The Phnom Penh Post Search

Search form




Logo of Phnom Penh Post newspaper Phnom Penh Post - រាជ​រដ្ឋា​ភិបាល​ពិចារណាផ្ដល់ម៉ាស់ និង​បរិក្ខាពេទ្យ​សម្រាប់​ការពារ​ជំ​ងឺកូវីដ​ ១៩ ទៅកាន់​ប្រ​ទេស​ទី​ម័រ​ខាង​កើត




រាជ​រដ្ឋា​ភិបាល​ពិចារណាផ្ដល់ម៉ាស់ និង​បរិក្ខាពេទ្យ​សម្រាប់​ការពារ​ជំ​ងឺកូវីដ​ ១៩ ទៅកាន់​ប្រ​ទេស​ទី​ម័រ​ខាង​កើត

Content image - Phnom Penh Post
លោកនាយក​រដ្ឋ​មន្ត្រី​ ហ៊ុន សែន ចាប់ដៃជា​មួយ​លោក Dionisio Babo Soares រដ្ឋ​មន្ត្រី​បរទេស​ទី​ម័រ​ខាងកើត​កាល​ពី​ឆ្នាំ ២០១៩។ រូបថត SPM

រាជ​រដ្ឋា​ភិបាល​ពិចារណាផ្ដល់ម៉ាស់ និង​បរិក្ខាពេទ្យ​សម្រាប់​ការពារ​ជំ​ងឺកូវីដ​ ១៩ ទៅកាន់​ប្រ​ទេស​ទី​ម័រ​ខាង​កើត

ភ្នំ​ពេញៈ លោក​​នាយករដ្ឋមន្ត្រី​ ហ៊ុន សែន​ កំពុងធ្វើការ​ពិចារណា​ផ្តល់​ម៉ាស់ និង​បរិក្ខារ​ពេទ្យ​មួយចំនួន​ទៅដល់​ប្រទេស​ទី​ម័​រ​ខាងកើត ដើម្បី​ប្រយុទ្ធប្រឆាំង​ជំងឺ​កូ​វីដ​ ១៩ បន្ទាប់ពី​លោក​បាន​ផ្តល់នូវ​សម្ភារ​ទាំងអស់នេះ​ ទៅដល់​ប្រទេស​ចំនួន​ ២ ​រួចមកហើយ​កាលពីពេល​ថ្មីៗ​កន្លងមកនេះ គឺ​ប្រទេស​ឡាវ និង​ប្រទេស​មី​យ៉ាន់​ម៉ា​។​

លោក​ ហ៊ុន សែន​ បាន​ថ្លែង​កាលពី​ថ្ងៃ​ពុធ​ទី ​២៥ ខែវិច្ឆិកា ក្នុង​ពិធី​ជួប​សំណេះសំណាល​ជាមួយ​សមាជិក​ក្រុម​មេធាវី​រាជរដ្ឋាភិបាល និង​ក្រុម​មេធាវី​ស្ម័គ្រចិត្ត​សម្តេច​តេ​ជោ​សែន​ចំនួន ​១៥៣ ​នាក់​ នៅ​វិមាន​សន្តិភាព​ថា លោក​កំពុង​ពិចារណា​ក្នុងការ​ផ្តល់នូវ​ម៉ាស​ និង​សម្ភារ​បរិក្ខារ​ពេទ្យ​ទៅដល់​ប្រទេស​ទី​ម័​រ​ខាងកើត​ផងដែរ​។​

លោក​បាន​មានប្រសាសន៍ថា​៖ «​កម្ពុជា​មិនមែន​គ្រាន់តែ​ផ្តល់ជំនួយ​ផ្នែក​វេជ្ជសាស្ត្រ វិស័យ​ផ្នែក​ពេទ្យ​នេះ​ទៅដល់​មិត្ត​ឡាវ និង​មី​យ៉ាន់​ម៉ា ហើយ​ខ្ញុំ​ត្រៀម​ទុក និង​អន្តរាគមន៍​ដល់​ប្រទេស​ទី​ម័​រ​ខាងកើត​»​។​

លោក​បន្តថា​៖ «​មាន​អ្នកខ្លះ​ឌឺ​មក​ខ្ញុំ​ថា ខ្លួនឯង​ដោះស្រាយ​មិន​ចេញ​ផង​ទៅ​គិតដល់​រឿង​គេ​។ បាទ​! សុំ​អ្នក​និយាយ​អី​និយាយ​ចុះ ក៏ប៉ុន្តែ​ក្នុងឋានៈ​ជា​អ្នក​ដែល​ចូលរួមចំណែក​នៅក្នុង​សហគមន៍​អន្តរជាតិ ខ្ញុំ​មាន​កាតព្វកិច្ច​ចូលរួម​ជាមួយនឹង​រដ្ឋ​ដទៃទៀត ប្រជាជាតិ​ដទៃទៀត ដើម្បី​ផ្តល់ជំនួយ​តាម​លទ្ធភាព​ដែល​អាចធ្វើ​ទៅបាន​»​។​

កាលពី​ថ្ងៃទី ​២៦ ខែវិច្ឆិកា លោក ​ម៉ម ប៊ុនហេង បាន​ដឹក​នាំយក​ម៉ាស់​ជាង ​២ ​លាន និង​បរិក្ខារ​ពេទ្យ​មួយចំនួន​របស់​រាជរ​ដ្ឋា​ភិ​បាល​កម្ពុជា​ផ្តល់ជូន​រដ្ឋាភិបាល​និង​ប្រជាជន​មី​យ៉ាន់​ម៉ា​។​

លោក​ ម៉ម ប៊ុនហេង ​បាន​មានប្រសាសន៍​មុនពេល​ឡើង​យន្តហោះ​នៅឯ​ព្រលានយន្តហោះ​អន្តរជាតិ​ភ្នំពេញ​ថា ម៉ាស់ និង​បរិក្ខា​ពេទ្យ​ទាំងនេះ​មាន​សារៈសំខាន់​ណាស់​សម្រាប់​ប្រើប្រាស់ ហើយ​ជំនួយ​នេះ​គឺជា​ការជួយ​គ្នា​ដោយ​ស្មារតី​សប្បុរសធម៌​ក្នុង​ការជួយ​គ្នា​ទៅវិញទៅមក​នៅពេល​មាន​គ្រោះអាសន្ន​ដូចជា​ករណី​កូ​វីដ​ ១៩ ​នេះ​។​

លោក​បាន​ថ្លែងថា៖ «​សម្ភារ​ម៉ាស់ និង​បរិក្ខា​ពេទ្យ​ទាំងនេះ​មាន​សារៈសំខាន់​ណាស់​សម្រាប់​ប្រជាជន​ក្នុងការ​ការពារ​ពី​ការចម្លង​ជំងឺ​កូ​វីដ ​១៩»​។​

លោក​ ម៉ម ប៊ុនហេង​ បានលើកឡើង​ទៀតថា ទោះបីជា​ប្រទេស​កម្ពុជា​ ផ្តល់ជំនួយ​ទាំងនេះ​ដល់​ប្រទេស​ជា​មិត្ត​មែន ប៉ុន្តែ​សម្រាប់​ការ​ស្តុក​ទុក​ប្រើប្រាស់​នៅក្នុង​ប្រទេស​ គឺ​មិនមាន​ការខ្វះខាត​នោះឡើយ ដោយសារ​លោកនាយករ​ដ្ឋ​មន្ត្រី​ ហ៊ុន សែន​ បាន​បញ្ជា​ឱ្យ​ក្រសួងសុខាភិបាល​ទិញ​សម្ភារ​ទាំងនេះ​ទុក​ក្នុង​ឃ្លាំង​បំពេញ​វិញ​ដែរ​។​

អំណោយ​របស់​រាជរដ្ឋាភិបាល​កម្ពុជា ជូន​រដ្ឋាភិបាល​មី​យ៉ាន់​ម៉ា​រួមមាន ម៉ាស់​ចំនួន​ ២​ លាន​, ម៉ាស់​ក្រណាត់​ ១០ ​ម៉ឺន​, ម៉ាស់ N95 ចំនួន ​២​ ម៉ឺន​, វែ​នតា​សុវត្ថិភាព​ចំនួន​ ២ ​ម៉ឺន​, សម្លៀកបំពាក់​សុវត្ថិភាព​សម្រាប់​មន្ត្រី​សុខាភិបាល (​ជា​ឈុត​) ចំនួន​ ២ ​ម៉ឺន​ឈុត​, ម៉ាស៊ីន​វាស់​កំដៅ​ចំនួន​ ៥០០, របាំងមុខ​ចំនួន​ ២​ ម៉ឺន​, ឧបករណ៍​ជំនួយការ​ដកដង្ហើម​សម្រាប់​ប្រ​យោធ​នក​ម្មចំនួន​ ២០, ទូរទស្សន៍​តាមដាន​សុខភាព​អ្នកជំងឺ និង​សម្ភារ​បន្ទាប់បន្សំ​ម៉ូ​ឌែ​ល Vista 120 ចំនួន​ ២០, ម្សៅ​ថ្នាំ​បាញ់សម្លាប់​មេរោគ ២៥​ គីឡូក្រាម​ក្នុង ​១​ ធុង (​ក្ល​រ៉ា​មីន​ប្រភេទ​B) ៥០០​ កេស​, ស្បែកជើង​ក៏​វែង​សុវត្ថិភាព​ ១ ​ពាន់​គូ និង​សាប៊ូ​លាងដៃ ២​ ពាន់​គូ​។​

គួរបញ្ជាក់​ផងដែរ​ថា កាលពី​ថ្ងៃ​ ១៦ ខែវិច្ឆិកា កម្ពុជា​បាន​ជួយ​ជំនួយ​ដល់​ប្រទេស​ឡាវ​នូវ ម៉ាស់​ធម្មតា​ចំនួន​ ២​ លាន​ម៉ាស់ ម៉ាស់​ក្រណាត់​ ដែល​កម្ពុជា​ផលិត​ដោយ​ខ្លួនឯង បូករួម​នឹង​សម្ភារ​វេជ្ជសាស្ត្រ​ដទៃៗ​ទៀត ដែលមាន​តម្លៃ​ ២ ២២៤ ០០០​ ដុល្លារ​អាមេរិក​៕

អត្ថបទគួរចាប់អារម្មណ៍

  • ខេត្តបាក់និញៈ សួនឧស្សាហ​កម្ម​ Yen Phong 1 Industrial Park នៅខេត្ត Bac Ninh ភាគខាងជើង​បាន​ក្លាយជា​​សួនឧស្សាហ​កម្មលើក​ដំបូង​នៅក្នុងប្រទេស​វៀតណាម ដែលទទួល​បាន​​បណ្ដាញ​ទូរគមនា​គមន៍​ 5G ដោយ​បច្ចេកវិទ្យាថ្មីនេះ​​ បានដាក់​​ឲ្យដំណើរការ​នៅទីតាំងនោះ​ដោយ​ក្រុមហ៊ុន Viettel កាល​ពីថ្ងៃព្រហស្បតិ៍។​​

  • ភ្នំពេញៈ កម្ពុជា​នាំចេញ​ទំនិញ​ទៅ​ទីផ្សារ​អាមេរិក​មានតម្លៃ​ជាង ៦ ​ពាន់​លាន​ដុល្លារ​ ក្នុង​រយៈពេល​ ១១ ​ខែ ឆ្នាំ​ ២០២០ កើន​ជាង ២២ ​ភាគរយ​ធៀបនឹង​រយៈពេល​ដូចគ្នា​ឆ្នាំ​ ២០១៩ ខណៈ​ទំហំ​ពាណិជ្ជកម្ម​ទ្វេភាគី​មានតម្លៃ​ជាង ៦,៣ ​ពាន់​លាន​ដុល្លារ​។ នេះ​បើ​យោងតាម​ទិន្នន័យ​ពី​ការិយាល័យ​ពាណិជ្ជកម្ម​អាមេរិក​។

  • ភ្នំពេញៈ ត្រឹម​រយៈពេល​ជិត​ ១ ​ខែ​ប៉ុណ្ណោះ​ចាប់ពី​ថ្ងៃទី​ ២០ ធ្នូ ដល់​ថ្ងៃទី​ ១៧ មករា ពលករ​ខ្មែរ​ដែល​បាន​វិលត្រឡប់​មកពី​ប្រទេស​ថៃ​តាម​ច្រក​នៃ​បណ្តា​ខេត្ត​ជាប់​ព្រំដែន​កម្ពុជា-ថៃ​ចំនួន​ ៦៩ ​នាក់ ​ត្រូវបាន​រកឃើញ​វិជ្ជមាន​កូវីដ​ ១៩ ដោយ​ក្នុង​នោះ​ពលករ​ដែល​បាន​ព្យាបាល​ជាសះស្បើយ​ ២១ ​នាក់​។

  • ស្ទឹងត្រែងៈ កម្លាំង​នគរបាល​ប្រឆាំង​គ្រឿងញៀន​គ្រោង​នឹង​បញ្ជូន​បុរស​ជនជាតិ​ឡាវ​​ ២ ​នាក់ និង​វត្ថុតាង​គ្រឿងញៀន​ជិត​ ៥០ ​គីឡូក្រាម​ទៅ​តុលាការ​នៅ​ព្រឹក​ថ្ងៃ​ចន្ទ​នេះ​ ខណៈ​ដែល​សមត្ថកិច្ច​កម្ពុជា​កំពុង​សហការ​ជាមួយ​សមត្ថកិច្ច​ឡាវ​ ដើម្បី​តាម​រក​ចាប់ខ្លួន​ជនជាតិ​ឡាវ​ ៤ ​នាក់​ទៀត​ដែល​រត់គេចខ្លួន​។

  • ភ្នំពេញៈ លោក ហង់ជួន ណារ៉ុន រដ្ឋមន្ត្រី​ក្រសួង​អប់រំ ​យុវជន និង​កីឡា​បាន​ដឹកនាំ​កិច្ចប្រជុំ​ដាក់​ចេញ​វិធានការ​បន្ថែម​ដល់​សាលារៀន​ដែល​កំពុង​ត្រូវបាន​ប្រើប្រាស់​ជា​មណ្ឌល​ចត្ដាឡីស័ក ពិសេស​សាលារៀន​តាម​ខេត្ដ​ជាប់​ព្រំដែន​ប្រទេស​ថៃ និង​វៀតណាម​ដើម្បី​ធ្វើយ៉ាងណា​ធានា​ផ្ដល់​ការសិក្សា​ដល់​សិស្ស​គ្រប់គ្នា​ក្នុង​ឆ្នាំ​សិក្សា​ថ្មី​នេះ​។

  • ភ្នំពេញៈ លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួង​មហាផ្ទៃ​បាន​ណែនាំ​ឱ្យ​អាជ្ញាធរ​គ្រប់លំដាប់​ថ្នាក់​លុបបំបាត់​ការបង្ក​សំឡេង​រំខាន​លើស​កម្រិត​ដោយ​យានយន្ដ​គ្រប់​ប្រភេទ និង​លុបបំបាត់​កន្លែង​កែច្នៃ​បំពង់​ស៊ី​ម៉ាំង​ដែល​បង្ក​ភាព​រំខាន​ដល់​អារម្មណ៍ និង​សិទ្ធិ​រស់នៅ​របស់​ពលរដ្ឋ