.jpg)
កម្មករចេញពីធ្វើការនៅរោងចក្រមួយនៅភ្នំពេញកាលពីថ្ងៃទី ១៧ តុលា។ រូប សហការី
ភ្នំពេញៈ រោងចក្រចំនួន ៧៩ ដែលស្ថិតនៅក្នុងរាជធានីភ្នំពេញ ខេត្តកំពង់ស្ពឺ និងខេត្តកណ្តាលបានរងផលប៉ះពាល់ដោយសារជំនន់ទឹកភ្លៀងក្នុងនោះរោងចក្រប្រមាណ ៤០ បានផ្អាកចង្វាក់ផលិតកម្មបណ្តោះអាសន្ន។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានប្រាប់ ភ្នំពេញ ប៉ុស្តិ៍ ម្សិលមិញថា រោងចក្រទាំង ៧៩ ដែលរងផលប៉ះពាល់ដោយទឹកជំនន់នេះ និងជះឥទ្ធិពលដល់កម្មករនិយោជិតប្រមាណជាង ៤ ម៉ឺននាក់។ លោកថ្លែងថា៖ «រោងចក្រដែលប៉ះពាល់ទាំងនេះនឹងវិវឌ្ឍទៅជាល្អប្រសើរវិញ ហើយនឹងមានចំនួនរោងចក្រកាន់តែតិចទៅៗ (លែងលិចទឹក) នៅថ្ងៃចន្ទ»។
គិតត្រឹមថ្ងៃទី ១៧ ខែតុលា រោងចក្រចំនួន ៦២ នៅភ្នំពេញ ១៣ នៅខេត្តកណ្តាល និង ៤ ទីតាំងនៅខេត្តកំពង់ស្ពឺបានប៉ះពាល់ដោយសារជំនន់ទឹកភ្លៀង។ លោក សួរ បញ្ជាក់ថា៖ «រោងចក្រប្រមាណជា ៤០ ទីតាំងរងការប៉ះពាល់ធ្ងន់ធ្ងរដែលធ្វើឱ្យមានការផ្អាកដំណើរការផលិតបណ្ដោះអាសន្ន ប៉ុន្តែជាង ៣០ កន្លែងផ្សេងទៀតនៅបន្តដំណើរការធម្មតា»។
លោក ចឹក បូរិន្ទ ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តកំពង់ស្ពឺ ប្រាប់ភ្នំពេញប៉ុស្តិ៍ម្សិលមិញថា រោងចក្រចំនួន ៤ ទីតាំងដែលមានទឹកជំនន់ឡើងដល់បរិវេណរោងចក្រ ប៉ុន្តែមិនបានប៉ះពាល់ដល់ចង្វាក់ផលិតកម្មទេ ហើយកម្មករនៅតែបន្តធ្វើការជាធម្មតា។
លោកប្រាប់ថា៖ «មន្ទីរនៅបន្តធ្វើការតាមដានជាប់ជាប្រចាំទាំងរោងចក្រ និងកម្មករដោយកន្លែងណាដែលកម្មករជួបបញ្ហា យើងជួយសម្របសម្រួលដល់ពួកគាត់ដូចជាកម្មករធ្វើដំណើរជួបនឹងការដាច់ផ្លូវ ឬយឺតយ៉ាវក្នុងម៉ោងការងារ យើងសម្របសម្រួលជូនពួកគាត់ទាំងអស់គ្នាជាមួយនឹងម្ចាស់រោងចក្រ»។
បើតាមលោក បូរិន្ទ មន្ទីរការងារបានសហការជាមួយនឹងសហជីព និងរោងចក្រដើម្បីធ្វើការសម្របសម្រួលទៅដល់រោងចក្រក្នុងការផ្តល់ភាពងាយស្រួលសម្រាប់កម្មករក្នុងករណីពួកគាត់មានបញ្ហាក្នុងការធ្វើដំណើរ។ ក្នុងខេត្តកំពង់ស្ពឺមានរោងចក្រចំនួន ១៤៥ រោងចក្រដែលនៅមានដំណើរការហើយមានរោងចក្រតែ ៩ ប៉ុណ្ណោះដែលបានព្យួរការងារកម្មករដោយសារការប៉ះពាល់ពីជំងឺកូវីដ១៩ និងមានកម្មករប្រមាណ ២០០០ នាក់បានប៉ះពាល់ពីការព្យួរនេះ។
លោក កាំង ម៉ូនីកា អគ្គលេខាធិការងនៃសមាគមរោងចក្រកាត់ដេរនៅកម្ពុជា (GMAC) ប្រាប់ភ្នំពេញប៉ុស្តិ៍ម្សិលមិញថា វាជារឿងអកុសលមែនទែនដែលទឹកជំនន់កើតមានឡើងនៅក្នុងប្រទេសកម្ពុជានៅផ្នែកខ្លះ ដែលធ្វើឱ្យប៉ះពាល់ដល់រោងចក្រដែលជាសមាជិករបស់ GMAC ដែលភាគច្រើនបានរងនូវផលប៉ះពាល់ពីការដកផ្នែកខ្លះនៃប្រព័ន្ធអនុគ្រោះពន្ធ EBA និងការធ្លាក់ចុះ ឬការបាត់បង់នៃការបញ្ជាទិញដោយសារការរីករាលដាលនៃជំងឺកូវីដ ១៩។
លោកថ្លែងថា៖ «ជាការពិតទឹកជំនន់នេះបានធ្វើឱ្យខូចខាតដល់ទ្រព្យសម្បត្តិរបស់រោងចក្រ ហើយវាក៏បានបង្អាក់ដល់ដំណើរការផលិតកម្មរបស់រោងចក្រដែរ។ យើងដឹងហើយថា នៅពេលដែលមានការអាក់ខានក្នុងការផលិតធ្វើឱ្យការផ្គត់ផ្គង់ទំនិញទៅដល់អ្នកបញ្ជាទិញនឹងមានការយឺតយ៉ាវ ហើយលក្ខខណ្ឌនៃការផ្គត់ផ្គង់ទំនិញនឹងមានការពិន័យបើសិនជាមានការយឺតយ៉ាវក្នុងការផ្គត់ផ្គង់ទំនិញមិនបានទាន់ពេលវេលាតាមការសន្យា»។
លោក ម៉ូនីកា បន្ថែមថា នេះគឺជាវិបត្តិជាន់លើវិបត្តិសម្រាប់រោងចក្រនៅកម្ពុជា ហើយចំពោះរោងចក្រដែលរងផលប៉ះពាល់ពីទឹកជំនន់នេះ ទោះបីជាទឹកស្រកវិញហើយក៏ដោយ តែរោងចក្រមិនទាន់អាចចាប់ផ្តើមដំណើរវិញភា្លមៗបានទេពីព្រោះត្រូវការសម្អាតពិនិត្យមើលទៅលើម៉ាស៊ីន និងឧបករណ៍ផ្សេងៗទៀតដែលបានប៉ះពាល់។
លោកប្រាប់ថា៖ «ក្នុងករណីដែលយើងមិនអាចបន្តដំណើរការផលិតកម្មបានដោយកត្តាខាងក្នុង និងខាងក្រៅរោងចក្រផង ដូចនេះសំណើពីខាងសមាគមដល់រាជរដ្ឋាភិបាល ជាពិសេសក្រសួងការងារគឺស្នើសុំការអនុញ្ញាតជាពិសេសនូវការព្យួរការងារគួរតែផ្តល់ការអនុញ្ញាតឱ្យបានលឿន។ ការអនុញ្ញាតជាពិសេសនោះគឺថា អាចមិនចាំបាច់ដើរតាមនីតិវិធីគ្រប់ជ្រុងជ្រោយដូចច្បាប់តម្រូវព្រោះវានឹងចំណាយពេលយូរ»។
លោក ម៉ាន់ សេងហាក់ អនុប្រធានសហព័ន្ធសហជីពសេរីកម្មករបានថ្លែងថា សម្រាប់កម្មករ និងសហជីពរបស់លោកនៅតាមមូលដ្ឋានមិនមានការប៉ះពាល់ដោយជំនន់ទឹកភ្លៀងនេះទេ ប៉ុន្តែលោកបានស្នើសុំឱ្យម្ចាស់រោងចក្រ និងអាជ្ញាធរដែនដីជួយចាត់វិធានការឱ្យទាន់ពេលវេលាទៅដល់កម្មករដែលរងនូវការប៉ះពាល់ដោយទឹកជំនន់នេះ។
លោកថ្លែងថា៖ «សហជីពរបស់ខ្ញុំនៅតែបន្តទាក់ទងតាមដានព័ត៌មាននៅគ្រប់សហជីពមូលដ្ឋាន និងឱ្យពួកគាត់ប្រុងប្រយ័ត្នខ្ពស់ចៀសវាងកើតមាននូវហានិភ័យខ្ពស់ដល់ពួកគាត់»។
កាលពីសប្តាហ៍មុនក្រសួងការងារបានធ្វើការណែនាំទៅដល់ម្ចាស់រោងចក្រ សហគ្រាស និងកម្មករនិយោជិត ដែលស្ថិតនៅតំបន់អាចរងគ្រោះដោយជំនន់ទឹកភ្លៀង ត្រូវតាមដានជាប្រចាំនូវការព្យាករឧតុនិយម និងត្រៀមគោលការណ៍ណែនាំអំពីសុវត្ថិភាព និងវិធីសាស្ត្រជម្លៀសខ្លួន នៅពេលមានទឹកលិច។ ត្រូវយកចិត្តទុកដាក់ខ្ពស់ចំពោះទីកន្លែង ដែលមានស្តុកទុកសារធាតុគីមី និងត្រូវបិទធុងរក្សាសារធាតុគីមីឱ្យបានជិតល្អ ដើម្បីចៀសវាងការលេចធ្លាយប៉ះពាល់ដល់សុខភាពរបស់កម្មករ និងប្រជាពលរដ្ឋ។
ជាមួយគ្នានេះក្រសួងក៏បានណែនាំទៅដល់កម្មករត្រូវគោរពតាមការណែនាំ សហការជាមួយនិយោជកក្នុងការបង្ការទប់ស្កាត់ការហូរចូលនៃជំនន់ទឹកភ្លៀង និងត្រូវនៅឱ្យឆ្ងាយពីប្រភព ឬខ្សែភ្លើងដែលចម្លងចរន្តអគ្គិសនី៕
