.jpg)
ក្រុមមន្ត្រីរដ្ឋាភិបាលបានចូលរួមកិច្ចប្រជុំសន្និបាតប្រចាំឆ្នាំរបស់អគ្គនាយកដ្ឋានអន្តោប្រវេសន៍នៃក្រសួងមហាផ្ទៃក្នុងទីក្រុងភ្នំពេញ។ ស្រេង ម៉េងស្រ៊ុន
ភ្នំពេញៈ រាជរដ្ឋាភិបាលទំនងជាបើកផ្លូវផ្តល់ភាពជាពលរដ្ឋដល់ជនជាតិវៀតណាមប្រមាណ ៧ ម៉ឺននាក់ ដែលពួកគេមួយចំនួនបានរស់នៅក្នុងប្រទេសកម្ពុជាអស់រយៈពេលជាច្រើនទសវត្សរ៍មកហើយ។ មន្ត្រីអន្តោប្រវេសន៍បានប្រកាសផែនការកាលពីម្សិលមិញនៅក្នុងសន្និបាតប្រចាំឆ្នាំរបស់អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ។
លោក នូវ លក្ខិណា អគ្គនាយករងនៃអគ្គនាយកដ្ឋានអន្តោប្រវេសន៍បានថ្លែងថា រាជរដ្ឋាភិបាលទទួលស្គាល់ថា ជនជាតិវៀតណាមជាច្រើនបានរស់នៅក្នុងប្រទេសកម្ពុជាអស់រយៈពេលជាច្រើនជំនាន់មកហើយ ហើយអ្នកខ្លះបានរស់នៅមុនរបបខ្មែរក្រហម។
លោក លក្ខិណា បានថ្លែងថា៖ «អគ្គនាយកដ្ឋានមិនអាចជាតិនិយមនោះទេ។ យើងត្រូវតែគោរពច្បាប់អន្តរជាតិដែរ»។
លោកថ្លែងថា៖ «មិនមែនជនជាតិវៀតណាមទាំងអស់នឹងត្រូវទទួលស្គាល់នោះទេ។ នៅពេលពួកគេដាក់ពាក្យ យើងត្រូវតែពិនិត្យពួកគេ។ ប៉ុន្តែខ្ញុំគិតថា ពួកគេភាគច្រើនបំផុតអាច»។
វិធានការនេះត្រូវបានស្វាគមន៍ដោយលោក មឿន តុលា នាយកអង្គការ Central ដែលជាអង្គការការពារសិទ្ធិពលករចំណាកស្រុកដែលថ្លែងថា៖ «ខ្ញុំគិតថា វិធីដែលរដ្ឋាភិបាលចុះបញ្ជីពួកគេជាជនអន្តោប្រវេសន៍គឺជាវិធីត្រឹមត្រូវ។ ប៉ុន្តែមានរឿងមួយចំនួនទៀតដែលយើងត្រូវគិត»។
លោក តុលា បានថ្លែងបន្តថា ជាឧទាហរណ៍ក្នុងប្រទេសថៃ និងប្រទេសម៉ាឡេស៊ី ជនអន្តោប្រវេសន៍ដែលគ្មានឯកសារត្រូវបានលើកទឹកចិត្តឲ្យចុះបញ្ជី ប៉ុន្តែនៅទីបំផុតពួកគេមិនត្រូវបានអនុញ្ញាតឲ្យក្លាយជាពលរដ្ឋគេទេ។ នោះមានន័យថា ពួកគេមិនដែលសម្រេចបានសិទ្ធិមួយចំនួន។ ឧទាហរណ៍ ក្នុងប្រទេសថៃ ជនអន្តោប្រវេសន៍អាចធ្វើការបាន ប៉ុន្តែមិនអាចបើកអាជីវកម្មផ្ទាល់ខ្លួនបាន ហើយក្នុងប្រទេសម៉ាឡេស៊ី ជនអន្តោប្រវេសន៍ត្រូវតែបង់ថ្លៃចុះឈ្មោះប្រចាំឆ្នាំជិត ៥០០ ដុល្លារ។
លោកស្រី Lyma Nguyen មេធាវីសិទ្ធិមនុស្សអូស្ត្រាលីដែលបានធ្វើការស្រាវជ្រាវអំពីជនជាតិវៀតណាមក្នុងប្រទេសកម្ពុជា បានលើកឡើងអំពីក្តីបារម្ភអំពីគំនិតផ្តួចផ្តើមនាពេលថ្មីៗនេះដោយអាជ្ញាធរមូលដ្ឋានដែលដកហូតឯកសារ «លក្ខណៈមិនប្រក្រតី» ពីជនជាតិវៀតណាម។
លោកស្រី Nguyen បានថ្លែងថា ភាគច្រើននៃឯកសារទាំងនោះអាចជួយបង្ហាញថា ពួកគេគួរតែត្រូវផ្តល់ឲ្យនូវភាពជាពលរដ្ឋជាច្រើនជំនាន់មកហើយ។
លោកស្រីបានថ្លែងថា៖ «[រដ្ឋាភិបាល] ចាំបាច់ត្រូវដោះស្រាយជាមួយពួកគេផ្អែកលើមូលដ្ឋានបុគ្គលនីមួយៗ ហើយមើលទៅលើស្ថានភាពបុគ្គល ស្ថានភាពគ្រួសារ និងទំនងទាក់ទងនៅក្នុងសហគមន៍ក្នុងប្រទេសកម្ពុជា។ ទាំងនេះគឺជាបញ្ហាដែលត្រូវធ្វើផ្អែកលើមូលដ្ឋានបុគ្គលនីមួយៗ»។
លោក លក្ខិណា បានថ្លែងថាអគ្គនាយកដ្ឋានអន្តោប្រវេសន៍ រៀបចំពិនិត្យ «យ៉ាងច្បាស់លាស់» ទៅលើប្រវត្តិនៃជនជាតិវៀតណាមដែលដាក់ពាក្យសុំជាជនអន្តោប្រវេសន៍ដែលមានឯកសារត្រឹមត្រូវ និងថាពួកគេនឹងអាចក្លាយជាពលរដ្ឋខ្មែរ ប្រសិនបើពួកគេបំពេញបានតាមលក្ខណៈវិនិច្ឆ័យមួយចំនួនដែលមានចែងនៅក្នុងច្បាប់ស្តីពីសញ្ជាតិ។
លោកបានថ្លែងថា៖ «ឥឡូវនេះយើងកំពុងគិតអំពីការគ្រប់គ្រងជនអន្តោប្រវេសន៍ក្នុងប្រទេសកម្ពុជា»។
មន្ត្រីអន្តោប្រវេសន៍បានប្រកាសថា ពួកគេកំពុងបង្ក្រាបទៅលើពលករបរទេសដែលមិនមានប័ណ្ណ‑សៀវភៅការងារ ឬបង់ពន្ធ បន្ទាប់ពីបានគណនាថារដ្ឋាភិបាលបានបាត់បង់ចំណូល ២៣ លានដុល្លារកាលពីឆ្នាំមុន។ ប្រសិនបើពួកគេនៅតែមិនគោរពច្បាប់អាចនឹងត្រូវបណ្តេញ៕ PS
