ពោធិ៍សាត់៖ យ៉ាងហោចណាស់មានក្មេងជំទង់ ៣ នាក់ និងយុវជនម្នាក់បានរងរបួសធ្ងន់ និងស្រាល ដោយសារផ្ទុះមីន ១ គ្រាប់ កាលពីថ្ងៃទី ១២ ខែសីហា នៅភូមិសង្គមថ្មី ឃុំថ្មដា ស្រុកវាលវែង ខេត្តពោធិ៍សាត់ ខណៈពួកគេបានរើសយកមកគប់លេងបណ្ដាលឲ្យផ្ទុះ។ នេះបើតាមលោកសាលីមេសា នាយផ្នែកសេនាធិការនៃអធិការដ្ឋាននគរបាលស្រុកវាលវែង។
លោក សាលី មេសា បានប្រាប់ភ្នំពេញប៉ុស្ដិ៍នៅថ្ងៃទី ១៣ សីហា នេះថា ក្មេងជំទង់ ៣ នាក់ និងយុវជនម្នាក់ត្រូវបានក្រុមគ្រួសារបញ្ជូនទៅមន្ទីរពេទ្យបង្អែកខេត្តពោធិ៍សាត់ភ្លាមៗ បន្ទាប់ពីរបួសដោយសារផ្ទុះយុទ្ធភណ្ឌមិនទាន់ផ្ទុះ ១ គ្រាប់ (មិនស្គាល់ម៉ាក) នៅទីតាំងខាងលើ។ ពួកគេជាអ្នកឃ្វាលគោក្របី ប៉ុន្ដែនៅថ្ងៃកើតហេតុនោះមានក្មេងម្នាក់អាយុ ១០ ឆ្នាំ បានរើសគ្រាប់មីន ១ គ្រាប់មកបង្ហាញគ្នីគ្នាលេង។
លោកបញ្ជាក់ថា៖ «ក្មេងម្នាក់គាត់រើសគ្រាប់មិនស្គាល់ឈ្មោះហ្នឹងពីស្រែមក ហើយយកបង្ហាញគ្នីគ្នាគាត់ស្រាប់តែពួកគេនាំគ្នាយកទៅគប់លេងជាច្រើនលើកច្រើនសាក៏ផ្ទុះឡើងត្រូវរបួសទាំង ៤ នាក់តែម្ដង។ ថ្មីៗនេះក៏មានការផ្ទុះគ្រាប់ដែលមិនស្គាល់ឈ្មោះបណ្ដាលឲ្យបុរស ២ នាក់ស្លាប់ នៅនឹងកន្លែងដែរព្រោះតំបន់យើងនេះសម្បូរគ្រាប់ណាស់ព្រោះជាអតីតទីតាំងសមរភូមិកាលពីសម័យសង្គ្រាម»។
លោក សាលី មេសា បន្ថែមថា ក្នុងនាមអាជ្ញាធរសូមអំពាវនាវដល់ពលរដ្ឋដែលរស់នៅតាមបណ្ដាកន្លែងផ្សេងៗនៅស្រុកវាលវែងមេត្តាប្រុងប្រយ័ត្ននៅពេលចេញទៅធ្វើការឬធ្វើស្រែចម្ការ។ ប្រសិនបើជួបយុទ្ធភណ្ឌមិនទាន់ផ្ទុះ សូមរូតរះរាយការណ៍មកសមត្ថកិច្ចដែលនៅជិតផ្ទះហើយកុំទៅប៉ះពាល់ ឬយកមកគប់ ឬដំ និងដុតលេង ដើម្បីមន្ត្រីជំនាញចុះមករំដោះឬកម្ទេចចោល។
លោក ពេជ្រ សោភ័ណ្ឌ នាយប៉ុស្ដិ៍នគរបាលរដ្ឋបាលឃុំថ្មដាបានប្រាប់ថ្ងៃទី ១៣ សីហា ថា ជនរងគ្រោះទាំង ៤ នាក់នេះ កំពុងសម្រាកព្យាបាលនៅមន្ទីរពេទ្យបង្អែកខេត្តពោធិ៍សាត់។ ពួកគាត់មានស្ថានភាពធ្ងន់ធ្ងរដោយត្រូវរបួសស្ទើរពេញរាងកាយ។
លោកថា៖ «រហូតមកទល់ពេលនេះខ្ញុំអត់ទាន់បានទទួលដំណឹងពីស្ថានភាពរបួសពួកគាត់ទេ ប៉ុន្ដែឪពុកម្ដាយគាត់នៅមើលថែ។ ខ្ញុំបានសួរនាំពីប្រភេទគ្រាប់ដែលផ្ទុះហ្នឹងដែរ ប៉ុន្ដែពួកគាត់មិនស្គាល់ទេ គឺគាត់យកទៅគប់លេង ៣ ឬ ៤ ដងទើបផ្ទុះ »។
លោក សោភ័ណ្ឌ បន្ថែមថាជនរងគ្រោះទាំង ៤ នាក់នេះ ជាកូនគ្រួសារកងទ័ពនៅជាប់ព្រំដែនកម្ពុជា-ថៃ ដែលរស់នៅជាមួយឪពុកម្ដាយនៅទីតាំងកើតហេតុខាងលើនេះ។ ពួកគេមានឈ្មោះទី១- សយ តុលា អាយុ ១៥ ឆ្នាំ (របួសធ្ងន់) ទី២- សយ កុម្ភៈ អាយុ ១៣ ឆ្នាំ (របួសធ្ងន់) ទី៣- សយ ស៊ីណាត ភេទប្រុស ១០ ឆ្នាំ (របួសស្រាល) និងទី៤- កួយ តាំងយូរ ភេទប្រុស អាយុ ២២ឆ្នាំ (របួសធ្ងន់)។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) នៅថ្ងៃទី ១៣ សីហា នេះ បានបដិសេធធ្វើអត្ថាធិប្បាយជុំវិញករណីនេះ ដោយថា កំពុងរវល់ប្រជុំ។
ប៉ុន្ដែលោកបានសរសេរលើហ្វេសប៊ុកផ្ទាល់ខ្លួននៅថ្ងៃនេះថា នៅល្ងាចថ្ងៃទី ១២ ខែ សីហា ឆ្នាំ ២០២០ នៅភូមិសង្គមថ្មី ឃុំថ្មដា ស្រុកវាលវែង ខេត្តពោធិ៍សាត់ មានករណីផ្ទុះសំណល់ជាតិផ្ទុះពីសង្គ្រាម របួសមនុស្ស ៤ នាក់ក្នុងនោះមានកុមារា ៣ នាក់ និងយុវជនម្នាក់។
លោកថា៖ «ពិតជាសោកស្តាយចំពោះគ្រោះថ្នាក់ សូមអំពាវនាវហើយអំពាវនាវទៀត សូមកុំវាយដំ និងលេងគ្រាប់ ព្រោះគ្មានគ្រាប់យុទ្ធភ័ណ្ឌមិនទាន់ផ្ទុះស្អុយនោះទេ ឬមិនផ្ទុះនោះទេ មានតែអ្នកជំនាញអាចវាយតម្លៃគុណភាពគ្រាប់ទាំងឡាយនោះបាន។ ដូចនេះនៅពេលឃើញគ្រាប់សំណល់ជាតិផ្ទុះពីសង្គ្រាម សុំប្រញាប់ប្រញាល់ទាក់ទងកម្លាំងប៉ូលិស អាជ្ញាធរមូលដ្ឋាន កម្លាំងដោះមីនជាពិសេសកម្លាំងអង្គភាពស៊ីម៉ាក់ ដើម្បីជួយបោសសម្អាតជូន»៕