.jpg)
ការិយាល័យអប់រំ យុវជននិងកីឡា ស្រុកបាទី។ ហ្វេសប៊ុក
ភ្នំពេញៈ លោកនាយករដ្ឋមន្ត្រី ហ៊ុន សែន បានប្រកាសគម្រោងលុបចោលការិយាល័យរបស់ក្រសួងមួយចំនួននៅថ្នាក់ស្រុកនាពេលខាងមុខ ហើយត្រូវរៀបចំការិយាល័យទាំងនោះឱ្យនៅជាមួយគ្នា ១ ដុំ លើកលែងតែការិយាល័យថ្នាក់ស្រុករបស់ក្រសួងសុខាភិបាល ក្រសួងអប់រំ ក្រសួងរៀបចំដែនដី និងការិយាល័យនគរបាលនិងកងទ័ព ដែលត្រូវរក្សាទុកដដែល។
លោកបានបញ្ជាក់កាលពីថ្ងៃទី ២៥ មករា ថា ការរៀបចំបែបនេះ ដើម្បីកុំឱ្យតាមបណ្ដាក្រសួងទាំងនោះបន្តស្នើសុំក្របខ័ណ្ឌមន្ត្រីរាជការទៅដាក់តាមស្រុកបន្ថែមទៀត ដែលធ្វើឱ្យចំនួនមន្ត្រីរឹតតែគរជើងគ្នា និងគ្មានប្រសិទ្ធភាពការងារ។
លោកហ៊ុន សែន ថ្លែងថា៖ «(ការិយាល័យ) សុខាភិបាលត្រូវទុក អប់រំត្រូវទុក រៀបចំដែនដីត្រូវទុកព្រោះអាហ្នឹងវាសំខាន់គ្រប់គ្រងដីធ្លីព្រោះទំនាស់កើតច្រើនណាស់។
ក្រៅពីនោះ យកមករៀបចំជាកញ្ចប់របស់វា ឥឡូវផ្នែកផលិតកម្ម ឧទាហរណ៍ (ការិយាល័យ) កសិកម្ម ធនធានទឹក អភិវឌ្ឍន៍ជនបទ ដាក់ហ្អែងម៉ាដុំ ឬក៏ថែមស្អី ឧស្សាហកម្ម រ៉ែ ដាក់ហ្អែងម៉ាដុំឱ្យទៅជាមួយគ្នាត្រង់ហ្នឹង ផ្នែកអីទៀត សង្គមកិច្ច វប្បធម៌ ឱ្យវានៅម៉ាចង្កោមទៅ ឱ្យវានៅជាតួអង្គ រដ្ឋបាលឯកភាពតែម្ដងទៅ។ កុំឱ្យវាសាំញ៉ាំ ឥឡូវម៉ាប៉ារ៉ូមាន២នាក់យកធ្វើម៉ាំស្អី អ៊ីចឹងឱ្យនៅត្រង់ហ្នឹងទៅ ហើយបម្រើសេវាឱ្យប្រមាណក្រសួង»។
លោក ផៃ ស៊ីផាន អ្នកនាំពាក្យនៃទីស្ដីការគណៈរដ្ឋមន្ត្រី ថ្លែងថា ការប្រកាសគម្រោងបង្រួមការិយាល័យនៃក្រសួងមួយចំនួននៅតាមស្រុក គឺដើម្បីកាត់បន្ថយភាពស្មុគស្មាញដល់ពលរដ្ឋ និងជួយឱ្យការផ្ដល់សេវាបម្រើប្រជាពលរដ្ឋកាន់តែមានប្រសិទ្ធភាពជាងមុន ហើយក៏ជាផ្នែកមួយនៃកំណែទម្រង់ស៊ីជម្រៅរបស់រាជរដ្ឋាភិបាលសម្រាប់អាណត្តិទី ៦។
ទោះយ៉ាងណាក៏ដោយ លោក ផៃ ស៊ីផាន មិនទាន់អះអាងបានពីកាលបរិច្ឆេទនៃដំណើការចាប់ផ្ដើមលុបចោលការិយាល័យថ្នាក់ស្រុកនៃក្រសួងមួយចំនួននៅពេលណាឡើយទេ។ ប៉ុន្តែគម្រោងនេះដើម្បីកុំឱ្យមានមន្ត្រីគរជើងគ្នាច្រើន។
លោក ស៊ីផាន អះអាងថា កន្លងមកដោយសារមានការិយាល័យក្រសួងនៅតាមស្រុកច្រើន បានធ្វើឱ្យពលរដ្ឋស្មុគស្មាញ និងមិនច្បាស់លាស់អំពីដែនសមត្ថកិច្ចរបស់ពួកគេនីមួយៗ។
លោក ស៊ីផានថ្លែងថា៖ «ដូច្នេះទី១ ដែលជាទិសដៅរបស់យើង គឺសេវាកម្មចុះឱ្យទៅជិតដល់មហាជន ទី២ មិនឱ្យបង្កភាពស្មុគស្មាញដោយសារការិយាធិបតេយ្យហ្នឹង ហើយទី៣ យើងមិនឱ្យមានការគរលើគ្នានៃសមត្ថកិច្ច»។
លោក វ៉ាស៊ឹម សុរិយា មន្ត្រីនាំពាក្យក្រសួងសាធារណការ និងដឹកជញ្ជូនបានប្រាប់ថា ជាទូទៅក្រសួងតែងចង់បានមន្ត្រីប្រចាំការឱ្យបានគ្រប់ស្រុក ប៉ុន្តែយ៉ាងនេះក្ដី ក្រសួងក៏ត្រូវតែអនុវត្តទៅតាមកម្មវិធីគោលនយោបាយកំណែទម្រង់ស៊ីជម្រៅដែរ។ សម្រាប់ក្រសួងសាធារណការមិនមានការិយាល័យតាមស្រុកច្រើនឡើយ ហើយចំពោះមន្ត្រីតាមការិយាល័យដែលមានតាមស្រុកខ្លះវិញ គឺជាមន្ត្រីជាប់កិច្ចសន្យានិងមន្ត្រីមកពីថ្នាក់ខេត្តដែលជួយធ្វើការងារនៅស្រុកឱ្យក្រសួងប៉ុណ្ណោះ។
លោកថា៖ «ធម្មតាវា (ការដកការិយាល័យតាមស្រុក) អាចប៉ះពាល់ខ្លះហើយសម្រាប់មន្ត្រីថ្នាក់ស្រុក ប៉ុន្តែដូចខ្ញុំជម្រាបអ៊ីចឹង យើងមិនមានគ្រប់ស្រុកទេ មានតែស្រុកធំៗ ខេត្តធំដែល មានការិយាល័យស្រុក តែស្រុកខ្លះស្ទើរតែអត់ អ៊ីចឹងហើយស្រុកខ្លះមានគឺមន្ត្រីជាប់កិច្ចសន្យា អ៊ីចឹងមន្ត្រីជាប់កិច្ចសន្យាយើងប្រមូលទៅវិញទៅ អត់អីទេ»។
លោក សន ជ័យ នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជាមើលឃើញថា ការិយាល័យស្រុកក្រសួងនៅតាមបណ្ដាតំបន់ដាច់ស្រយាលមួយចំនួន ពុំសូវមានកិច្ចការដែលត្រូវធ្វើឡើយ។
លោកថា៖ «ក្នុងនោះដែរមានតែមនុស្សមិនសូវជាមានផែនការសកម្មភាពអីឱ្យបានផុលផូសដែរទេ ដោយសារអាហ្នឹងគាត់ធ្វើទៅតាមរចនាសម្ព័ន្ធកំណត់ដោយថ្នាក់ជាតិ។ទោះយ៉ាងណាក៏ដោយលោក ហ៊ុន សែន អះអាងថា គម្រោងកែសម្រួលរចនាសម្ព័ន្ធនៅថ្នាក់ស្រុកនេះ គឺអាចសន្សំថវិកាជាតិច្រើន និងមិនខ្ជះខ្ជាយទៀតទេ។
លោក ហ៊ុន សែន ថ្លែងថា៖ «លើសនឹងខ្វះ លើសគឺលើសចំនួនមនុស្សដែលគ្មានសមត្ថភាពធ្វើការ ឯខ្វះគឺខ្វះមនុស្សដែលមានសមត្ថភាពពិតប្រាកដ នេះគឺជាចំណុចដែលខ្ញុំគួរតែនិយាយ។ សូម្បីការប្រើទឹកប្រើភ្លើងក៏តិចជាងមុនដែរ ប្រើបុគ្គលិកក៏តិចជាងមុន មធ្យោបាយធ្វើការក៏តិចជាងមុន បើយើងធ្វើកំណែទម្រង់ អាហ្នឹងធ្វើឱ្យសេដ្ឋកិច្ចយើងកាន់តែរីកចម្រើន និងកាន់តែមានប្រសិទ្ធភាពការងារ»។
លោក ពេជ្រ ប៊ុនធិន រដ្ឋមន្ត្រីក្រសួងមុខងារសាធារណៈ ថ្លែងកាលពីម្សិលមិញដោយមិនទាន់ដឹងព័ត៌មានអំពីការប្រកាសរបស់នាយករដ្ឋមន្ត្រីអំពីគម្រោងលុបការិយាល័យក្រសួងខ្លះនោះទេ។ លោកថា៖ «ខ្ញុំអត់ដឹងសោះ»៕
