.jpg)
ជនជាប់ឃុំដែលត្រូវបាននាំមកតុលាការរាជធានីភ្នំពេញនាដើមឆ្នាំនេះ។ ហេង ជីវ័ន
ភ្នំពេញ៖ ក្រសួងយុត្ដិធម៌ប្រកាសថា រយៈពេល ១ ខែ ក្រោយ ការប្រកាសដាក់ឱ្យអនុវត្តយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត សំណុំរឿងព្រហ្មទណ្ឌដែលកកស្ទះចំនួន ៣ ៤៥៤ ស្មើនឹង ២៧% នៃសំណុំរឿងកកស្ទះសរុបជិត ៤ ម៉ឺនសំណុំរឿង ត្រូវបានជំនុំជម្រះរួចហើយ។ ក្រសួងរំពឹងថា ករណីដែលនៅសេសសល់នឹងអាចដោះបានក្នុងដំណាច់ឆ្នាំនេះ។
អ្នកនាំពាក្យក្រសួងយុត្តិធម៌ លោក ជិន ម៉ាលីន ប្រាប់ភ្នំពេញប៉ុស្តិ៍ ពីម្សិលមិញថា ក្នុងពេលអនុវត្តយុទ្ធនាការរយៈពេល ១ ខែកន្លងទៅ មិនមានបញ្ហាប្រឈមណាមួយកើតឡើងគួរឱ្យកត់សម្គាល់ដល់ក្រុមការងារអនុវត្ដយុទ្ធនាការឡើយ។ ព្រោះភាគីពាក់ព័ន្ធទាំងអស់យល់ច្បាស់ពីសារៈសំខាន់នៃការអនុវត្ដយុទ្ធនាការនេះ និងគោរពតាមអភិក្រម ដែលបានដាក់ចេញទៅ។
លោកថ្លែងថា៖ «ទៅមុខទៀត គ្រប់ភាគីពាក់ព័ន្ធនឹងបន្តអនុវត្ដតាមផែនការ យន្តការ ក៏ដូចជាវិធានការដែលបានដាក់ចេញក្នុងការអនុវត្ដយុទ្ធនាការនេះ។ យើងសង្ឃឹមថា បើសម្ទុះនេះនៅតែខ្លាំងក្លា វិជ្ជមានដូចរយៈពេល ១ ខែកន្លងទៅនេះ គឺយើងរំពឹងទុកថាសំណុំរឿងនៅសេសសល់នឹងអាចដោះបាននូវដំណាច់ឆ្នាំ ២០២០ នេះ»។
កាលពីថ្ងៃទី ២ ខែកក្កដា នេះ គណៈកម្មការដឹកនាំយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី ខេត្ត (គ.យ.ក.ស) របស់ក្រសួងយុត្ដិធម៌បានចេញសេចក្តីប្រកាសព័ត៌មានស្តីពី វឌ្ឍនភាពនៃយុទ្ធនាការដោះស្រាយការកកស្ទះសំណុំរឿង នៅតាមសាលាដំបូងរាជធានី-ខេត្ត ក្រោយការប្រកាសដាក់ចេញឱ្យអនុវត្ត កាលពីថ្ងៃទី ១៨ ខែ ឧសភា ឆ្នាំ ២០២០។
គ.យ.ក.ស. អះអាងថា៖ «ជាលទ្ធផលសំណុំរឿងព្រហ្មទណ្ឌនៅតាមសាលាដំបូងរាជធានី-ខេត្ត ដែលកកស្ទះចំនួន ៣ ៤៥៤ សំណុំរឿង ស្មើនឹង ២៧% នៃសំណុំរឿងកកស្ទះសរុប ជិត ៤ ម៉ឺនសំណុំរឿង ត្រូវបានជំនុំជម្រះរួច»។
គ.យ.ក.ស. រំពឹងថា សាលាដំបូងរាជធានី-ខេត្ត ទូទាំងប្រទេស នឹងបន្តការខិតខំដោះស្រាយសំណុំរឿងកកស្ទះទាំងនេះ ឱ្យបានចប់សព្វគ្រប់នៅត្រឹមដំណាច់ឆ្នាំ ២០២០ នេះ ដោយប្រកាន់ខ្ជាប់នូវអភិក្រមការងារក្នុងយុទ្ធនាការ គឺ លឿន ត្រឹមត្រូវ យុត្តិធម៌ និងមិនពុករលួយ។
លោក កើត រិទ្ធ រដ្ឋមន្ត្រីក្រសួងយុត្តិធម៌បានឱ្យដឹងក្នុងពេលប្រកាសបើកយុទ្ធនាការនេះថា តាមការផ្ទៀងផ្ទាត់សំណុំរឿងនៅតាមសាលាដំបូងរាជធានី-ខេត្ត គឺសំណុំរឿងដែលកំពុងចាត់ការមានជិត ៤ ម៉ឺនសំណុំរឿង (៣៩ ១៥២ សំណុំរឿង)។ មានអ្នកជាប់ឃុំសរុបចំនួន ១២ ៦៥១ នាក់ (អ្នកជាប់ឃុំនៅក្នុងសំណុំរឿងគ្រឿងញៀនមានចំនួន ៦ ៩០០ នាក់)។ ចំនួននេះធ្វើឱ្យមានភាពចង្អៀតណែនក្នុងពន្ធនាគារនាពេលបច្ចុប្បន្ន។
លោករដ្ឋមន្រ្ដីថ្លែងថា ផ្អែកតាមផែនការ និងផ្អែកតាមទិន្នន័យសំណុំរឿងដែលទទួលបានពីសាលាជម្រះក្ដី និងដោយមានការចូលរួមគាំទ្រដោយសុឆន្ទៈ ពីគ្រប់តួអង្គ និងស្ថាប័នអនុវត្ដច្បាប់ទាំងអស់ដែលមានការពាក់ព័ន្ធ ក្រសួងយុត្ដិធម៌រំពឹងទុកថា យុទ្ធនាការនេះ នឹងអាចកាត់បន្ថយការកកស្ទះសំណុំរឿងនៅតាមសាលាដំបូងរាជធានី-ខេត្ដ បានប្រមាណចាប់ពី ៥០-៧០ ភាគរយ នៅក្នុងរយៈពេល ៦ ខែ ក្រោយការអនុវត្ដយុទ្ធនាការនេះ។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃបានឱ្យដឹងថា បច្ចុប្បន្នអគ្គនាយកដ្ឋានពន្ធនាគារកំពុងធ្វើការស្ថាបនាជួសជុល និងពង្រីកពន្ធនាគារបន្ថែមទាំងនៅរាជធានីភ្នំពេញ និងខេត្ដមួយចំនួន។
លោកថា តាមរយៈការអនុវត្ដយុទ្ធនាការរបស់ក្រសួងយុត្ដិធម៌នេះនឹងជួយពន្លឿនសំណុំរឿងដែល កកស្ទះឱ្យទៅជាសំណុំរឿងដែលមានសាលក្រមស្ថាពរ និងអាចឱ្យពន្ធនាគារផ្ទេរអ្នកជាប់ឃុំពីកន្លែងកកស្ទះទៅពន្ធនាគារដែលធំទូលាយបាន។
លោកថ្លែងថា៖ «នៅពេលដែលចំនួនអ្នកកាត់ទោសហើយមានការកើនឡើង យើងអាចធ្វើការផ្ទេរពួកគាត់ទៅកន្លែងណាដែលទូលាយជាងមុន ជាជាងការផ្ដុំគ្នាទៅទីកន្លែងប្រជុំជន សំខាន់ៗដូចជានៅខេត្ដសៀមរាប និងរាជធានីភ្នំពេញជាដើម»។
លោក ស៊ឹង សែនករុណា មន្ត្រីអង្កេតជាន់ខ្ពស់នៃសមាគមការពារសិទ្ធិមនុស្ស (អាដហុក) លើកឡើងថា លទ្ធផលនេះជាការប្រសើរដែលក្រុមការងារអនុវត្ដយុទ្ធនាការរបស់ក្រសួងយុត្ដិធម៌ដោះស្រាយសំណុំរឿងក្នុង ១ ខែនេះបានច្រើនករណី។ លោកថា កន្លងមក សំណុំរឿងកកស្ទះនៅតាមតុលាការរាជធានី-ខេត្ដ គឺជាបញ្ហាមួយដែលតុលាការកម្ពុជាមានការឆកល្វែង ក្នុងការអនុវត្ដតួនាទីរបស់ខ្លួនឱ្យបានត្រឹមត្រូវ។
លោកថ្លែងថា៖ «ជាការទទូចរបស់ខាងខ្ញុំជាសង្គមស៊ីវិល ខ្ញុំចង់ឃើញការដោះស្រាយសំណុំរឿងដែលកំពុងកកស្ទះទាំងនេះឱ្យមានភាពឆាប់រហ័ស ហើយគួរមានការពិនិត្យមើលទៅលើចំណាត់ការនៃការដោះស្រាយសំណុំរឿងទាំងនេះ»។
លោកបន្តថា៖ «ថ្វីដ្បិតតែវា [សំណុំរឿង] មានចំនួនច្រើនករណីមែន ក៏ប៉ុន្ដែគួរពិនិត្យមើលភាពប្រក្រតី នៃដំណោះស្រាយក្នុងសំណុំរឿងនេះដែរថា តើអ្នកដែលកាន់សំណុំរឿងកន្លងមកមានកំហុសអ្វីខ្លះទើបនាំឱ្យមាន [ភាព] យឺតយ៉ាវក្នុងការដោះស្រាយ រហូតដល់មានការរំលោភបំពានសិទ្ធិមានយុត្ដិធម៌របស់ប្រជាពលរដ្ឋ។ ករណីនេះជាកំណែទម្រង់ក្នុងប្រព័ន្ធយុត្ដិធម៌ចាប់ពីពេលនេះទៅ»។
មន្ត្រីសិទ្ធិមនុស្សរូបនេះបានស្នើឱ្យមានការគិតគូរចំពោះអ្នកទោសមនសិការផងដែរ ព្រោះសំណុំរឿងអ្នកទាំងនេះក៏រងនូវភាពអយុត្ដិធម៌ដែរ ហើយជាសំណុំរឿងមួយមិនត្រូវទុកចោលឱ្យនៅដាច់ដោយឡែកនោះទេ៕
