ភ្នំពេញៈ ក្រសួងរៀបចំដែនដីនគរូបនីយកម្ម និងសំណង់បានសហការជាមួយក្រសួងកសិកម្មរុក្ខាប្រមាញ់ និងនេសាទ ក្រសួងបរិស្ថាន អាជ្ញាធរជាតិដោះស្រាយទំនាស់ដីធ្លី និងអាជ្ញាធរខេត្តមណ្ឌលគិរីក្នុងគោលបំណងពន្លឿនការចុះបញ្ជីដីរដ្ឋ ការដោះស្រាយវិវាទដីធ្លី និងរៀបចំផែនការប្រើប្រាស់ដីនៅខេត្តមណ្ឌលគិរី ខណៈដែលខេត្តនេះត្រូវបានរងការចោទប្រកាន់ថា មានបុគ្គលមានអំណាចមួយចំនួនកំពុងទន្ទ្រានយកដី។
យោងតាមរបាយការណ៍របស់ក្រសួងរៀបចំដែនដីបានឲ្យដឹងកាលពីថ្ងៃពុធថា ក្រសួងបានបង្កើតគណៈកម្មការចុះបញ្ជីដីរដ្ឋ ដីឯកជនរបស់ប្រជាពលរដ្ឋ ដីសហគមន៍ជនជាតិភាគតិច និងដោះស្រាយវិវាទដោយមានអនុគណៈកម្មការ៤ និងក្រុមការងារចុះបញ្ជីដីមាន ១២ ក្រុម។
យោងតាមរបាយការណ៍ដដែលនេះបានឲ្យដឹងថា៖ «គណៈកម្មការនេះនឹងចុះបំពេញការងារចាប់ពីថ្ងៃទី ២៨ ខែកក្កដា ឆ្នាំ ២០២០ ដើម្បីជំរុញពន្លឿនការងារចុះបញ្ជីដីរដ្ឋ ចុះបញ្ជីដីឯកជនរបស់ប្រជាពលរដ្ឋ ចុះបញ្ជីដីសហគមន៍ជនជាតិភាគតិច ដោះស្រាយវិវាទដីធ្លី និងរៀបចំផែនការការប្រើប្រាស់ដីនៅខេត្តមណ្ឌលគិរីដែលនៅសេសសល់ក្នុងភូមិទាំង ៤៦ ដែលបានចុះបញ្ជីរួច ភូមិចំនួន ១០ ដែលកំពុងដំណើរការចុះបញ្ជី និងដំណើរការចុះបញ្ជីក្នុងភូមិចំនួន ៣៦ ផ្សេងទៀតផងដែរ»។
លោក ស៊ឹង សែនករុណា អ្នកនាំពាក្យអង្គការសមាគមអាដហុកបានឲ្យដឹងថា ក្រសួងត្រូវយកចិត្តទុកដាក់ការចុះបញ្ជីលើដីរដ្ឋដែលត្រូវបានបុគ្គលមានអំណាចឆ្លៀតឱកាសទន្ទ្រានកាន់កាប់។
លោក សែនករុណា ថ្លែងថា៖ «បើការកាន់កាប់ដីរដ្ឋនេះដោយអ្នកក្រីក្រពិតប្រាកដ ហើយពិតជាត្រូវការដីសម្រាប់បង្កបង្កើនផលចិញ្ចឹមជីវិតនោះ ខ្ញុំគិតថាជាអាទិភាពក្នុងការផ្តល់ដី ចុះបញ្ជីកម្មសិទ្ធិជូនពួកគាត់។ តែបើពិនិត្យឃើញថា អ្នកទាំងអស់នោះជាជនខិលខូច ជាអ្នកមានអំណាច មានលុយ ទៅធ្វើការទិញដូរ ឬជួលមនុស្សឲ្យទៅទន្ទ្រានយកដីនោះដោយខុសច្បាប់ ខ្ញុំគិតថា មិនគួរមានការចុះបញ្ជីឲ្យនោះទេ។
ផ្ទុយទៅវិញគួរតែមានវិធានការផ្លូវច្បាប់ទៀត»។
លោក ស៊ឹង សែនករុណា បានអះអាងថា បើសិនជាការចុះបញ្ជីដីធ្លីនេះបានធ្វើឡើងត្រឹមត្រូវ និងទូទាំងប្រទេសនោះបញ្ហាជម្លោះដីធ្លីក៏នឹងលែងមានដែរ ហើយបើកើតមានក៏ងាយស្រួលក្នុងការដោះស្រាយផងដែរ។
លោក អ៊ាង ម៉េងលី មន្ត្រីសម្របសម្រួលអង្គការសមាគមអាដហុកប្រចាំខេត្តមណ្ឌលគិរីបានឲ្យដឹងថា វិវាទដីធ្លីភាគច្រើនបង្កឡើងដោយក្រុមហ៊ុនធំៗដែលទទួលបានសិទ្ធិវិនិយោគ និងមន្ត្រីមានអំណាច។ ចំណុចដែលក្តៅនៃការធ្វើឲ្យមានជម្លោះដីធ្លីខ្លាំងបំផុតនោះ ក៏ព្រោះមានគម្រោងធំៗបានទៅអភិវឌ្ឍក្នុងខេត្តនេះ ដូចជាគម្រោងព្រលានយន្តហោះ និងការអភិវឌ្ឍតំបន់ផ្សេងៗនេះ ខណៈដែលអាជ្ញាធរដែនដីមួយចំនួនតូចបានចូលរួមនូវសកម្មភាពមិនប្រក្រតីនៃការទទួលស្គាល់ឯកសារមិនស្របច្បាប់។
ទន្ទឹមនេះដែរក្រសួងមហាផ្ទៃកាលពីថ្ងៃទី ២២ ខែកក្កដា ឆ្នាំ ២០២០ បានសម្រេចបង្កើតក្រុមការងារអន្តរក្រសួងដែលមានសមាសភាពមន្ត្រីជាន់ខ្ពស់ថ្នាក់ជាតិជាច្រើនរូប ដើម្បីចុះសិក្សាស្រាវជ្រាវលើករណីកាប់រានទន្ទ្រានកាន់កាប់ដីព្រៃខុសច្បាប់ក្នុងតំបន់ការពារធម្មជាតិស្ថិតក្នុងខេត្តមណ្ឌលគិរីដែរ។
យោងតាមសេចក្ដីសម្រេចរបស់លោក ស ខេង រដ្ឋមន្ត្រីក្រសួងមហាផ្ទៃបានឲ្យដឹងថា៖ «ក្រុមការងារនេះមានតួនាទី ភារកិច្ចចុះសិក្សាស្រាវជ្រាវលើករណីនីមួយៗនៃការកាប់រាន ទន្ទ្រានកាន់កាប់ដីព្រៃខុសច្បាប់ក្នុងតំបន់ការពារធម្មជាតិស្ថិតក្នុងខេត្តមណ្ឌលគិរី និងប្រមូលឯកសារ និងភ័ស្តុតាងនានាពាក់ព័ន្ធជាមួយនឹងមន្ត្រី និងអ្នកពាក់ព័ន្ធសកម្មភាពទាំងនោះ (ដោយ) សហការជាមួយអាជ្ញាធរមានសមត្ថកិច្ចពាក់ព័ន្ធនៅរដ្ឋបាលថ្នាក់ក្រោមជាតិក្នុងដំណើរការស្រាវជ្រាវនេះ»។
ទោះជាយ៉ាណាក៏ដោយយោងតាមរបាយការណ៍របស់ក្រសួងដែនដីបានឲ្យដឹងថា នៅខេត្តមណ្ឌលគិរីមកទល់ខែកក្កដា ឆ្នាំ ២០២០ នេះការងារចុះបញ្ជីដីធ្លីនៅខេត្តមណ្ឌលគិរីទទួលបានលទ្ធផលប្រមាណ ៤៦ ភូមិត្រូវបានចុះបញ្ជី និងចេញបណ្ណកម្មសិទិ្ធរួចរាល់លើផ្ទៃដីទំហំ ១៩១ ០១៨ ហិកតា ឬស្មើនឹង ២៤ ២១៨ បណ្ណក្នុងនោះការចុះបញ្ជីដីជូនប្រជាពលរដ្ឋលើទំហំដីប្រមាណ ៣៩ ២២៦ ហិកតាស្មើនឹង ២៣ ៧៥៥ បណ្ណចុះបញ្ជីដីរដ្ឋទំហំប្រមាណ ១៤៥ ៦៣៣ ហិកតា ស្មើនឹង ១៦៧ បណ្ណ ដីសហគមន៍ជនជាតិដើមភាគតិចចុះបញ្ជីបាន ៧ សហគមន៍លើផ្ទៃដីទំហំ ៦ ១៥៦ ហិកតាស្មើនឹង ២៧៨ បណ្ណ និងមាន ១០ ភូមិកំពុងដំណើរការចុះបញ្ជីដីធ្លីមានលក្ខណៈជាប្រព័ន្ធចំពោះដីសហគមន៍ជនជាតិដើមភាគតិច ៦ សហគមន៍ដែលកំពុងដំណើរការ និងបានបញ្ចប់ការបិទផ្សាយជាសាធារណៈរួចរាល់។ ខណៈការដោះស្រាយវិវាទដីធ្លីគឺដោះស្រាយបាន ២២ ករណី និងកំពុងបន្តដោះស្រាយចំនួន ៣៨ ករណី។
របាយការណ៍របស់ក្រសួងរៀបចំដែនដីនគរូបនីយកម្ម និងសំណង់បានឲ្យដឹងផងដែរកាលពីថ្ងៃពុធថា មកទល់ពេលនេះក្រសួងបានចេញបណ្ណកម្មសិទ្ធិលើដីរដ្ឋបានចំនួន ២ ១១៨ បណ្ណ ឬស្មើនឹង ៨៧ ម៉ឺនហិកតានៅទូទាំងប្រទេសដែលក្នុងនោះដីសម្បទានសេដ្ឋកិច្ចមានចំនួន ២ ០១១ បណ្ណ ឬស្មើនឹង ៧៤ ម៉ឺនហិកតា និងដីរដ្ឋផ្សេងៗទៀតបានចំនួន ១០៧ បណ្ណ ឬស្មើនឹង ១៣ ម៉ឺនហិកតា៕