The Phnom Penh Post Search

Search form

Logo of Phnom Penh Post newspaper Phnom Penh Post - រោងចក្រ​មួយចំនួន​នៅក្នុង​ខេត្ត​ព្រះសីហនុ​ និង​កំពង់​ស្ពឺ ត្រូវបាន​បិទ​ជា​បណ្ដោះអាសន្ន ​ក្រោយ​រកឃើញ​អ្នក​វិជ្ជមាន​កូ​វីដ​ ១៩

រោងចក្រ​មួយចំនួន​នៅក្នុង​ខេត្ត​ព្រះសីហនុ​ និង​កំពង់​ស្ពឺ ត្រូវបាន​បិទ​ជា​បណ្ដោះអាសន្ន ​ក្រោយ​រកឃើញ​អ្នក​វិជ្ជមាន​កូ​វីដ​ ១៩

Content image - Phnom Penh Post
អាជ្ញាធរ​ខេត្ត​កំពង់​ស្ពឺ​ ចុះ​ណែនាំ​និង​ផ្តល់​អំណោយ​ដល់​ពល​រដ្ឋ​នៅ​ក្នុង​តំបន់​បិទ​ខ្ទប់​​កាលពី​ថ្ងៃ​ទី ២២ ​ខែ​ មេសា​ ឆ្នាំ​២ ០២១។ រូប​ថត រដ្ឋ​បាល​ខេត្ត​កំពង់​ស្ពឺ

រោងចក្រ​មួយចំនួន​នៅក្នុង​ខេត្ត​ព្រះសីហនុ​ និង​កំពង់​ស្ពឺ ត្រូវបាន​បិទ​ជា​បណ្ដោះអាសន្ន ​ក្រោយ​រកឃើញ​អ្នក​វិជ្ជមាន​កូ​វីដ​ ១៩

កំពង់​ស្ពឺ/ព្រះ​សីហនុៈ រោងចក្រ​សហគ្រាស​ ១៤ ​ទីតាំង នៅក្នុង​តំបន់​មួយ​ចំនួន​នៃ​ខេត្ត​ព្រះសីហនុ ​និង​ខេត្តកំពង់ស្ពឺ​ ត្រូវបាន​បិទ​ជា​បណ្ដោះ​អាសន្ន ក្រោយពី​រកឃើញ​អ្នក​វិជ្ជមាន​កូ​វីដ ១៩​ និង​អ្នក​ពាក់​ព័ន្ធ​នៅ​ក្នុង​រោង​ចក្រ។

លោក វ៉ី សំណាង អភិបាល​ខេត្ត​កំពង់​ស្ពឺ បានឱ្យ​ដឹង​នៅ​ថ្ងៃ​ទី ១៦ ខែ ឧ​សភា ឆ្នាំ ២០២១ នេះ​ថា ក្នុង​ខេត្ត​កំពង់ស្ពឺ​រហូតមក​ដល់​​ពេល​នេះ មាន​រោងចក្រ​ចំនួន ៣ កន្លែង​ ត្រូវបាន​ប្រកា​សបិទ​បណ្តោះអាសន្ន និង​រោងចក្រ​ខ្លះទៀត ត្រូវបាន​បិទ​ដោយ​ផ្នែក បណ្ដាលឱ្យ​កម្មករ-កម្ម​រិ​នី ជាង ១ ០០០ នាក់ បាត់បង់​ការងារ។

លោក វ៉ី សំណាង ថ្លែងថា៖ «ការប្រកាស​ផ្អាក​ដំណើរការ​រោងចក្រ​ណាមួយ គឺរោងចក្រ​នោះ​មាន​ការជាប់​ពាក់​ព័ន្ធ​នឹង​ជំងឺ​កូ​វីដ ១៩ និង​មាន​ការឆ្លង​នៅក្នុង​រោងចក្រ​សហគ្រាស​នោះ ប៉ុន្តែ​បើ​រោងចក្រ​ណា​ដែល​មិន​ជាប់​ពាក់ព័ន្ធ គឺ​មិ​នមាន​ការបិទ​នោះទេ»។

លោក វ៉ី សំណាង បាន​ឱ្យ​ដឹង​ថា នៅ​ក្នុង​ខេត្ត​កំពង់​ស្ពឺ ចាប់តាំងពី​មានការ​ផ្ទុះ​ជំងឺ​កូ​វីដ ១៩ រហូតមកដល់​ពាក់កណ្ដាល​ខែឧសភា​ព អាជ្ញាធរ​បាន​រកឃើញ អ្នក​វិជ្ជមាន​កូ​វីដ ១៩ ប្រមាណ ២៦៨ នាក់។

ទោះ​យ៉ាង​ណា​ លោក សំណាង ថ្លែងថា រដ្ឋបាល​ខេត្តក៏បាន​ប្រកា​សបិទ​ជា​បណ្ដោះ​អាសន្ន និង​បើក​ឡើងវិញ​ផង​ដែរ នូវ​មន្ទីរ​សម្រាក​ព្យា​បាល ផ្សារ​និង​ភូមិ​នានា ដែល​រក​ឃើញ​មានការ​ឆ្លង​នូវ​មេរោគ​កូ​វីដ ១៩។

ដោយឡែក​នៅ​ខេត្ត​ព្រះសីហនុ មាន​រោងចក្រ ​១១ ទីតាំង​ ត្រូវបាន​បិទ​ជា​បណ្ដោះអាសន្ន​និង ១៧ ទីតាំង​ កំពុង​ជាប់​ពាក់ព័ន្ធ។ នេះបើ​យោង​តាម លោក ឃាង ភារ​ម្យ អ្នក​នាំពាក្យរដ្ឋបាល​ខេត្ត​ព្រះសីហនុ។

លោក ឃាង ភារ​ម្យ ថ្លែង​ថា៖ «មាន​រោង​ចក្រខ្លះ​ទៀត ​មានការ​ជាប់​​ពាក់​ព័ន្ធ​ដោយ​ផ្នែក ប៉ុន្តែមិនមាន​ការបិទ​រោងចក្រ​ទាំងមូល​នោះទេ ដើម្បី​កុំឱ្យ​មានការ​រាំងស្ទះ​ដល់​ចង្វាក់​ខ្សែ​ផលិតកម្មរបស់​រោង​ចក្រ»។

លោក ឃាង ភារ​ម្យ បាន​ឱ្យ​ដឹង​ថា មន្ត្រី​ជំនាញ​នៃ​មន្ទីរ​ការងារ​និង​បណ្តុះបណ្តាល​វិជ្ជាជីវៈ កំពុង​ធ្វើ​បច្ចុប្បន្នភាព​បញ្ជី​រោងចក្រ​និង​កម្មករ-កម្មការិនី ដែល​បាន​រង​ផល​ប៉ះពាល់។

ចំពោះ​វិធានការក្នុងការ​ទប់​ការរីក​រាលដាល​នៃ​ជំងឺ​កូ​វីដ ១៩ រដ្ឋបាលខេត្តបាន​លុប​តំបន់​ក្រហម ដោយ​បង្រួម​មក​នៅ​ជា​ចំណុច​ក្រហមនៅតាម​ផ្ទះ ឬទី​សំណាក់​របស់អ្នក​ដែលមាន​វិជ្ជមាន​កូ​វីដ ១៩ និង​តំបន់​លឿងទុំ​ក៏បាន​បង្រួម​មក​នៅ​តូច តាម​កម្រិត​នៃ​ការឆ្លង។

រីឯ រដ្ឋបាល​ខេត្ត​តាកែវ នៅ​ថ្ងៃទី​ ១៦ ខែ​ ឧសភា ឆ្នាំ ២០២១ នេះ បាន​សម្រេច​បិទ​បញ្ចប់ និង​ដាក់ឱ្យ​ដំណើរការ​ឡើង​វិញ ចំពោះ​ក្រុមហ៊ុន​រោង​ចក្រ ចំនួន ៤ នៅក្នុង​ស្រុក​បាទី៕

អត្ថបទគួរចាប់អារម្មណ៍