.jpg)
លោកយន្ត មីន (ស្ដាំ) និងមន្ត្រីពេលចុះពិនិត្យរោងចក្របំប្លែងសំណល់។ សហការី
ព្រះសីហនុ: អភិបាលខេត្តព្រះសីហនុលោក យន្ត មីន កាលពីថ្ងៃទី ១៧ ខែ មិថុនា បានព្រមានបិទរោងចក្របំប្លែងកាកសំណល់ផេះធ្យូងថ្មមួយឈ្មោះ «ស៊ីម៉ាវ» ដែលស្ថិតនៅក្រុមទី៤ ភូមិ ២ ឃុំអូរត្រះ ស្រុកស្ទឹងហាវ បន្ទាប់ពីមានពលរដ្ឋជាង ៤០ គ្រួសារបានប្ដឹង ដោយសារបារម្ភពីបញ្ហាសុខភាពបង្កដោយធូលីចេញពីរោងចក្រនោះ ប៉ុន្តែតំណាងរោងចក្រសន្យាកែលម្អឡើងវិញ។
លោក យន្ត មីន ដែលបានដឹកនាំមន្ត្រីពីស្ថាប័នជំនាញចុះពិនិត្យទីតាំងរោងចក្របំប្លែងកាកសំណល់នោះបានលើកឡើងថា រោងចក្រនេះមានច្បាប់អនុញ្ញាតត្រឹមត្រូវពីក្រសួងឧស្សាហកម្ម និងសិប្បកម្ម ប៉ុន្តែបច្ចុប្បន្នមានផលប៉ះពាល់ដល់ពលរដ្ឋដែលរស់នៅជុំវិញនោះ ព្រមទាំងប៉ះពាល់ដល់បរិស្ថានផងដែរ។
លោកបានបន្តថា ជាដំណោះស្រាយក្រុមការងារបានឯកភាពឲ្យតំណាងរោងចក្រនេះកែលម្អលក្ខណ:បច្ចេកទេសដើម្បីកុំឲ្យហុយផេះមកលើផ្ទះរបស់ពលរដ្ឋបន្តទៀត កាត់បន្ថយផលប៉ះពាល់ និងការពារបរិស្ថានឲ្យបានល្អ។
លោក យន្ត មីន បានបញ្ជាក់ថា៖ «ការងារនេះ រដ្ឋបាលខេត្តព្រះសីហនុបានទុករយ:ពេល ២ ឬ ៣ ខែបន្តទៀតដើម្បីឲ្យម្ចាស់កែលម្អរោងចក្ររបស់ខ្លួន ប៉ុន្ដែប្រសិនបើមិនបានអនុវត្តតាមការណែនាំរបស់ក្រុមការងារទេយើងនឹងបញ្ឈប់ដំណើរការឬតម្រូវឲ្យក្រុមហ៊ុនរកទីតាំងថ្មីដែលនៅឆ្ងាយពីផ្ទះរបស់ពលរដ្ឋកំពុងរស់នៅ»។
លោកបន្ថែមថា៖ «ប្រសិនបើម្ចាស់រោងចក្របំប្លែងធ្យូងថ្មនេះ គាត់កែលម្អរោងចក្រឲ្យមានបរិស្ថានបានល្អ រដ្ឋបាលខេត្ត នឹងឲ្យគាត់បន្តអាជីវកម្មព្រោះដំណោះស្រាយគឺយើងធ្វើដើម្បីឈ្នះ ឈ្នះ ទាំងអស់គ្នា។ មានន័យថា អ្នកវិនិយោគក៏ទទួលបានផលប្រយោជន៍ ប្រជាពលរដ្ឋក៏ទទួលបានការងារពីការធ្វើវិនិយោគ ព្រោះក្រុមហ៊ុនក៏បានបង់ពន្ធចូលថវិកា រដ្ឋ ហើយប្រជាពលរដ្ឋក៏មានការងារធ្វើទទួលបានផលប្រយោជន៍ឲ្យគ្នាទៅវិញទៅមកដែរ»។
លោកបានពន្យល់ថា ផេះដែលយកចេញមកពីរោងចក្រអគ្គិសនីធ្យូងថ្ម គឺយកមកបំប្លែងនៅរោងចក្រនេះដើម្បីកែច្នៃជាប្រយោជន៍សម្រាប់ផ្គត់ផ្គង់ឲ្យរោងចក្រក្រឡុកបេតុងឬក្រឡុកស៊ីម៉ងត៍។
លោកបានសុំការយោគយល់ពីពលរដ្ឋបើមិនមានផលប៉ះពាល់ធ្ងន់ធ្ងរទេ ព្រោះពលរដ្ឋក៏ទទួលបានផលប្រយោជន៍ពីការវិនិយោគនេះដែរ។
លោក ខៀវ វុទ្ធី តំណាងពលរដ្ឋទាំង ៤២ គ្រួសារ បានថ្លែងពីម្សិលមិញថា រោងចក្រនេះបានបង្កផលប៉ះពាល់តាំងពីឆ្នាំ ២០១៣ មកក្នុងពេលបើកដំណើរការពីដំបូង ប៉ុន្ដែពលរដ្ឋបាននាំគ្នាតស៊ូទ្រាំរស់នៅក្នុងភូមិកំណើតខ្លួនរហូត ហើយក៏បានសំណូមពរទៅតំណាងរោងចក្រ និងប្ដឹងទៅអាជ្ញាធរឃុំ/ស្រុកជាច្រើនលើកដែរ ប៉ុន្ដែគ្មានប្រសិទ្ធភាព។
លោកបានបន្តថា ដោយសារវេទនាពិបាកស្រូបធូលីផេះដែលហុយពីរោងចក្រនោះ មានអ្នកខ្លះបានផ្លាស់ប្ដូរលំនៅនិងមួយចំនួនទៀតចាប់ផ្ដើមឈឺបណ្ដើរៗ។
មួយរយៈចុងក្រោយនេះ ពលរដ្ឋទ្រាំលែងបានក៏សម្រេចនាំគ្នាដាក់ពាក្យបណ្ដឹងទៅសាលាខេត្តព្រះសីហនុដោយស្នើសុំឲ្យចុះមកពិនិត្យផ្ទាល់។
លោក វុទ្ធី បញ្ជាក់ថា៖ «និយាយរឿងហុយហ្នឹង គឺលែងនិយាយចេញហើយ គឺហុយធូលីផេះចេញពីរោងចក្រស៊ីម៉ាវហ្នឹង រាល់ថ្ងៃតែម្ដង មនុស្សក្មេងៗចាស់ៗគឺឈឺសឹងតែគ្រប់គ្នាហើយខ្ញុំក៏មិនទាន់បានទៅពិនិត្យសុខភាពដែរ។ ហុយលើដំបូលផ្ទះពាងទឹកហុយចូលក្នុងផ្ទះ ពេលហូបបាយក៏ពិបាកដែរ និយាយរួមគឺហុយខ្លាំងតែម្ដង»។
លោក សុខ សុខុម ប្រធានអង្គការស្រាវជ្រាវជាតិកម្ពុជា (CNRO) ដែលតែងតាមដានការអភិវឌ្ឍនៅខេត្តជាប់សមុទ្របានថ្លែងថា លោកក៏បានចូលរួមចុះពិនិត្យទីតាំងនោះផ្ទាល់ដែរហើយបានសង្កេតឃើញថា ពិតជាបង្កការលំបាកដល់ពលរដ្ឋនៅជុំវិញរោងចក្រនោះមែន ព្រោះសកម្មភាពផលិតកម្ម បានបង្កឲ្យមានធូលីហុយលើផ្ទះរបស់ពលរដ្ឋ។
លោកបានបញ្ជាក់ថា៖ «ខ្ញុំសង្ឃឹមលើមន្ត្រីថ្នាក់ជាតិ និងក្រោមជាតិ ជំរុញឲ្យគាត់ដូរទីតាំងថ្មីដែលគ្មានមនុស្សរស់នៅកុំទុកពេលឲ្យគាត់រៀបចំបច្ចេកទេសហ្នឹងយូរខែពេក បើមិនអ៊ីចឹងទេ បញ្ហាប៉ះពាល់ដល់ពលរដ្ឋ គឺនៅតែបន្តប៉ះពាល់ដដែល»។
លោក សាមុត សុធារិទ្ធិ ប្រធានមន្ទីរបរិស្ថានខេត្តព្រះសីហនុ បានថ្លែងកាលពីម្សិលមិញថា រោងចក្រនេះ ត្រូវបានអាជ្ញាធរតម្រូវឲ្យកែប្រែបច្ចេកទេសឡើងវិញ ហើយតំណាងរោងចក្របានយល់ព្រម ដោយសារកន្លងមកបានបង្កផលប៉ះពាល់ពលរដ្ឋក្នុងមូលដ្ឋាន។
លោកបានបញ្ជាក់ថា៖ «យើងឲ្យគាត់រៀបចំបច្ចេកទេសម្ដងទៀត គឺធ្វើយ៉ាងណា កុំឲ្យវាហុយធូលីផេះទៅលើផ្ទះអ្នកភូមិ ព្រោះបង្កឲ្យខូចសុខភាពគាត់ ហើយយើងក៏បានរៀបចំឲ្យមានវេទិកាសាធារណៈជាមួយពលរដ្ឋ ដើម្បីសុំមតិយោបល់ និងសំណូមពរគាត់បន្ថែមទៀតដើម្បីពន្លឿនចាត់វិធានការលើបញ្ហានេះ»។
តំណាងរោងចក្រកែច្នៃកាកសំណល់ធ្យូងថ្ម ស៊ីម៉ាវ មិនអាចស្វែងរកប្រភពទាក់ទងសុំការបញ្ជាក់ពីបញ្ហានេះបានទេ កាលពីម្សិលមិញ។
ប៉ុន្ដែលោក Chen Song អ្នកគ្រប់គ្រងរោងចក្រកែច្នៃកាកសំណល់ធ្យូងថ្ម ស៊ីម៉ាវ ត្រូវបានគេហទំព័រហ្វេសប៊ុករដ្ឋបាលសាលាខេត្តព្រះសីហនុដកស្រង់សម្ដីថា បច្ចុប្បន្នរោងចក្រលោកបានសម្ងួតកាកសំណល់ពីរោងចក្រធ្យូងថ្មដើម្បីយកទៅផ្គត់ផ្គង់ដល់រោងចក្រក្រឡុកស៊ីម៉ងត៍ ដោយក្នុង ១ ថ្ងៃៗមានចំនួន ១០០ តោន។
លោកបានសន្យាថា នឹងកែលម្អបរិស្ថានក្នុងរោងចក្រដោយមិនឲ្យហុយធូលីចេញមកក្រៅទៀតទេ នាថ្ងៃខាងមុខដើម្បីកុំឲ្យប៉ះពាល់ដល់ពលរដ្ឋនៅក្នុងមូលដ្ឋាន។
លោក Chen Song បញ្ជាក់បានថា៖ «យើងនឹងរកវិធានការកាត់បន្ថយ មិនឲ្យមានផលប៉ះពាល់ដល់បរិស្ថាន និងសុខុមាលភាពរបស់ប្រជាពលរដ្ឋយើងដែលមានផ្ទះនៅជុំវិញតំបន់រោងចក្ររបស់ខ្ញុំទៀតទេ នាថ្ងៃអនាគត»៕
