ព្រះវិហារៈ រូបសំណាកព្រះគោដែលអ្នកភូមិបានប្រទះឃើញនៅលើទីទួលបុរាណមួយស្ថិតក្នុងភូមិកោងយ៉ោង ឃុំយាង ស្រុកជាំក្សាន្ត ខេត្តព្រះវិហារ កាលពីថ្ងៃទី ៣០ ខែ ឧសភា ឆ្នាំ ២០២០ ត្រូវបាននាំយកទៅរក្សាទុកនៅក្នុងសារមន្ទីរខេត្តព្រះវិហារហើយ បន្ទាប់ពីពិធីប្រគល់ និងទទួលរូបសំណាកនេះត្រូវបានធ្វើឡើងកាលពីថ្ងៃចន្ទ។
លោក មួង ច័ន្ទសី មន្ត្រីបច្ចេកទេសបុរាណវិទ្យាទទួលបន្ទុកការងារសារមន្ទីរខេត្តព្រះវិហារបានប្រាប់ភ្នំពេញប៉ុស្តិ៍ថា ថ្វីដ្បិតតែបដិមាព្រះគោនៅមិនទាន់ត្រូវបានគេឆ្លាក់រួចរាល់ជាស្ថាពរ ដែលមិនអាចកំណត់អំពីរចនាប័ទ្មនៃក្បាច់ចម្លាក់ក្ដី ប៉ុន្តែតាមរយៈថ្មដែលត្រូវបានគេយកមកឆ្លាក់ជារូបព្រះគោនេះគេជឿថា បដិមានេះត្រូវបានគេសាងឡើងនៅក្នុងយុគសម័យមហានគរ។
លោក ច័ន្ទសី បញ្ជាក់ថា៖ «បដិមាព្រះគោមួយអង្គនេះធ្វើពីថ្មរំលីង និងទំនងជាត្រូវបានគេសាងឡើងនៅក្នុងសម័យអង្គរ។ ទោះយ៉ាងណាយើងនៅមិនទាន់ធ្វើពិសោធន៍រកអាយុកាលនៃបដិមាព្រះគោមួយនេះនៅឡើយទេ។ យើងបានទទួលយកបដិមាព្រះគោនេះ មករក្សាទុកជាបណ្ដោះអាសន្នក្នុងសារមន្ទីរខេត្តព្រះវិហារ ដើម្បីរង់ចាំមន្ត្រីជំនាញវត្ថុបុរាណថ្នាក់ជាតិនាំយកទៅពិសោធនៅរាជធានីភ្នំពេញ»។
បើតាមលោក ច័ន្ទសី ការធ្វើពិសោធន៍រកអាយុកាលនៃចម្លាក់ព្រះគោមួយនេះ គេត្រូវប្រើសារធាតុគីមីផ្សំមួយចំនួនដែលក្នុងនោះកាបូន C14 ជាសារធាតុផ្សំ ដែលមិនអាចខ្វះបានក្នុងការពិសោធនេះ។
បើតាមលោក ប្រាក់ វណ្ណារី ប្រធានការិយាល័យនគរបាលការពារបេតិកភណ្ឌខេត្តព្រះវិហារ រូបសំណាកព្រះគោដែលកំពុងត្រូវបានតាំងបង្ហាញនៅក្នុងសារមន្ទីរនៃមន្ទីរវប្បធម៌ និង វិចិត្រសិល្បៈខេត្តព្រះវិហារនាពេលនេះត្រូវបានប្រជាពលរដ្ឋម្នាក់ឈ្មោះ លាក់ ជាតិ អាយុ ៣២ ឆ្នាំ មានទីលំនៅ ភូមិកោងយ៉ោង ឃុំយាង ស្រុកជាំក្សាន្ត ប្រទះឃើញ និងនាំយកមកប្រគល់ឲ្យនគរបាលជំនាញបេតិកភណ្ឌខេត្តព្រះវិហារ តាមរយៈនគរបាលមូលដ្ឋានស្រុកជាំក្សាន្តកាលពីព្រឹកថ្ងៃទី ៣១ ខែ ឧសភា ឆ្នាំ ២០២០ ដើម្បីនាំយកទៅរក្សាទុកជាបណ្ដោះអាសន្ន។
លោក វណ្ណារី ថ្លែងថា៖ «មានអ្នកភូមិខ្លះ មិនដឹងរឿងបានចោទលោក លាក់ ជាតិ ថាបានលួចយករូបបដិមាព្រះគោនោះពីទីទួលបុរាណ ដើម្បីយកទៅរក្សាទុកជាកម្មសិទ្ធិផ្ទាល់ខ្លួន ប៉ុន្តែដោយសារខ្លាចសមត្ថកិច្ចស្រាវជ្រាវរកឃើញ និងចោទប្រកាន់ថា លួចសម្បត្តិវប្បធម៌ជាតិទើបប្រគល់ឲ្យសមត្ថកិច្ចវិញនោះ គឺជារឿងមិនពិតទេ»។
លោកបានបន្តថា៖ «ការពិតយើងគួរតែសរសើរ និងលើកទឹកចិត្តដល់គាត់ ដែលបាននាំយក បដិមាព្រះគោនោះពីក្នុងព្រៃដែលគ្មានអ្នកថែរក្សាមកប្រគល់ជូនសមត្ថកិច្ចជំនាញយើងរក្សាទុកជាសម្បត្តិបេតិកភណ្ឌវប្បធម៌ជាតិ» ។
ជាមួយគ្នានេះលោក វណ្ណារី បានអំពាវនាវដល់ប្រជាពលរដ្ឋ និងអ្នកពាក់ព័ន្ធទាំងអស់មិនត្រូវលួច ឬជួញដូរខុសច្បាប់នូវរាល់បដិមា រូបសំណាក រូបចម្លាក់ថ្មក្ដី ឈើក្ដី ឬវត្ថុបុរាណនានាផ្សេងៗទៀតដែលជាសម្បត្តិបេតិកភណ្ឌវប្បធម៌របស់ជាតិនោះឡើយ ព្រោះជាទង្វើល្មើសច្បាប់ដែលអាចមានទោសទណ្ឌដល់ខ្លួនឯង ហើយក៏ជាទង្វើបំផ្លាញសម្បត្តិបេតិកភណ្ឌវប្បធម៌ជាតិផងដែរ៕