The Phnom Penh Post Search

Search form




Logo of Phnom Penh Post newspaper Phnom Penh Post - រឿង​ស្នេហា​ផ្ទាល់​ខ្លួន​លោក កឹម សុខា ​នៅ​តែ​ក្តៅ

រឿង​ស្នេហា​ផ្ទាល់​ខ្លួន​លោក កឹម សុខា ​នៅ​តែ​ក្តៅ

លោក ហេង សំរិន (ឆ្វេង) ​នៅក្នុង​កិច្ចប្រជុំ​រដ្ឋសភា​កន្លង​មក​​។
លោក ហេង សំរិន (ឆ្វេង) ​នៅក្នុង​កិច្ចប្រជុំ​រដ្ឋសភា​កន្លង​មក​​។ រូបថត ហ្វេសប៊ុក

រឿង​ស្នេហា​ផ្ទាល់​ខ្លួន​លោក កឹម សុខា ​នៅ​តែ​ក្តៅ

ភ្នំពេញៈ គណៈកម្មការ​សិទ្ធិ​មនុស្ស​ទទួល​ពាក្យ​បណ្តឹង​អង្កេត និង​ទំនាក់​ទំនង​រដ្ឋសភា ព្រឹទ្ធសភា​នៃ​រដ្ឋសភា​បាន​បកស្រាយ​ថា​នៅក្នុង​រដ្ឋធម្មនុញ្ញ និង​បទបញ្ជា​ផ្ទៃ​ក្នុង​នៃ​រដ្ឋសភា​ពុំ​មាន​មាត្រា​ណា​មួយ​ដែល​អនុញ្ញាត​ឲ្យ​រដ្ឋសភា​កោះ​ហៅ​តំណាងរាស្ត្រ​មក​បំភ្លឺ​ពី​រឿង​អ្វី​មួយ​នោះ​ឡើយ​ខណៈ​​ដែល​ក្រុម​​និស្សិត​ដែល​ជា​ដើម​ចម​នៃ​បញ្ហា​នេះ​បាន​ប្រកាស​ថា​នៅ​ថ្ងៃ​នេះ​ពួកគេ​នឹង​បន្ត​​ដង្ហែ​ញត្តិ​ទៅ​ផ្ទះ​លោក កឹម សុខា ដើម្បី​ជំរុញ​ឲ្យ​ប្រធាន​ស្តីទី​គណកបក្ស​ប្រឆាំង​រូប​នេះ​ធ្វើការ​បំភ្លឺ​ទៅ​នឹង​រឿង​អាស្រូវ​ផ្លូវភេទ​ផ្ទាល់​ខ្លួន​របស់​លោក​។

ការ​បកស្រាយ​របស់​គណៈកម្មការ​រដ្ឋសភា​នេះ​បាន​ធ្វើ​ឡើង​បន្ទាប់​ពី​លោក ស្រី ចំរើន ដែល​អះអាង​ថា​ខ្លួន​ជា​តំណាង​ឱ្យ​ក្រុម​និស្សិត​ប៉ុន្តែ​មជ្ឈដ្ឋាន​ជាច្រើន​គិត​ថា​ក្រុម​នេះ​មាន​អ្នក​នយោបាយ​នៅ​ពី​ក្រោយ​បាន​ដាក់​ញត្តិ​ទៅ​រដ្ឋសភា​ឱ្យ​កោះ​ហៅ​ប្រធាន​ស្តីទី​គណបក្ស​សង្គ្រោះ​ជាតិ​លោក កឹម សុខា ឱ្យ​បំភ្លឺ​រឿង​អាស្រូវ​ផ្លូវ​ភេទ​ដែល​ត្រូវ​បាន​បណ្តាញ​ព័ត៌មាន​​ផ្សព្វផ្សាយ​ជា​ខ្សែ​អាត់​សំឡេង​ក្នុង​រយៈពេល​ជាច្រើន​សប្តាហ៍​កន្លង​មក​នេះ​​។ ​ប៉ុន្មាន​ថ្ងៃ​ក្រោយ​មក​លោក​ ឡេង ប៉េងឡុង អគ្គលេខាធិការ​រដ្ឋសភា​បាន​ចេញ​លិខិត​មួយ​ស្នើ​ឲ្យ​លោក​ កឹម សុខា ធ្វើការ​បំភ្លឺ​ពី​បញ្ហា​នេះ​។

ប៉ុន្តែ​នៅ​ក្នុង​លិខិត​កាលពី​ម្សិលមិញ​ចុះ​ហត្ថលេខា​ដោយ​ប្រធាន​គណៈកម្មការ​សិទ្ធិ​មនុស្ស​ទទួល​ពាក្យ​បណ្តឹង​នៃ​រដ្ឋសភា​លោក អេង ឆៃអ៊ាង បាន​បំភ្លឺ​ជូន​ប្រធាន​រដ្ឋសភា​លោក ហេង សំរិន ថា​គណៈកម្មការ​បាន​ទទួល​ពាក្យ​បណ្តឹង​របស់​លោកស្រី ចំរើន កាល​ពី​ថ្ងៃ​ទី ២៥ ខែ​មីនា ​វេលា​ម៉ោង ៩ និង ៣៥ នាទី​ព្រឹក​ដែល​បាន​ស្នើ​ឱ្យ​ប្រធាន​រដ្ឋសភា​លោក ហេង សំរិន ពន្លឿន និង​ជំរុញ​កោះ​ហៅ​លោក កឹម សុខា ចូល​បំភ្លឺ​ចំពោះ​ខ្សែអាត់​សំឡេង​ដែល​ត្រូវ​បាន​គេ​ផ្សព្វផ្សាយ​តាម​នីតិវិធី​របស់​រដ្ឋសភា។ ក្នុង​លិខិត​បាន​បញ្ជាក់​ថា​ទាក់ទង​នឹង​សំណើ​នេះ​សភា​មិន​មាន​សិទ្ធិ​កោះ​ហៅ​តំណាងរាស្ត្រ​ឱ្យ​បំភ្លឺ​រឿង​អ្វី​មួយ​ឡើយ​។

លិខិត​បាន​បន្ត​ថា៖ «សូម​គោរព​ជូន​សម្តេច​ប្រធាន​សភា​មេត្តា​ជ្រាប​ថា​នៅ​ក្នុង​រដ្ឋធម្មនុញ្ញ​កម្ពុជា និង​បទបញ្ជា​ផ្ទៃ​ក្នុង​នៃ​រដ្ឋសភា​ពុំ​មាន​មាត្រា និង​ប្រការ​ណា​មួយ​អនុញ្ញាត​ឱ្យ​រដ្ឋសភា​កោះ​អញ្ជើញ​តំណាងរាស្ត្រ​មក​បំភ្លឺ​ពី​បញ្ហា​អ្វី​មួយ​ឡើយ»។

នៅ​ក្នុង​ទំព័រ​ហ្វេសប៊ុក​របស់​តំណាងរាស្ត្រ​គណបក្ស​សង្គ្រោះ​ជាតិ​លោក អេង ឆៃអ៊ាង ក៏​បាន​លើក​ឡើង​ថា៖ «សេចក្តី​រាយការណ៍​របស់​ខ្ញុំ​មាន​ខ្លឹមសារ​ផ្ទុយ​ពី​លិខិត​លោក ឡេង ប៉េងឡុង អគ្គលេខាធិការ​រដ្ឋសភា​ដែល​បង្ខំ​ឲ្យ​អ្នក​តំណាងរាស្ត្រ​ កឹម សុខា ឆ្លើយ​បំភ្លឺ​ផ្ទុយ​ពី​ស្មារតី​នៃ​រដ្ឋធម្មនុញ្ញ និង​បទ​បញ្ជា​ផ្ទៃក្នុង​នៃ​រដ្ឋសភា»។

លោកស្រី ចំរើន ដែល​បាន​ដាក់​ញត្តិ​​​ស្នើសុំ​ឱ្យ​រដ្ឋសភា​កោះ​ហៅ​លោក កឹម សុខា មក​បំភ្លឺ​បាន​ប្រាប់​ភ្នំពេញ​ប៉ុស្តិ៍​កាលពី​ម្សិលមិញ​ថា​ការ​ឆ្លើយតប​របស់​គណៈកម្មការ​ទទួល​ពាក្យ​បណ្តឹង​នៃ​រដ្ឋសភា​គ្រាន់​តែ​ជា​ការ​គេចវេះ​ប៉ុណ្ណោះ។

លោក​ថា៖ «ខ្ញុំ​មិន​យល់​ថា​ស្ថាប័ន​រដ្ឋសភា​មាន​ចំណាត់ការ​យ៉ាង​ណា​ទេ​តែ​ខ្ញុំ​ធ្វើ​ទៅ​តាម​មាត្រា ៣៥ នៃ​រដ្ឋធម្មនុញ្ញ​មាន​ន័យ​ថា​រាល់​សេចក្តី​ស្នើសុំ​របស់​ប្រជាពលរដ្ឋ​ត្រូវ​បាន​យក​ចិត្ត​ទុកដាក់ និង​ដោះស្រាយ​ជូន​ពី​អង្គការ​រដ្ឋ»។

លោក​បាន​ឲ្យ​ដឹង​ទៀត​ថា​នៅ​ថ្ងៃ​នេះ​លោក​នឹង​បន្ត​ហែ​ក្បួន​ដាក់​ញត្តិ​ទៅ​ឧត្តម​ស្នងការ​​អង្គការ​សហប្រជាជាតិ​ទីស្នាក់ការ​គណបក្ស​សង្គ្រោះ​ជាតិ និង​ផ្ទះ​លោក កឹម សុខា ផង​ដែរ។

លោក​បន្ត​ថា​កាលពី​រសៀល​ថ្ងៃ​ម្សិលមិញ​លោក​បាន​ជូន​ដំណឹង​ទៅ​សាលា​រាជធានី​ភ្នំពេញ​ស្តីពី​ការ​ហែ​ក្បួន​ដាក់​ញត្តិ​តាម​មធ្យោបាយ​ជិះ​រថយន្ត និង​ម៉ូតូ​ដែល​មាន​គ្នា​ប្រមាណ ២០០ នាក់។

លោក​ មេធាវី សុក សំអឿន បាន​សម្តែង​ការ​យល់​ស្រប​ចំពោះ​ការ​បញ្ជាក់​​របស់​គណៈកម្មការ​សិទ្ធិ​មនុស្ស​នៃ​រដ្ឋសភា​ដោយ​លោក​លើក​ឡើង​ថា​ប្រសិន​រដ្ឋសភា​ចាំ​តែ​កោះ​ហៅ​តំណាងរាស្ត្រ​មក​សួរ​រឿង​ផ្ទាល់​ខ្លួន ឬ​រឿង​តូចតាច​នោះ​តំណាងរាស្ត្រ​មិន​ចាំបាច់​មាន​អភ័យ​ឯកសិទ្ធិ​ការពារ​ខ្លួន​នោះ​ទេ។

លោក​​បញ្ជាក់​ថា៖ «គ្រាន់​តែ​រឿង​ផ្ទាល់​ខ្លួន​អ៊ីចឹង​រដ្ឋសភា​កោះ​ហៅ​តំណាងរាស្ត្រ​មក​សួរ​រដ្ឋសភា​ដែល​គេ​បោះឆ្នោត​ឱ្យ ៥ ឆ្នាំ​មិន​បាច់​រវល់​អី​ទេ​រវល់​តែ​តាម​ដាន​រឿង​ផ្ទាល់​ខ្លួន​របស់​តំណាងរាស្ត្រ»។

ម្យ៉ាង​ទៀត​តំណាង​រាស្ត្រ​ដែល​គេ​ឱ្យ​អភ័យ​ឯកសិទ្ធិ​គឺ​ដើម្បី​ការពារ​កុំឱ្យ​យក​រឿង​កំប៉ិក​កំប៉ុក​រឿង​ការ​បញ្ចេញ​មតិ​តិចតួច​មក​ហៅ​សួរ​វា​ធ្វើ​ឱ្យ​រាំងស្ទះ​ការងារ​របស់​តំណាងរាស្ត្រ»។

លោក សុក សំអឿន បាន​ពន្យល់​បន្ថែម​ថា​រាល់​ចំណាត់ការ​លើ​តំណាងរាស្ត្រ​នីមួយៗ​ទាល់​តែ​តំណាងរាស្ត្រ​​រូប​នោះ​បាន​ប្រព្រឹត្ត​បទល្មើស​ជាក់ស្តែង និង​បទឧក្រិដ្ឋ​ធ្ងន់ធ្ងរ។

លោក​បញ្ជាក់​ថា​៖ «រឿង​តំណាងរាស្ត្រ​អត់​មាន​និយាយ​ពី​ហៅ​សួរ​អ៊ីចឹង​ទេ​មាន​តែ​រឿង​ព្រហ្មទណ្ឌ​បើ​ទោស​ធ្ងន់​គេ​ដក​​អភ័យឯក​សិទ្ធិ​តែ​ម្តង​ហើយ​តុលាការ​អ្នក​ចាត់ការ»៕

អត្ថបទគួរចាប់អារម្មណ៍