The Phnom Penh Post Search

Search form




Logo of Phnom Penh Post newspaper Phnom Penh Post - រឿង​អាស្រូវ​ផ្លូវភេទ ​នៅ​ក្នុង​រដ្ឋសភា​ រក​ការពិត​មិន​ទាន់​ឃើញ




រឿង​អាស្រូវ​ផ្លូវភេទ ​នៅ​ក្នុង​រដ្ឋសភា​ រក​ការពិត​មិន​ទាន់​ឃើញ

Content image - Phnom Penh Post
លោក ហូរ វ៉ាន់ ​សមាជិក​តំណាងរាស្ត្រ​មកពី​គណបក្ស​សង្គ្រោះជាតិ។

រឿង​អាស្រូវ​ផ្លូវភេទ ​នៅ​ក្នុង​រដ្ឋសភា​ រក​ការពិត​មិន​ទាន់​ឃើញ

ភ្នំពេញៈ អ្នក​នាំ​ពាក្យ​រដ្ឋសភា​​បាន​អះអាង​ថា​ស្ថាប័ន​នេះ​មិន​អាច​ស្វែងរក​​ការពិត​​នៃ​រឿង​អាស្រូវ​​ផ្លូវភេទ​នៅ​ក្នុង​រដ្ឋសភា​របស់​លោក យ៉ែម បុញ្ញឫទ្ធិ ​តំណាងរាស្រ្ត​គណបក្ស​ប្រឆាំង​ដែល​ត្រូវ​បាន​ចោទប្រកាន់​ដោយ​​គណនី​ហ្វេសប៊ុក​ឈ្មោះ សីហា នាពេល​ថ្មីៗ​នេះ​បាន​ទេ​ ខណៈ​គ្មាន​អ្នក​បំភ្លឺ ប៉ុន្តែ​ថា​ករណី​នេះ​នៅ​តែ​ស៊ើបអង្កេត​ដើម្បី​ចង់​ដឹង​ការ​ពិត​។

ថ្លែង​ប្រាប់​ភ្នំពេញ​ប៉ុស្តិ៍​កាលពី​ម្សិលមិញ​អ្នក​នាំពាក្យ​រដ្ឋសភា លោក ឡេង ប៉េងឡុង បាន​អះអាង​ថា​ការ​ចោទប្រកាន់​​​ទៅ​លើ​​តំណាងរាស្រ្ត​គណបក្ស​សង្គ្រោះ​ជាតិ​លោក យ៉ែម បុញ្ញឫទ្ធិ ថា​មាន​រឿង​អាស្រូវ​​ផ្លូវភេទ​នៅក្នុង​រដ្ឋសភា​នោះ ការពិត​​នៃ​​ករណី​នេះ​​មិន​ត្រូវ​បាន​រកឃើញ​ទេ​ហើយ​​​រឿង​នេះ​​​ត្រូវ​បាន​​បង្ហោះ​ដោយ​​​គណនី​ហ្វេសប៊ុក សីហា ដែល​មិន​បាន​បង្ហាញ​អត្តសញ្ញាណ​​ច្បាស់លាស់​។

លោក ប៉េង ឡុង បាន​បន្ថែម​ថា​សកម្មភាព​នេះ​គឺ​មិនមែន​ថា​មិន​ខុស​ច្បាប់​នោះ​ទេ តែ​លុះត្រា​តែ​មាន​ភាគី​ណា​មួយ​​ដាក់​ពាក្យ​បណ្ដឹង​ប្តឹង​ទៅ​លើ​ភាគី​ម្ខាង​ទៀត​។

លោក ឡេង ប៉េងឡុង បាន​ថ្លែង​បន្ត​ថា​៖ «​​គ្មាន​អ្វី​ទេ​។ ​វា​ត្រូវ​បាន​ចេញ​ផ្សាយ​អនាមិក​ដូចនេះ​យើង​មិន​ដឹង​ថា​ធ្វើ​ដូចម្តេច​។ រឿង​បែប​នេះ​​គឺជា​រឿង​​ដែល​ត្រូវ​បាន​លាក់បាំង​ ​បើ​ទោះបី​ជា​យើង​ដឹង [យើង​]​ មិន​មាន​ច្បាប់​ណា​មួយ​​ហាមប្រាម​ពួកគេ​ទេ​»។

លោក​បាន​បន្ថែម​ថា​មិនមាន​ច្បាប់​ណា​មួយ​ចោទ​ពួកគេ​ទេ ប៉ុន្តែ​រដ្ឋសភា​នឹង​រៀបចំ​ពិធី​មួយ​នៅ​ជិត​ចូលឆ្នាំ​ខ្មែរ​ដើម្បី​កម្ចាត់​រឿង​អាក្រក់​ពី​ក្នុង​រដ្ឋសភា។

លោក ឡេង ប៉េងឡុង បាន​បញ្ជាក់​ថា៖ «ខ្ញុំ​នៅ​តែ​ស៊ើបអង្កេត គ្រាន់​តែ​ចង់​ដឹង ប៉ុន្តែ​គ្មាន​នរណា​ម្នាក់​អាច​បំភ្លឺ​រឿង​នេះ​ដល់​យើង»។ លោក​បន្ថែម​ថា​ទំព័រ​ហ្វេសប៊ុក​របស់ សីហា ឥឡូវ​នេះ​កំពុង​បង្ហោះ​រឿង​អាស្រូវ​របស់​តំណាងរាស្រ្ត​គណបក្ស​សង្គ្រោះ​ជាតិ​មួយ​ទៀត​គឺ​លោក ហូរ វ៉ាន់។

លោក យ៉ែម បុញ្ញឫទ្ធិ ដែល​រង​ការ​ទម្លាយ​រឿង​អាស្រូវ​នេះ​មិន​អាច​ទាក់ទង​សុំ​អត្ថាធិប្បាយ​បាន​ទេ​កាលពី​ម្សិលមិញ។

ទន្ទឹម​នឹង​នេះ​ដែរ​កាលពី​ម្សិលមិញ​គណនី​ហ្វេសប៊ុក​របស់ សីហា ដដែល​ក៏​បាន​បង្ហោះ​រឿង​អាស្រូវ​ស្រដៀង​គ្នា​ពី​លោក ហូរ វ៉ាន់ ដែល​ជា​សមាជិក​តំណាងរាស្ត្រ​មកពី​គណបក្ស​សង្គ្រោះជាតិ​ផង​ដែរ ពាក់ព័ន្ធ​នឹង​រឿង​ស្នេហា​ជាមួយ​ស្រី​ក្មេង​ម្នាក់​មាន​ស្រុក​កំណើត​នៅ​ខេត្ត​កំពង់ស្ពឺ និង​បាន​បង្ហោះ​ទាំង​សំឡេង​ដែល​គេ​សង្ស័យ​ថា​ជា​សំឡេង​របស់​លោក ហូរ វ៉ាន់ ក្នុង​ពេល​កំពុង​សាសង​ជាមួយ​ស្រី​ក្មេង​នោះ​នៅ​ក្នុង​ន័យ​ស្នេហា​ជាមួយ​នាង។

នៅ​ពេល​ទាក់ទង​កាលពី​ម្សិលមិញ​លោក ហូរ វ៉ាន់ បាន​បដិសេធ​មិន​ធ្វើ​អត្ថាធិប្បាយ​ចំពោះ​ការ​ចោទប្រកាន់​នេះ​ទេ ប៉ុន្តែ​លោក​បាន​ថ្លែង​ថា​ប្រសិន​បើ​នរណា​ចង់​ដឹង​ការ​ពិត​គាត់​គួរ​សួរ​ទៅ​កាន់ សីហា ផ្ទាល់​ដែល​បាន​ចោទ​ប្រកាន់​មក​លើ​រូប​លោក។

លោក ហូរ វ៉ាន់ បាន​បញ្ជាក់​ថា៖ «ដូច​ដែល​អ្នក​ធ្លាប់​បាន​ដឹង​ហើយ ពេល​នេះ ឲ្យ​តែ​ជិត​ដល់​រដូវ​នេះ [រដូវ​ជិត​បោះឆ្នោត] ពួកគេ​តែងតែ​មាន​លេស​ដូចនេះ​ដូចនោះ»៕ PS

អត្ថបទគួរចាប់អារម្មណ៍