.jpg)
រោងចក្រផលិតកាបូប ត្រូវបានបិទជាបណ្ដោះអាសន្ន ក្រោយពីមានអ្នកវិជ្ជមានកូវីដ ១៩។ រូបថត ហ្វេសប៊ុក
តាកែវ៖ អាជ្ញាធរខេត្តតាកែវសម្រេចបិទរោងចក្រផលិតកាបូប PEEVI INDUSTRY (CAMBODIA) បន្ទាប់ពីរកឃើញអ្នកមានវិជ្ជមានកូវីដ ១៩ ចំនួន ៣ នាក់នៅក្នុងរោងចក្រនេះ។
លោក ម៉ឹង វីរិយ៉ា ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តតាកែវ បានប្រាប់ ភ្នំពេញ ប៉ុស្តិ៍ នៅថ្ងៃទី ២៨ ខែ មេសា ឆ្នាំ ២០២១ នេះថា រោងចក្រផលិតកាបូបមួយនេះ ស្ថិតនៅក្នុងស្រុកបាទី ខេត្តតាកែវ អ្នកវិជ្ជមានកូវីដ ១៩ នោះ គឺជនជាតិចិនចំនួន ២ នាក់ និងជនជាតិខ្មែរ ១ នាក់។ បន្ទាប់ពីបិទនេះភ្លាម ក្រុមការងារបានឱ្យស្វែងរកអ្នកដែលប៉ះពាល់ផ្ទាល់ និងប្រយោលបានចំនួន ៦១ នាក់ ដោយបានយកសំណាកទៅធ្វើតេស្តរកជំងឺកូវីដ ១៩ ប៉ុន្តែរហូតមកដល់ថ្ងៃទី ២៨ ខែមេសា មិនទាន់ចេញលទ្ធផលនោះទេ។
លោក ម៉ឹង វីរិយ៉ា ថ្លែងថា៖ «យើងទើបរកឃើញវិជ្ជមានលើមនុស្សបីនាក់កាលពីម្សិលមិញ (២៧ មេសា) ក្រុមអាជ្ញាធរបានចុះទៅណែនាំក្រុមហ៊ុនក៏សម្រេចបិទបណ្តោះអាសន្ន ដើម្បីអនុញ្ញាតឱ្យមានការបាច់ថ្នាំសម្លាប់មេរោគ រហូតដល់ថ្ងៃចន្ទ ទី ៣ ឧសភា ទើបឱ្យចូលវិញ»។
លោក ម៉ឹង វីរិយ៉ា ថ្លែងដោយសម្តែងការព្រួយបារម្ភចំពោះការរីករាលដាលបន្តទៅកម្មករ-កម្មការិនីផ្សេងទៀត និងអាចចម្លងទៅកាន់ភូមិស្រុកដែលពួកគេរស់នៅ ប៉ុន្តែក្រុមហ៊ុនបានសម្រេចបិទមុនពេលដែលអាជ្ញាធរចុះទៅដល់។
លោកថា ក្រុមការងារកំពុងស្រាវជ្រាវរកកន្លែងស្នាក់នៅ និងឈ្មោះកម្មករ-កម្មការិនីដែលបម្រើការនៅក្នុងរោចក្រចំនួន ៧៦៤ នាក់ ដើម្បីរាយការណ៍ជូនទៅអភិបាលខេត្តនឹងមានវិធានការទាន់ពេលវេលា។
យោងតាមសេចក្តីជូនដំណឹងរបស់រដ្ឋបាលស្រុកបាទី កាលពីថ្ងៃទី ២៧ ខែ មេសា ឆ្នាំ ២០២១ បានអំពាវនាវដល់ប្រជាពលរដ្ឋដែលធ្លាប់ប្រាស្រ័យទាក់ទងជាមួយអ្នកជំងឺកូវីដ ១៩ ទាំង ៣ នាក់នោះ ត្រូវរាយការណ៍ជូនអាជ្ញាធរមូលដ្ឋានជាបន្ទាន់និងរួសរាន់ទៅយកសំណាកនៅតាមទីតាំងដែលបានកំណត់នៅមណ្ឌលសុខភាព និងមន្ទីរពេទ្យបង្អែកស្រុកបាទី ព្រមទាំងត្រូវដាក់ខ្លួនឱ្យនៅដាច់ដោយឡែករយៈពេល ១៤ ថ្ងៃ។
យោងតាមសេចក្តីជូនដំណឹងនេះបានបញ្ជាក់ថា អ្នកមានវិជ្ជមានកូវីដ ១៩ ទាំង ៣ នាក់ គឺជាករណីឆ្លងក្នុងសហគមន៍ ទី១-ឈ្មោះ វុធ សុខេន ភេទស្រី អាយុ ៣០ ឆ្នាំ ទីលំនៅភូមិឃ្លាំងសម្បត្តិ ឃុំពត់សរ ស្រុកបាទី ខេត្តតាកែវ ជាកម្មការិនី ទី២-ឈ្មោះ Huang Hu ភេទប្រុស ជនជាតិចិន អាយុ ៤៨ ឆ្នាំ ស្នាក់នៅក្នុងរោងចក្រ និងទី៣-ឈ្មោះ Wang Guo_Qin ភេទស្រី ជនជាតិចិន អាយុ ៤៦ ឆ្នាំ ស្នាក់នៅរោងចក្រ។
លោក អ៊ូច ភា អភិបាលខេត្តតាកែវបានថ្លែងនៅក្នុងកិច្ចប្រជុំមួយជាមួយអ្នកជំនាញនៅថ្ងៃទី ២៨ ខែមេសា ដោយបានបញ្ជាដល់អាជ្ញាធរពាក់ព័ន្ធទាំងអស់ ត្រូវតែចុះធ្វើការស្រាវជ្រាវចំពោះអ្នកពាក់ព័ន្ធផ្ទាល់ និងប្រយោលទាំងអស់ ដើម្បីយកសំណាកធ្វើតេស្ដ និងយកពួកគាត់មកធ្វើចត្តាឡីស័កឱ្យត្រឹមត្រូវ។
លោក អ៊ូច ភា ថ្លែងថា ប្រសិនបើករណីឆ្លងកូវីដ ១៩ នេះ មានលក្ខណៈធ្ងន់ធ្ងរត្រូវត្រៀមកន្លែងសម្រាប់ធ្វើជាមណ្ឌលចត្តាឡីស័ក ដោយក្នុងនោះត្រូវត្រៀមសាលារៀននៅតាមមូលដ្ឋាន ឬមណ្ឌលចត្តាឡីស័កនៅសាលាគរុកោសលខេត្តដែលមានស្រាប់ ដើម្បីងាយស្រួលគ្រប់គ្រង។ ម្យ៉ាងទៀតអាជ្ញាធរស្រុក ត្រូវសហការដើម្បីចុះបាញ់ថ្នាំសម្លាប់មេរោគនៅអគាររោងចក្រនេះ៕
