.jpg)
អាជ្ញាធរខណ្ឌជ្រោយចង្វារ យកអំណោយជូនអ្នកដែលពាក់ព័ន្ធជាមួយអ្នកកើតជម្ងឺកូវីដ ១៩ ក្នុងសង្កាត់ព្រែកលៀប កាលពីថ្ងៃទី ៦ មេសា ២០២១ កន្លងមក។ ហុង មិនា
ភ្នំពេញ៖ រាជរដ្ឋាភិបាលបានសម្រេចបង្កើតនូវយន្តការ និងនីតិវិធីនៃការអនុវត្តវិធានការគោលនយោបាយអន្តរាគមន៍ជំនួយសង្គម សម្រាប់ជនរងគ្រោះ ឬរងផលប៉ះពាល់ធ្ងន់ធ្ងរ ពីជំងឺកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ ដែលក្នុងនោះមានគ្រួសារមានជីវភាពលំបាក គ្រួសារមានសមាជិកមានជំងឺកូវីដ ១៩ និងគ្រួសារមានសមាជិកស្លាប់ដោយជំងឺកូវីដ ១៩ នៅទូទាំងប្រទេស។
យោងតាមសេចក្តីសម្រេចដែលចុះហត្ថលេខាដោយលោក អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិគាំពារសង្គម កាលពីថ្ងៃទី ១៧ ខែមេសា បានឱ្យដឹងថា សេចក្តីសម្រេចនេះ មានវិសាលភាពអនុវត្តន៍ចំពោះប្រជាពលរដ្ឋខ្មែរ ដែលរងគ្រោះ និងរងផលប៉ះពាល់ធ្ងន់ធ្ងរ ពីជំងឺកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ ឆ្នាំ ២០២១។
គ្រួសារដែលទទួលបាននូវការគាំពារនេះ រួមមានគ្រួសារមានជីវភាពលំបាករស់នៅក្នុងរាជធានីភ្នំពេញ និងក្រុងតាខ្មៅ ដែលត្រូវបានអនុវត្តន៍វិធានការបិទខ្ទប់ គ្រួសារដែលមានសមាជិកទទួលរងជំងឺកូវីដ ១៩ តែមិនមានអ្នកស្លាប់ និងគ្រួសារដែលមានសមាជិកស្លាប់ដោយសារជំងឺកូវីដ ១៩ នៅទូទាំងប្រទេស។
គ្រួសារមានជីវភាពលំបាករស់នៅក្នុងរាជធានីភ្នំពេញ និងក្រុងតាខ្មៅ ដែលត្រូវបានអនុវត្តវិធានការបិទខ្ទប់សំដៅដល់គ្រួសារដែលមានបណ្ណសមធម៌ គ្រួសារដែលជាកម្មករនិយោជិត និងដែលប្រកបមុខរបរមានហានិភ័យការងារខ្ពស់ រួមទាំងកម្មករនិយោជិតក្រៅប្រព័ន្ធ អាជីវករលក់ដូរតូចតាច និងគ្រួសារដទៃទៀតដែលកំណត់ដោយអាជ្ញាធរមូលដ្ឋាន និងដែលរស់នៅក្នុងរាជធានីភ្នំពេញ និងក្រុងតាខ្មៅ ដែលត្រូវបានអនុវត្តវិធានការបិទខ្ទប់។
អាជ្ញាធរខណ្ឌជ្រោយចង្វារ យកអំណោយជូនអ្នកដែលពាក់ព័ន្ធជាមួយអ្នកកើតជម្ងឺកូវីដ ១៩ ក្នុងសង្កាត់ព្រែកលៀប កាលពីថ្ងៃទី ៦ មេសា ២០២១ កន្លងមក។
សេចក្តីសម្រេចបានបន្តថា គ្រួសារទាំង ៣ ប្រភេទនេះ ត្រូវទទួលបានការឧបត្ថម្ភជាសាច់ប្រាក់ចំនួនមួយលើកគត់ តាមកម្រិតនៃគ្រួសារ ក្នុងនោះ សម្រាប់គ្រួសារមានសមាជិកតែម្នាក់រស់នៅរាជធានីភ្នំពេញ និងក្រុងតាខ្មៅ រស់នៅទីប្រជុំជនតាមខេត្ត និងជនបទ ទទួលបានថវិកាចំនួន ១៦ ម៉ឺនរៀល។ សម្រាប់សមាជិក ២ ឬ ៣ នាក់ ទទួលបាន ២០ ម៉ឺនរៀល និងសមាជិកចាប់ពី ៤ នាក់ឡើងទៅនឹងទទួលបាន ២៤ ម៉ឺនរៀល។
សម្រាប់ការទទួលបានការឧបត្ថម្ភស្បៀងអាហារ ចំពោះគ្រួសារទាំងនេះ គឺបានចំនួន ០១ លើកគត់ ដែលក្នុងនោះមានអង្ករចំនួន ២៥ គីឡូក្រាម មីចំនួន ១ កេសតូច ទឹកត្រីចំនួន ១ យួរ និងទឹកស៊ីអ៊ីវចំនួន ១ យួរ។
តាមសេចក្តីសម្រេច ការឧបត្ថម្ភជាសាច់ប្រាក់នេះ មិនអនុវត្តន៍ចំពោះគ្រួសារមានបណ្ណសមធម៌ ដែលបាននិងកំពុងទទួលបានការឧបត្ថម្ភក្រោមកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ ១៩ ទេ៕
