ភ្នំពេញៈ អាជ្ញាធរខេត្តនៅតាមព្រំដែនកម្ពុជា-ថៃ និងស្ថាប័នពាក់ព័ន្ធកំពុងបង្កើនការរឹតបន្តឹងថែមទៀតនៅកន្លែងធ្វើចត្តាឡីស័ក និងតាមច្រករបៀង និងច្រកខុសច្បាប់ ដើម្បីចៀសវាងកុំឱ្យពលករណាម្នាក់ចូលមកដោយមិនបានពិនិត្យ និងធ្វើចត្តាឡីស័ក ខណៈមានពលករខ្មែរដែលវិលត្រឡប់មកពីថៃចំនួន ១៦ នាក់ ត្រូវបានរកឃើញមានវិជ្ជមានកូវីដ ១៩។
ទន្ទឹមនឹងនេះអាជ្ញាធរថៃក៏បាននិងកំពុងដាក់បម្រាមហាមប្រជាពលរដ្ឋថៃ និងជនបរទេសមិនឱ្យចល័តពីតំបន់មួយទៅតំបន់មួយ និងកំពុងដាក់វិធានការគ្រប់គ្រង និងបង្ការការរីករាលដាលនៃជំងឺកូវីដ១៩ដែលកំពុងកើតឡើងនៅបណ្តាខេត្តមួយចំនួននៃប្រទេសថៃ។
ក្រសួងការងារ និងបណ្តុះបណ្តាលវិជ្ជាជីវៈកាលពីយប់ថ្ងៃទី ៣១ ខែធ្នូ បានអំពាវនាវដល់ពលករកម្ពុជាដែលកំពុងស្នាក់នៅ និងធ្វើការនៅថៃមិនត្រូវចល័ត ឬវិលត្រឡប់មកស្រុកកំណើតវិញក្នុងដំណាក់កាលនេះទេ គឺពួកគេអាចមានហានិភ័យខ្ពស់ទាំងផ្នែកសន្តិសុខ និងសុខភាព។
ក្រសួងបញ្ជាក់ថា៖ «បងប្អូនអាចប្រឈមនឹងការឃាត់ខ្លួន និងរងការពិន័យរបស់អាជ្ញាធរថៃក្នុងពេលធ្វើដំណើរខុសនឹងបម្រាមរបស់អាជ្ញាធរថៃ។ ទន្ទឹមនឹងនេះដែរ ដើម្បីការពារសុខភាពរបស់បងប្អូន និងក្រុមគ្រួសារក៏ដូចជាសុខភាពសាធារណៈ បងប្អូននឹងត្រូវក្រុមការងារចត្តាឡីស័កកម្ពុជានៅតាមច្រកព្រំដែនកម្ពុជា-ថៃ យកសំណាកទៅពិនិត្យជំងឺកូវីដ ១៩ និងដាក់ឱ្យធ្វើចត្តាឡីស័កនៅតាមបណ្តាខេត្តជាប់ព្រំដែនចំនួន ១៤ ថ្ងៃ បើទោះបីជាបងប្អូនឆ្លងចូលមកប្រទេសកម្ពុជាតាមច្រកណាមួយក៏ដោយ»។
បើតាមក្រសួងការងារ គណៈកម្មការផ្តល់ភាពស្របច្បាប់ដល់ពលករកម្ពុជាដែលកំពុងស្នាក់នៅ និងធ្វើការនៅប្រទេសថៃ បានធ្វើការជាប្រចាំជាមួយនឹងថៃហើយក្នុងពេលខាងមុខនេះ ក្រសួងមហាផ្ទៃថៃ និងក្រសួងការងារថៃនឹងរួមគ្នាស្រង់ឈ្មោះពលករបរទេស និងចេញបណ្ណពណ៌ស៊ីជម្ពូដល់ពលករបរទេសក្នុងនោះក៏មានពលករកម្ពុជាផងដែរ បើទោះបីជាបងប្អូនមាន ឬគ្មានឯកសារក៏ដោយ។
ស្របពេលជាមួយនេះកាលពីព្រឹកថ្ងៃទី ២ ខែ មករា ឆ្នាំ ២០២១ មានបុរសជាពលករខ្មែរអាយុ ៥២ ឆ្នាំម្នាក់ បានស្លាប់ក្នុងមណ្ឌលចត្តាឡីស័កកម្រិត ២ នៃខេត្តត្បូងឃ្មុំ (វិទ្យាល័យត្បូងឃ្មុំ) ដោយសារជំងឺគាំងបេះដូង និងបានដួលបោកក្បាលនឹងចានបង្គន់បន្ទាប់ពីលោកបានធ្វើតេស្តរកវីរុសកូវីដ ១៩ លើកទី១ តែឃើញអវិជ្ជមានពីថ្ងៃទី ៣០ ខែធ្នូ។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានឱ្យដឹងពីម្សិលមិញថា ជនរងគ្រោះរូបនេះបានធ្វើដំណើរពីខេត្តឈុនប៊ុរីនៃប្រទេសថៃ ចូលមកកម្ពុជាតាមច្រកអន្តរជាតិអូរស្មាច់នៃខេត្តឧត្តរមានជ័យពីថ្ងៃទី ២៨ ធ្នូ ឆ្នាំមុន។ ក្រោយពីពិនិត្យសុខភាពរួចក៏បានបញ្ជូនគាត់បន្តមកខេត្តត្បូងឃ្មុំតាមរថយន្តដឹកជញ្ជូនយោធាមកដល់មណ្ឌលចត្តាឡីស័កនៅខេត្តត្បួងឃ្មុំ។ គ្រូពេទ្យតែងពិនិត្យសុខភាពគាត់រាល់ព្រឹកដោយមិនមានសញ្ញាថា គាត់មានភាពមិនប្រក្រតីឡើយ។
លោកស្រីថ្លែងថា៖ «បន្ទាប់ពីជនរងគ្រោះបានវិលត្រឡប់មកបន្ទប់ក៏បានចូលក្នុងបន្ទប់ទឹក ប៉ុន្តែដោយសារបាត់យូរពេកក៏មានការស្វែងរកដោយបានគាស់ទ្វារបន្ទប់ ហើយក៏បានឃើញសាមីសពដេកស្តូកស្តឹងបាត់បង់ជីវិតទៅហើយនៅម៉ោង ៩:១០ នាទីព្រឹកថ្ងៃសៅរ៍»។
លោកស្រីបន្ថែមថា ក្រោយពីក្រុមការងារកោសល្យវិច័យពិនិត្យលើខ្លួនសពឃើញស្នាមបែកក្បាលហូរឈាមក្នុងស្ថានភាពរបៀបជាដួលបោកក្បាលនឹងចានបង្គន់។ ការរាយការណ៍ពីភរិយារបស់សពគឺប្តីរបស់គាត់ធ្លាប់មានជំងឺបេះដូង និងមានការព្យាបាលកន្លងមកនៅប្រទេសថៃជាយូរមកហើយដែរ។
គួរបញ្ជាក់ផងដែរថា គិតត្រឹមថ្ងៃទី ២ ខែមករា ឆ្នាំនេះកម្ពុជាបានរកឃើញអ្នកមានវីរុសកូវីដ ១៩ ចំនួន ៣៨១ នាក់ក្នុងនោះអ្នកជាសះស្បើយមាន ៣៦២ នាក់។
ឯអ្នកកំពុងសម្រាកព្យាបាលមាន ១៩ នាក់ ក្នុងនោះមានពលករមកពីថៃឆ្លងកូវីដ ១៦ នាក់។ ពលករ ៦ នាក់កំពុងព្យាបាលនៅមន្ទីរពេទ្យខេត្តបាត់ដំបង និង ១០ នាក់ ព្យាបាលនៅមន្ទីរពេទ្យប៉ៃលិន។
កាលពីថ្ងៃទី ២ ខែមករា លោកនាយករដ្ឋមន្ត្រី ហ៊ុន សែន តាមរយៈក្រសួងសុខាភិបាលបានសម្រេចឧបត្ថម្ភថវិកាបន្ថែមទៅដល់ខេត្តនៅជាប់នឹងព្រំដែនកម្ពុជា-ថៃ ចំនួន ៦៥០ លានរៀល និងសម្ភារមួយចំនួនទៀតដោយសារខេត្តទាំងនេះមានបន្ទុកទទួលពលករត្រឡប់មកពីថៃដើម្បីរៀបចំធ្វើចត្តាឡីស័ក។ ក្នុងនោះមានខេត្តបាត់ដំបង ខេត្តបន្ទាយមានជ័យ ខេត្តឧត្ដរមានជ័យ និងខេត្តប៉ៃលិន។
បើតាមលោកស្រី យក់ សម្បត្តិរដ្ឋលេខាធិការក្រសួងសុខាភិបាលបានឱ្យដឹងថា សម្រាប់ខេត្តប៉ៃលិនដែលរកឃើញមានពលករវិជ្ជមានជំងឺកូវីដ ១៩ ច្រើនពីថ្ងៃទី ១ ខែមករា ត្រូវបានបន្ថែមនូវម៉ាស៊ីនជំនួយដកដង្ហើម ២ គ្រឿង ម៉ាស៊ីនតាមដានសញ្ញាជីវិតអ្នកជំងឺ ៥ គ្រឿង និងទឹកថ្នាំសម្លាប់មេរោគចំណុះ ២៥ លីត្រ ៥ ប៊ីដុង និងក៏បានបញ្ជូនក្រុមគ្រូពេទ្យជំនាញពីមន្ទីរពេទ្យរុស្ស៊ីទៅជួយផ្នែកបច្ចេកទេសដល់មន្ទីរពេទ្យខេត្តប៉ៃលិនផងដែរ។
កាលពីយប់ថ្ងៃទី ៣១ ខែធ្នូ លោកនាយករដ្ឋមន្ត្រី ហ៊ុន សែន បានបញ្ជាឱ្យកម្លាំងតាមព្រំដែនគ្រប់គ្រងឱ្យបានហ្មត់ចត់បំផុតតាមច្រករបៀងដែលដាច់ខាតមិនឱ្យមានការឆ្លងចូលមកផ្ទៃក្នុងប្រទេសដោយមិនបានពិនិត្យ មិនបានយកសំណាក និងមិនបានធ្វើចត្តាឡីស័កឡើយ។
ទន្ទឹមនឹងនេះដែរលោក ហ៊ុន សែន អំពាវនាវដល់ពលករកម្ពុជាទាំងស្របច្បាប់ និងមិនស្របច្បាប់នៅប្រទេសថៃ សុំបន្តស្នាក់នៅទីនោះ និងយោគយល់ក្នុងកាលៈទេសៈដ៏លំបាកនេះ។
ទាក់ទងនឹងបញ្ហាកូវីដនេះដែរនៅថ្ងៃចន្ទទី ៤ មករានេះ លោក អ៊ុច បូររិទ្ធ រដ្ឋមន្ត្រីប្រតិភូអមនាយករដ្ឋមន្ត្រីតំណាងនាយករដ្ឋមន្ត្រីកម្ពុជាអមដោយ លោកស្រី យក់ សម្បត្តិ រដ្ឋលេខាធិការក្រសួងសុខាភិបាល រួមទាំងមន្ត្រីមួយចំនួននឹងដឹកម៉ាស់ ២ លាន និងសម្ភារបរិក្ខារពេទ្យជាជំនួយពីរាជរដ្ឋាភិបាលកម្ពុជាទៅប្រគល់ជូនរដ្ឋាភិបាលនេប៉ាល់។
គួរបញ្ជាក់ដែរថា កន្លងមកកម្ពុជាក៏ធ្លាប់ផ្តល់ម៉ាស់ និងសម្ភារបរិក្ខារពេទ្យទៅដល់ប្រទេសជាមិត្តមួយចំនួនរួចមកហើយដូចជា ឡាវ មីយ៉ាន់ម៉ា និងទីម័រខាងកើតផងដែរ៕
វីដេអូ៖