The Phnom Penh Post Search

Search form




Logo of Phnom Penh Post newspaper Phnom Penh Post - រាជ​រដ្ឋាភិបាល​យក​ការ​លក់​សំបុត្រ​ចូល​អង្គរ មក​គ្រប់​គ្រង​វិញ

រាជ​រដ្ឋាភិបាល​យក​ការ​លក់​សំបុត្រ​ចូល​អង្គរ មក​គ្រប់​គ្រង​វិញ

Content image - Phnom Penh Post
ទេសចរបរទេសដែល​មកទស្សនាប្រាសាទអង្គរវត្តកាលពីដើមឆ្នាំ​នេះ។ ម៉ៃ វីរៈ

រាជ​រដ្ឋាភិបាល​យក​ការ​លក់​សំបុត្រ​ចូល​អង្គរ មក​គ្រប់​គ្រង​វិញ

ភ្នំពេញៈ ប្រមុខ​រាជ​រដ្ឋាភិបាល​កម្ពុជា លោក​នាយក​រដ្ឋ​មន្ត្រី ហ៊ុន សែន បាន​ធ្វើ​ការ​ប្រកាស​ក្នុង​កិច្ច​ប្រជុំ​គណៈរដ្ឋ​មន្ត្រី​របស់​ខ្លួន នៅ​ថ្ងៃ​សុក្រ​នេះ​ថា រាជ​រដ្ឋាភិបាល​កម្ពុជា បាន​សម្រេច​ដក​ហូត ការ​លក់​សំបុត្រ​ចូល​ទស្សនា តំបន់​អង្គរ ពី​ក្រុមហ៊ុន​ សុខ គង់ ត្រលប់​មក​គ្រប់​គ្រង​ខ្លួន​ឯង​វិញ។ នេះ​បើ់​តាម​មន្ត្រី អ្នក​នាំ​ពាក្យ​ទីស្តី​ការ​គណៈរដ្ឋ​មន្ត្រី លោក ផៃ ស៊ីផាន បាន​ឲ្យ​ដឹង​តាម​បណ្តាញ​សង្គម​ហ្វេសប៊ុក​របស់​ខ្លួន នៅ​ព្រឹក​ថ្ងៃ​សុក្រ​នេះ។

លោក ផៃ ស៊ីផាន បាន​បញ្ជាក់​ឲ្យ​ដឹង​ទៀត​ថា រាជរដ្ឋាភិបាល​ក៏ បាន​សម្រេច​បង្កើត​សហគ្រាស​សាធារណៈ ដើម្បី​ធុរៈកិច្ច​គ្រប់គ្រង​រមណីយដ្ឋាន​បេតិក​ភ័ណ្ឌ​អង្គរ ដែល​មាន​ក្រសួង​ទេសចរណ៍ និង​ក្រសួង​សេដ្ឋកិច្ច និង ហិរញ្ញវត្ថុ ជា​អន្ដរ​ក្រសួង រៀប​ចំ​គណៈកម្មាធិការ​នេះ។

លោក ឡុង កុសល ប្រធាន​នាយកដ្ឋាន​ផ្សព្វផ្សាយ និង​ជា​អ្នក​នាំពាក្យ ​អាជ្ញាធរ​ជាតិ​អប្សរា ក៏​បាន​បញ្ជាក់​ប្រាប់​ភ្នំពេញ ប៉ុស្តិ៍ តាម​ទូរស័ព្ទផង​ដែរថា ពិត​ប្រាកដ​មែន។ លោក​ថ្លែង​ថា «យើង​ទើប​ទទួល​បាន​ដំណឹង​នេះ​ផង​ដែរ។ ជាគោលការណ៍ តាម​កិច្ច​ប្រជុំ​គណៈរដ្ឋ​មន្ត្រី​ព្រឹក​នេះ រាជរដ្ឋាភិបាល​ពិត​ជា​បាន​សម្រេច​ដក​យក​ត្រលប់​មក​វិញ​មែន»។

សូមបញ្ជាក់​ថា ក្រុមហ៊ុន​ សុខ គង់ បាន​ទទួល​សិទ្ធិ​គ្រប់​គ្រង​ការ​លក់​សំបុត្រ​ចូល​ទស្សនា​ប្រាសាទ​នានា ក្នុង​តំបន់​អង្គរ​នេះ តាំង​ពី​ឆ្នាំ ១៩៩៩ មក។

ដោយឡែក ចំនួន​ភ្ញៀវ​ទេសចរ​បរទេស​ចូល​ទស្សនា​រមណីយដ្ឋាន​អង្គរ​នៅ​ខែ ​តុលា ​កើន​ឡើង​ ៤ ​ភាគរយ ជាមួយ​នឹង​ចំណូល​បាន​ពី​ការ​លក់​សំបុត្រ​កើន​ឡើង​ ៤,៥២ ​ភាគរយ។ នេះ​បើ​តាម​ទិន្នន័យ​ពី​អាជ្ញាធរ​អប្សរា។

តួលេខ​បង្ហាញ​ថា ចំនួន​ភ្ញៀវ​បរទេស​មក​ទស្សនា​អង្គរ​ក្នុង​ខែ​តុលា​មាន​ចំនួន ១៥៣ ៣០៨ នាក់​កើន​ឡើង​ ៤,០៩ ​ភាគរយ​បើ​ធៀប​នឹង​ខែ​តុលា​ ឆ្នាំ​ទៅ ក្នុង​នោះ​ទទួល​បាន​ចំណូល​ពី​ការ​លក់​សំបុត្រ​ចំនួន ​៤ ៣៨១ ០៤០ ដុល្លារ។

បើ​គិត​ត្រឹម​រយៈ ពេល​ ១០ ​ខែ​ដំបូង​ឆ្នាំ​នេះ កំណើន​ភ្ញៀវ​មាន​តែ​២​ភាគរយ​ប៉ុណ្ណោះ​គឺ​មាន​ចំនួន ១ ៦៧៧ ៣៥២ បើ​ធៀប​រយៈពេល​ដូច​គ្នា​កាលពី​ឆ្នាំ​ទៅ ក្នុង​នោះ​ទទួល​បាន​ចំណូល​សរុប ៤ ៧៦៨១ ០៨០ ដុល្លារ​កើន​ឡើង ​០,៦២ ​ភាគរយ៕

អត្ថបទគួរចាប់អារម្មណ៍