.jpg)
ពិធីចុះហត្ថលេខារវាងភាគីកម្ពុជា-ថៃនៅបាងកកថ្មីៗនេះ។ រូប ស្ថានទូតកម្ពុជា
ភ្នំពេញៈ ព្រះអង្គម្ចាស់ក្សត្រិយ៍មហាចក្រី ស៊ិរិនថន បានបន្តផ្ដល់ជំនួយ ៥ ឆ្នាំទៀត សម្រាប់អភិវឌ្ឍវិទ្យាស្ថានបច្ចេកវិទ្យាកំពង់ឈើទាលនៅខេត្តកំពង់ធំ និងវិទ្យាស្ថានបច្ចេកវិទ្យាកំពង់ស្ពឺ។ នេះបើតាមសេចក្ដីប្រកាសព័ត៌មានរបស់ស្ថានទូតកម្ពុជាប្រចាំប្រទេសថៃ។
កិច្ចព្រមព្រៀងជួយវិស័យអប់រំនេះត្រូវបានចុះហត្ថលេខាកាលពីថ្ងៃទី ២ កញ្ញា នៅទីក្រុងបាងកករវាងឯកអគ្គរាជទូតកម្ពុជាប្រចាំប្រទេសថៃលោក អ៊ូក សោភ័ណ តំណាងឲ្យលោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងលោក ដន ប្រាម៉ាត់វីណៃ ឧបនាយករដ្ឋមន្ត្រី រដ្ឋមន្ត្រីក្រសួងការបរទេសថៃ។ ជំនួយនេះមានរយៈពេល ៥ ឆ្នាំចាប់ពីខែកញ្ញា ឆ្នាំ ២០២០ ដល់ខែកញ្ញា ឆ្នាំ ២០២៥។
សេចក្ដីប្រកាសព័ត៌មានរបស់ស្ថានទូតបញ្ជាក់ថា «គម្រោងព្រះរាជឧបត្ថម្ភដល់ព្រះរាជាណាចក្រកម្ពុជាលើវិស័យអប់រំបានកើតចេញពីការព្រះរាជតម្រិះផ្ដួចផ្ដើមដ៏ថ្លៃថ្លារបស់ព្រះអង្គម្ចាស់ក្សត្រិយ៍ក្នុងគោលបំណងចូលរួមអភិវឌ្ឍប្រព័ន្ធអប់រំប្រកបដោយគុណភាព សម្រាប់យុវជនកម្ពុជាប្រៀបដូចជាអំណោយប្រកបដោយចីរភាពដល់ប្រជាជនកម្ពុជាជាមិត្តនឹងគ្នាជាយូរអង្វែងមកហើយ»។
ស្ថានទូតបញ្ជាក់ថា៖ «ការអនុវត្តគម្រោងព្រះរាជឧបត្ថម្ភកន្លងមកបានជំរុញទំនាក់ទំនងរវាងព្រះរាជាណាចក្រកម្ពុជា និងព្រះរាជាណាចក្រថៃឲ្យកាន់តែល្អប្រសើរ ជាពិសេសបង្កើតឲ្យមានកិច្ចសហប្រតិបត្តិការល្អ ទាំងផ្នែករដ្ឋ ឯកជន និងប្រជាជន ព្រមទាំងបង្កើតឲ្យមានការអភិវឌ្ឍធនធានមនុស្សជំនាន់ថ្មី តាមរយៈការផ្ដល់អាហារូបករណ៍ដល់សិស្សនិស្សិត និងមន្ត្រីរាជការកម្ពុជាចំនួន ២ ១២៤ កន្លែងចាប់ពីឆ្នាំ ២០០៥ ដល់ឆ្នាំ ២០២០ ដើម្បីរួមចំណែកក្នុងការអភិវឌ្ឍព្រះរាជាណាចក្រកម្ពុជា»។
លោក ប៉ិច សៀង នាយកវិទ្យាស្ថានបច្ចេកវិទ្យាកំពង់ឈើទាលនៅខេត្តកំពង់ធំបានឲ្យដឹងពីម្សិលមិញថា ជំនួយរបស់ព្រះអង្គម្ចាស់ក្សត្រិយ៍មហាចក្រី ស៊ិរិនថន បានចាប់ផ្ដើមតាំងពីឆ្នាំ ២០០០ ដោយការសាងសង់វិទ្យាល័យកំពង់ឈើទាល។ ពេលនោះភាគីកម្ពុជាបានផ្ដល់ទីតាំង រីឯភាគីថៃរ៉ាប់រងសង់អគារ និងសម្ភារសិក្សា រោងជាង និងបណ្ដុះបណ្ដាលគ្រូបច្ចេកទេសកសិកម្ម។ ប៉ុន្តែនៅឆ្នាំ ២០១៥ វិទ្យាល័យនេះបានប្រែក្លាយទៅជាវិទ្យាស្ថាន។
លោកថា វិទ្យាស្ថាននេះចាប់ផ្ដើមទទួលនិស្សិតនៅឆ្នាំ ២០១៦ ដែលមកទល់ពេលនេះមាននិស្សិតជាង ១០០ នាក់បានបញ្ចប់ការសិក្សា និងបណ្ដុះគ្រូបច្ចេកទេសកសិកម្មប្រមាណ ៤០ នាក់។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាបានថ្លែងពីម្សិលមិញថា គោលបំណងនៃកិច្ចព្រមព្រៀងគម្រោងព្រះរាជឧបត្ថម្ភនេះគឺដើម្បីឲ្យភាគីទាំង ២ ធ្វើកិច្ចសហប្រតិបត្តិការអភិវឌ្ឍវិទ្យាស្ថានបច្ចេកវិទ្យាកំពង់ឈើទាល និងវិទ្យាស្ថានបច្ចេកវិទ្យាកំពង់ស្ពឺឲ្យប្រកបដោយចីរភាព។
ពាក់ព័ន្ធនឹងការឧបត្ថម្ភនេះ ស្ថានទូតថៃប្រចាំកម្ពុជាបានថ្លែងប្រាប់តាមអ៊ីមែលកាលពីម្សិលមិញថា៖ «យុវជនគឺជាអនាគតប្រកបដោយចីរភាពសម្រាប់កម្ពុជា។ អនុស្សរណៈនៃការយោគយល់គ្នានេះមានសារៈសំខាន់សម្រាប់ការកសាង និងថែរក្សាហេដ្ឋារចនាសម្ព័ន្ធវិទ្យាស្ថានទាំង ២ នេះ។ លើសពីនេះទៀត វាផ្ដល់ឱកាសជាច្រើនដល់សិស្សនិស្សិតតាមរយៈការហាត់ការ និងអាហារូបករណ៍កម្រិតឧត្តមសិក្សា»៕
