ភ្នំពេញៈ រាជរដ្ឋាភិបាលកាលពីម្សិលមិញចេញសារាចរណែនាំដល់ក្រសួង ស្ថាប័នពាក់ព័ន្ធ និងអាជ្ញាធរដែនដីគ្រប់លំដាប់ថ្នាក់ត្រូវចូលរួមចាត់វិធានការថែរក្សាទឹកដើម្បីផ្គត់ផ្គង់សម្រាប់តែការប្រើប្រាស់ប្រចាំថ្ងៃតែប៉ុណ្ណោះ ដោយហេតុរបបទឹកទន្លេមេគង្គមានការប្រែប្រួលខ្លាំងស្រកចុះដល់កម្រិតទាបបំផុតដែលមិនធ្លាប់មានក្នុងរយៈកាលកន្លងមក។
សារាចរដដែលនេះបានឲ្យដឹងថា៖ «ការងារបង្កបង្កើនផលស្រូវប្រាំងក្នុងឆ្នាំ ២០១៩-២០២០ គឺអាចធ្វើបានតែ ១ ដងប៉ុណ្ណោះ ដោយមិនអាចធ្វើស្រូវប្រាំងលើកទី ២ បានទេបើទោះបីជាទឹកនៅតាមបណ្តាអាងដែលបានរក្សាទុក និងកន្លែងមួយចំនួនដែលមានទឹកជាធម្មជាតិក៏ដោយគួរគប្បីរក្សាទឹកទាំងនោះទុកសម្រាប់ប្រើប្រាស់ប្រចាំថ្ងៃ និងការដាំដំណាំរួមផ្សំផ្សេងទៀតក្រៅពីស្រូវ»។
សារាចរដដែលនេះបានឲ្យដឹងថាក្នុងឆ្នាំ ២០១៩ ព្រះរាជាណាចក្រកម្ពុជាក៏ដូចជាបណ្ដាប្រទេសក្នុងតំបន់បានទទួលរងឥទ្ធិពលយ៉ាងធ្ងន់ធ្ងរពីបាតុភូតអែលនីណូ (El Nino) ដោយបានបង្កឲ្យមានកត្តាអវិជ្ជមានជាច្រើនដូចជា ធាតុអាកាសមានសភាពក្តៅហួតហែងខ្លាំង, រដូវវស្សាមកដល់មានសភាពយឺតយ៉ាវ, របាយទឹកភ្លៀងមានភាពរអាក់រអួលមិនស្មើគ្នា, របបទឹកទន្លេមេគង្គមានការប្រែប្រួលខ្លាំង។
សារាចរនេះថា៖ «អាងទឹកនាពេលកន្លងមកបានរក្សាទឹកទុកស្ទើរតែ ១០០% ក្នុងក្របខ័ណ្ឌទូទាំងប្រទេសយ៉ាងណាក្តីបញ្ហាគ្រប់គ្រងទឹក និងប្រើប្រាស់ទឹកនៅតែត្រូវបានចាត់ទុកជាអាទិភាព ដើម្បីបម្រើឲ្យស្រូវធ្ងន់ចុងរដូវវស្សាស្រូវរដូវប្រាំងនៅឆ្នាំ ២០១៩-២០២០ និងការប្រើប្រាស់ប្រចាំថ្ងៃរហូតដល់មានភ្លៀងកក់ខែនាឆ្នាំថ្មី»។
លោក កែវ វី អ្នកនាំពាក្យអាជ្ញាធរជាតិគ្រប់គ្រងគ្រោះមហន្តរាយបានថ្លែងប្រាប់ភ្នំពេញប៉ុស្តិ៍កាលពីម្សិលមិញថា ក្រសួងធនធានទឹក និងឧតុនិយមដឹងពីស្ថានភាពអាកាសធាតុជាមុនហើយក្នុងឆ្នាំដែលមានកម្រិតទឹកភ្លៀងដែលទទួលបានមានចំនួនតិចដូច្នេះហើយគាត់បានចុះទៅណែនាំប្រជាពលរដ្ឋកុំឲ្យធ្វើស្រែប្រាំងលើកទី ២ ដើម្បីចៀសវាងការខ្វះខាតទឹកក្នុងការប្រើប្រាស់។
លោកបានបញ្ជាក់ថា៖ «នៅក្នុងខេត្តពោធិ៍សាត់ និងក្នុងខេត្តបន្ទាយមានជ័យ ស្រែប្រាំងលើកទី ១ ដែលពលរដ្ឋបានធ្វើលើសផែនការហើយ ដូច្នេះយើងគ្រាន់តែផ្អាកគាត់កុំឲ្យធ្វើស្រែប្រាំងលើកទី ២ ដោយសារតែយើងឃើញថា អាកាសធាតុ វាគ្មានភ្លៀងកក់ខែ ហើយវាអាចមានបញ្ហាខ្វះខាតទឹក ហើយយើងខំសន្សំទឹកទុកសម្រាប់ការប្រើប្រាស់»។
ការចេញសារាចររបស់រាជរដ្ឋាភិបាលនេះបានធ្វើឡើងបន្ទាប់ពីគណៈកម្មការទន្លេមេគង្គបានចេញសេចក្ដីប្រកាសព័ត៌មានថា កម្ពុជាស្ថិតនៅក្នុងចំណោមប្រទេសជួបគ្រោះរាំងស្ងួតខ្លាំងចាប់ពីថ្ងៃទី ១៩ ខែវិច្ឆិកា រហូតដល់ខែមករាឆ្នាំ ២០២០ និងបន្ទាប់ពីមានស្រូវរាប់ពាន់ហិកតាក្នុងខេត្តបន្ទាយមានជ័យចាប់ផ្តើមប្រឈមការខូចខាតដោយខ្វះទឹកជាបន្តបន្ទាប់រួចមក៕