.jpg)
កម្មករ-កម្មការនីស្នាក់នៅបន្ទប់ជួលស្ថិតនៅតំបន់ក្រហម ដែលត្រូវបានបិទខ្ទប់នាពេលកន្លងមក។ រូបថត រ៉ាស់ហ៊ីម
ភ្នំពេញ៖ រោងចក្រចំនួន ៩៥ ដែលមានទីតាំងនៅក្នុងតំបន់លឿង ដែលរាជរដ្ឋាភិបាលបានអនុញ្ញាតឲ្យមានអាជីវកម្ម ត្រូវបានបើកដំណើរឡើងវិញ ប្រមាណជាមួយអាទិត្យមកហើយ ប៉ុន្ដែកម្មករភាគច្រើនមិនទាន់អាចត្រឡប់ចូលមកធ្វើការបាននៅឡើយ ដោយហេតុកំពុងជាប់គាំងក្នុងតំបន់ក្រហម និងតំបន់លឿងទុំ។
យោងតាម លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ ថ្លែងនៅក្នុងទូរទស្សន៍ជាតិកម្ពុជានៅក្នុងវេទិកាពិសេស ស្តីពីសកម្មភាព និងលទ្ធផលនៃការអនុវត្តរបស់ក្រសួងស្ថាប័នពាក់ព័ន្ធការទប់ស្កាត់ការឆ្លងរាលដាលនៃជំងឺកូវីដ ១៩ ក្នុងប្រទេសនៅថ្ងៃទី ៣ ខែឧសភា។
លោក ហេង សួរ ថ្លែងថា៖ «រោងចក្រនៅក្នុងនេះ (តំបន់លឿង) គឺមានតែ ៩៥ រោងចក្រ ដែលបានបើកដំណើរការឡើងវិញ។ ចំនួនកម្មករនិយោជិកបានប្រហែល ៣០ ភាគរយនៃចំនួនកម្មករនិយោជិតសរុប ឬស្មើនឹង ១ ម៉ឺន ៥ ពាន់នាក់ ដែលអាចវិលត្រឡប់មកធ្វើការវិញក្នុងរោងចក្រ»។
លោក ហេង សួរ ថ្លែងថា៖ «ទោះបីយើងបានបើកដំណើរការរោងចក្រ ក៏ប៉ុន្តែចំនួនបងប្អូនកម្មករ ដែលអាចទៅបំពេញការងារបាន គឺមិនទាន់បានពេញលេញនៅឡើយទេ»។
ទោះជាយ៉ាងណាក៏ដោយលោក ហេង សួរ បានអះអាងថា នេះក៏ជាចំណុចល្អមួយដែរ ដែលវាជាការចាប់ផ្តើមឡើងវិញនូវសកម្មភាពអាជីវកម្ម ក្នុងបរិបទមួយដែលកំពុងមានការផ្ទុះជំងឺកូវីដ ១៩ ដូច្នេះកម្មករក្នុងចំណោម ៣០ ទៅ ៥០ ភាគរយនេះ វាអាចជួយរក្សាបាននូវវិធានការសុខាភិបាល ដើម្បីកាត់បន្ថយនៃលទ្ធភាពឆ្លងរីករាលដាល។
កម្មករដែលមិនអាចវិលត្រឡប់មកធ្វើការជាធម្មតាវិញបានទាំងអស់ ព្រោះពួកគេបានបន្តស្នាក់នៅផ្ទះជួល ដែលកំពុងស្ថិតក្នុងតំបន់ក្រហម និងតំបន់លឿងទុំ ដោយមិនអាចចេញធ្វើចរាចរណ៍បាន ខណៈកម្មករមួយចំនួនដែលមានលំនៅឋានជាប់រាជធានីភ្នំពេញ ក៏មិនអាចវិលត្រឡប់ចូលមកធ្វើការនៅរោងចក្រ ដែលបានបើកដំណើរក្នុងពេលនេះផងដែរ។
លោក អាត់ ធន់ ប្រធានសហភាពការងារកម្ពុជាបានលើកឡើងថា ក្នុងដំណាក់កាលនេះ គឺគ្មានមធ្យោបាយអ្វីល្អជាងនេះនោះទេ ដែលក្រសួងត្រូវតម្រូវឲ្យរោងចក្រមួយចំនួនត្រូវតែបើកដំណើរការ ដើម្បីបន្តសង្វាក់ផលិតកម្មឡើងវិញ ជាមួយនឹងចំនួនកម្មករដែលអាចគ្រប់គ្រងបាន ក្នុងការបញ្ចៀសការឆ្លងរីករាលដាល។
លោក ធន់ ថ្លែងថា៖ «បើសិនជារដ្ឋាភិបាល បើកដំណើរការភ្នំពេញវិញ ហើយបិទចរាចរណ៍តែតំបន់ណា ដែលមានបញ្ហាក៏ជាការដែលល្អដែរ ដើម្បីឲ្យអ្នកដែលមិនពាក់ព័ន្ធនេះ អាចដំណើរការ និងដោះស្រាយសេដ្ឋកិច្ចជីវភាព និងការរស់នៅរបស់ខ្លួនបានល្អប្រសើរ»។
អ្នកនាំពាក្យក្រសួងការងារបានបញ្ជាក់ថា ចាប់តាំងពីមានការឆ្លងរីករាលដាលជំងឺកូវីដ ១៩ ចូលទៅក្នុងតំបន់រោងចក្ររហូតមកដល់ថ្ងៃទី ២៨ មេសា មានរោងចក្រជាង ២០០ កន្លែង បានបិទទ្វារជាបណ្តោះអាសន្ន ក្នុងនោះមានកម្មករ ១ ៦៧៣ នាក់ មានផ្ទុកជំងឺ និងកម្មករជាង ១ ម៉ឺននាក់ កំពុងធ្វើចត្តាឡីស័ក៕
