ភ្នំពេញៈ រាជរដ្ឋាភិបាលកម្ពុជាសម្រេចកែប្រែអត្រាពន្ធដោយដំឡើងប្រាក់ជាប់ពន្ធលើប្រាក់បៀវត្សរ៍ប្រចាំខែរបស់និយោជិតចាប់ពី ១ លាន ៣ សែនរៀលឡើងទៅ ទើបជាប់កាតព្វកិច្ចបង់ពន្ធជាអ្វីដែលអ្នកនាំពាក្យក្រសួងសេដ្ឋកិច្ចបានបញ្ជាក់ថា នឹងផ្តល់ប្រយោជន៍ដល់មន្ត្រីរាជការច្រើនជាងគេ ខណៈប្រាក់បៀវត្សរ៍មន្ត្រីនៅក្នុងឆ្នាំនេះបានកើនឡើង។
អនុក្រឹត្យដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីពាក់កណ្តាលខែកុម្ភៈបានឲ្យដឹងថា និយោជិតទាំងអស់នឹងមិនមានកាតព្វកិច្ចបង់ពន្ធនោះទេក្នុងករណីដែលកម្រិតប្រាក់បៀវត្សរ៍ស្ថិតក្រោម ១ លាន ៣ សែនរៀល ឬស្មើប្រហែល ៣២០ ដុល្លារ ខណៈកាលពីឆ្នាំមុនអ្នកមានប្រាក់បៀវត្សរ៍ចាប់ពី ១ លាន ២ សែនរៀលឡើងទៅនឹងត្រូវជាប់កាតព្វកិច្ចនេះ។
តាមអនុក្រឹត្យថ្មីដដែលបានបន្តថា សម្រាប់អ្នកមានប្រាក់បៀវត្សរ៍ដែលត្រូវជាប់កាតព្វកិច្ចពន្ធគឺមានចាប់ពី ១ លាន ៣ សែន ១ រយរៀល ដល់ ២ លានរៀលនឹងជាប់កាតព្វកិច្ចបង់ពន្ធចំនួន ៥ ភាគរយ។ រីឯអ្នកមានប្រាក់បៀវត្សរ៍ចាប់ពី ២ លាន ១ រយរៀលដល់ ៨ លាន ៥ សែនរៀលនឹងជាប់កាតព្វកិច្ចបង់ពន្ធចំនួន ១០ ភាគរយ។
ចំណែកអ្នកមានប្រាក់បៀវត្សរ៍ចាប់ពី ៨ លាន ៥ សែន ១ រយរៀលដល់ ១២ លាន ៥ សែនរៀលនឹងត្រូវជាប់កាតព្វកិច្ចពន្ធបង់ចូលរដ្ឋចំនួន ១៥ ភាគរយ ខណៈអ្នកមានប្រាក់បៀវត្សរ៍លើសពី ១២ លោន ៥ សែនរៀលឡើងទៅនឹងត្រូវបង់ពន្ធចូលរដ្ឋចំនួន ២០ ភាគរយ។
រាជរដ្ឋាភិបាលបានបញ្ជាក់ថា៖ «អនុក្រឹត្យនេះមានគោលដៅកំណត់ភាគរយនៃប្រាក់ចំណូលជាប់ពន្ធប្រចាំឆ្នាំដែលសម្រេចបានដោយរូបវន្តបុគ្គល សហគ្រាសឯកបុគ្គល និងចំណែកដែលត្រូវបែងចែកឲ្យសមាជិកម្នាក់ៗរបស់ក្រុមហ៊ុនសហកម្មសិទ្ធិដែលមិនត្រូវបានចាត់ទុកជានីតិបុគ្គល និងភាគរយនៃប្រាក់បៀវត្សរ៍ជាប់ពន្ធប្រចាំខែរបស់និយោជិតនិវាសនជន»។
លោក មាស សុខសេនសាន អ្នកនាំពាក្យក្រសួងសេដ្ឋកិច្ចបានប្រាប់ភ្នំពេញប៉ុស្តិ៍កាលពីម្សិលមិញថា ករណីកែប្រែអត្រាពន្ធសម្រាប់ប្រាក់ចំណូល ឬប្រាក់បៀវត្សរ៍នេះគឺជាគោលការណ៍របស់រាជរដ្ឋាភិបាលក៏ដូចជាក្រសួងសេដ្ឋកិច្ច និងហិរញ្ញវត្ថុក្នុងការធ្វើប្រសើរឡើងនូវជីវភាពរបស់ប្រជាពលរដ្ឋ មន្ត្រីរាជការក៏ដូចបុគ្គលិកដែលទើបតែទទួលបានការដំឡើងប្រាក់បៀវត្សរ៍បន្តិចបន្តួច ដើម្បីកុំឲ្យមានការជាប់កាតព្វកិច្ចបង់ពន្ធនេះ។
លោកបានបន្តថា ការកំណត់នេះក៏ព្រោះតែប៉ុន្មានឆ្នាំចុងក្រោយនេះ រដ្ឋបានប្រមូលទំហំប្រាក់ចំណូលចរន្តលើសផែនការដែលធ្វើឲ្យរដ្ឋមានប្រាក់សន្សំថែមទៀត ដូច្នេះពី ១ ឆ្នាំទៅ ១ ឆ្នាំ រាជរដ្ឋាភិបាលគិតឃើញថា មន្ត្រីរាជការទាំងអស់ដែលមានប្រាក់បៀវត្សរ៍ទាបបំផុតនោះមិនគួរណាជាប់ពន្ធនោះទេ ដោយគួរតែបន្តបើកប្រាក់បៀវត្សរ៍របស់ខ្លួនទៅតាមចំណូលដែលទទួលបាន។
លោកបានបញ្ជាក់ថា៖ «លក្ខខណ្ឌកែប្រែអត្រាពន្ធក៏បានជះឥទ្ធិពលខ្លាំងដល់មន្ត្រីរាជការដែលមាន ដូច្នេះប្រសិនបើ រដ្ឋាភិបាលដំឡើងប្រាក់បៀវត្សរ៍របស់មន្ត្រីរាជការហើយបែរទៅជាគាត់ជាប់ពន្ធវិញដដែល ប្រាកដជាមិនមានន័យទេនៅក្នុងការដំឡើងប្រាក់បៀវត្សរ៍ជូនពួកគាត់។ ហេតុផលបែបនេះហើយទើបយើងកែប្រែសន្ទស្សន៍នៃដំណាក់កាលជាប់ពន្ធនេះដោយដំឡើងឲ្យខ្ពស់បន្តិច ដើម្បីឲ្យមន្ត្រីរាជការអាចរួចផុតពីការជាប់ពន្ធ»។
លោក យក ប៊ុនណា អ្នកនាំពាក្យរដ្ឋលេខាធិការដ្ឋានមុខងារសាធារណៈបានប្រាប់ភ្នំពេញប៉ុស្តិ៍ដែរថា នៅក្នុងឆ្នាំនេះមន្ត្រីរាជការទាំងអស់នឹងទទួលបានការដំឡើងប្រាក់បៀវត្សរ៍បន្ថែមទៀតដោយការទទួលបានប្រាក់បំណាច់ប្រមាណ ៧ ភាគរយបន្ថែមទៀត ហើយនឹងបើកជូនដល់ពួកគាត់ចំនួន ៧ ភាគរយ។ លោកបន្តថា ការទទួលបាននេះនឹងធ្វើឲ្យមន្ត្រីរាជការមួយចំនួនធំ ពិសេសមន្ត្រីក្នុងក្របខ័ណ្ឌគ្រូបង្រៀនទទួលបានអត្ថប្រយោជន៍ក្នុងការរួចផុតពីកាតព្វកិច្ចបង់ពន្ធនេះ។
លោកបន្ថែមថា៖ «ជារួមនៅពេលដំឡើងអត្រាជាប់ពន្ធនេះ អត្ថប្រយោជន៍នឹងទៅដល់មន្ត្រីយើងគឺនៅក្នុងវិស័យអប់រំមានច្រើន មានគ្រូបឋម គ្រូថ្នាក់ក្រោមៗដែលមានប្រាក់បៀវត្សរ៍ក្រោមអប្បបរមានៅក្នុងរង្វង់ ១ លាន ២ សែន ឬ ១ លាន ៣ សែនរៀលនេះពិតជាមានច្រើន»។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាបានលើកឡើងថា ការដែលរដ្ឋាភិបាលអនុវត្តការលើកលែងពន្ធដល់អ្នកដែលមានប្រាក់បៀវត្សរ៍ក្រោម ១ លាន ៣ សែននេះហាក់ដូចជាមិនមានការចាប់អារម្មណ៍ខ្លាំងពីពលរដ្ឋជាងអ្វីដែលរដ្ឋាភិបាលព្យាយាមធ្វើឲ្យពលរដ្ឋអាចទទួលបានប្រាក់ចំណូលខ្ពស់ពីវិស័យផ្សេងៗនោះទេ។
លោកបានបង្ហាញការយល់ឃើញថា ថវិកាដែលកាត់ចេញពីប្រាក់ចំណូល ឬប្រាក់បៀវត្សរ៍របស់ពលរដ្ឋអាចមិនមានចំនួនច្រើនប៉ុន្មាននោះទេ ដោយសារតែពលរដ្ឋខ្មែរភាគច្រើនបំផុតមានប្រាក់ចំណូលក្រោម ៥០០ ដុល្លារ។
លោកបញ្ជាក់ថា៖ «នៅពេលយើងពិនិត្យមើលទំហំប្រាក់បៀវត្សរ៍ដែលត្រូវជាប់កាតព្វកិច្ចពន្ធគឺបង្ហាញថា ពលរដ្ឋខ្មែរដែលមានប្រាក់បៀវត្សរ៍ក្រោម ៥០០ ដុល្លារនេះ គឺមានចំនួនមួយដ៏ច្រើន ដូច្នេះប្រសិនបើពួកគេជាប់ពន្ធនោះគឺមូលដ្ឋានគិតពន្ធក៏មិនច្រើនណាស់ណាដែរ។ យន្តការថ្មីនេះមិនទំនងថា អាចទាក់ទាញការចាប់អារម្មណ៍ពីប្រជាពលរដ្ឋច្រើនទេ»៕
វីដេអូ៖