The Phnom Penh Post Search

Search form




Logo of Phnom Penh Post newspaper Phnom Penh Post - រឿង​លិខិត​ឆ្លង​ដែន​មន្ត្រី​មាន​ការ​សម្រេច​ថ្មី​ទៀត​ហើយ

រឿង​លិខិត​ឆ្លង​ដែន​មន្ត្រី​មាន​ការ​សម្រេច​ថ្មី​ទៀត​ហើយ

មន្ត្រី​ជាន់​ខ្ពស់​រដ្ឋាភិបាល​នៅក្នុង​ពិធី​មួយ​នៅ​វិមាន​សន្តិភាព​កាលពី​ថ្ងៃ​ចន្ទ​។
មន្ត្រី​ជាន់​ខ្ពស់​រដ្ឋាភិបាល​នៅក្នុង​ពិធី​មួយ​នៅ​វិមាន​សន្តិភាព​កាលពី​ថ្ងៃ​ចន្ទ​។ រូបថត ហ្វេសប៊ុក

រឿង​លិខិត​ឆ្លង​ដែន​មន្ត្រី​មាន​ការ​សម្រេច​ថ្មី​ទៀត​ហើយ

ភ្នំពេញៈ លោក​នាយក​រដ្ឋមន្ត្រី ហ៊ុន សែន បាន​ចេញ​សេចក្តី​ណែនាំ​ថ្មី​មួយ​ឱ្យ​មន្ត្រី​ត្រូវ​រក្សា​ទុក​លិខិត​ឆ្លង​ដែន​ដោយ​ខ្លួនឯង​បន្ទាប់ពី​បញ្ចប់​បេសកកម្ម​នៅ​បរទេស​ដែល​សេចក្តី​ណែនាំ​នេះ​ផ្ទុយ​ពី​ការ​សម្រេច​របស់​ក្រសួង​ការបរទេស​ដែល​ទើប​តែ​ចេញ​កាលពី​ដើម​​ខែ​នេះ​។

សារាចរ​ស្តី​ពី​ការ​ស្នើ​សុំ​លិខិត​ឆ្លងដែន​ផ្លូវការ និង​ការ​ប្រើប្រាស់​លិខិត​ឆ្លងដែន​ផ្លូវការ​សម្រាប់​មន្ត្រី​កម្ពុជា​ចុះ​ហត្ថលេខា​ដោយ​លោក​ ហ៊ុន សែន កាល​ពី​ថ្ងៃ​ទី ១៤ ខែ​មីនា​បាន​លើក​ឡើង​ថា​ដើម្បី​ចៀសវាង​កុំ​ឱ្យ​មាន​បញ្ហា​បែប​នេះ​កើត​មាន​ជា​បន្តបន្ទាប់​នៅ​ថ្ងៃ​មុខ និង​ធានា​នូវ​ការ​ប្រើប្រាស់​លិខិត​ឆ្លងដែន​បាន​ត្រឹមត្រូវ​គ្រប់​ក្រសួង និង​ស្ថាប័ន​នានា​ត្រូវ​ពិនិត្យ​បេសកកម្ម​ឲ្យ​បាន​ហ្មត់ចត់​បំផុត​មុន​នឹង​ស្នើ​សុំ​លិខិត​ឆ្លងដែន​ផ្លូវការ​ពី​ក្រសួង​ការបរទេស។

សារាចរ​បញ្ជាក់​ថា៖ «ក្រោយ​ពី​បញ្ចប់​បេសកកម្ម​នៅ​ក្រៅ​ប្រទេស​មន្ត្រី​រាជការ​​គ្រប់​ក្រសួង ស្ថាប័ន​ទាំងអស់​ត្រូវ​រក្សា​ទុក​លិខិត​ឆ្លង​ដែន​ផ្លូវការ​ដោយ​ខ្លួនឯង​ហើយ​ត្រូវ​ប្រើប្រាស់​លិខិត​ឆ្លងដែន​ផ្លូវការ​នេះ​ឲ្យ​បាន​ត្រឹមត្រូវ​ចៀសវាង​ការ​ប្រើប្រាស់​ខុស​គោលដៅ​ដែល​នាំ​ឲ្យ​ប៉ះពាល់​ដល់​កិត្តិយស​រាជរដ្ឋាភិបាល​ និង​ព្រះរាជាណាចក្រ​កម្ពុជា​»​។

ប៉ុន្តែ​សារាចរ​របស់​លោក​នាយក​រដ្ឋមន្ត្រី​ផ្ទុយ​ពី​លិខិត​របស់​ក្រសួង​ការបរទេស​ដែល​ចេញ​ផ្សាយ​កាលពី​ថ្ងៃ​ទី ៤ ខែ មីនា ដោយ​សម្រេច​ដក​ហូត​លិខិត​ឆ្លងដែន​ផ្លូវការ​មន្ត្រី​កម្ពុជា​យក​មក​ទុក​​នៅ​ក្រសួង​ជា​បណ្តោះ​អាសន្ន​បន្ទាប់ពី​ត្រឡប់​ពី​បេសកកម្ម​នៅ​ក្រៅ​ប្រទេស​ដោយ​លើក​ហេតុផល​ថា​ដើម្បី​ការពារ​សណ្តាប់​ធ្នាប់​រដ្ឋបាល និង​កិត្យានុភាព​មន្ត្រី​រាជការ​ទាំង​មូល។

លិខិត​នោះ​បញ្ជាក់​ថា៖ «ឱ្យ​មន្ត្រី​អន្តោប្រវេសន៍​កម្ពុជា​នៅ​គ្រប់​ច្រក​ទ្វារ​ព្រំដែន​កម្ពុជា​ដក​លិខិត​ផ្លូវការ​មន្ត្រី​ដែល​ចប់​បេសកកម្ម​ពី​បរទេស​​ហើយ​បញ្ជូន​មក​រក្សា​នៅ​ក្រសួង​ការបរទេស​ហើយ​ក្រសួង​​នឹង​ប្រគល់​លិខិត​ឆ្លងដែន​ផ្លូវការ​ទាំង​នោះ​វិញ​នៅពេល​មន្ត្រី​ទាំង​នោះ​មាន​បេសកកម្ម​ទៅ​បរទេស​ជាថ្មី»​។

បើ​តាម​សេចក្តី​ជូន​ដំណឹង​របស់​ក្រសួង​ការបរទេស​មួយ​ទៀត​ដែល​ចេញ​ផ្សាយ​កាលពី​ថ្ងៃ​ទី ៩ ខែ​មីនា​បាន​លើក​ឡើង​ថា​កន្លង​មក​នេះ​មាន​មន្ត្រី​របស់​​អង្គភាព​ ឬ​ស្ថាប័ន​ខ្លះ​នៅ​ពេល​ចប់​បេសកកម្ម​ផ្លូវការ​ ឬ​មិន​បាន​ទៅ​បំពេញ​បេសកកម្ម​ផ្លូវការ​បាន​ប្រើប្រាស់​លិខិត​ឆ្លងដែន​ផ្លូវការ​នោះ​ក្នុង​ការ​ធ្វើ​ដំណើរ​ទៅ​ធ្វើ​ពលករ​ខុស​ច្បាប់​នៅ​ក្រៅ​ប្រទេស។

ក្រសួង​ការបរទេស​បាន​បញ្ជាក់​ថា៖ ​«ប្រការ​នេះ​បាន​ធ្វើឲ្យ​អាជ្ញាធរ​មាន​សមត្ថកិច្ច​របស់​ប្រទេស​នោះ​មាន​ការ​ភ្ញាក់ផ្អើល​ និង​ចាប់​អារម្មណ៍​យ៉ាង​ខ្លាំង​ដោយ​មិន​យល់​ថា​ហេតុ​អ្វី​បាន​ជា​ពលករ​ខុស​ច្បាប់​កាន់​លិខិត​​ឆ្លង​ដែន​ផ្លូវការ​ហើយ​បាន​ជូន​ព័ត៌មាន​មក​ក្រសួង​កា​បរទេស​​តាមរយៈ​ស្ថានទូត​យើង»។

ទាក់ទង​នឹង​ករណី​នេះ​អ្នក​នាំ​ពាក្យ​ក្រសួង​ការបរទេស​លោក ជុំ សុន្ទរី បាន​ថ្លែង​ថា​លិខិត​របស់​ក្រសួង​ដែល​ចេញ​ផ្សាយ​ពី​មុន​គ្រាន់​តែ​ជា​ការ​ជូន​ដំណឹង​តែ​អ្វី​ដែល​រដ្ឋាភិបាល​ចេញ​សារាចរ​ណែនាំ​ក្រោយ​នេះ​គឺ​តម្រូវ​ឱ្យ​គ្រប់​​ក្រសួង​ទាំងអស់​ត្រូវ​តែ​អនុវត្ត​តាម។

លោក​​បញ្ជាក់​ថា៖ «ជា​ធម្មតា​រាជរដ្ឋាភិបាល​ចេញ​សារាចរ​មក​គ្រប់​ក្រសួង សា្ថប័ន​ទាំងអស់​ត្រូវ​តែ​គោព​អនុវត្ត​ទៅ​តាម​សារាចរ​របស់​រាជរដ្ឋាភិបាល​ដូច្នេះ​បញ្ហា​ហ្នឹង​ដូច​អត់​មាន​អី​គួរ​ឱ្យ​សង្ស័យ​ទេ​យើង​ត្រូវ​តែ​គោរព​តាម»។

នាយក​ប្រតិបត្តិ​សម្ព័ន្ធ​គណនេយ្យភាព​សង្គម​កម្ពុជា​លោក សន ជ័យ ធ្លាប់​ថ្លែង​ថា​ការ​រឹតបន្តឹង​នេះ​ជា​រឿង​ល្អ​មួយ​ដើម្បី​ទប់ស្កាត់​មន្ត្រី​រដ្ឋាភិបាល​ខិលខូច​មួយ​ចំនួន​ដែល​កេងប្រវ័ញ្ច​ការងារ​រដ្ឋ​ទៅ​បម្រើ​ការងារ​ខ្លួន​ឯង៕

អត្ថបទគួរចាប់អារម្មណ៍