០០ ០០០ ដុល្លារសហរដ្ឋអាមេរិក ហើយរហូតមកដល់ពេលនេះជាង ២០ ឆ្នាំហើយ។ ហើយចំនួនទឹកប្រាក់នេះវាមិនសមភាពទៅនឹងការអភិវឌ្ឍនៃប្រទេសកម្ពុជាទេ។
លោក សុភ័គ ថ្លែងថា៖ «៣០០ ០០០ ដុល្លារសហរដ្ឋអាមេរិកវាគ្រាន់តែស្មើនឹងតម្លៃដីមួយដុំតូចតែប៉ុណ្ណោះ វាតូចណាស់។ យើងត្រូវតែគិតទៅតាមកំណើនសេដ្ឋកិច្ចរបស់កម្ពុជា ប្រហែលជាចំនួនថវិកាគួរតែច្រើនជាងនេះ ក្រុមការងារនឹងសម្រេច (លើបញ្ហានេះ)»។
លោក សុភ័គ ថ្លែងបន្តទៀតថាចំណុចទី ២ នឹងសិក្សាពីរយៈពេលនៃការរស់នៅរបស់ជនបរទេសនៅក្នុងប្រទេសកម្ពុជាដែលពីមុន គឺរស់នៅរយៈពេល ៧ ឆ្នាំ តែពេលនេះប្រហែលជារយៈពេលរស់នៅគឺយូរជាងមុន តែមិនទាន់ប្រាកដថាយូរប៉ុនណាទេ អាស្រ័យលើក្រុមការងារ។
លោកថ្លែងថា៖ «សព្វថ្ងៃយើងមានជនបរទេសច្រើនទទួលបានសញ្ជាតិ យើងត្រូវការបរទេសច្រើន ហើយបើសិនជាយើងមានការកែប្រែថ្មី ប្រហែលតម្លៃខ្ពស់ជាងមុន»។
យោងតាមរបាយកាណ៍របស់អគ្គនាយកនៃអគ្គនាយកដ្ឋាននៃក្រសួងមហាផ្ទៃដែលបានចេញផ្សាយកាលពីថ្ងៃទី ២២ ខែមករា ឆ្នាំ ២០១៨ បានឲ្យដឹងថា ជនបរទេសចំនួន ១ ៥១៨ រូបទទួលបានសញ្ជាតិដោយមានព្រះរាជក្រឹត្យ ក្នុងនោះមានអ្នកវិនិយោគទុនចំនួន ១ ០៦៨ នាក់។
លោក មាស នី អ្នកវិភាគសង្គមនៅក្នុងអង្គការក្រៅរដ្ឋាភិបាលធ្លាប់បានថ្លែងថា វាជារឿងត្រឹមត្រូវដែលប្រទេសខ្មែរចាប់ផ្តើមពិនិត្យមើលច្បាប់នេះឡើងវិញ ហើយនឹងត្រូវពិនិត្យមើលឲ្យបានល្អិតល្អន់ឡើងវិញទៅលើច្បាប់ទាំងអស់។
លោក នី ថ្លែងថា៖ «ហើយប្រសិនបើប្រទេសណាមិនមានច្បាប់ហ្នឹងត្រឹមត្រូវទេ ប្រទេសនោះនឹងត្រូវរងគ្រោះដោយសារមានជនខិលខូចខ្លះឆ្លៀតឱកាស ដោយសារតែច្បាប់ហ្នឹងវាធូររលុង។ នៅពេលគេប្រព្រឹត្តអ្វីខុសនៅស្រុកគេ ហើយគេរត់មកនៅស្រុកយើង»។ «យើងត្រូវពិនិត្យមើលប្រភពរបស់អ្នកវិនិយោគទុនថា តើគេវិនិយោគទុនត្រឹមត្រូវទេ ឲ្យមានការរឹតបន្តឹងកុំធូររលុង ពីព្រោះឥឡូវនេះប្រសិនបើច្បាប់នៅក្នុងប្រទេសយើងទាក់ទងនឹងអន្តោប្រវេសន៍ និងចូលសញ្ជាតិបើយើងមិនពិនិត្យតឹងរ៉ឹងទេ ប្រទេសយើងនឹងក្លាយទៅជាប្រទេសមួយដូចគេយកសំរាមមកចាក់ចោល»៕ NS
